Mōsaia 29–ʻAlamā 4

Vakai Fakalūkufuá

Naʻe akoʻi ʻe ha tangata ko hono hingoá ko Nēhoa, ʻi he lotolotonga ʻo e kau Nīfaí, ha tokāteline hala ʻa ia naʻá ne fakatupu ai e kakai ʻi hono kuongá, mo ha niʻihi kehe ʻi he ngaahi taʻu naʻe hoko aí, ke nau fakafisingaʻi honau Fakamoʻuí. Koeʻuhí ko hono ivi tākiekiná, naʻe “kamata ke fakatangaʻi ʻa kinautolu naʻe kau ki he siasi ʻo e ʻOtuá” (ʻAlamā 1:19). Kimui ange aí, naʻe taki ʻe ha tangata ko hono hingoá ko ʻAmelikai ha fakafepakiʻi ʻa e kau Nīfaí ʻa ia naʻe tupunga ai ha mate ʻa ha kakai tokolahi ʻi he taú. ʻI he fakalau ʻa e taimí, naʻe fakatupu ʻe he hīkisia mo e fakakikihi naʻe fakahaaʻi ʻe ha niʻihi ʻo e kāingalotu ʻo e Siasi ʻo e Fakamoʻuí ke tuka ʻa e fakalakalaka ʻa e Siasí. Ko hono olá, naʻe ueʻi ʻa ʻAlamā ke ne fakafisi mei he fakamaau lahí ke līʻoa ʻene moʻuí ki hono malanga ʻaki ʻa e folofola ʻa e ʻOtuá.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

ʻAlamā 1:1–18

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ʻiloʻi mo fakasītuʻaʻi ʻa e ngaahi akonaki hala te ne lava ʻo fakatafoki kinautolu meia Sīsū Kalaisí.

• Teuteu ʻa e tokotaha akó: ʻE lava ke ako ʻe he kau akó ʻa e konga “Te u lava ʻo ʻiloʻi mo fakasītuʻaʻi ʻa e ngaahi akonaki halá” ʻi he lēsoní “ 3–9 Sune. Mōsaia 29–ʻAlamā 4: ‘Naʻa Nau Tuʻu Maʻu mo Tuʻu Taʻe-faʻa-ueʻi ’” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2024.

• Vitiō: “Fakatomalá: Ko ha Fili Fakafiefia” (15:45; mamata mei he taimi 9:17 ki he 10:10)

• Fokotuʻu ki hono akoʻi ʻi he konifelenisi vitioó: ʻI he maʻu ʻe he kau akó ha ngaahi potufolofola ʻokú ne fakatonutonu ʻa e ngaahi akonaki hala ʻa Nēhoá, te nau lava ʻo vahevahe ʻenau ngaahi talí ʻo fakaʻaongaʻi ʻa e polokalama fepotalanoaʻaki.

ʻAlamā 1:19–33

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau tali faivelenga mo ongoʻi nonga neongo kapau ʻoku nau fehangahangai mo ha fakatanga koeʻuhí ko ʻenau hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

• Teuteu ʻa e tokotaha akó: Fakaafeʻi ʻa e kau akó ke nau fakakaukau ki ha ngaahi taimi ʻi heʻenau moʻuí naʻe poleʻi ai ʻenau tuí pea mo e founga naʻa nau tali ʻakí.

• Vitiō: “Ko e Mahuʻinga—mo e Tapuaki—ʻo e Tuʻunga Fakaākongá” (14:45; mamata mei he taimi 0:25 to 2:05)

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ʻa e kau akó ke nau fakaʻaongaʻi ʻa e polokalama fetalanoaʻakí ke hiki ai ʻa e ngaahi ngāue naʻe fai ʻe he kau Nīfaí. ʻE maʻu heni ʻe he kau akó ha lisi te nau lava kotoa ʻo vakai ki ai, ʻo lava ke nau tānaki atu ai ki heʻenau lisí ha ngaahi ngāue naʻe maʻu ʻe honau kaungāakó.

ʻAlamā 2–3

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e ngaahi nunuʻa ʻo ʻenau fili ʻa e tokotaha ke muimui ki ai lolotonga ʻo e moʻui ko ʻení.

• Teuteu ʻa e tokotaha akó: Fakaafeʻi ʻa e kau akó ke nau lau pe fanongo ki he ʻAlamā 2–3 kimuʻa pea nau toki omi ki he kalasí. ʻAi ke nau fakakaukau ki he meʻa te nau lava ʻo ako mei he fakamatala ʻi he ongo vahe ko ʻení.

• Ngaahi meʻa ke fakaʻaliʻalí: Fakaʻaliʻali ʻa e saati ʻoku ui ko e “Ko e totongi meiate ia ʻokú ne fie talangofua ki aí,” pe hiki tatau ia ki he palakipoé ke fakafonu ʻe he kau akó

• Ngaahi Meʻá: ʻŪ laʻipepa ke fakafofongaʻi ʻa e paʻangá; kato pe puha ʻe ua

ʻAlamā 4

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau fakaʻaongaʻi ʻa e folofola ʻa e ʻOtuá ke ikunaʻi ʻaki ʻa e hīkisiá mo e fakakikihí.

• Teuteu ʻa e tokotaha akó: Fakaafeʻi ʻa e kau akó ke nau omi mateuteu ke vahevahe ha potufolofola pe fakamatala mei ha taki ʻo e Siasí fekauʻaki mo e loto-fakatōkilaló.

• Lēsoni fakatātaá: Hiki ʻa e “Maka tūkiaʻanga” ʻi ha laʻipepa kuo fakapipiki ʻi he falikí ʻi he hūʻanga ki he loki akó

• Vitiō: “ʻOku Malangaʻi ʻe ʻAlamā ʻa e Folofola ʻa e ʻOtuá” (10:33; mamata mei he taimi 0:36 ki he 1:59)

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ha saati ʻi he kotoa ʻo e lēsoní, fakaʻaliʻali ʻi he tafaʻaki ʻe taha ʻa e ngaahi palopalema naʻe aʻusia ʻe ʻAlamā mo hono kakaí pea fakaʻaliʻali ʻi he tafaʻaki ʻe tahá ʻa e ngaahi solovaʻangá. Fakaafeʻi ʻa e kau akó ke nau tānaki ki he saati ko ʻení ʻi he lele ʻa e lēsoní pea hiki ia ki heʻenau tohinoa akó.

Toe Vakaiʻi ʻo e Fakataukei Fakatokāteliné Hono 10

Taumuʻa ʻo e lēsoní: ʻE maʻu ʻe he kau akó ʻi he lēsoni ko ʻení ha ngaahi faingamālie ke nau akoako fakaʻaongaʻi ai ha niʻihi ʻo e ngaahi potufolofola fakataukei fakatokāteline kuo nau ako ʻi he taʻú ni ki heʻenau moʻuí.

• Teuteu ʻa e tokotaha akó: Fakaafeʻi ʻa e kau akó ke fili ha taha ʻo e fuofua ngaahi fakamoʻoni fakataukei fakatokāteline ʻe 12 ʻoku nau pehē ʻoku ʻuhingamālié. Poupouʻi ʻa e kau akó ke nau omi mateuteu ke vahevahe ʻa e ʻuhinga ʻoku ʻuhingamālie ai kiate kinautolu ʻa e potufolofola kuo nau filí.

• Meʻa ke fakaʻaliʻalí: Ko e saati mo e fuofua potufolofola fakataukei fakatokāteline ʻe 12

• Fokotuʻu ki hono akoʻi ʻi he konifelenisi vitioó: ʻE lava ke fakaʻaongaʻi ʻe he kau akó ʻa e polokalama fetalanoaʻakí ke tohi ha ngaahi faingataʻa pe palopalema kehekehe ʻoku ʻi he māmaní. Te nau lava leva ʻo tohi ha ngaahi potufolofola fakataukei fakatokāteline ʻe lava ʻo tokoni ki he kakaí ke nau fehangahangai mo e ngaahi faingataʻa pe palopalema ko iá.