Mōsaia 11–17

Vakai Fakalūkufuá

Naʻe fekauʻi atu ʻe he ʻEikí ʻa ʻApinetai mo ha pōpoaki ki he Tuʻi ko Noá mo hono kakaí ke nau fakatomala pea fakaʻehiʻehi mei he mamahi ʻe lava ke hoko koeʻuhí ko ʻenau faiangahalá. Naʻe akoʻi ʻe ʻApinetai ʻa Noa mo ʻene kau taulaʻeikí fekauʻaki mo e fatongia ʻo Sīsū Kalaisí ʻi honau fakamoʻuí pea mo e mahuʻinga ʻo hono tohi e ngaahi fekau ʻa e ʻOtuá ʻi honau lotó. Neongo naʻe mateuteu ʻa e Tuʻi ko Noá ke fakapoongi ʻa ʻApinetai, ka naʻe ʻiloʻi ʻe ʻApinetai ʻe fakaʻatā ia ʻe he ʻOtuá ke fakaʻosi ʻa e pōpoaki naʻe fekauʻi mai ia ke fakahokó. Naʻe tui ʻa ʻAlamā, ko ha taha ʻo e kau taulaʻeiki ʻa e Tuʻi ko Noá, kia ʻApinetai. Hili hono ʻoatu ʻe ʻApinetai ʻene pōpoakí mo e fakamoʻoni kia Sīsū Kalaisí, naʻe tāmateʻi ia.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Mōsaia 11–17

Taumuʻa ʻo e lēsoní: ʻE lava ke tokoni e lēsoni ko ʻení ke fakatupulaki e loto-holi ʻa e kau akó ke tali e kau palōfita ʻa e ʻEikí pea fakahoko e ngaahi fakaafe ʻoku nau fai mei he ʻEikí.

• Teuteu ʻa e tokotaha akó: Fakaafeʻi e kau akó ke hiki ha lisi nounou ʻo e ngaahi fakaafe kuo nau fanongo ne fai kimuí ni mai ʻe he kau palōfitá. Kole ange ke nau haʻu mateuteu ke vahevahe e founga ʻoku hoko ai e ngaahi fakaafe ko ʻení ko ha fakamoʻoni ʻo e ʻofa mo e tokanga ʻa e ʻEikí kiate kinautolú.

• Ngaahi Vitioó: “Toe Fakamatala ʻe ʻAlamā ʻa e Faiangahala ʻa e Tuʻi ko NoáKo e ʻOfa ʻa e ʻOtuá” (13:11; mamata mei he taimi 6:35 ki he 7:04); “ʻOku Mate ʻa ʻApinetai koeʻuhí ko ʻEne Tuí” (4:28)

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ha tatau fakaʻilekitulōnika ʻo e folofolá. Fakaʻilongaʻi e kupuʻi lea ʻoku toutou fakaʻaongaʻi “kapau ʻe ʻikai te nau fakatomala” ʻi he Mōsaia 11:20–25 pea fakaʻaliʻali ki he kau akó ha sīpinga ʻo e founga ke fakaʻilongaʻi ai e ngaahi kupuʻi lea ʻoku toutou ʻasi ʻi he folofolá.

Mōsaia 12–13

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau muimui lelei ange kia Sīsū Kalaisi ʻi heʻenau tohi ʻa e ngaahi fekaú ʻi honau lotó.

• Teuteu ʻa e tokotaha akó: ʻE lava ke kole ʻe he kau akó ki ha mēmipa ʻo e fāmilí pe kaungāmeʻa ke vahevahe ha aʻusia ʻo ha taimi naʻe mahuʻingamālie fakataautaha ai ha fekau kiate kinautolu.

• Vitiō: “ʻOku Fakamoʻoni ʻa ʻApinetai ʻi he ʻao ʻo e Tuʻi ko Noá mo ʻEne Kau Taulaʻeikí” (4:35)

• Fokotuʻu ki hono akoʻi ʻi he konifelenisi vitioó: ʻI he taimi ʻoku kole ai ki he kau akó ke nau feinga ke ʻiloʻi e Fekau ʻe Hongofulú, fakakaukau ke fakaafeʻi ke nau hiki ʻa e ngaahi fekaú ʻi he polokalama fetalanoaʻakí ke vakai pe te nau lava ʻo manatuʻi kotoa e fekau ʻe 10.

Mōsaia 14–16

Taumuʻa ʻo e lēsoní: ʻE lava ke tokoni e lēsoni ko ʻení ke fakatokangaʻi ʻe he kau akó ʻa e mahuʻinga ʻo hono ʻiloʻi ko Sīsū Kalaisi toko taha pē te Ne lava ʻo huhuʻi kitautolu mei he angahalá mo e maté.

• Teuteu ʻa e tokotaha akó: Fakaafeʻi e kau akó ke fakalaulauloto pe ko e fē ʻi he ngaahi fatongia mo e huafa ʻo Sīsū Kalaisí ʻoku mahuʻingamālie taha kiate kinautolú pea ko e hā hono ʻuhingá.

•  

• Fokotuʻu ki hono akoʻi ʻi he konifelenisi vitioó: Fakakaukau ke fakakulupu e kau akó ʻi he fanga kiʻi loki fakatahá pea vahe ki he kulupu takitaha ha taha ʻo e ngaahi fakamatala ako ʻe tolu ʻi he lēsoní. ʻE lava ke ako ʻe he kau akó ʻenau ngaahi veesi ne vahe angé pea teuteu ke vahevahe e meʻa ne nau akó mo e kalasí kotoa.

Siviʻi Hono 4 Hoʻo Akó

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau vakaiʻi e ngaahi taumuʻa kuo nau fokotuʻú pea mo e tupulaki fakataautaha kuo nau aʻusia ʻi heʻenau ako e Tohi ʻa Molomoná.

• Teuteu ʻa e tokotaha akó: Fakakaukau ke fakaafeʻi ʻa e kau akó ke nau talanoa mo ha mātuʻa pe kaungāmeʻa fekauʻaki mo e meʻa ʻoku fai ʻe he kau palōfitá mo e founga kuo tākiekina pe tāpuekina ai kinautolu ʻe he kau palōfitá.

• Meʻa ke fakaʻaliʻalí: Ko ha sīpinga ʻo ha mape fakakaukau

• Fokotuʻu ki hono akoʻi ʻi he konifelenisi vitioó: Vahevahe ʻa e kau akó ki he fanga kiʻi loki fakatahá. ʻE lava ke taufetongi e kau akó ʻi hono fakamatalaʻi ʻa e fatongia ʻo e kau palōfitá ki heʻenau kulupú. Ko ha founga ʻe taha ko hono faʻu ha tūkunga ke fakafaivaʻi pea ʻeke fehuʻi ai ha kau ako ʻe niʻihi kae akoʻi ʻe ha kau ako kehe ʻe niʻihi ʻa e ngaahi moʻoni fekauʻaki mo e kau palōfitá.

Toe Vakaiʻi Hono 8 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke ako maʻuloto ha potufolofola mo ha kupuʻi lea fakafolofola mahuʻinga ʻe taha pe lahi ange mei he ʻuluaki potufolofola fakataukei fakatokāteline ʻe 12 ʻi he Tohi ʻa Molomoná.

• Teuteu ʻa e tokotaha akó: Fakaafeʻi ha kau ako ke ʻomi pe mateuteu ke fakamatalaʻi e ʻīmisi ʻo Sīsū Kalaisi ʻoku nau saiʻia taha aí pea vahevahe ʻa e meʻa ʻoku tokoni ke nau manatuʻi Iá.

• Ngaahi ʻĪmisí: Ngaahi ʻĪmisi ʻo e Fakamoʻuí

• Fokotuʻu ki hono akoʻi ʻi he konifelenisi vitioó: Lolotonga e ngāue tā fakatātaá, fakakaukau ke fakaafeʻi e kau akó ke tamateʻi e ongo ʻo ʻenau maiká (mute) pea tamateʻi mo ʻenau meʻafaitaá. ʻOange ha miniti ʻe 10–15 ke nau tā ai ʻenau ʻū fakatātaá ʻi ha pepa pe ko ha polokalama fakakomipiuta ʻi heʻenau meʻangāue fakaʻilekitulōniká. ʻE lava ke ke tā ha ngaahi hiva mei he Kuaea Tāpanekalé ʻi he Temipale Sikueá pe ko ha ngaahi hiva kehe ʻoku langaki moʻui fakalaumālié. Fakaafeʻi leva e kau akó ke toe fakamoʻui ʻenau maiká mo e meʻafaitaá pea vahevahe ʻenau ʻū fakatātaá.