“Mōsaia 21–24, Konga 2: Ko e Tafoki ki he ʻEikí ke Fakahaofi mei he Ngaahi Faingataʻá,” Tohi ʻa Molomoná – Tohi Lēsoni ʻa e Faiakó (2024)
“Mōsaia 21–24, Konga 2,” Tohi ʻa Molomoná – Tohi Lēsoni ʻa e Faiakó
Mōsaia 21–24, Konga 2
Ko e Tafoki ki he ʻEikí ke Fakahaofi mei he Ngaahi Faingataʻá
ʻOkú ke faʻa tali fēfē e taimi ʻokú ke aʻusia ai e ngaahi ʻahiʻahí mo e ngaahi faingataʻá? ʻOkú ke pehē ko e hā ʻoku ʻunu ai ha kakai ʻe niʻihi ke ofi ange ki he ʻEikí kae holomui ha niʻihi meiate Iá? ʻOku tau ako ʻi he Mōsaia 21–24, naʻe tafoki ʻa e kakai ʻo Limihaí mo e kakai ʻo ʻAlamaá ki he ʻEikí ke maʻu ha mālohi mo ha fakatauʻatāina mei he nofo pōpulá. ʻOku fakataumuʻa e lēsoni ko ʻení ke tokoniʻi koe ke ke falala ki he Tamai Hēvaní mo Sīsū Kalaisi ke tokoniʻi koe ke ke ikunaʻi hoʻo ngaahi faingataʻá.
Tokoniʻi e kau akó ke nau lava ʻo fakatokangaʻi ʻa e ivi tākiekina ʻo e ʻEikí ʻi heʻenau moʻuí. ʻI hono ako ʻe he kau akó ʻa e founga naʻe tāpuakiʻi ai ʻe he Fakamoʻuí e kakai ʻi he folofolá, tokoni ke nau fakatokangaʻi foki ʻa e fatongia ʻokú Ne fakahoko ʻi heʻenau moʻuí. Fakaafeʻi e kau akó ke nau fakakaukau ki he founga ʻoku tokoniʻi ai kinautolu ʻe he Fakamoʻuí ʻaki hono ʻoange ha fakamoʻui mo ʻoange ha mālohi kiate kinautolu.
Teuteu ʻa e tokotaha akó: ʻE lava ke talanoa e kau akó mo ha mēmipa ʻo e fāmilí fekauʻaki mo ha ʻahiʻahi pe faingataʻa naʻe aʻusia ʻe he mēmipa ʻo e fāmilí pea mo ha ngaahi founga naʻe fakamālohia ai ia ʻe he ʻEikí ke kātekina iá.
Ngaahi ʻEkitivitī Ako ʻOku Ala Fakahokó
Ko e lēsoni ʻeni hono ua ʻo e ongo lēsoni ʻoku fakatefito ʻi he Mōsaia 21–24. Kapau kuo teʻeki ke ke akoʻi ʻa e Konga 1 kimuʻa he lēsoni ko ʻení, fakahoko leva ia. Kapau ʻoku fakangatangata e taimi kalasí pea ko e lēsoni pē ʻe taha ʻi he Mōsaia 21–24 ʻe lava ke akoʻí, fakakaukau ki he founga ʻe lava ke fakatahaʻi lelei ai e ongo lēsoní.
Fehangahangai mo e ngaahi ʻahiʻahi
ʻOku fakataumuʻa ʻa e ʻekitivitī ko ʻení ke tokoniʻi e kau akó ke nau siviʻi pē kinautolu fekauʻaki mo ha ʻahiʻahi ʻoku nau lolotonga foua pe kuo nau aʻusia. Mahalo te ke fie fakakau ha ngaahi fakamatala pe ngaahi fehuʻi ʻi he palakipoé ke tataki e kau akó ʻi heʻenau lekooti ʻenau ngaahi fakakaukaú. ʻOku ʻikai fiemaʻu ke vahevahe ʻe he kau akó ʻenau ngaahi talí ʻi he konga ko ʻeni ʻo e lēsoní.
ʻI he lēsoni kuo ʻosí, naʻe fakaafeʻi koe ke ke fakakaukau ki ha ʻahiʻahi ʻokú ke lolotonga aʻusia pe kuó ke aʻusia. Mahalo kuó ke ako ha niʻihi ʻo e ngaahi moʻoni ʻi hoʻo ako ʻa e Mōsaia 21–24 naʻe tokoni ke mahino kiate koe ʻa e ʻuhinga ʻoku fakaʻatā ai ʻe he ʻEikí ke ke aʻusia ʻa e ngaahi ʻahiʻahí. ʻI he ʻaho ní, toe fakakaukau ki ho ngaahi ʻahiʻahí, ka ʻi he taimi ko ʻení fakakaukau ki he founga kuó ke fehangahangai ai mo kinautolú. Mahalo te ke fie hiki ha ngaahi faingataʻa pe lavameʻa naʻá ke aʻusia mo ha ngaahi founga kuó ke ongoʻi ai e ivi tākiekina pe ngaahi tāpuaki ʻa e ʻEikí.
Ko e mālohi fai fakahaofi ʻo e ʻEikí
Fakakaukau ke fakaafeʻi ha toko taha pe tokolahi ange ʻo e kau akó ke fakamatalaʻi fakanounou ʻa e meʻa ʻoku nau manatuʻi mei he lēsoni kimuʻá fekauʻaki mo e nofo pōpula ʻa e kakai ʻo Limihaí pea mo e kakai ʻo ʻAlamaá. Kapau ʻe fiemaʻu, ʻe lava ke fakaʻaongaʻi ʻa e fakamatala fakanounou ko ʻení.
Mahalo te ke manatuʻi haʻo ako ki he kakai ʻo Limihaí (ʻi he fonua ko Nīfaí) mo e kakai ʻo ʻAlamaá (ʻi he fonua ko Heilamí). Naʻá na fakatou aʻusia ha ngaahi ʻahiʻahi faingataʻa lolotonga hono fakapōpulaʻi kinautolu ʻe he kau Leimaná. ʻOku ʻasi ʻi he fakatātā ko ʻení ʻenau ngaahi fononga ʻi he Mōsaia 21–24.
Te ke ako he ʻahó ni ki he founga naʻe fakahaofi ai ʻe he ʻEikí ʻa e ongo kulupú fakatouʻosi mei he nofo pōpulá pea tataki ki he fonua ko Seilahemalá. ʻI hoʻo akó, manatuʻi hoʻo ngaahi ʻahiʻahí pea fekumi ki he ngaahi moʻoni ʻe tokoni ke ke ʻiloʻi ai e ngaahi founga ʻoku fakaʻaongaʻi ai ʻe he ʻEikí ʻa Hono mālohi faifakahaofí ʻi hoʻo moʻuí.
ʻOku fakataumuʻa ʻa e ʻekitivitī ko ʻení ke tokoni ki he kau akó ke nau ako ki hono fakatauʻatāinaʻi ʻo e kakai ʻo Limihaí mo e kakai ʻo ʻAlamaá. Mahalo ʻe tokoni ke vahevahe ʻa e kalasí ki ha fanga kiʻi kulupu iiki pea vahe ki he ngaahi kulupu ko ʻení ke nau ako fekauʻaki mo e kakai ʻo Limihaí pe ko e kakai ʻo ʻAlamaá. ʻE lava leva ke fakamatalaʻi fakanounou ʻe he kau akó ʻenau ngaahi fakamatalá pea vahevahe ha ngaahi veesi pe kupuʻi lea mahuʻingamālie pea mo e ngaahi tefitoʻi moʻoni naʻe makehe kiate kinautolú.
Faʻu ‘a e saati ko ení ‘i hoʻo tohinoa akó. Fakapapauʻi ʻokú ke fakaʻatā ha konga lahi ke lekooti ai ha ngaahi tali ʻi he puha takitaha.
Mōsaia 21–24: Mālohí mo e Fakahaofí
Tohi ʻa Molomoná – Tohi Lēsoni ʻa e Faiakó (2024)—“Mōsaia 21–24, Konga 2: Ko e Tafoki ki he ʻEikí ke Fakahaofi mei he Ngaahi Faingataʻá”
|
Kakai ʻo Limihaí |
Kakai ʻo ʻAlamaá | |
|---|---|---|
|
Ko e hā ha ngaahi ngāue naʻe fai ʻe he kakaí ke nau maʻu ai e tokoni ʻa e ʻEikí? | ||
|
Naʻe kau fēfē ʻa e ʻEikí ʻi honau fakahaofí? | ||
|
Ko e hā ha ngaahi kupuʻi lea manako ʻe niʻihi ke manatuʻi mei he ngaahi veesi ko ʻení? |
© 2023 by Intellectual Reserve, Inc. All rights reserved.
Hili hano ʻoange ha taimi feʻunga maʻá e kau akó ke nau akó, fakaafeʻi kinautolu ke vahevahe ʻenau tali ki he ngaahi fehuʻi ʻoku lisi atu ʻi he sātí. Fakapapauʻi ke fakaʻatā ha kau ako tokolahi ke vahevahe ʻenau ngaahi fakakaukaú.
-
Ko e hā ha niʻihi ʻo e ngaahi ngāue naʻe fai ʻe he kakaí ke maʻu ai e tokoni ʻa e ʻEikí?
-
Ko e hā naʻá ke ako fekauʻaki mo e ʻEikí mo Hono mālohí ʻi hoʻo ako e ongo talanoa ko ʻení?
-
Ko e hā ha kupuʻi lea naʻá ke saiʻia taha ai naʻá ke maʻu mei ha taha ʻo e ngaahi veesi naʻá ke akó?
Ko hono ʻiloʻi mo fiefia ʻi he mālohi ʻo e ʻEikí
ʻI he ngaahi moʻoni lahi ʻoku lava ke tau ako mei he ngaahi veesi ko ʻení, mahalo kuó ke fakatokangaʻi mei hoʻo akó ko e taimi ʻoku tau tafoki ai ki he Tamai Hēvaní, te Ne poupouʻi kitautolu lolotonga hotau ngaahi ʻahiʻahí pea fakahaofi kitautolu ʻi he taimi pē ʻAʻana (vakai ki he Mōsaia 21:14–16). ʻOku tau toe ako foki ko e taimi ʻoku tau kātekina fiefia mo faʻa kātaki ai hotau ngaahi ʻahiʻahí, ʻe lava ʻe he ʻEikí ʻo fakamālohia kitautolu ke tau lava ʻo fuesia lelei ʻetau ngaahi kavengá (vakai ki he Mōsaia 24:15).
-
ʻOku tākiekina fēfē ʻe hono ʻiloʻi e ngaahi meʻa ko ʻeni fekauʻaki mo e ʻEikí ʻa e founga ʻokú ke fehangahangai ai mo ho ngaahi ʻahiʻahí?
-
Kuo tokoniʻi mo fakamālohia fēfē koe ʻe he ʻEikí, pe ko ha taha ʻokú ke ʻilo, ke ke kātekina ha ʻahiʻahi pe fuesia ha kavenga? Naʻe tākiekina fēfē ʻe he aʻusia ko ʻení hoʻo ngaahi ongo kiate Iá?
Fakakaukau ke vahevahe ha sīpinga fakataautaha ko ha konga ʻo e fealēleaʻaki ki he fehuʻi naʻe toki fakahokó.
ChurchofJesusChrist.org.
Ko hoʻo ngaahi sitepu hokó
Hili hono vahevahe e ngaahi fakahinohino ko ʻení, fakakaukau ke fakaʻaliʻali ʻi he palakipoé ʻa e ngaahi fehuʻi ke tali ʻe he kau akó koeʻuhí ke nau lava ʻo vakai ki he ngaahi fehuʻí ʻi heʻenau tohí.
Fakakaukau ki he meʻa kuó ke ako he ʻahó ni ʻe lava ʻo tokoni atu ʻi he ngaahi ʻahiʻahi ʻokú ke fehangahangai mo iá.
Tānaki atu ha kōlomu foʻou ki he saati naʻá ke faʻu kimuʻa ange ʻi he lēsoní pea fakahingoa ʻa e ʻotu ki ʻolunga ʻo e kōlomu ko ʻení “Ko Au.” Fakakakato leva hoʻo kōlomu foʻoú ʻaki hono tali e ngaahi fehuʻi ko ʻení. (Kapau ʻoku ʻikai ha feituʻu ke fokotuʻu ai ha kōlomu foʻou, tali e ngaahi fehuʻí ʻi ha feituʻu kehe ʻi hoʻo tohinoa akó.)
-
Ko e hā ha ngaahi ngāue te ke lava ʻo fai ke maʻu lahi ange ai e tokoni ʻa e ʻEikí ʻi ho ngaahi ʻahiʻahi?
-
Ko e hā ha meʻa kuó ke ako he ʻahó ni fekauʻaki mo e ʻEikí ʻe lava ʻo tokoni ke mahino kiate koe ʻa e faʻahinga tokoni pe mālohi te Ne lava ʻo ʻoatu kiate koé?
-
Ko e hā ha ngaahi foʻi lea pe kupuʻi lea mei he ngaahi veesi naʻá ke akó ʻokú ke pehē ʻe lava ke felāveʻi mo ho ngaahi tūkungá? Ko e hā hono ʻuhingá?
Fakakaukau ke fakaafeʻi ha niʻihi te nau loto-fiemālie ke vahevahe ʻenau ngaahi tali ki he ngaahi fehuʻi naʻe toki ʻosi. Fakamoʻoni ki he ngaahi moʻoni kuo mou aleaʻi he ʻaho ní pea mo e mālohi ʻo e ʻEikí ke fakahaofi kitautolu mei hotau ngaahi faingataʻaʻiá.