Mōsaia 18–24

Vakai Fakalūkufuá

Naʻe akoʻi ʻe ʻAlamā hono kakaí ʻi he ngaahi Vai ʻo Molomoná fekauʻaki mo e fuakava ʻoku tau fai mo e ʻOtuá ʻi he taimi ʻoku tau papitaiso aí. Lolotonga iá, hili hono fakafisingaʻi ʻo ʻApinetaí, naʻe mole mei he Tuʻi ko Noá mo hono kakaí ʻa e ngaahi tāpuaki ʻo e malú pea ne nau aʻusia ha mamahi lahi. ʻOku fakamatalaʻi ʻe he Mōsaia 21–24 ʻa e ngaahi meʻa naʻe hoko ki he kakai ʻo Limihaí mo e kakai ʻo ʻAlamaá, ʻa ia naʻa nau fakatou fehangahangai ai mo ha ngaahi faingataʻa. Naʻe tafoki e ngaahi kulupu ko ʻení ki he ʻEikí ke maʻu ha mālohi mo fakatauʻatāina mei he nofo pōpulá.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Mōsaia 18

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e fuakava ʻo e papitaisó mo e founga te ne lava ʻo tākiekina ai honau vā fetuʻutaki mo e ʻOtuá pea mo e niʻihi kehé.

• Teuteu ʻa e tokotaha akó: Fakakaukau ke fakaafeʻi e kau akó ke ʻomi ha laʻitā pe meʻa ne nau tohi ʻi heʻenau tohinoá ʻi he ʻaho ʻo honau papitaisó ki he kalasí. ʻE lava foki ke nau ʻeke ki he niʻihi kehe ne nau ʻi aí, ʻa e meʻa ʻoku nau manatuʻí. ʻE lava ke haʻu mateuteu ha taha pē kuo teʻeki papitaiso ke vahevahe ha ngaahi fakakaukau mo ha ngaahi ongo naʻá ne aʻusia lolotonga ʻene ʻalu ki ha papitaiso, pe ko ha ngaahi fehuʻi ʻokú ne ala maʻu fekauʻaki mo e papitaisó.

• Ngaahi Vitioó: “Kalapu Tapu Kapekapé” (4:56); “Mata ke Mamata” (9:44; mamata mei he taimi 4:55 ki he 6:53); “[Ongo Vaʻe ʻo Teitoní]” (3:02)

• Fokotuʻu ki hono akoʻi ʻi he konifelenisi vitioó: Kimuʻa pea kamata e kalasí, fakakaukau ke fakaafeʻi e kau akó ke ʻoatu ha laʻitā naʻe faitaaʻi ʻi honau ʻaho papitaisó. Fakaʻaliʻali e ʻū tā ko ʻení ke kamata ʻaki e kalasí, pea fakaafeʻi e kau akó ke feinga ke ʻiloʻi pe ko e ʻū taá ʻo hai. Fakaafeʻi leva e kau akó ke vahevahe ʻenau ngaahi manatu mo e ngaahi ongo mei honau papitaisó.

Fakataukei Fakatokāteliné: Mōsaia 18:8–10

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea fakafolofola mahuʻinga ʻo e Mōsaia 18:8–10, fakamatalaʻi ʻa e tokāteline ʻoku akoʻi ʻi he ngaahi veesi ko iá, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí ʻo fakaʻaongaʻi ʻa e potufolofola ko ʻení.

• Teuteu ʻa e tokotaha akó: Fakakaukau ke fakaafeʻi e kau akó ke nau feinga ke ako maʻuloto e potufolofola mo e kupuʻi lea fakafolofola mahuʻinga ki he Mōsaia 18:8–10.

• Meʻa ke fakaʻaliʻalí: Ko e kupuʻi lea fakafolofola mahuʻinga ki he Mōsaia 18:8–10, tatau ai pē pe ʻoku hiki ʻi he palakipoé ʻi ha hokohoko kehekehe pe tohi ʻi ha ʻū laʻipepa kehekehe ʻo fokotuʻu ʻi he palakipoéʻo ʻikai ʻi he hokohoko totonú

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali e ngaahi tefitoʻi moʻoni ʻe tolu ʻo hono maʻu ʻo e ʻilo fakalaumālié ko ha ngaahi ʻuluʻi tohi ʻi ha fakamatala ʻe lava ke fakatonutonu ʻe he kau akó. Fakaafeʻi e kau akó ke toe vakaiʻi e ngaahi tefitoʻi moʻoni ko ʻení ʻaki hano taipeʻi e meʻa ʻoku nau manatuʻi fekauʻaki mo e tefitoʻi moʻoni takitaha ʻi lalo ʻi hono ʻuluʻi tohí.

Mōsaia 19–20

Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó ha holi lahi ange ke tokanga ki he ngaahi fakatokanga mo e ngaahi akonaki ʻa e kau palōfita ʻa e ʻEikí.

• Teuteu ʻa e tokotaha akó: Fakaafeʻi e kau akó ke nau fakakaukau ki ha sīpinga mei he folofolá pe ko ʻenau moʻuí ʻokú ne poupouʻi e fakamatala ko ʻení. Poupouʻi kinautolu ke nau omi mateuteu ki he kalasí ke vahevahe ʻenau sīpingá. “ʻOku mahino pē mei he hisitōliá ʻoku ʻi ai ʻa e malu, nonga, tuʻumālie, mo e fiefia ʻi hono tali e faleʻi fakaepalōfitá (M. Russell Ballard, “His Word Ye Shall Receive,” Ensign, May 2001, 65).

• Ngaahi ʻAtá: ʻU fakatātā ʻo e ngaahi meʻa pe meʻangāue ki he malú; ko ha fakatātā ʻo ʻApinetai ʻi he ʻao ʻo e Tuʻi ko Noá; fakatātā ʻo e ngaahi fononga ʻi he vahaʻa ʻo Seilahemala mo e fonua ko Nīfaí

• Naunau ki he akó: Ngaahi tatau ʻo e Ki Hono Fakamālohia ʻo e Toʻu Tupú (kiʻi tohi, 2011) maʻá e fānau ako ʻoku ʻikai lava ʻo maʻu ʻa e kiʻi tohí ʻi ha meʻangāue fakaʻilekitulōniká.

• Fokotuʻu ki hono akoʻi ʻi he konifelenisi vitioó: ʻI he kamataʻanga ʻo e kalasí, kole ki he kau akó ke nau fekumi ʻi honau ʻapí ki ha meʻa ʻoku fakataumuʻa ke maluʻi kinautolu. Fakaafeʻi ke nau fakaʻaliʻali ki he kalasí ʻa e meʻa ko iá.

Mōsaia 21–24, Konga 1

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ongoʻi ʻoku tupulaki ʻenau falala ki he Tamai Hēvaní mo Sīsū Kalaisi ʻi he taimi ʻoku nau aʻusia ai e ngaahi ʻahiʻahí mo e ngaahi faingataʻá ʻi heʻenau moʻuí.

• Teuteu ʻa e tokotaha akó: ʻE lava ke fakaafeʻi e kau akó ke fakakaukau ki ha ʻahiʻahi pe faingataʻa he kuohilí naʻá ne tokoniʻi kinautolu ke nau aʻusia ha tupulaki pe ʻunu ke ofi ange ki he ʻEikí. Poupouʻi e kau akó ke nau haʻu mateuteu ke vahevahe e meʻa ne nau akó pe founga naʻe tākiekina lelei ai kinautolu ʻe he faingataʻa ko ʻení.

• Ngaahi Meʻá: Ko ha kato āfei mo ha ngaahi meʻa mamafa ke faʻo ki ai

• ʻĪmisí: Ko e fakatātā ʻo e ngaahi fononga ʻi he vahaʻa ʻo Seilahemalá, fonua ko Nīfaí, ngaahi Vai ʻo Molomoná, mo e fonua ko Heilamí

• Vitiō: “Ko e Finangalo ʻo e ʻOtuá” (3:02)

• Fokotuʻu ki hono akoʻi ʻi he konifelenisi vitioó: ʻI he konga ko e “ʻUhinga ʻoku fakaʻatā ai ʻe he ʻEikí ʻa e ngaahi ʻahiʻahí,” fakakaukau ke fakaafeʻi ha vaheua ʻe taha ʻo e kalasí ke nau ako ʻa e ngaahi veesi fekauʻaki mo e kakai ʻo Limihaí pea ako ʻe he vaeua ʻe tahá ʻa e ngaahi veesi fekauʻaki mo e kakai ʻo ʻAlamaá. Fakaʻaongaʻi e fanga kiʻi loki fakatahá ke lava e kau akó ʻo aleaʻi e meʻa ne nau akó, pea ʻeke ki he kulupu takitaha ʻa e ngaahi fehuʻi vakaiʻí.

Mōsaia 21–24, Konga 2

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke falala ki he Tamai Hēvaní mo Sīsū Kalaisi ke tokoniʻi kinautolu ʻi honau ngaahi faingataʻaʻiá.

• Teuteu ʻa e tokotaha akó: ʻE lava ke talanoa e kau akó mo ha mēmipa ʻo e fāmilí fekauʻaki mo ha ʻahiʻahi pe faingataʻa naʻe aʻusia ʻe he mēmipa ʻo e fāmilí pea mo ha ngaahi founga naʻe fakamālohia ai ia ʻe he ʻEikí ke ne kātekina iá.

• ʻĪmisí: Ko e fakatātā ʻo e ngaahi fononga ʻi he vahaʻa ʻo Seilahemalá, fonua ko Nīfaí, ngaahi Vai ʻo Molomoná, mo e fonua ko Heilamí

• Laʻipepa Tufa: “Mōsaia 21–24: Mālohí mo e Fakahaofí”

•  

• Fokotuʻu ki hono akoʻi ʻi he konifelenisi vitioó: ʻI he ʻosi hono fakafonu ʻe he kau akó ʻa e sātí, fakakaukau ke fakaʻaongaʻi ʻa e meʻangāue palakipoé pe vahevahe hoʻo screen mo kinautolu ke nau lava ʻo fakaʻaliʻali e ngaahi kupuʻi lea ʻoku nau saiʻia taha ai mei he ngaahi potufolofola ne nau akó.