Mosiah 4:9–10

“Tuo sa Dios”

Nakahunong ka na ba sukad aron sa pagpamalandong sa epekto sa imong mga pagtuo sa imong mga binuhatan ug kon kinsa ka mamahimo? Samtang nagtudlo unsa ang kinahanglan natong buhaton aron padayon nga magbaton og kapasayloan sa atong mga sala, si Hari Benjamin mihatag og gibug-aton sa kamahinungdanon sa pagtuo sa Dios. Kini nga leksiyon makatabang kanimo sa paglig-on sa imong pagtuo ug gugma sa Dios.

Pagtudlo sa mga kasulatan ug sa mga pulong sa mga propeta nga adunay pagtuo ug katuyoan.Sa matag oportunidad, dasiga ang imong mga gitudloan nga modangop ngadto sa pulong sa Dios alang sa giya, mga tubag sa mga pangutana, ug suporta. Kon ang mga estudyante “[mag]busog sa mga pulong ni Kristo,” ang mga kamatuoran nga ilahang makaplagan “magtug-an [kanila] sa tanan nga mga butang nga [ilang] buhaton” (2 Nephi 32:3).

Pagpangandam sa estudyante: Dapita ang mga estudyante sa pagtambong sa klase nga adunay lista sa tulo ngadto sa lima ka butang nga ilang gituohan mahitungod sa Dios.

Mga Posibleng Kalihokan sa Pagkat-on

Ang epekto sa atong mga pagtuo

Ang mosunod mao ang pipila ka bakak nga mga ideya nga kaniadto gituohan sa mga tawo nga tinuod. Pamalandongi ang epekto niini nga mga pagtuo sa mga kinabuhi niadto nga mga indibidwal

Ikonsiderar ang pagpakita sa mosunod nga mga pamahayag diha sa pisara.

• Ang kalibotan patag.

• Ang mga baki maghatag kanimo og mga kalunggo.

• Ang mga bituon naglibot tuyok sa kalibotan.

• Unsa nga mga problema ang mahimong moabot gikan sa pagtuo sa bakak nga mga ideya?

• Sa unsang paagi nimo nakita nga ang imong mga gituohan o kadtong sa uban nakaimpluwensiya sa mga kinaiya o mga binuhatan?

• Sa unsang paagi nga ang atong gituohan makaapekto kanato sa espirituhanong paagi?

Tuo sa Dios

Si Hari Benjamin mitudlo sa kamahinungdanon sa pagtuo sa Dios. Sa dili pa sugdan ang imohang pagtuon, paggahin og panahon sa pagpamalandong kon unsay imong gituohan mahitungod sa Dios. Sa unsang paagi nga ang imong mga pagtuo bahin sa Dios nag-impluwensiya sa imong mga binuhatan? Ikonsiderar ang paglista diha sa imong journal sa pagtuon sa pipila niini nga mga pagtuo ug pamalandongi nganong mituo ka sa imong gituohan. Sa tibuok nimong pagtuon, idugang ang bisan unsang mga hunahuna o mga impresyon nga mahimong aduna ka.

Ikonsiderar usab ang pagdrowing sa mosunod nga imahe diha sa pisara ug dapita ang mga estudyante sa pagtabang sa pagpuno sa mga sirkulo og mga pagtulun-an nga gikan sa Mosiah 4:9–10.

Kopyaha ang mosunod nga hulagway diha sa imong journal sa pagtuon. Sa sentro sa lingin, isulat ang tuo sa Dios ug ang Mosiah 4:9–10.

Basaha ang Mosiah 4:9–10, mangita sa nagkalain-laing mga butang nga gidapit ni Hari Benjamin sa iyang katawhan nga tuohan mahitungod sa Dios. Isulat ang matag usa niini sa gawas sa mga lingin. Kon gikinahanglan, mahimo nimong dugangan ang mga lingin sa imong hulagway.

• Sa usa ka yano nga kapahayag [sentence], unsaon nimo pagpamubo ang mga pagtulun-an ni Hari Benjamin diha sa Mosiah 4:9–10? Ikonsiderar ang paggamit sa imong gipamubo nga kapahayag [sentence] isip ulohan sa biswal nga imong gibuhat.

Hatagi ang pipila sa mga estudyante og kahigayonan sa pagpaambit sa ilang mga gipamubo niini nga mga bersikulo ngadto sa klase. Ang posible nga mga kamatuoran nga mahimo nilang mailhan isip kabahin niini nga pagpamubo naglakip sa mosunod: Ang mga propeta sa Ginoo nagdapit kanato sa pagtuo sa Dios.Ang Dios milalang sa tanan nga mga butang ug aduna sa tanan nga gahom ug kaalam. Mapakita nato ang atong pagtuo sa Dios pinaagi sa atong mga buhat.

Ikonsiderar ang pagbahin sa klase ngadto sa gagmay nga mga grupo ug pag-assign sa matag grupo sa pagtutok sa usa o daghan pa sa mga pagtulun-an ni Hari Benjamin gikan sa mga bersikulo 9–10. Mahimong hisgotan sa mga estudyante ang mosunod nga mga pangutana mahitungod sa mga kamatuoran nga gi-assign kanila nga pagatutokan ug dayon ipaambit ang ilang mga tubag ngadto sa klase.

• Sa unsang paagi nga ang pagsabot ug pagtuo niini nga mga pagtulun-an gikan ni Hari Benjamin makaapekto sa imong kinabuhi?

• Sa unsang paagi nimo nakita kini nga mga pagtulun-an nga gisupak o gibaliwala sa kalibotan karon?

Si Presidente Russell M. Nelson mipaambit sa mosunod nga tambag alang niadtong dili segurado kon sila mituo sa Dios:

Kon dili kamo segurado nga nagatuo kamo sa Dios, sugdi dinha. Sabta nga kon wala ang mga kasinatian uban sa Dios, ang tawo posibling magduda nga adunay Dios. Busa, pangita’g paagi nga makabaton kamo og mga kasinatian uban Kaniya. … Hangyoa Siya nga sultihan kamo nga Siya anaa gayud—kon Siya nakaila ba kaha kaninyo. Pangutan-a Siya unsay Iyang gibati bahin kaninyo. Ug dayon, maminaw. (Russell M. Nelson, “Dali, Sunod Kanako,” Liahona, Mayo 2019, 90)

• Unsa nga mga kasinatian ang imong nasinati nga nakapalig-on sa imong pagtuo sa Langitnong Amahan ug ni Jesukristo?

Kon makaayo sa mga estudyante ang dugang nga diskusyon mahitungod sa pagpili nga motuo sa Dios, ikonsiderar ang paggamit sa pamahayag ni Elder L. Whitney Clayton sa seksiyon sa “Komentaryo ug Background nga Impormasyon”.

Pagpasabot of Maayo

Usa ka paagi nga atong mapalig-on ang atong pagtuo ug pagsalig sa Dios mao ang pagkat-on gikan sa dinasig nga mga pagtulun-an ug mga kasinatian sa uban (tan-awa sa Giya ngadto sa mga Kasulatan , “Hugot nga Pagtuo”). Pagpili og bisan usa sa mosunod nga tulo ka mga kalihokan aron sa pagtabang kanimo sa pagpalambo sa imong pagtuo sa Dios:

Ipakita ang mosunod nga tulo ka kapilian ug hatagi ang mga estudyante og igong panahon sa pagkompleto sa usa sa mga kalihokan. Kini nga mga kalihokan mahimong makompleto nga magtinagsa, o ang mga estudyante mahimong mokompleto niini kuyog sa uban kinsa mipili sa pagtutok sa samang kalihokan. Ikonsiderar ang paglakip sa nagkalain-laing mga kalihokan sumala sa mga panginahanglan ug abilidad sa imong mga estudyante.

• Mga Himno: Pangitaa diha sa hymnbook ang mga pulong, hugpong sa mga pulong, mga bersikulo, o tibuok nga mga himno nga nagtudlo mahitungod sa kinaiya ug batasan sa Dios o kanang makapalig-on sa imong pagtuo diha Kaniya.

• Ubang mga asoy sa kasulatan: Pangita ug pagtuon sa mga asoy diha sa mga kasulatan diin ang uban mipamatuod sa ilang mga pagtuo mahitungod sa atong Langitnong Amahan o sa Iyang Anak, si Jesukristo. Ang mga pananglitan sa mga tudling nga mahimo nimong tun-an naglakip sa Alma 26:16, 35–37; 34:8–10; ug Doktrina ug mga Pakigsaad 76:22–24.

  Ikonsiderar ang paghatag sa mga estudyante og bag-ong mga kopya sa edisyon sa kinatibuk-ang komperensiya sa Liahona kon gamiton ang mosunod nga kapilian. Mahimo usab nga gamiton sa mga estudyante ang Gospel Library app.

• Kinatibuk-ang komperensiya: Gamit ang bag-ong mga pakigpulong sa kinatibuk-ang komperensiya, pangitaa ang mga pulong, hugpong sa mga pulong, mga asoy, o mga istorya nga nagtudlo mahitungod sa Langitnong Amahan ug ni Jesukristo ug naglig-on sa imong pagtuo diha Kanila. (Ikonsiderar ang pagsiksik sa mga pakigpulong sa kinatibuk-ang komperensiya pinaagi sa mga hilisgotan sama sa “Langitnong Amahan,” “Dios nga Kapangulohan,” o “Jesukristo.”)

Hatagi ang pipila sa mga estudyante og kahigayonan sa pagpaambit sa ilang nakat-onan o gibati gikan sa ilang mga pagtuon.

Human sa pagdapit sa mga estudyante sa pagpaambit sa ilang mga panabot, ikonsiderar ang paghatag kanila og gagmay nga mga piraso sa papel, ug dapita ang mga estudyante nga buot mosulat og usa ka butang nga ilang gituohan mahitungod sa Dios. Kini nga mga pamahayag sa pagtuo mahimong i-post sa classroom sa sunod semana aron makita ug mapamalandongan sa uban.

Imong sunod nga mga lakang

Bisan kon ikaw adunay lig-on nga pagtuo sa Dios o naningkamot sa pagtino kon unsa ang imong gituohan, adunay mga butang nga ang matag usa kanato makahimo sa pagpalig-on sa atong pagtuo ug gugma alang sa Dios. Paggahin og panahon sa pagpamalandong sa imong gibati nga imong sunod nga lakang mao ang pag-ila og maayo sa Dios. Irekord ang imong mga hunahuna ug mga impresyon diha sa imong journal sa pagtuon.

Ikonsiderar ang pagtapos sa leksiyon pinaagi sa pagpaambit sa imong pagpamatuod sa Dios. Dasiga ang mga estudyante sa paglihok sa mga impresyon nga ilang gibati karon.

Komentaryo ug Background nga Impormasyon

Sayop ba nga “motuo” lamang kon dili pa kita komportable nga moingon nga “Ako Nasayod”?

Si Elder Jeffrey R. Holland sa Korum sa Napulog Duha ka Apostoles mitudlo:

Usa ka 14 anyos nga batan-on miingon nako nga medyo nagduha-duha, “Brother Holland, dili pa ko makasulti nga ako nasayud nga ang Simbahan tinuod, apan mituo ko nga kini tinuod.” Gigakos nako og hugot kaayo ang maong batan-on. Giingnan nako siya uban sa tanang kainit sa akong kalag nga ang pagtuo usa ka bililhon nga pulong, gani mas bililhon nga buhat, ug dili kinahanglan nga siya mangayog pasaylo tungod kay “mituo lamang.” Siya akong giingnan nga si Kristo Mismo miingon, “Ayaw kahadlok, sumalig ka lamang,” [Mark 5:36], usa ka pulong nga, nakapamisyon sa batan-ong Gordon B. Hinckley. Giingnan nako kining batan-on nga ang pagsalig mao ang unang lakang ngadto sa pagtuo ug nga ang mga artikulo sa hugot nga pagtuo sa atong tinuohan mihatag og gibug-aton sa pulong nga, “Kami nagtuo.” Giingnan nako siya nga mapasigarbohon kaayo ko niya sa katinuod sa iyang paningkamot. (Jeffrey R. Holland, “Nagatuo Ako,” Liahona, Mayo 2013, 94–95)

Unsa ang tahas sa mga ordinansa sa ebanghelyo sa atong padayon nga pagbaton og kapasayloan sa atong mga sala?

Si Elder L. Whitney Clayton, emeritus sa General Authority Seventy, mipaambit sa mosunod:

Ang mga propeta sa kasaysayan nagdasig kanato ug gani naghangyo kanato nga motuo ni Kristo. Ang ilang pagdasig nagpakita sa sukaranang kamatuoran: Dili kita pugson sa Dios nga motuo. Hinoon Siya nagdapit nato nga motuo pinaagi sa pagpadala og buhing mga propeta ug mga apostoles sa pagtudlo nato, pinaagi sa mga kasulatan, ug pag-agni nato pinaagi sa Iyang Espiritu. Kita gyod ang angay mopili nga mohangop niana nga espirituhanong mga pagdapit, mopili gamit atong balatian sa espirituhanong kahayag diin Siya nagtawag kanato. Ang desisyon nga motuo mao ang pinakaimportanting pagpili nga atong himoon. Kini naghulma sa tanan natong desisyon. (L. Whitney Clayton, “Pagpili nga Motuo,” Liahona, Mayo 2015, 38)

Unsaon nako pagtabang ang uban kinsa wala motuo ni Jesukristo?

Si Elder Neil L. Andersen sa Korum sa Napulog Duha ka Apostoles mitudlo:

Adunay daghang tawo dinhi sa yuta nga gamay ra kaayo og nahibaloan kabahin ni Jesukristo, ug sa pipila ka bahin sa kalibotan diin ang Iyang ngalan gipahayag sulod sa gatosan ka tuig, ang pagtuo diha ni Jesukristo nagkawala. … Usa ka bag-ong pagtuon nagpadayag nga sa miaging 10 ka tuig, 30 ka milyon ka tawo sa Estados Unidos miingon nga sila wala na motuo sa kabalaan ni Jesukristo. Nagtan-aw sa tibuok kalibotan, laing pagtuon ang nanagna nga sa mga dekada nga moabot, labaw sa kaduhaon ang gidaghanon ang mobiya sa Kristiyanismo kay sa modawat niini. …

Kamo ug ako naghisgot bahin ni Jesukristo, apan kita makahimo kanunay og mas maayo pa. Kon ang kalibotan dili kaayo maghisgot mahitungod Kaniya, kinsa ang maghisgot og dugang mahitungod Kaniya? Kita! Uban sa laing mahalaron nga mga Kristiyano! (Neil L. Andersen, “Kita Naghisgot kang Kristo,” Liahona, Nob. 2020, 88, 89)

Dugang nga mga Kalihokan sa Pagkat-on

Alternatibo nga paagi sa pagsugod sa leksiyon

Ikonsiderar ang paghimo og senaryo alang sa mga estudyante diin adunay mangutana, “Unsa ang gituohan sa mga miyembro sa imong Simbahan mahitungod sa Dios?” ug dapita dayon ang mga estudyante sa pagtubag sa dili pa isulat ang ilang kaugalingong mga pagtuo mahitungod sa Dios.

“Kinaiya, pagkahingpit, ug mga hiyas” sa Dios

Ang Lectures on Faith [Mga Panudlo sa Pagtuo] nag-ingon nga “ang husto nga ideya sa kinaiya, pagkahingpit, ug mga hiyas sa [Dios]” makaimpluwensiya sa atong abilidad sa pagpakita og hugot nga pagtuo diha Kaniya (Lectures on Faith [1985], 38). Ikonsiderar ang pagtabang sa mga estudyante nga makasabot niini nga baroganan pinaagi sa pagdapit kanila sa piho nga paglista sa unsay ilang nahibaloan ug gituohan nga may kalabotan sa kinaiya, pagkahingpit, ug mga hiyas sa Dios. Sa unsang paagi nga ang pagsabot ug pagtuo niini nga mga butanga makaimpluwensiya sa imong relasyon uban Kaniya? Sa unsang paagi kini makapalambo sa imong kompiyansa ug pagsalig diha Kaniya?

“Nagatuo ako” batok sa “Nahibalo ako”

Pangutan-a ang mga estudyante kon unsaon nila pagtubag ang usa ka tawo nga natingala kon okay ra ba nga moingon og “Nagatuo ko” isip pagpadayag sa ilang pagpamatuod imbes nga “Nahibalo ko.” Ikonsiderar ang paggamit sa pamahayag ni Elder Jeffrey R. Holland diha sa seksiyon nga “” ug pangutan-on ang mga estudyante kon unsa ang mipatigbabaw alang kanila gikan niini nga pamahayag.