“Mōsaia 28: Ului Fakatāutahá mo Hono Vahevahe ʻo e Ongoongolelei,” Tohi ʻa Molomoná – Tohi Lēsoni ʻa e Faiakó (2024)
“Mōsaia 28,” Tohi ʻa Molomoná – Tohi Lēsoni ʻa e Faiakó
Mōsaia 28
Ului Fakatāutahá mo Hono Vahevahe ʻo e Ongoongoleleí
Ko e hā ha ngaahi aʻusia kuó ke maʻu ʻi hono vahevahe ʻo e ongoongolelei ʻo Sīsū Kalaisí? Hili e ului ʻa e ngaahi foha ʻo Mōsaiá, ne nau kole ki he tuʻí ha ngofua ke malanga ʻaki e ongoongoleleí ki he kau Leimaná. Naʻe fuofua kole ʻe he Tuʻi ko Mōsaiá ki he ʻEikí, peá ne tuku hono ngaahi fohá ke nau ʻalu koeʻuhí ka nau lava ʻo ʻave e folofola ʻa e ʻOtuá ki he kau Leimaná (vakai ki he Mōsaia 28:1). ʻOku fakataumuʻa ʻa e lēsoni ko ʻení ke tokoniʻi koe ke fakatupulaki hoʻo holi ke vahevahe ʻa e ongoongoleleí.
Tokoniʻi e kau akó ke nau mahuʻingaʻia ʻi he ngaahi moʻoni ʻo e ongoongoleleí. Mahalo ʻe faingataʻa ki ha kau ako ʻe niʻihi ke ʻiloʻi e founga ʻoku fekauʻaki ai e ongoongoleleí mo ʻenau moʻui fakaʻahó. Fekumi ʻi he faʻa lotu ki ha ngaahi founga ke tokoniʻi ai kinautolu ke nau ongoʻi ʻoku ʻuhingamālie mo ʻaonga ʻa e meʻa ʻoku nau akó ki honau ngaahi tūkunga fakatāutahá, ngaahi fehuʻí, mo e ngaahi fiemaʻú.
Teuteu ʻa e tokotaha akó: Fakakaukau ke fakaafeʻi e kau akó ke talanoa ki ha taha ʻoku nau tui ʻoku ului moʻoni ki he ongoongolelei ʻo Sīsū Kalaisí. Ko e hā ha meʻa naʻe tokoni ki he tokotaha fakafoʻituitui ko iá ʻi he hala ʻo ʻene uluí? Mahalo te ke fakakaukau foki ke fakaafeʻi e kau akó ke vakavakaiʻi ʻenau loto-holi ke vahevahe ʻa e ongoongoleleí.
Ngaahi ʻEkitivitī Ako ʻOku Ala Fakahokó
Vahevahé mo e ului
Fakakaukau ke ʻomi pe fakaʻaliʻali ha fakatātā ʻo ha meʻa ʻokú ke fiefia ʻi hono vahevahe mo e niʻihi kehé. Vahevahe ʻa e meʻa ko ʻení mo e kau akó kimuʻa pea fai ʻa e fehuʻi hokó.
-
Ko e hā ha ngaahi meʻa ʻokú ke ʻofa lahi ai ʻa ia ʻokú ke fie vahevahe mo e niʻihi kehé?
Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻoku ʻikai ko ha meʻa foʻou hono vahevahe ʻo e ngaahi meʻa ʻoku ʻuhingamālie kiate kitautolú. ChurchofJesusChrist.org
Good Things to Share
Sharing what matters most is not unusual at all. What good things will you share?
ʻOku ʻikai ko ha meʻa foʻou ke tau vahevahe ʻa e ngaahi meʻa ʻoku mahuʻinga taha kiate kitautolú mo e niʻihi kehé.
ʻOku hāsino moʻoni e sīpinga ko ʻení ʻi he ngaahi meʻa ʻoku mahuʻinga fakalaumālie mo ʻaonga tahá. …
Ko e fakaafe ʻoku mau ʻoatu ke mou ako mo siviʻi ʻemau pōpoakí ʻoku makatuʻunga ia ʻi ngaahi lelei ʻo e ongoongolelei ʻo Sīsu Kalaisi ʻi heʻemau moʻuí. Mahalo naʻa ʻoku ʻi ai ha ngaahi taimi ʻoku mau hā mā pe taʻeufi, pe taʻefieʻauna ʻi heʻemau ngaahi feingá. Ko ʻemau fakaʻamú ke vahevahe mo kimoutolu ʻa e ngaahi moʻoni ʻoku mahuʻinga taha kiate kimautolú. (David A. Bednar, “Haʻu ʻo Mamata,” Liahona, Nōvema 2014, 109, 110)
Fakafuofuaʻi e tuʻunga moʻoni ʻo e ongo fakamatala ko ʻení kiate koé mei he meʻafua 1–5 (ʻa ia ko e 1 ʻoku ʻikai moʻoni kiate koe pea ko e 5 ʻoku moʻoni ʻaupito kiate koe):
Fakakaukau ke fakaʻaliʻali e ongo fakamatala ko ʻení ki he kau akó ʻi heʻenau fakalaulauloto mo fakakaukau ki heʻenau moʻuí.
-
ʻOku mahuʻinga lahi kiate au ʻa e ngaahi moʻoni fekauʻaki mo e Fakamoʻui ko Sīsū Kalaisí mo ʻEne ongoongoleleí.
-
ʻOku ou maʻu ha holi ke vahevahe ʻa ʻEne ongoongoleleí mo e niʻihi kehé.
ʻI hoʻo ako e moʻui mo e ngaahi sīpinga ʻa e ngaahi foha ʻo Mōsaiá, fakalaulauloto ki hoʻo holi ke vahevahe e ongoongolelei ʻo e Fakamoʻuí. Fekumi ki ha fakahā ke ʻiloʻi e ngaahi sitepu hoko ʻe finangalo e ʻEikí ke ke fakahoko kae lava ke toe mahuʻingamālie ange ʻa e ongoongoleleí kiate koe pea tupulaki mo hoʻo holi ke vahevahe ʻa e ongoongoleleí.
Ko e ngaahi foha ʻo Mōsaiá
Manatuʻi, ʻi he hili e ului ʻa e ngaahi foha ʻo e Tuʻi ko Mōsaiá, ne nau malangaʻi e ongoongoleleí ʻi honau fonuá, ʻi heʻenau feinga ke fakaleleiʻi ʻenau ngaahi fehalāakí (vakai ki he Mōsaia 27:32–37).
Lau ʻa e Mōsaia 28:1–5, ʻo kumi e meʻa naʻe fiemaʻu ʻe he ngaahi foha ʻo Mōsaiá mo hono ʻuhingá. (Mahalo te ke fie fakaʻilongaʻi e meʻa ʻokú ke ʻiló ʻi hoʻo folofolá.)
-
Ko e ngaahi foʻi lea pe kupuʻi lea fē ʻi he ngaahi veesi ko ʻení ʻoku mahuʻinga kiate koé? Ko e hā e ngaahi ʻuhinga ʻa e ngaahi foha ʻo Mōsaiá ki hono vahevahe ʻo e ongoongoleleí mo e kau Leimaná?
Fakakaukau ke fakaafeʻi ha kau ako tokolahi ke vahevahe e meʻa kuo nau maʻú.
-
Ko e hā ʻe ala hoko ai ʻeni ko ha ngaahi ʻuhinga fakalotolahi ke vahevahe e ongoongoleleí?
-
Ko e hā ha ngaahi moʻoni naʻá ke ako mei he ngaahi veesi ko ʻení?
Mahalo ʻe vahevahe ʻe he kau akó ha ngaahi tefitoʻi moʻoni kehekehe. Kapau he ʻikai tala atu ʻe he kau akó ʻa e tefitoʻi moʻoni ʻoku fakaʻilongaʻi mataʻāʻā atu ʻi laló, fakakaukau ke fai ange ʻa e ongo fehuʻi ko ʻení: ʻE fekauʻaki fēfē nai ʻetau holi ke vahevahe ʻa e ongoongoleleí mo ʻetau ului fakatāutahá? Ko e hā hono ʻuhingá?
Ko e moʻoni ʻe taha ʻoku tau ako mei he ngaahi veesi ko ʻení ʻi he loloto ange ʻa ʻetau ului ki he ʻEikí, ko e tupulaki ange ia ʻetau holi ke vahevahe e ongoongoleleí.
Naʻe fakapapauʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻa e foʻi moʻoni ko ʻení ʻi heʻene akoʻi e ngaahi meʻa ni:
ʻOku hoko ʻa e lahi ʻo ʻetau holi ke vahevahe ʻa e ongoongoleleí ko ha fakaʻilonga lelei ʻo e lahi ʻo ʻetau ului fakafoʻituituí (Dallin H. Oaks, “Sharing the Gospel,” Ensign, Nov. 2001, 7).
-
Ko e hā ha ngaahi aʻusia naʻe maʻu ʻe he ngaahi foha ʻo Mōsaiá naʻá ne tokoniʻi kinautolu ke nau ului kia Sīsū Kalaisi mo ʻEne ongoongoleleí? (Vakai ki he Mōsaia 27:34–36; 28:4).
Fakakaukau ke fakaʻaliʻali e ngaahi fehuʻi ko ʻení ke fakalaulauloto pe tali ʻe he kau akó ʻi heʻenau tohinoa akó kimuʻa pea fai ʻenau talí.
-
Ko e hā ha ngaahi aʻusia kuó ne tokoniʻi koe pe ko kinautolu ʻokú ke ʻiló ke nau ului lahi ange kia Sīsū Kalaisi mo ʻEne ongoongoleleí?
-
Ko e hā ha meʻa ʻokú ke saiʻia taha ai fekauʻaki mo Sīsū Kalaisi mo ʻEne ongoongoleleí ʻokú ke loto ke vahevahe mo e niʻihi kehé? (Hangē ko ʻení, mahalo naʻá ke maʻu ha ngaahi aʻusia mahuʻingamālie ʻi he fakamolemole ʻa e Fakamoʻuí, ʻofa ʻa e ʻOtuá, lotú, mo e alā meʻa peheé.)
Naʻa mo e taimi ʻoku tau ului ai ki he ʻEikí, mahalo ʻe ʻi ai pē ha ngaahi ʻuhinga ʻoku kei faingataʻa ai hono vahevahe ʻo e ongoongoleleí.
-
Kapau ko e taha koe ʻo e ngaahi foha ʻo Mōsaiá, ko e hā ha ngaahi meʻa te ke hohaʻa ki ai ʻi hono malanga ʻaki ʻo e ongoongoleleí ki he kau Leimaná?
ʻI he hoko ʻa Mōsaia ko ʻenau tamaí mo e tuʻí, naʻe lahi ha ngaahi ʻuhinga ki heʻene hohaʻa ki hono fekau hono ngaahi fohá ke malanga ʻaki ʻa e ongoongoleleí ki he kau Leimaná. Naʻe ʻikai ngata pē ʻi he manavasiʻi ʻa e Tuʻi ko Mōsaiá ki he tuʻunga malu ʻa hono ngaahi fohá, ka naʻá ne toe manavasiʻi foki telia naʻa mavahe hono ngaahi fohá pea ʻikai ha ʻea-hoko ke fakakalauni ko e tuʻi hoko ʻo e kau Nīfaí.
Lau ʻa e Mōsaia 28:6–8, ʻo kumi e ʻuhinga ne tuku ai ʻe Mōsaia hono ngaahi fohá ke nau ō ʻi ha faʻahinga misiona fakatuʻutāmaki peheé.
-
Ko e hā e ngaahi tāpuaki naʻe talaʻofa ʻe he ʻEikí kia Mōsaiá?
Ko hoʻo ngaahi sitepu hokó
Fakaʻaongaʻi ha kiʻi taimi ke hiki e ngaahi meʻa ʻokú ke hohaʻa ki aí pe hohaʻa ki ai e niʻihi kehé fekauʻaki mo hono vahevahe ʻo e ongoongoleleí.
Hiki ʻa e tali ʻa e kau akó ʻi he palakipoé. Fakakaukauʻi pe ko e lelei tahá ke fili ha meʻa ʻe taha ke tokanga fakataha ki ai e kalasí kotoa pe ke ngāue fakafoʻituitui pe fakakulupu iiki e kau akó.
Fili ha taha ʻo e ngaahi hohaʻa ko ʻení pea lotua ha fakahinohino ʻi hoʻo fekumi ʻi he folofolá mo fakalaulauloto ki he founga ke ikunaʻi ai ʻa e hohaʻa ko ʻení. Hangē ko ʻení, kapau naʻá ke maʻu ha taha ʻo e ngaahi hohaʻa ko ʻení, te ke lava ʻo fakalaulauloto ki he ngaahi fehuʻí mo ako ʻa e ngaahi potufolofola ʻoku hiki atu hili ʻa e ngaahi fakamatalá.
Fakakaukau ke fakaʻaliʻali e ngaahi fakamatala ko ʻení pe hiki kinautolu ʻi he palakipoé.
ʻOku ʻikai ke u fakapapauʻi pe kuó u ului feʻunga ke vahevahe ʻa e ongoongoleleí. ʻE anga fēfē hano tokoniʻi koe ʻe he ngaahi sīpinga ʻo e ngaahi foha ʻo Mōsaiá? (Vakai ki he Mōsaia 28:1–5.) ʻI hoʻo lau ha niʻihi ʻo e ngaahi veesi ko ʻení, kumi ha ngaahi founga te ke lava ai ʻo ului lahi ange: Ngāue 3:19; Sēmisi 5:20; ʻĪnosi 1:2–5; Mōsaia 3:19; 5:2; 27:25; ʻAlamā 5:12–14; 22:15–18; 53:10; Hilamani 15:7; 3 Nīfai 9:20.
ʻOku ou manavasiʻi naʻa fakasītuʻaʻi au. Toe fakamanatu ʻi he Mōsaia 28:2–4 ʻa e ngaahi ʻuhinga naʻe fiemaʻu ai ʻe he ngaahi foha ʻo Mōsaiá ke vahevahe ʻa e ongoongoleleí neongo naʻe fakakaukau ha niʻihi tokolahi ʻe ngalingali he ʻikai tali ia ʻe he kau Leimaná. ʻE tokoni fēfē nai kiate koe ʻa e ngaahi ʻuhinga ko ʻení? ʻE tokoni fēfē nai kia koe hoʻo fakakaukau ki he meʻa kuo fai ʻe he Fakamoʻuí maʻaú (mo lava ke fai maʻá e niʻihi kehé) ke ke ikunaʻi hoʻo manavasiʻí?
Kuo teʻeki ke u hoko ko e faʻifaʻitakiʻanga lelei taha hono moʻui ʻaki ʻo e ongoongoleleí. Kimuʻa pea ului e ngaahi foha ʻo Mōsaiá, naʻa nau malanga ʻo fakafepakiʻi e ongoongoleleí (vakai ki he Mōsaia 27:8–10), ka ʻi he hili ʻenau fakatomalá, ne nau hoko ko e niʻihi ʻo e kau faifekau lavameʻa taha ʻi he Tohi ʻa Molomoná (vakai ki he ʻAlamā 17:4). Ko e hā nai ha meʻa ʻoku ueʻi koe ʻe he tā sīpinga ko ʻení ke ke fakahokó? Ko e hā ha ngaahi sīpinga kehe ʻi he folofolá te ke lava ʻo fakakaukau ki ai ʻe ala tokoni?
Fakaafeʻi ha kau ako ʻe niʻihi ke vahevahe e meʻa ne nau maʻú mo e founga ʻe ala tokoni ai ki he meʻa ʻoku fai ki ai e hohaʻá.
Fakakaukau ke fakaʻaliʻali e ngaahi sētesi ko ʻení ki he kau akó ʻi heʻenau fakalaulauloto mo fakahoko ha tali ʻi heʻenau tohinoa akó.
-
“Ko e taha ʻo e ngaahi meʻa mahuʻinga taha naʻá ku ako mei he ngaahi foha ʻo Mōsaiá ko e …”
-
“Ko e meʻa ʻe taha ʻoku ou ongoʻi ʻoku finangalo e ʻEikí ke u fai ke u muimui ai ki he sīpinga ʻo e ngaahi foha ʻo Mōsaiá ko e …”
-
“Ke fakahoko ha ngāue lelei ʻi he meʻá ni, te u lava ʻo …”
Fakaafeʻi e kau akó ke vahevahe. Mahalo ʻe tokoni ke fakaʻosi ʻaki hano vahevahe hoʻo fakamoʻoní, ongó, mo e ngaahi fakakaukaú pe fakaafeʻi ha toko taha pe toko ua ʻo e kau akó ke fai ia.