Mōsaia 25–28

Vakai Fakalūkufuá

ʻI he hoko ʻa ʻAlamā ko e taulaʻeiki lahi ʻi he Siasi ʻo e Fakamoʻuí, naʻá ne maʻu ha fakahinohino mei he ʻEikí ke tokoniʻi ʻa e niʻihi ne nau fai ha ngaahi angahala mamafá. Naʻá ne ʻiloʻi mo e Tuʻi ko Mōsaiá ʻa e loto-mamahi ʻi he mamata ki he angatuʻu ʻa e kau mēmipa ʻo e fāmilí ki he Fakamoʻuí. Tuʻunga ʻi he ʻaloʻofa ʻa Kalaisí, naʻe faifai pea tāpuekina kinaua ke na ongoʻi ʻa e fiefia ʻi heʻena mamata ki he fakatomala ʻa e niʻihi ko ʻeni ʻokú na ʻofa aí. Naʻe tokoniʻi ʻe he Fakamoʻuí ʻa ʻAlamā ko e Siʻí mo e ngaahi foha ʻo Mōsaiá, ʻa ia naʻe fakamatalaʻi ko e kau “fakalielia taha ʻi he kau fai angahalá” (Mōsaia 28:4), ke nau liliu “ki ha tuʻunga ʻo e anga-māʻoniʻoni” (Mōsaia 27:25). ʻI he hili ʻenau uluí, naʻe ʻalu e ngaahi foha ‘o Mōsaiá ke malanga ‘aki e ongoongoleleí ki he kau Leimaná.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Mōsaia 26

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e natula ʻofa mo faʻa fakamolemole ʻo e Tamai Hēvaní mo Sīsū Kalaisí pea mo e ʻuhinga ʻoku totonu ke tau fakatomala ai mei heʻetau ngaahi angahalá.

• Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi fehuʻi ʻoku nau maʻu fekauʻaki mo e fakatomalá. Poupouʻi ke nau lau ʻa e Mōsaia 26, ʻo kumi e tali ki he ngaahi fehuʻi ko ʻení.

• Laʻipepa Tufa: “Ngaahi Hohaʻa fekauʻaki mo e Fakatomalá”

• Fokotuʻu ki hono akoʻi ʻi he konifelenisi vitioó: Fakakaukau ke ʻīmeili pe ʻave ʻa e laʻipepa tufá ki hoʻo kau akó kimuʻa he kalasí. Kapau ʻokú ke fili ha foʻi hohaʻa ki he kalasí kotoa ke nau ako, fakakaukau ke fakaafeʻi e kau akó ke taipeʻi ʻi he polokalama fetalanoaʻakí ʻa e mataʻitohi ʻo e foʻi hohaʻa ʻoku nau loto ke akó. ʻE tokoni ʻeni ke ke ʻilo ʻa e meʻa ʻoku fie ako ʻe he tokolahi taha ʻo e kau akó. Kapau ʻoku fili fakafoʻituitui ʻe he kau akó ha tūkunga hohaʻa ke ako, fakaʻatā ke nau fakaʻosi ʻenau akó, pea fakakaukau leva ke fakaafeʻi ke nau taipeʻi ʻi he polokalama fetalanoaʻakí ʻa e mataʻitohi ʻo e tūkunga hohaʻa naʻa nau akó. Makatuʻunga ʻi he ngaahi fiemaʻu ʻa e kalasí, te ke lava ʻo kole ki he kau ako ne nau ako e tūkunga hohaʻa tatau ke aleaʻi e meʻa ne nau akó. Pe ke fakahoko ʻi ha founga kehekehé, te ke lava ʻo fili ha kau ako ne nau ako ha ngaahi tūkunga hohaʻa kehekehe ke aleaʻi e meʻa ne nau akó.

Mōsaia 27:1–24

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau ʻiloʻi ha ngaahi founga ke tokoniʻi ai ʻa kinautolu ʻoku fakasītuʻaʻi e ngaahi akonaki ʻa Sīsū Kalaisí ke nau toe foki kiate Ia.

• Teuteu ʻa e tokotaha akó: Fakakaukau ke fakaafeʻi e kau akó ke nau teuteu ke vahevahe ha ngaahi talanoa mei he folofolá ʻa ia naʻe tokoniʻi ai ʻe he ʻEikí ke liliu ha taha naʻe hē pe angatuʻu.

• Vitiō: “ʻOku Ului ʻa ʻAlamā ko e Siʻí ki he ʻEikí” (11:32; mamata mei he taimi 3:06 ki he 6:59)

• Fokotuʻu ki hono akoʻi ʻi he konifelenisi vitioó: ʻI he ofi ki he fakaʻosinga ʻo e lēsoní, ke tokoni ki he kau akó ke ako fekauʻaki mo e ʻaukaí pe fai ʻenau fakamoʻoní, fakakaukau ke fakakulupu kinautolu ʻi he ngaahi loki fakatahá. Fakapapauʻi ke fakaʻaliʻali e ngaahi fakahinohino ki hono ako ʻo e tefitó, fokotuʻu ha taimi fakangatangata (hangē ko ʻení, miniti ʻe ono), pea talaange ki he kau akó te nau vahevahe ʻa e meʻa ne nau akó ʻi he taimi te nau foki ai ʻo fakataha ko ha kalasí.

Mōsaia 27:24–37

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau fakatomala mo fakahaaʻi ʻa e tui ʻe lava ʻe he Fakamoʻuí ʻo liliu honau lotó.

• Teuteu ʻa e tokotaha akó: Fakakaukau ke fakaafeʻi e kau akó ke fakakaukau ki ha ngaahi meʻa ʻi natula ʻoku liliu fakaʻaufuli (hangē ko e liliu ha katapila ki ha kiʻi pepe). Te nau lava ʻo faitaaʻi ha meʻa ke fakaʻaliʻali ki he kalasí.

• Ngaahi ʻīmisi ke fakaʻaliʻalí: Ko ha ʻīmisi ʻo ha katapila mo ha kiʻi pepe; ko ha fakatātā ʻo e hā ʻa e ʻāngeló kia ʻAlamā ko e Siʻí; ko ha fakatātā ʻo Sīsū Kalaisi

•  

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ha tokotaha lahi ne papi ului ki he Siasí ke haʻu ki he kalasí pe ke lekooti ha foʻi vitiō ʻokú ne vahevahe ai e founga kuo tokoniʻi ai ia ʻe he Fakamoʻuí ke ne liliú. Fakapapauʻi ke maʻu ha ngofua mei hoʻo kouʻotineitá mo e taki lakanga fakataulaʻeiki fakalotofonuá kimuʻa pea toki fakaafeʻi mai ʻa e tokotahá.

Mōsaia 28

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke fakatupulaki ʻenau holi ke vahevahe ʻa e ongoongoleleí.

• Teuteu ʻa e tokotaha akó: Fakakaukau ke fakaafeʻi e kau akó ke talanoa ki ha taha ʻoku nau tui ʻoku ului moʻoni ki he ongoongolelei ʻo Sīsū Kalaisí. Ko e hā naʻe tokoni ki he tokotaha fakafoʻituitui ko iá ʻi he hala ʻo ʻene uluí? Mahalo te ke fakakaukau foki ke fakaafeʻi e kau akó ke vakavakaiʻi ʻenau loto-holi ke vahevahe ʻa e ongoongoleleí.

• Fakatātā: Ko ha meʻa (pe ko ha ʻīmisi ʻo ha meʻa) ʻokú ke saiʻia ʻaupito ai, ʻokú ke fiefia ke vahevahe mo e niʻihi kehé

•  

• Fokotuʻu ki hono akoʻi ʻi he konifelenisi vitioó: Ke kamata e lēsoní, fakakaukau ke ʻomi pe fakaʻaliʻali ha fakatātā ʻo ha meʻa ʻokú ke saiʻia ʻaupito ai pea ʻokú ke fiefia ke vahevahe mo e niʻihi kehé. Vahevahe ʻeni mo e kau akó kimuʻa pea fai ange ʻa e ʻuluaki fehuʻi ʻi he lēsoní.

Toe Vakaiʻi Hono 9 ʻo e Fakataukei Fakatokāteliné

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e tokāteline ʻoku akoʻi ʻi he ngaahi potufolofola fakataukei fakatokāteliné pea fakamatalaʻi ia ki he niʻihi kehé.

• Teuteu ʻa e tokotaha akó: Fakaafeʻi e kau akó ke omi mateuteu ke vahevahe fekauʻaki mo ha taimi naʻe tāpuekina ai ʻenau moʻuí ʻo fakafou ʻi ha taha naʻá ne fakamatalaʻi ange ʻa e folofolá kiate kinautolu pe ko ha taimi naʻa nau lava ai ʻo tāpuekina ha moʻui ʻa ha taha kehe ʻaki hono fakaʻaongaʻi pe fakamatalaʻi ʻa e folofolá.

• Vitiō: “Ko Hono Fakaloloto ʻEtau Ului kia Sīsū Kalaisí” (10:05; mamataʻi mei he taimi 6:34 ki he 7:31)

• Fokotuʻu ki hono akoʻi ʻi he konifelenisi vitioó: Fakaʻaliʻali e ngaahi sitepu ʻe tolú ki he mahino mo hono fakamatalaʻi ʻo e ngaahi moʻoni mei he folofolá. Tuku ke teuteu e kau akó ke vahevahe ha veesi fakataukei fakatokāteline mo ha taha kehe ʻo fakaʻaongaʻi e ngaahi sitepu ko ʻení. Fakakaukau ke vahevahe e kau akó ki he fanga kiʻi loki fakatahá ke fakafaivaʻi hono fakamatalaʻi ʻa e potufolofola fakataukei fakatokāteline ne nau filí.