Mosiah 3:19

Pagsalikway sa Kinaiyanhon nga Pagkatawo

Mibati ka ba sukad nga nasagmuyo sa imong mga sayop o kawalay katakos sa pagsunod sa tanang mga sugo sa Dios? Gihulagway ni Hari Benjamin ang atong dili hingpit nga kinaiya nga “ang kinainyahon nga tawo.” Siya mitudlo nga kita makabuntog niini pinaagi sa Pag-ula ni Jesukristo. Ang katuyoan niini nga leksiyon mao ang pagtabang kanimo sa pagtinguha sa tabang sa Manluluwas sa pagbuntog sa imong napukan nga kinaiya.

Pagmugna og palibot nga makapalambo sa pagkat-on.Kon ang mga magtutudlo ug mga estudyante naghigugma ug nagtahod sa Ginoo, sa usag usa, ug sa pulong sa Dios, ang pagkat-on mapalambo. Ang pagbati nga gidawat [acceptance] ug ang gugma nga gibati sa mga estudyante gikan sa uban makapahumok sa mga kasingkasing, makapakunhod sa kahadlok, ug makadugang sa ilang tinguha ug pagsalig sa pagpaambit sa mga pagbati ug mga kasinatian.

Pagpangandam sa estudyante: Dapita ang mga estudyante sa pagbasa sa Mosiah 3:19 ug sa pagpamalandong sa gipasabot niini. Mahimo usab nimo silang dapiton sa pagpangita og kasulatan o pamahayag gikan sa usa ka lider sa Simbahan nga makadugang sa ilang pagsabot sa bahin niini nga bersikulo.

Mga Posibleng Kalihokan sa Pagkat-on

Atong napukan nga mga kinaiya

Ikonsiderar ang pagpakita og hulagway sa lobo samtang imong ipaambit ang asoy gikan ni Presidente Dallin H. Oaks.

Si Presidente Dallin H. Oaks sa Unang Kapangulohan miasoy sa mosunod nga istorya:

Usa ka maalamon nga Cherokee, usa sa lumad nga mga tribo sa Estados Unidos, misugilon sa iyang apo nga lalaki og sambingay mahitungod sa kinabuhi.  “Sulod kanako anaay makalilisang nga panagbugno tali sa duha ka lobo,” miingon ang lolo.  “Ang usa dautan: puno sa kasuko ug kasina, pagkalooy sa kaugalingon ug kasubo, kahakog ug pagpamakak. “Ang usa maayo: puno sa kamabination ug kamanggiloy-on, kamapainubsanon ug kamatuoran, gugma ug kamaya. Kana nga panagbugno anaa sa sulod sa matag usa kanato.” “Asa nga lobo ang magmadaugon?” nangutana ang apo nga lalaki. (Dallin H. Oaks, “Mga Pagpili,” Alang sa Kalig-on sa mga Kabatan-onan, Sept. 2021, 13; istorya nga gipahiangay gikan ni Shayne M. Bowen, “Kabubut-on ug Pagkamaytulubagon,” Liahona, Sept. 2012, 52)

• Kon ikaw ang apohan, unsaon kaha nimo pagtubag ang pangutana sa imong apo?

  Dapita ang mga estudyante sa pagpamalandong sa ilang tubag sa mosunod nga pangutana:

• Giunsa nimo pagkamatikod niini nga pakigbisog tali sa “duha ka mga lobo” sa imong kaugalingon?

Sa istorya nga gipaambit ni Presidente Oaks, ang tubag sa lolo sa pangutana sa iyang apo kon hain sa lobo ang nagmadaugon mao, “Kadtong imong gipakaon.”

Isip kabahin sa iyang kataposang pakigpulong ngadto sa mga Nephite, si Hari Benjamin mitudlo sa mga kamatuoran nga gipadayag sa anghel ngadto kaniya mahitungod sa atong pagkapukan nga kinaiya ug sa unsang paagi kini makaapekto sa atong relasyon ngadto sa Dios.

Basaha ang Mosiah 3:19, mangita kon giunsa paghulagway ni Hari Benjamin ang usa ka tawo nga adunay mga kinaiya sama niadtong gihulagway sa unang lobo diha sa istorya.

Ikonsiderar nga ipabasa lang sa mga estudyante ang unang bahin sa Mosiah 3:19 (nga matapos sa mga pulong nga “hangtod sa kahangtoran”) niining puntoha sa leksiyon.

Ang Mosiah 3:19 usa ka tudling sa doktrinal nga kahanas.  Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

• Unsay imong nadiskobrehan?

Ikonsiderar ang pagsulat sa mga pulong nga Kinaiyanhon nga Tawo diha sa pisara isip ulohan. Dapita ang mga estudyante sa paghunahuna og mga pulong o hugpong sa mga pulong nga mahimong makatabang nila nga makasabot sa kahulogan sa termino. Dayon ipalista nila ang ilang mga tubag ubos sa ulohan.

Si Elder David A. Bednar sa Korum sa Napulog Duha ka Apostoles mitudlo:

May kamatuoran, ang kinaiyanhon nga tawo nga gihulagway ni Hari Benjamin anaa sa matag usa kanato. Ang kinaiyanhon nga tawo dili mahinulsulon, kalibotanon ug mahilayon, mapatuyangon ug mapasulabihon, ug puno sa garbo ug hakog. (David A. Bednar, “Kita Nagtuo sa Pagkaputli,” Liahona, Mayo 2013, 42)

• Ngano sa imong hunahuna nga ang kinaiyanhon nga tawo usa ka kaaway sa Dios?

• Unsa kaha ang gipasabot sa “pagpakaon” sa kinaiyanhon nga lalaki o babaye nga anaa sa sulod kanatong tanan?

Aron matabangan ang mga estudyante nga mas makasabot sa kinaiyanhon nga tawo, ikonsiderar ang pagpresentar sa pipila sa mosunod nga mga senaryo o paghunahuna og imong kaugalingon. Dapita ang mga estudyante sa pagpaambit kon unsaon kaha sa pagsanong sa kinaiyanhon nga tawo ang matag usa:

1. Adunay nakapasilo kanimo.

2. Anaa ka sa usa ka pasulit [test] ug makakita sa mga tubag sa ubang mga estudyante.

3. Usa ka dili angay nga hulagway ang kalit nga nagpakita [pop up] sa imong electronic device.

Hunahunaa ang pipila sa mga paagi nga imong namatikdan ang mga kinaiya o batasan sa kinaiyanhon nga lalaki o babaye sa imong kinabuhi. Samtang nagpadayon ka sa pagtuon, pangitaa ang mga pagtulun-an nga makatabang kanimo sa imong mga paningkamot sa pagbuntog niini nga mga kinaiya ug mga batasan.

Pagbuntog sa kinaiyanhon nga tawo

Basaha ang Mosiah 3:19 pag-usab, niining higayona mangita sa unsay gitudlo ni Hari Benjamin kon unsaon nato pagbuntog ang kinaiyanhon nga tawo.

• Unsa ang imong nakat-onan gikan niini nga bersikulo nga makatabang kanimo sa pagbuntog sa kinaiyanhon nga tawo?

Kon gisulat nimo kaganena ang Kinaiyanhon nga Tawo diha sa pisara, ikonsiderar ang paghimo og ikaduhang ulohan gamit ang pulong Santos. Samtang ang mga estudyante makadiskobre sa mga kamatuoran mahitungod sa pagbuntog sa kinaiyanhon nga tawo ug mahimong usa ka santos pinaagi sa Pag-ula sa Manluluwas, ilista kini sa pisara ubos sa ikaduhang ulohan.

Gikan sa Mosiah 3:19, kita nakat-on nga pinaagi sa pagtugyan ngadto sa mga pagdani sa Balaang Espiritu, kita makabuntog sa kinaiyanhon nga tawo ug mahimong mga santos pinaagi sa Pag-ula ni Jesukristo.

• Sa imong hunahuna sa unsang paagi si Jesukristo makatabang kanato sa pagsalikway sa kinaiyanhon nga tawo ug mahimong usa ka santos pinaagi sa Iyang Pag-ula?

• Unsa sa imong hunahuna ang gipasabot sa pagtugyan ngadto sa mga pagdani sa Balaang Espiritu? Sa unsang paagiha sa imong hunahuna ang pagbuhat niini makatabang kanimo sa pagbuntog sa kinaiyanhon nga pagkatawo?

Paggamit og mga cross-reference aron sa pagpalawom sa imong pagsabot

Ikonsiderar ang paghatag og panahon sa mga estudyante sa pagpalawom sa ilang pagsabot sa mga pagtulun-an sa Mosiah 3:19 pinaagi sa paggamit sa kahanas sa pagtuon sa kasulatan nga mga cross-reference.

Ang paggamit og mga cross-reference usa ka kahanas sa pagtuon sa kasulatan nga makatabang sa pagpalawom sa imong pagsabot sa usa ka tudling sa kasulatan. Pagpraktis niini nga kahanas pinaagi sa pagpangita og mga cross-reference nga makapalawom sa imong pagsabot sa mga pagtulun-an sa Mosiah 3:19.

Ikonsiderar ang pagpangita og mga cross-reference pinaagi sa pagpangita sa termino nga “kinaiyanhon nga tawo” o ubang importante nga mga pulong gikan sa Mosiah 3:19 diha sa Gospel Library app. Mahimo usab nimong pangitaon ang pipila ka mga pakisayran sa kasulatan ug mga hilisgotan nga gilista sa footnotes alang sa Mosiah 3:19.

Mahimo nimong ilista ang mosunod nga mga pakisayran sa kasulatan diha sa pisara. Dayon pag-assign og lain-laing mga grupo sa pagbasa og usa o daghan pa niini ug ipaambit ang ilang nakat-onan. Mahimo usab nimong hatagan ang mga estudyante og panahon sa pagpangita og may kalabotan nga mga kasulatan o mga pamahayag gikan sa mga lider sa Simbahan.

• Mga Taga-Galacia 5:16–17

• Mosiah 27:25–26

• Alma 22:13–14

• Ether 12:27

• Doktrina ug Mga Pakigsaad 11:12–13

Human ang mga estudyante adunay igong panahon sa pagtuon, dapita sila sa pagpaambit diha sa klase unsay ilang nakat-onan. Mahimo nimong hangyoon ang mga estudyante sa pagpaambit kon unsay ilang nakita nga labing makahuluganon ngadto kanila ug sa unsang paagi kini may kalabotan sa mga pagtulun-an diha sa Mosiah 3:19. Mahimo usab nilang ipaambit ang ilang nakat-onan kon sa unsang paagi kita gitabangan ni Jesukristo sa pagbuntog sa kinaiyanhon nga pagkatawo. Dapita ang daghang mga estudyante sa pagpaambit sa ilang mga panabot.

• Unsa ang imong nakat-onan kon sa unsang paagi ang Manluluwas makatabang kanato sa pagbuntog sa kinaiyanhon nga tawo ug mahimong usa ka santos?

Paggamit niini sa imong kinabuhi

Karon nga mas nakakat-on na ka mahitungod sa unsay ipasabot sa pagsalikway sa kinaiyanhon nga tawo ug mahimong usa ka santos pinaagi sa Pag-ula sa Manluluwas, hunahunaa kon unsaon nimo sa paggamit niini nga mga pagtulun-an sa imong kinabuhi. Unsa ang usa ka butang nga imong gibati nga nadasig nga buhaton o hunongon sa pagbuhat? Irekord ang imong mga hunahuna ug mga impresyon diha sa imong journal sa pagtuon.

Komentaryo ug Background nga Impormasyon

Ngano nga importante alang kanako nga maningkamot nga isalikway ang kinaiyanhon nga pagkatawo?

Si Elder David A. Bednar sa Korum sa Napulog Duha ka Apostoles mitudlo:

Ang tukmang matang sa pagsulay sa mortalidad, ma-summarize sa mosunod nga pangutana: Ako ba mosunod sa mga hilig sa kinaiyanhon nga tawo, o motugyan ba ko sa mga pagdani sa Balaang Espiritu ug mosalikway sa kinaiyanhon nga pagkatawo ug mahimo nga usa ka santos pinaagi sa Pag-ula ni Kristo ang Ginoo (tan-awa sa Mosiah 3:19)? Kana ang pagsulay. Tanang gana, tinguha, hilig, ug diha-diha nga gusto sa kinaiyanhon nga tawo mabuntog pinaagi sa Pag-ula ni Jesukristo. Kita ania sa kalibotan aron sa pagpalambo og diosnong kinaiya ug pugngan ang tanang kahigal. (David A. Bednar, “Kita Nagtuo sa Pagkaputli,” Liahona, Mayo 2013, 43)

Unsa kaha kon mobati ko nga nawad-an sa kadasig sa akong mga paningkamot sa pagbuntog sa kinaiyanhon nga pagkatawo?

Si Elder Jeffrey R. Holland sa Korum sa Napulog Duha ka Apostoles mitudlo:

Si [Satanas] lamang ang moingon, “Dili na ka mausab. Dili ka mahimong mag-usab. Dugay kaayo ug lisod kaayo kining pag-usab. Undang na. Sugot na. Ayaw paghinulsol. Ingon na man gyud ka niana.” Kana, mga higala, usa ka bakak naggikan sa ka walay paglaom. Ayaw padala niana. (Jeffrey R. Holland, “Unsaon sa Pag-usab,” Liahona, Peb. 2017, 60)

Si Brother Bradley R. Wilcox sa Kinatibuk-ang Kapangulohan sa Sunday School mitudlo:

Ang Dios nahigugma kanato kon unsa kita, apan Siya nahigugma usab kanato og maayo nga gitugotan kita nga magpabilin kon unsa man ang atong pagka kita. Ang magtubo ngadto sa Ginoo mao ang katuyoan sa mortalidad. Ang kausaban mao ang katuyoan sa Pag-ula ni Kristo. Si Kristo dili lang kay makapabanhaw, makalimpyo, makahupay, ug makaayo kanato, apan atol sa proseso sa pagkalimpyo, Siya makausab kanato aron nga mahimo nga mas mahisama Kaniya. (Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 61)

Dugang nga mga Kalihokan sa Pagkat-on

Mosiah 3:19. Pagtugyan ngadto sa mga pagdani sa Balaang Espiritu

Tun-i ang mga pagtulun-an ni Hari Benjamin mahitungod sa pagtugyan ngadto sa mga pagdani sa Balaang Espiritu. Mahimo kang mohunong ug dapiton ang mga estudyante sa paghunahuna kon unsay gipasabot sa pulong nga motugyan. Dapita sila sa paghunahuna og nagkalain-laing mga sitwasyon sa ilang kinabuhi diin ilang nakita o gigamit kana nga pulong ug sa paghunahuna kon unsaon nila sa pagtugyan ngadto sa mga pagdani sa Balaang Espiritu sa ilang mga kinabuhi.  Usa ka kahulogan sa pulong nga pagdani mao ang papagdapit. Ang Espiritu naghimo sa pagkamatarong nga mas madanihon. Ikonsiderar ang pagdapit og pipila ka mga estudyante aron pagpaambit kon sa unsang paagi ang Espiritu Santo nakatabang kanila sa ilang mga paningkamot sa pagsalikway sa kinaiyanhon nga pagkatawo.

Mosiah 3:19. Kristohanon nga mga hiyas ug sama sa bata nga mga kinaiya

Ikonsiderar ang pag-analisar ug paghisgot sa sama sa bata nga mga kinaiya nga gilista diha sa Mosiah 3:19. Isip kabahin niini nga diskusyon, mahimo nimong tabangan ang mga estudyante sa paghunahuna kon sa unsang paagi gipakita ni Jesukristo ang matag usa niini nga mga kinaiya. Mahimo gani nimong dapiton ang mga estudyante sa pagsiksik sa mga kasulatan alang sa mga ehemplo diin gipakita sa Manluluwas ang usa o daghan pa niini nga mga hiyas. Ikonsiderar ang pagdapit sa mga estudyante sa paghisgot nganong sa ilang hunahuna ang pagkahimong sama sa usa ka bata kabahin sa proseso sa pagsalikway sa kinaiyanhon nga pagkatawo.

Mosiah 3:21. “Pinaagi lamang sa paghinulsol”

Aron mas mahatagan og gibug-aton ang mga pagtulun-an ni Hari Benjamin mahitungod sa pagsalikway sa kinaiyanhon nga pagkatawo ug mahimong sama sa usa ka bata pinaagi ni Jesukristo, ikonsiderar ang pagdapit sa mga estudyante sa pagbasa sa Mosiah 3:16–23. Mahimo nimong dapiton ang mga estudyante sa pagmarka sa mga pulong nga “pinaagi lamang sa paghinulsol” sa Mosiah 3:21. Dapita ang mga estudyante sa pagpaambit og mga ideya kon sa unsang paagi ang paghinulsol makatabang nila sa pagbuntog sa ilang napukan nga mga kinaiya ug sa pagpabilin nga limpyo sa espirituhanong paagi.