Toe Vakaiʻi Hono 9 ʻo e Fakataukei Fakatokāteliné

Mahino mo hono Fakamatalaʻi ʻo e Ngaahi Moʻoní

ʻOku ʻi he ngaahi potufolofola fakataukei fakatokāteliné ha ngaahi moʻoni mahuʻinga fekauʻaki mo Sīsū Kalaisi mo ʻEne ongoongoleleí. ʻE lava ke tokoni ʻa e lēsoni ko ʻení ke mahino kiate koe ʻa e tokāteline ʻoku akoʻi ʻi he ngaahi potufolofola fakataukei fakatokāteliné pea fakamatalaʻi kinautolu ki he niʻihi kehé.

Tokoni ki he kau akó ke fakatupulaki ʻenau malava ke aleaʻi mo e niʻihi kehé e ngaahi meʻa ʻoku tui ki ai e ongoongoleleí. ʻI hono fakamatalaʻi ʻo e tokāteliné mo e ngaahi tefitoʻi moʻoní, vahevahe ha ngaahi fakakaukau mo ha ngaahi aʻusia mahuʻingá pea mo e fakamoʻoni ki he moʻoni fakalangí ʻoku fakamaʻalaʻala ai ʻa e mahino ʻoku maʻu ʻe he kau akó ki he tokāteline mo e ngaahi tefitoʻi moʻoni ʻo e ongoongoleleí pea fakatupulaki ʻa e malava ʻa e kau akó ke akoʻi e ongoongoleleí ki he niʻihi kehé. ʻOange maʻu pē ha ngaahi faingamālie ke fakamatalaʻi ai ʻe he kau akó ʻa e meʻa ʻoku nau akó.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe fekauʻaki mo ha taimi naʻe tāpuekina ai ʻenau moʻuí ʻo fakafou ʻi ha taha naʻá ne fakamatalaʻi ange ʻa e folofolá kiate kinautolu pe ko e taimi naʻa nau lava ai ʻo tāpuekina ha moʻui ʻa ha taha kehe ʻaki hono fakaʻaongaʻi pe fakamatalaʻi ʻa e folofolá.

Ngaahi ʻEkitivitī Ako ʻOku Ala Fakahokó

ʻE ala fiemaʻu ke akoʻi ha lēsoni ki he potufolofola fakataukei fakatokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakavāhengá pe vahefonuá pe kouʻōtineitá ke fakapapauʻi ʻe akoʻi e lēsoni kotoa pē ʻo e fakataukei fakatokāteline ki he potufolofolá ʻi he lele ʻa e seminelí.

Ko hono fakamatalaʻi ʻo e ngaahi moʻoní mei he folofolá

Fakaʻaliʻali e fehuʻi ko ʻení ki he kau akó pea fakaafeʻi ke nau hiki ʻenau ngaahi talí ʻi he palakipoé.

• Ko e hā ha ngaahi tūkunga ʻe niʻihi ʻe lava ai ʻe hoʻo tuʻunga malava ke mahino mo fakamatalaʻi ʻa e folofolá ʻo fakahoko pe kuó ne fakahoko ha liliu ʻi he moʻui ʻa ha taha?

Naʻe vahevahe ʻe ʻEletā ʻAnolofo Valenisuela ʻo e Kau Fitungofulú ha aʻusia ʻi he taimi naʻá ne lava ai ʻo tāpuekina e niʻihi kehé ʻaki ʻene akoʻi mahino e folofolá. Sio he vitiō “Ko Hono Fakaloloto ʻEtau Ului kia Sisu Kalaisí” mei he taimi 6:34 ki he 7:31, maʻu ʻi he ChurchofJesusChrist.org, pe lau ʻa e fakamatala ʻi laló.

Lolotonga ʻeku ngāue fakafaifekau ʻi heʻeku kei talavoú, naʻá ku fakatokangaʻi ai naʻe liliu e moʻui ʻa e kakai tokolahi ʻi heʻemau akoʻi e ngaahi folofolá. Naʻá ku ʻilo ai ki he mālohi naʻe maʻu aí pea mo e founga te ne lava ai ʻo liliu ʻetau moʻuí. Ko e tokotaha kotoa pē naʻa mau akoʻi ki ai e ongoongolelei kuo fakafoki maí naʻe makehe pea kehekehe ʻenau ngaahi fiemaʻú. Naʻe hanga ʻe he ngaahi folofola māʻoniʻoní—ʻio, ʻa e ngaahi kikite ne tohi ʻe he kau palōfita māʻoniʻoní—ʻo ʻomi kinautolu ke tui ki he ʻEikí pea fakatomala mo liliu honau lotó.

Naʻe fakafonu kinautolu ʻe he ngaahi folofolá ʻaki ʻa e fiefia ʻi heʻenau maʻu e ueʻi fakalaumālie, fakahinohino, fakafiemālie, ivi, mo e tali ki heʻenau ngaahi fiemaʻú. Naʻe fili honau tokolahi ke fakahoko ha ngaahi liliu ʻi heʻenau moʻuí pea kamata ke tauhi e ngaahi fekau ʻa e ʻOtuá. (Arnulfo Valenzuela, “Ko Hono Fakaloloto ʻEtau Ului kia Sīsū Kalaisí,” Liahona, Nōvema 2021, 60)

• ʻOkú ke pehē ko e hā naʻe fuʻu ongo mālohi pehē ai ʻa e folofolá ki he kakai naʻe akoʻi ʻe ʻEletā Valenisuelá?

  Mahalo ʻe fiemaʻu ʻe he kau akó ha taimi ke nau fakakaukau ai ki he ngaahi fehuʻi ko ʻení. ʻE ala tokoni ke fai e ngaahi fehuʻí pea fakaafeʻi e kau akó ke fakakaukau ki heʻenau talí ʻi hoʻo vahevahe hoʻo talí.

• Ko e fē ha taimi kuo tāpuekina ai hoʻo moʻuí ʻo fakafou ʻi ha taha ʻokú ne fakamatalaʻi atu ʻa e folofolá kiate koe?

• Ko e fē ha taimi kuó ke lava ai ʻo faitāpuekina ʻa e niʻihi kehé ʻi hono fakamatalaʻi e folofolá kiate kinautolú?

Fakalaulauloto ki he founga te ke lava ai ʻo fakatupulaki hoʻo malava ke mahino mo fakamatalaʻi ʻa e folofolá. Fakakaukau ki he founga ʻe tokoniʻi ai koe ʻi hoʻo fai iá ke ke hoko ʻo hangē ange ko e Fakamoʻuí, ʻa ia naʻá Ne faʻa fakaʻaongaʻi e folofolá ke akoʻi e niʻihi kehé (vakai ki he Luke 24:27; Sione 10:34–36).

Fakataukei Fakatokāteline ʻo e Tohi ʻa Molomoná

ʻOku hiki atu ʻi lalo ʻa e ʻuluaki potufolofola fakataukei fakatokāteline ʻe 12 ʻo e Tohi ʻa Molomoná. Fakakaukau ke fakaʻilongaʻi e ngaahi potufolofola ko ʻení fakataha mo honau ngaahi kupuʻi lea fakafolofola mahuʻingá kapau kuo teʻeki ke ke fai ia.

Fakaʻaliʻali e saati ko ʻení ke lava e kau akó ʻo vakai ki ai lolotonga e lēsoní.

ʻUluaki Potufolofola Fakataukei Fakatokāteline ʻe 12 mo e Ngaahi Kupuʻi Lea Mahuʻingá

Tohi ʻa Molomoná – Tohi Lēsoni ʻa e Faiakó (2024)

Potufolofolá	Kupuʻi Lea Folofola Mahuʻingá
Potufolofolá 1 Nīfai 3:7	Kupuʻi Lea Folofola Mahuʻingá “Te u ʻalu ʻo fai ʻa e ngaahi meʻa kuo fekau ʻe he ʻEikí.”
Potufolofolá 2 Nīfai 2:25	Kupuʻi Lea Folofola Mahuʻingá “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.”
Potufolofolá 2 Nīfai 2:27	Kupuʻi Lea Folofola Mahuʻingá “ʻOku nau tauʻatāina ke fili ʻa e tauʻatāiná mo e moʻui taʻengatá … pe … pōpulá mo e maté.”
Potufolofolá 2 Nīfai 26:33	Kupuʻi Lea Folofola Mahuʻingá “ʻOku tatau ʻa e kakai fulipē ʻi he ʻao ʻo e ʻOtuá.”
Potufolofolá 2 Nīfai 28:30	Kupuʻi Lea Folofola Mahuʻingá ʻE foaki ʻe he ʻOtuá “ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.”
Potufolofolá 2 Nīfai 32:3	Kupuʻi Lea Folofola Mahuʻingá “Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.”
Potufolofolá 2 Nīfai 32:8–9	Kupuʻi Lea Folofola Mahuʻingá “Kuo pau ke mou lotu maʻu ai pē.”
Potufolofolá Mōsaia 2:17	Kupuʻi Lea Folofola Mahuʻingá “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
Potufolofolá Mōsaia 2:41	Kupuʻi Lea Folofola Mahuʻingá “[Ko] kinautolu ʻoku tauhi ʻa e ngaahi fekau ʻa e ʻOtuá … ʻoku nau monūʻia ʻi he meʻa kotoa pē.”
Potufolofolá Mōsaia 3:19	Kupuʻi Lea Folofola Mahuʻingá “Liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí.”
Potufolofolá Mōsaia 4:9	Kupuʻi Lea Folofola Mahuʻingá “Tui pē ki he ʻOtuá; … tui ʻokú Ne maʻu ʻa e poto kotoa.”
Potufolofolá Mōsaia 18:8–10	Kupuʻi Lea Folofola Mahuʻingá Ke “papitaiso ʻa kimoutolu ʻi he huafa ʻo e ʻEikí, ko e fakamoʻoni … kuo mou fai ha fuakava mo Ia.”

© 2023 by Intellectual Reserve, Inc. All rights reserved.

Fakakaukau ki he founga ʻe lava ke tokoniʻi ai koe ʻe hono fakaʻaongaʻi ʻo e sīpinga ko ʻení ke mahino lelei ange kiate koe mo fakamatalaʻi e ngaahi moʻoni mei he folofolá.

Fakaʻaliʻali pe ʻoange ki he kau akó ʻa e sīpinga sitepu ʻe tolu ko ʻení.

• Sitepu 1: Maʻu ha mahino ki he puipuituʻa ʻo e folofolá pea fakapapauʻi ʻa e founga ke fakamatalaʻi ai ia ʻi he lea pē ʻaʻau. ʻE lava ke kau ʻi he puipuituʻá ʻa e feituʻu ʻoku hoko ai e ngaahi meʻá mo e tokotaha ʻokú ne fai e leá pea ko hai ʻokú ne lea ki aí pea ko e hā hono ʻuhingá. ʻE lava ke tokoni ʻi he ngāué ni ʻa hono lau e ʻuluʻi fakamatala ʻo e vahé mo ha ngaahi veesi ʻe niʻihi.

• Sitepu 2: Maʻu ha mahino ki he ngaahi moʻoni ʻoku maʻu ʻi he folofolá ʻo feʻunga ke lava ʻo fakamatalaʻi kinautolu. Ke tokoniʻi koé, fakakaukau ke fai kiate koe ha ngaahi fehuʻi hangē ko ʻení: Ko e hā ʻa e ngaahi tefitoʻi pōpoaki ʻoku feinga ʻa e tokotaha faʻu tohí ke vahevahé? Ko e hā ʻoku akoʻi ʻe he potufolofolá fekauʻaki mo e Tamai Hēvaní mo Sīsū Kalaisí? Te u fakamatalaʻi fēfē ʻa e ngaahi moʻoní ʻi ha founga faingofua? Ko e hā ha ngaahi tūkunga ʻe ala ʻaonga ai ki ha taha ke mahino kiate ia ʻa e pōpoaki ko ʻení?

• Sitepu 3: Fakakaukau ki he founga ʻe lava ke tokoniʻi ai ʻe he ngaahi moʻoni naʻá ke ʻiló ʻa e tokotaha ʻokú ke fakamatalaʻi ki aí. Fakakaukau ki he ngaahi tūkunga ʻo ʻenau moʻuí mo e ngaahi palopalema ʻoku nau fehangahangai mo iá. Fakafehokotaki e ngaahi moʻoní mo e ngaahi tūkunga mo e ngaahi palopalema ko ʻení.

Akoako Fakahoko

Fili ha potufolofola fakataukei fakatokāteline ʻe taha pe ua mei he saati ʻi ʻolungá ʻokú ke fiemaʻu ke mahino lelei ange pe ʻokú ke ongoʻi ʻe hoko ko ha tāpuaki kiate koe pe ko ha taha ʻokú ke ʻilo. Fakaʻaongaʻi e sīpinga naʻá ke toki akó ke hiki ai e founga te ke fakamatalaʻi ai ia ki ha taha kehé.

Hili ha taimi feʻunga ke ako mo teuteu ai, fakakaukau ke fakaafeʻi e kau akó ke nau fakafaivaʻi hono fakamatalaʻi e ngaahi moʻoni fakafolofolá ʻiate kinautolú.

ʻI hoʻo ʻosí, tali e ngaahi fehuʻi ko ʻení.

• Naʻe tokoni fēfē nai hono fakaʻaongaʻi e saati ko ʻení ke fakaloloto ange hoʻo mahinó? Naʻe tokoni fēfē ia kiate koe ʻi hoʻo teuteuʻi mo fakamatalaʻi e potufolofolá ki he niʻihi kehé?

• ʻE tokoniʻi fēfē koe ʻe he ngaahi moʻoni naʻá ke maʻu mo fakamatalaʻí ki hoʻo ngaahi tūkunga fakatāutahá?

• ʻE tokoniʻi fēfē koe ʻi hono fakaʻaongaʻi e sīpinga ko ʻení ke mahino mo fakamatalaʻi maʻu pē ʻa e folofolá ke ke hoko ai ʻo hangē ko e Fakamoʻuí?