“Mōsaia 5:1–5: ʻIkai ha Toe Holi ke Fai Kovi,” Tohi ʻa Molomoná – Tohi Lēsoni ʻa e Faiakó (2024)
“Mōsaia 5:1–5,” Tohi ʻa Molomoná – Tohi Lēsoni ʻa e Faiakó
Mōsaia 5:1–5
ʻIkai ha Toe Holi ke Fai Kovi
ʻI he taimi ʻe niʻihi, mahalo te tau ongoʻi ʻoku fiemaʻu ke tau fakahoko ha ngaahi liliu pe fakaleleiʻi ha meʻa kuo tau fai. Naʻe ongoʻi pehē ʻa e kakai ʻo e Tuʻi ko Penisimaní hili ʻenau fanongo kiate ia ʻo kau kia Sīsū Kalaisi mo e meʻa ʻokú Ne fakahaofi kitautolu mei aí. ʻE lava ke tokoniʻi koe ʻe he lēsoni ko ʻení ke fakatupulaki hoʻo holi ke liliú pe hokohoko atu hoʻo liliu ʻi he tokoni ʻa e ʻEikí.
Ko e ngāue fakatatau ki he ngaahi akonaki ʻa e Fakamoʻuí. Naʻe akoʻi ʻe Sīsū Kalaisi ʻa e tokāteline moʻoní mo e ngaahi tefitoʻi moʻoní koeʻuhí ke lava ʻo liliu ʻetau moʻuí ke toe lelei ange. Fekumi maʻu pē ki ha ngaahi faingamālie ke fakaafeʻi e kau akó ke fai ha ngāue lelei ʻoku māʻoniʻoni ʻo makatuʻunga ʻi Heʻene ngaahi akonakí. ʻE lava ke kehekehe ʻa e ngaahi ngāué ki he tokotaha ako takitaha, ka ʻe lava ke tokoniʻi kinautolu ʻe he Laumālie Māʻoniʻoní ke nau ʻiloʻi ʻa e meʻa te nau lava ʻo fai ke muimui ai ki he Fakamoʻuí.
Teuteu ʻa e tokotaha akó: ʻE lava ke ke fakaafeʻi e kau akó ke nau fakakaukau ki he meʻa ʻokú ne fakatupunga ʻenau fakaʻamu ke ofi ange ki he Tamai Hēvaní mo Sīsū Kalaisí.
Ngaahi ʻEkitivitī Ako ʻOku Ala Fakahokó
Hoko ʻo hangē ko Sīsū Kalaisí
Fakakaukau ke fakaʻaliʻali e ngaahi ʻīmisi ko ʻení pe ʻomi ha niʻihi ʻo e ngaahi ʻopusekí ki he kalasí kapau ʻoku maʻu. Fakaʻaongaʻi leva ha ngaahi fehuʻi hangē ko ia ʻoku hoko maí ke tokoni ki he kau akó ke nau fakakaukau ki he founga ʻe lava ke fakafehoanaki ai ʻa e liliu ʻo e ngaahi ʻopusekí ki heʻetau liliú pea hoko ʻo hangē ko e Tamai Hēvaní mo Sīsū Kalaisí.
-
Ko e hā ʻokú ne fakatupu e liliu ʻa e ngaahi meʻa ko ʻení?
-
Ko e hā e ngaahi ʻuhinga ʻoku liliu ai e kakaí?
-
ʻE founga fēfē hano liliu ʻe he ʻEikí hotau lotó ke faitatau pe kehekehe mei he founga ʻoku liliu ai e ngaahi meʻa ko ʻení?
Fakakaukau ke fakaʻaliʻali ʻa e fakamatala ko ʻení pe hiki ia ʻi he palakipoé. Fakaafeʻi e kau akó ke nau fakakaukau ki he lahi ʻenau ongoʻi ʻoku ʻaonga e fakamatala ko ʻení kiate kinautolú.
-
ʻOku ou fiemaʻu ke tokoniʻi au ʻe he ʻEikí ke u liliu ʻo toe lelei ange.
Fakaafeʻi e kau akó ke nau fakakaukau ki he ʻuhinga ʻoku nau ongoʻi pehē aí. ʻE lava ke kau heni ʻa e fakalaulauloto ki he ngaahi founga naʻe lava ke tokoniʻi ai kinautolu ʻe he ʻEikí ʻi he kuohilí.
ʻI hoʻo ako ʻa e Mōsaia 5, kumi ha ngaahi ʻuhinga te ke fie kolea ai e tokoni ʻa e ʻEikí ke ke liliu mo fakalakalaka aí.
Ko hono aʻusia ha liliu ʻo e lotó
Hili e lea ʻa e Tuʻi ko Penisimaní ki hono kakaí, naʻá ne fie ʻilo pe naʻa nau “tui ki he ngaahi lea kuó ne lea ʻaki kiate kinautolú” (Mōsaia 5:1).
Lau ʻa e Mōsaia 5:1–5 ke ʻilo e founga naʻa nau tali aí. Mahalo ʻe tokoni ke ʻiloʻi ʻoku ʻuhinga ʻa e foʻi lea holí ki he aafe pe fakahehema ʻa ha taha, ʻa e meʻa ʻoku nau fakamamafa ki aí. Mahalo te ke fie mamataʻi ʻa e foʻi vitiō “ʻOku Fakahoko ʻe he Kakai ʻo e Tuʻi ko Penisimaní ha Fuakava” mei he taimi 0:00 ki he 1:37, ʻa ia ʻoku maʻu ʻi he ChurchofJesusChrist.org.
Ke tokoni ke mahino lelei ange ki he kau akó e ngaahi veesi ko ʻení, te ke lava ʻo fakaafeʻi kinautolu ke nau hiki tatau pea fakakakato ʻa e saati ko ʻení ʻi heʻenau tohinoa akó. Pe ko hono lau ʻe he kau akó e ngaahi vēsí pea fakaʻilongaʻi ʻa e meʻa ʻoku nau maʻú ʻi heʻenau folofolá. Hangē ko ʻení, ʻe lava ke siakaleʻi ʻe he kau akó e ngaahi foʻi lea mo e ngaahi kupuʻi lea ʻoku nau fakahaaʻi ʻa e founga naʻe liliu ai ʻa e kakaí pea laineʻi e ngaahi foʻi lea mo e kupuʻi lea ʻokú ne fakahaaʻi ʻa e meʻa naʻá ne fakatupu e liliu ʻa e kakaí.
|
Founga naʻe liliu ai e kakaí |
Ko e hā naʻe tupu ai e liliu ʻa e kakaí |
|---|---|
Founga naʻe liliu ai e kakaí
| Ko e hā naʻe tupu ai e liliu ʻa e kakaí
|
Mahalo te ke fie fakaafeʻi e kau akó ke vahevahe e meʻa ne nau maʻú. Fakaafeʻi e kau akó ke fakamatalaʻi fakanounou e ngaahi tefitoʻi moʻoni naʻa nau akó. Ko e ʻekitivitī ko ʻení ko ha founga ia ʻe taha ke fakahoko ai ʻeni.
Fakatefito ʻi he Mōsaia 5:1–5, fakakakato e kupuʻi lea ko ʻení.
ʻI he liliu hotau lotó ʻo fakafou ʻi he Laumālie ʻo e ʻEikí, ʻoku …
ʻE lava ke fakakakato ʻe he kau akó ʻa e leá ʻi ha ngaahi founga kehekehe. ʻOku kau ʻi he ngaahi founga ʻe niʻihi ʻa e, ʻI he liliu hotau lotó ʻo fakafou ʻi he Laumālie ʻo e ʻEikí, ʻoku …
-
mole meiate kitautolu ʻa e holi ke faikoví pea maʻu ʻa e holi ke failelei maʻu ai pē.
-
tau ongoʻi fiefia.
-
tau loto-fiemālie ke fakahoko ha ngaahi fuakava ke talangofua ki he ngaahi fekaú.
ʻE ala tokoni ke fakaafeʻi e kau akó ke hiki e ngaahi tefitoʻi moʻoní ʻi he palakipoé pea hiki kinautolu ʻi heʻenau folofolá. Fakaʻaongaʻi ha niʻihi pe kotoa ʻo e ngaahi fehuʻi ko ʻení ke tokoni ke mahino mo fakalaulauloto e kau akó ki he mahuʻinga ʻo e ngaahi moʻoni kuo nau ʻiló.
ʻOku mahuʻinga ke mahino neongo naʻe “ʻikai ke toe maʻu [ʻe he kakai ʻo e Tuʻi ko Penisimaní] ha holi [pe fakahehema] ke faikovi” (Mōsaia 5:2), ʻoku ʻikai ʻuhinga ʻeni naʻe ʻikai ke nau toe faiangahala. Ka naʻe liliu ʻe he ʻEikí honau lotó ke nau holi fakamātoato ke failelei pea fakaʻehiʻehi mei he angahalá.
-
Ko e fē ha taimi kuó ke maʻu ai ha holi lahi, hangē ko e kakai ʻo e Tuʻi ko Penisimaní, ke “failelei maʻu ai pē”? Ko e hā naʻá ne tokoniʻi koe ke ke ongoʻi peheé?
-
ʻOkú ke pehē ko e hā ʻoku ʻikai ongoʻi pehē ai ha tokolahi ʻo kitautolu he taimi kotoa peé?
-
ʻOkú ke pehē ko e hā ʻe lava ke fai ʻe ha taha ke ne faʻa ongoʻi pehē aí?
Ko e mahino ʻa e liliú
Fakakaukau ke fakaʻilongaʻi ʻi he Mōsaia 5:3 ʻa e kupuʻi lea “ʻi he fungani angalelei taʻe-fakangatangata ʻa e ʻOtuá.” Ke mahino moʻoni kiate kitautolu ʻa e liliu naʻe hoko ʻi he kakai ʻo e Tuʻi ko Penisimaní, kuo pau ke mahino kiate kitautolu ʻa e founga ʻe lava ke tokoniʻi ai kitautolu ʻe Sīsū Kalaisi ke tau liliú.
Naʻe fakamatalaʻi ʻe Sisitā Uenitī W. Nalesoni ʻo pehē:
Fakakaukau ke fakaʻaliʻali e fakamatala ko ʻení pea fakaafeʻi e kau akó ke kumi e ngaahi foʻi lea pe kupuʻi lea ʻoku nau saiʻia aí.
Ko e Fakamoʻuí ʻa e tupuʻanga taupotu taha mo moʻoni mo moʻui pē taha ʻo e liliú. Ko e tupuʻanga Ia ʻo e liliu kotoa pē. … Te Ne ʻomi ʻa e lelei taha ʻiate koé, ʻi hoʻo tafoki kiate Iá. Ko e moʻoni te Ne fakahaofi ʻa e meʻa kotoa pē ʻoku lelei taha ʻiate koé. …
… ʻOkú Ne ʻofa ʻiate koe. ʻOkú Ne tanganeʻia ʻi hoʻo feinga ke liliú.
Ko ʻEne fakaʻamú ke ke liliu, ke ke fakaʻau ʻo siʻaki ʻaupito ʻa e tangata fakakakanó, ke liliu ho lotó, pea liliu ho natulá. Naʻe fai ʻe Sīsū Kalaisi ʻa e meʻa kotoa naʻá Ne faí kae lava ke ke liliu! Ko Ia hoʻo Fakamoʻuí mo hoku Fakamoʻuí!
Pea ʻi heʻetau tautapa maʻu pē ki he mālohi ʻo ʻEne feilaulau fakalelei mo taʻefakangatangatá ke fakaʻaongaʻi ʻi heʻetau moʻuí, ʻe hanga ʻe Heʻene fakamoʻui taupotu tahá ʻo ʻomi ki heʻetau moʻuí takitaha ʻa e liliu taupotu taha ʻoku tau fekumi fakamātoato ki aí. (Wendy W. Nelson, “Change: It’s Always a Possibility!” [Brigham Young University devotional, April 7, 1998], 10, speeches.byu.edu)
-
Fakatatau kia Sisitā Nalesoní, ko e hā ʻe lava ke fai ʻe Sīsū Kalaisi ke tokoniʻi kitautolu ke tau liliú?
-
Ko e hā naʻá ke ako fekauʻaki mo hoʻo fatongia ke liliú?
Fakaafeʻi e kau akó ke fakakaukau ki ha taha ʻoku nau ʻilo kuo liliu ʻi he tokoni ʻa Sīsū Kalaisí. Te ke lava ʻo vahevahe ʻa e sīpinga ʻo ʻEva ʻi he vitiō “Ko ha Liliu ʻo e Lotó” (4:39), ʻa ia ʻoku ʻi he ChurchofJesusChrist.org. ʻE ala tokoni foki ke vahevahe fekauʻaki mo ha taha ʻokú ke ʻilo naʻe liliu.
Hili iá peá ke ʻeke ki he kau akó ha ngaahi fehuʻi hangē ko ʻení:
-
Naʻe tokoniʻi fēfē ʻe he ʻEikí ʻa e tokotahá ni?
-
Ko e hā ha ngaahi ngāue fakafoʻituitui naʻe fai ʻe he tokotahá ni ke liliú?
-
ʻOkú ke pehē ko e hā ʻoku iku ai e ngaahi liliu ko ʻení ki ha fiefia lahi angé?
Ko hono fakahoko ʻo e liliú ke tuʻuloá
Ke fakaʻosi hoʻo akó, fakakaukau ki hoʻo moʻuí mo hoʻo fakalakalaka lolotonga ki he hoko ʻo hangē ko e Tamai Hēvaní mo Sīsū Kalaisí. Fakalaulauloto ki he meʻa ʻokú ke ongoʻi ʻe fiemaʻu ʻe he Laumālie Māʻoniʻoní ke ke fai ko ha ola ʻo e meʻa naʻá ke ako mo ongoʻí.
Vahevahe hoʻo fakamoʻoní ʻe tokoniʻi ʻe he ʻEikí, ʻo fakafou ʻi Hono Laumālié, ʻa e kau akó ke nau liliu pea hoko ʻo hangē ange ko e Tamai Hēvaní mo Sīsū Kalaisi.