“Sēkope 7: Tui Taʻeueʻia kia Sīsū Kalaisi,” Tohi ʻa Molomoná – Tohi Lēsoni ʻa e Faiakó (2024)
“Sēkope 7,” Tohi ʻa Molomoná – Tohi Lēsoni ʻa e Faiakó
Sēkope–7
Tui Taʻeueʻia kia Sīsū Kalaisi
Kapau ʻokú ke ongoʻi ʻoku ʻi ai ha kakai he ʻahó ni ʻoku nau feinga ke fakatūkiaʻi e tui ʻa e kāingalotu ʻo e Siasi ʻo e Fakamoʻuí, ʻokú ke moʻoni. ʻOku ʻikai ko ha meʻa foʻou ʻeni. ʻI he lotolotonga ʻo e kau Nīfaí, naʻe ʻi ai ha tangata ko hono hingoá ko Seialemi “naʻá ne ngāue faivelenga koeʻuhí ke ne kākaaʻi ʻa e loto ʻo e kakaí” (Sēkope 7:3). ʻE lava ke tokoniʻi koe ʻe he lēsoni ko ʻení ke ke teuteu ke ikunaʻi e ngaahi pole ki hoʻo tui kia Sīsū Kalaisi mo ʻEne ongoongoleleí.
Ko hono tokoniʻi e kau akó ke mahino kiate kinautolu e kakano ʻo e folofolá. Ko e kakano ʻo e folofolá ʻa e talanoá, kakaí, ngaahi meʻa naʻe hokó, ngaahi malangá mo e ngaahi fakamatalá. ʻE lava ke tokoni hono maʻu ha mahino ki he ngaahi meʻa ko ʻení ke fakafehokotaki ai e kau akó mo e niʻihi fakafoʻituitui ʻi he folofolá pea fakamāmaʻi kinautolu ʻe he ngaahi malanga fakalaumālie kuo lekōtí.
Teuteu ʻa e tokotaha akó: Fakaafeʻi e kau akó ke omi mateuteu ki he kalasí ke vahevahe ha sīpinga ʻo ha taha ʻoku tuʻu maʻu ʻi heʻenau tuí ʻi he taimi naʻe fakafepakiʻi ai kinautolu ʻe he niʻihi kehé.
Ngaahi ʻEkitivitī Ako ʻOku Ala Fakahokó
Ko e teuteu ki he ngaahi faingataʻa ʻi he kahaʻú
Kimuʻa pea vahevahe e lea ko ʻení, fakakaukau ke fehuʻi ange, “Mei ha meʻafua ʻo e taha ki he hongofulu, ʻoku mou pehē ko e hā hono faingataʻa ʻo e hoko ko ha ākonga loto-toʻa ʻo Sīsū Kalaisi he ʻaho ní?” Te ke lava ʻo kole ki he kau akó ke puke hake ʻa e lahi ʻo e ʻuluʻulutuhu ʻokú ne fakafofongaʻi ʻenau talí pea kole ki ha niʻihi ʻo kinautolu ke vahevahe ʻa e ʻuhinga ʻo ʻenau talí.
Naʻe vahevahe ʻe Palesiteni Lāsolo M. Nalesoni ʻa e meʻá ni fekauʻaki mo ha pole faingataʻa te tau fehangahangai mo ia:
ʻOku faingataʻa e kahaʻú. ʻE tātātaha ke faingofua pe manakoa he kahaʻú ke te hoko ko ha mēmipa faivelenga ʻo e Siasí. ʻE siviʻi kitautolu taki taha. Naʻe fakatokanga mai ʻa e ʻAposetolo ko Paulá ʻi he ngaahi ʻaho fakaʻosí, ko kinautolu ʻoku muimui faivelenga ki he ʻEikí te nau “ʻilo ʻa e fakatangá” (2 Tīmote 3:12]. ʻE lava ke laiki koe ʻe he fakatanga ko iá ke ke vaivai pe ko haʻane fakaivia koe ke ke hoko ko ha faʻifaʻitakiʻanga lelei mo ke loto-toʻa ange ʻi hoʻo moʻui fakaʻahó. (Russell M. Nelson, “Fehangahangai mo e Kahaʻú ʻi he Tui,” Liahona, Mē 2011, 36.
-
Naʻe fai ʻe Palesiteni Nalesoni ʻa e lea ko ʻení ʻi he 2011. Ko e hā ha ngaahi founga kuó ke ʻosi aʻusia pe mamata ai ki he meʻa naʻá ne fakamatalaʻí?
-
Ko e hā nai ka hōloa ange ai ʻi he kahaʻú ʻa e manakoa ʻo e moʻui faivelenga ki he ongoongolelei ʻo Sīsū Kalaisi kuo fakafoki maí? ʻOkú ke pehē ko e hā ʻoku kei mahuʻinga aí?
-
ʻOkú ke pehē ko e hā ka tomuʻa fakahā mai ai ʻe he ʻEikí kiate kitautolu e ngaahi faingataʻa ko ʻení?
Fakakaukau ʻi ha kiʻi taimi ki he mālohi lolotonga ʻo hoʻo fakamoʻoni ki he ongoongolelei ʻo Sīsū Kalaisí pea mo hoʻo mateuteu ke kei moʻui faivelenga ai pē kiate Ia ʻi he ngaahi ʻaho faingataʻa ka hoko maí. ʻI hoʻo ako ʻa e Sēkope 7, kumi e founga naʻe teuteuʻi ai ʻe Sēkope ia ke ne kei faivelenga ai pē ʻi he taimi naʻe feinga ai ha tangata faiangahala ko Seialemi ke fakaʻauha ʻene tuí.
Ko e malanga fakafepaki ʻa Seialemi kia Kalaisí
Lau ʻa e Sēkope 7:1–7, pe mamata ʻi he vitiō “ʻOku Fakaʻikaiʻi ʻe Seialemi ʻa Kalaisi” mei he taimi 0:33 ki he 2:21. ‘Oku maʻu e vitioó ni ‘i he ChurchofJesusChrist.org. Kumi e meʻa naʻe akoʻi ʻe Seialemi ke ne feinga ke fakavaivaiʻi ai e tui ʻa e kau Nīfaí kia Kalaisí.
-
Ko e hā naʻe akoʻi ʻe Seialemi ke feinga ke fakavaivaiʻi ai e tui ʻa e kau Nīfaí?
-
Ko e hā ha ngaahi founga ʻe ala fakafepakiʻi ai ʻe he kakaí ʻa e tui ʻa e kau ākonga ʻa Kalaisí he ʻahó ni?
Fakaafeʻi e kau akó ke nau fakalaulauloto fakalongolongo ki heni:
Fakalaulauloto pe kuó ke mamata nai ʻi ha taha ʻokú mo feohi ʻoku kamata ke veiveiua ʻene tui kia Sīsū Kalaisi mo ʻEne ongoongolelei kuo fakafoki maí koeʻuhí ko e ivi tākiekina ʻo e niʻihi kehé. Kuó ke fakatokangaʻi nai ha taha ʻokú ne poleʻi hoʻo tui kiate Iá?
He ʻikai lava ke ueʻia e tui ʻa Sēkopé
Fakakaukau ke fakaafe‘i e kau akó ke lau e ngaahi veesi ko ʻení mo ha kulupu tokosiʻi. Hili iá pea fakaafeʻi e kulupu takitaha ke hiki ʻe ha fakafofonga ʻi he palakipoé ʻa e meʻa ne nau ako mei he sīpinga ʻa Sēkopé. Ko ha ngaahi moʻoni ʻeni ʻe ala maʻu ʻe he kau akó: ʻe lava ke tokoniʻi kitautolu ʻe he Laumālié ke tau ʻiloʻi ʻa e meʻa ke fai mo lea ʻaki ʻi he taimi ʻoku poleʻi ai ʻetau tuí, pea ʻe lava ke tau falala ki he ngaahi akonaki ʻa e kau palōfitá ke fakamālohia ʻetau tui kia Kalaisí.
ʻI he lolotonga e vahevahe ʻa e kau akó, fakakaukau ke fakamanatu ange ʻe lava ke teuteuʻi kinautolu ʻe hono ako ʻo e ngaahi potufolofola fakataukei fakatokāteliné mo e ngaahi tefitoʻi moʻoni ki hono maʻu ʻo e ʻilo fakalaumālié ke matuʻuaki e ngaahi pole ʻo ʻenau tui kia Sīsū Kalaisí.
Lau ʻa e Sēkope 7:5, 8–12, ʻo kumi e meʻa naʻe tokoni kia Sēkope ke fakafisingaʻi ai e ngaahi akonaki ʻa Seialemí.
Ko e tefitoʻi moʻoni ʻe taha te tau lava ʻo ako mei he veesi 5, te tau lava ʻo ikunaʻi e ngaahi pole ki heʻetau tui kia Sīsū Kalaisí ʻaki ʻetau manatuʻi e ngaahi aʻusia fakalaumālie he kuohilí naʻá ne fakamālohia ʻetau tuí.
-
Ko e hā ha ngaahi meʻa pau naʻe manatuʻi ʻe Sēkope lolotonga e fehangahangai ko ʻení, naʻe tokoni kiate iá?
-
Ko e hā ka lava ai ʻe heʻetau manatuʻi ʻetau ngaahi aʻusia fakalaumālie he kuohilí ʻo fakamālohia kitautolu ʻi he taimi ʻoku tau fehangahangai ai mo e ngaahi pole ʻo ʻetau tuí?
Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku hanga ʻe he ʻOtuá, fakataha mo e fakahinohino fakanonga ʻoku tau maʻu he taimi ki he taimi mei he Laumālie Māʻoniʻoní, ʻo fakapapauʻi mālohi mo fakataautaha mai ʻokú Ne ʻafioʻi mo ʻofaʻi kitautolu pea ʻokú Ne tāpuekina pau mo tauʻatāina kitautolu. Pea ʻi he ngaahi taimi ʻo ʻetau faingataʻaʻiá, ʻoku fakamanatu mai ʻe he Fakamoʻuí ʻa e ngaahi aʻusiá ni. …
Manatuʻi maʻu pē hoʻo ngaahi manatu melie toputapú. Tui ki ai. Hanga ʻo tohi ia. … ʻOku ou palōmesi atu ʻi hoʻo fakahā loto-fiemālie mo mataʻikoloa ʻaki ʻa e ngaahi meʻa fakalaumālie fakangalongataʻa ʻoku hoko ʻi hoʻo moʻuí, ʻe lahi ange ʻa ʻene hoko mai kiate koé. ʻOku ʻafioʻi mo ʻofa ʻa e Tamai Hēvaní ʻiate koe! (Neil L. Andersen, “Ngaahi Manatu Melie Fakalaumālie Fakangalongataʻá,” Liahona, Mē 2020, 19, 21–22)
Kapau te ke fakaʻaongaʻi e fakakaukau ko ʻení, tuku ha taimi feʻunga ki he kau akó ke nau fakalaulauloto, lotu, mo lekooti ai ʻenau ngaahi ongó mo e ngaahi aʻusiá. Hili iá pea fakaafeʻi ha niʻihi ʻe loto-fiemālie ke vahevahe ha ngaahi aʻusia ʻoku ʻikai fuʻu toputapu. Fakakaukau ke vahevahe ha sīpinga fakataautaha ʻoku ʻikai fuʻu toputapu pe makehe koeʻuhí ke lava he kau akó ʻo fakafekauʻaki mo hoʻo aʻusiá.
Tuku ha taimi ke fakamanatuʻi ai e ngaahi ongo mo e ngaahi aʻusia kuo foaki atu ʻe he ʻOtuá ke fakapapauʻi atu ʻokú Ne ʻafioʻi mo ʻofa ʻiate koé. Hiki hanau niʻihi ʻi hoʻo tohinoa akó pe ʻi hoʻo folofolá. Kapau ʻokú ke fiemaʻu tokoni ʻi hono manatuʻi ʻo e ngaahi aʻusia peheé, kole ki he Tamai Hēvaní ʻi he lotu ke tokoniʻi koe ke ke ʻiloʻi pe manatuʻi ha ngaahi meʻa ʻi hoʻo laka atu ki muʻa he kahaʻú. Te Ne fai ia ʻi he taimi mo e founga pē ʻAʻana.
Mahalo foki te ke fie mamata ʻi he foʻi vitiō “Ngaahi Manatu Melie Fakalaumālie Fakangalongataʻá” mei he taimi 13:40 ki he 14:46. Kumi e founga ʻoku fakahaaʻi ai ʻe he fakatātā ʻa ʻEletā ʻEnitasení ʻa e malava ke hanga ʻe heʻetau ngaahi manatu melie fakalaumālié ʻo fakamaama ʻa e halá maʻatautolu mo e niʻihi kehé fakatouʻosi lolotonga e ngaahi taimi faingataʻá. ʻOku maʻu e vitiō ko ʻení ʻi he ChurchofJesusChrist.org.
Te ke lava ʻo fakaʻaongaʻi e ngaahi fokotuʻu ko ʻení pea ʻoange ki he kau akó ha ngaahi miniti siʻi ke ʻave ha pōpoaki telefoni pe ʻīmeili ki ha taha ʻoku nau ʻofa ai. Mahalo ʻe tokoni ke fakamanatu kiate kinautolu ʻoku ʻi ai ha ngaahi aʻusia toputapu ʻe niʻihi ʻoku totonu ke tauhi fakataautaha.
Fakalaulauloto pe ko hai ʻokú ke ʻiloʻi ʻe lava ke fakamālohia ʻi haʻane fanongo ki ha taha ʻo hoʻo ngaahi aʻusiá. Fakakaukau ke kumi ha founga ke vahevahe ai ia mo kinautolu.
Fakakaukau foki ki he niʻihi ʻoku mou ʻofa aí mo e kau taki ʻo e Siasí ʻa ia ʻe lava ʻe heʻenau tuí mo e ngaahi aʻusiá ʻo fakamālohia hoʻo tuí. Fakakaukau ke ke tokoniʻi kinautolu.
Ko ha fakaʻilonga mei he ʻOtuá
Lau ʻa e Sēkope 7:13–23, pe sio ʻi he vitiō “ʻOku Fakaʻikaiʻi ʻe Seialemi ʻa Kalaisi” mei he taimi 2:22 ki he 7:16, ke ʻilo e meʻa naʻe hoko kia Seialemí.
Fakakaukau ke fakaʻaliʻali e ongo fehuʻi ko ʻení pea fakaʻatā e kau akó ke fakalaulauloto ki ai. Hili iá pea fakaafeʻi ha niʻihi ʻe fiemālie ke vahevahe ʻenau ngaahi talí.
-
ʻOkú ke pehē ko e hā naʻe lekooti ai ʻe Sēkope e fakamatala ko ʻení maʻá e kakai ʻi hotau kuongá?
-
ʻOkú ke pehē ʻe fakaʻaongaʻi fēfē ʻe he Tamai Hēvaní ʻa e meʻa naʻá ke ako he ʻaho ní ʻi ha tūkunga ʻokú ke lolotonga fehangahangai mo ia?