“ʻAlamā 7:14–27: ʻ[Ko e] Hala ʻOku Fakatau Atu ki he Puleʻanga ʻo e ʻOtuá,’” Tohi ʻa Molomoná – Tohi Lēsoni ʻa e Faiakó (2024)
“ʻAlamā 7:14–27,” Tohi ʻa Molomoná – Tohi Lēsoni ʻa e Faiakó
ʻAlamā 7:14–27
ʻ“[Ko e] Hala ʻOku Fakatau Atu ki he Puleʻanga ʻo e ʻOtuá”
ʻOku faʻa lea ʻaki ʻe he kau palōfitá ʻa e “hala fāsiʻi mo lausiʻí” (2 Nīfai 31:19), ko e “hala ʻo e fuakavá,” pe “ko e hala ʻoku fakatau ki he puleʻanga ʻo e ʻOtuá” (ʻAlamā 7:19). Naʻe fakatokangaʻi ʻe ʻAlamā naʻe ʻi he hala ko ʻení ʻa e kakai ʻo Kitioné peá ne akoʻi kiate kinautolu ʻa e founga ke nau hokohoko atu ai ʻi aí pea hoko ʻo tatau ange mo e ʻOtuá. ʻOku fakataumuʻa ʻa e lēsoni ko ʻení ke tokoniʻi koe ʻi hoʻo feinga ke maʻu ʻa e ngaahi ʻulungaanga faka-Kalaisí ʻi hoʻo muimui ʻi he hala ʻoku fakatau ki he ʻOtuá.
Paotoloaki ha ongo ʻo e ʻofá mo e fakaʻapaʻapá. Poupouʻi e kau akó ke nau fakahaaʻi ʻa e ʻofa faka-Kalaisí mo hono tali loto-fiemālie ʻa e mēmipa takitaha ʻo e kalasí. ʻE lava ʻe hono fai iá ʻo fakamolū e loto ʻo e kau mēmipa ʻo e kalasí ʻoku faingataʻaʻiá.
Teuteu ʻa e tokotaha akó: Fakaafeʻi ʻa e kau akó ke nau fakakaukau ki he ngaahi ʻulungaanga faka-Kalaisi ʻoku nau fie fakatupulaki kakato angé pea ke nau omi mateuteu ke vahevahe hono ʻuhingá.
Ngaahi ʻEkitivitī Ako ʻOku Ala Fakahokó
Ko ha hala ke muimui ai
Fakakaukau ke fakaʻaliʻali ʻa e ʻīmisi ko ʻení (pe ha ʻīmisi faitatau mo ia) lolotonga hoʻo fai ʻa e fehuʻi ko ʻení.
-
Ko e hā ha ngaahi lelei ʻo hono maʻu ha hala ke muimui aí?
Fakakaukau ke ke mamata ʻi he “Fakafoki Fakaʻahó” mei he taimi 1:40 ki he 3:25 ke vakai kia ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene fakamatalaʻi ʻa e meʻa ʻoku hoko ki he kakai ʻoku fononga taʻe ʻi ai ha hala pe ngaahi fakaʻilonga falalaʻangá. ʻOku maʻu ʻa e vitiō ko ʻení ʻi he ChurchofJesusChrist.org.
Hili e kikite ʻa ʻAlamā ki he kakai ʻo Kitioné fekauʻaki mo e moʻui mo e Fakalelei ʻa Sīsū Kalaisí, naʻá ne vahevahe ha ngaahi lea fakalotolahi kiate kinautolu.
Lau ʻa e ʻAlamā 7:19–20 ke ʻiloʻi e meʻa naʻe lea ʻaki ʻe ʻAlamā fekauʻaki mo e ʻOtuá, Hono halá, mo e kakai ʻo Kitioné.
Fakakaukau ke fakaʻilongaʻi ʻa e kupuʻi lea “hala ʻoku fakatau atu ki he puleʻanga ʻo e ʻOtuá” ʻi he veesi 19. Te ke ako lahi ange he ʻahó ni fekauʻaki mo e hala ko ʻení.
-
ʻOkú ke pehē te ke lava fēfē ʻo tala pe ʻokú ke ʻi he hala ʻoku fakatau ki he puleʻanga ʻo e ʻOtuá?
Fakakaukau ke tā ʻa e fakatātā ko ʻení ʻi he palakipoé pea fakahingoa ia “[Ko e] hala ʻoku fakatau atu ki he puleʻanga ʻo e ʻOtuá.” Fakaafeʻi ʻa e kau akó ke nau tā ha meʻa tatau ʻi heʻenau tohinoá.
Tā ha fakatātā tatau mo ʻení pea fakahingoa ia “[Ko e] hala ʻoku fakatau atu ki he puleʻanga ʻo e ʻOtuá.”
Ko e hala ʻoku fakatau ki he puleʻanga ʻo e ʻOtuá ʻoku faʻa ui ia ko e hala fāsiʻi mo lausiʻí pe ko e hala ʻo e fuakavá. ʻOku tau ʻi he hala ko ʻení ʻi he taimi ʻoku tau muimui ai ki he sīpinga mo e ngaahi akonaki ʻa Sīsū Kalaisí. ʻI heʻetau hokohoko atu ʻi he hala ko ʻení ʻoku tataki ai kitautolu ki he moʻui taʻengatá (vakai ki he 2 Nīfai 31:19–20).
ʻI hoʻo akó, fakalaulauloto pe ʻokú ke vakai kiate koe ʻi he hala ʻoku fakatau ki he puleʻanga ʻo e ʻOtuá. Fekumi ki he ngaahi akonaki ʻoku tokoni atu ke mahino lelei ange kiate koe ʻa e hala ko ʻení pea mo e ngaahi tāpuaki ʻoku foaki atu ʻe he ʻEikí ʻi hoʻo muimui ki aí.
“[Ko e] hala ʻoku fakatau atu ki he puleʻanga ʻo e ʻOtuá”
Naʻe fakamatalaʻi ʻe ʻAlamā ha ngaahi ngāue te tau lava ʻo fai ʻa ia te ne tataki kitautolu ke tau foki ki he ʻao ʻo e ʻOtuá.
Lau ʻa e ʻAlamā 7:14–16, pea hiki ʻa e ngaahi ngāue ko ʻení ʻi he foʻi halá pe ʻi he tafaʻakí ʻi hoʻo fakatātaá.
-
Ko e hā e meʻa naʻe tokoni atu e ngaahi veesi ko ʻení ke mahino kiate koe fekauʻaki mo e ʻuhinga ʻo e nofo ʻi he hala ʻoku fakatau ki he ʻOtuá?
Fakakaukau ke fakangofua ha kau ako ʻe niʻihi ke hiki ʻenau ngaahi tali ki he fehuʻi kimuʻa ʻi he palakipoé. ʻE lava leva ke fakaafeʻi ʻe he kau ako ko ʻení ha niʻihi kehe te nau lava ʻo haʻu ʻo siakaleʻi ha tali ʻi he palakipoé ʻoku ngali mahuʻinga makehe kiate iá. ʻE lava leva ke kole ki he tokotaha ako naʻá ne siakaleʻi ʻa e talí ke ne fakamatalaʻi ʻa e ʻuhinga ʻokú ne ongoʻi ai ko ha ngāue mahuʻinga ʻeni ʻoku tokoni ke tau foki ai ki he ʻao ʻo e ʻOtuá.
Ko e moʻoni ʻe taha te tau lava ʻo ako mei he ngaahi veesi ko ʻení ko e taimi ʻoku tau fakatomala ai, fakahoko ha ngaahi fuakava mo e ʻOtuá, mo maʻu e ngaahi ouau ʻo e ongoongolelei ʻo Sīsū Kalaisí, ʻoku tau muimui ai ʻi he hala ʻoku fakatau ki he puleʻanga ʻo e ʻOtuá.
-
ʻOku tokoni fēfē ʻa e ngaahi ngāue ko ʻení ke teuteuʻi kitautolu ke foki ki he ʻao ʻo e ʻOtuá?
-
Ko e hā ha ngaahi tāpuaki te tau ala aʻusia ʻi he moʻui ko ʻení ʻi heʻetau muimui ʻi he hala ʻo e ʻOtuá?
Fakakaukau ke fakaafeʻi ʻa e kau akó ke vahevahe e ngaahi tāpuaki kuo nau aʻusia ʻi heʻenau muimui ʻi he hala ʻo e ʻOtuá. Te ke lava foki ʻo vahevahe ha ngaahi sīpinga mei hoʻo moʻui fakatāutahá.
Ko hono fakatupulaki ha ngaahi ʻulungaanga faka-Kalaisí lolotonga hoʻo fononga ʻi Hono halá
Naʻe fakamatalaʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ko e tāpuaki ʻe taha ʻo e muimui ki he hala ʻo e fuakava ʻa e ʻOtuá ko ʻene “taki kitautolu ke tau hoko ʻo tatau mo Iá” (“Mou Fili he ʻAhó Ni,” Liahona, Nōvema 2018, 104).
Fakakaukau ke fakaʻaliʻali e ngaahi ʻīmisi ko ʻeni ʻo e Fakamoʻuí (pe ngaahi ʻīmisi kehe ʻokú ke filí) lolotonga hono fai e ngaahi fehuʻi ko ʻení ki he kau akó. Te ke lava ʻo vahevahe e ngaahi ʻulungaanga ʻo Sīsū Kalaisi ʻokú ke saiʻia taha aí kimuʻa pea fai e ngaahi fehuʻí.
-
Ko e hā ha ngaahi ʻulungaanga ʻo Sīsū Kalaisi ʻokú ke saiʻia taha ai? Ko e hā hono ʻuhingá?
-
Ko e hā ha ngaahi founga ʻokú ke fie hoko ai ʻo hangē ko e Fakamoʻuí? Ko e hā ha meʻa te ne lava ʻo ʻai ke faingataʻa iá? Te tau ikunaʻi fēfē nai ʻa e ngaahi faingataʻa ko ʻení ʻi he tokoni ʻa e ʻEikí?
-
Ko e fē ha taimi kuó ke ongoʻi ai ʻa e holi lahi taha ke ke hangē ko Iá? Ko e hā e meʻa naʻe hoko ʻi hoʻo moʻuí naʻá ne ʻai koe ke ke ongoʻi peheé?
Naʻe fakahā ʻe ʻAlamā ha niʻihi ʻo e ngaahi ʻulungaanga faka-Kalaisi ʻoku totonu ke tau feinga ke maʻu ʻi heʻetau ʻaʻeva ʻi he hala ʻoku fakatau ki he puleʻanga ʻo e ʻOtuá.
Lau ʻa e ʻAlamā 7:22–25 ʻo kumi ʻa e ngaahi ʻulungaanga mo e ngaahi tōʻonga faka-Kalaisi ʻokú ke sio ʻoku ʻomi pe fakamatalaʻi maí. Fakakaukau ke fakaʻilongaʻi e ngaahi meʻá ni ʻi hoʻo folofolá. Te ke lava foki ʻo fakakaukau ke lisi ʻa e ngaahi ʻulungaanga mo e tōʻonga ko ʻení ʻi he foʻi halá pe ʻi he tafaʻaki ʻo hoʻo fakatātaá.
ʻOku fakataumuʻa ʻa e ʻekitivitī ko ʻení ke tokoni ki he kau akó ke nau ako lahi ange fekauʻaki mo e ngaahi ʻulungaanga faka-Kalaisi ʻoku hā ʻi he ʻAlamā 7:22–25 pea faʻu ha palani ke fakatupulaki ha taha pe lahi ange ʻo e ngaahi ʻulungaanga ko ʻení. ʻE ʻaonga ke ke fakakakato ʻa e ʻekitivitī ko ʻení kimuʻa pea kamata e kalasí koeʻuhí ke ke mateuteu lelei ange ke tokoniʻi e kau akó ʻi heʻenau ngāué. Fakapapauʻi ke ʻoange ha taimi feʻunga ki he kau akó ke fakakakato ʻa e ʻekitivitī ko ʻení.
Fakakaukau ke fakaʻaliʻali ʻa e ngaahi fakahinohino ko ʻení.
Fili ʻi he faʻa lotu ha ʻulungaanga ʻoku hā ʻi he ʻAlamā 7:22–25 ʻokú ke ongoʻi ʻoku finangalo ʻa e Tamai Hēvaní ke ke fakatupulaki, pea fakakakato leva ʻa e ʻekitivitī ko ʻení. Lekooti hoʻo ngaahi fakakaukaú ʻi lalo ʻi hoʻo fakatātaá pe ʻi ha feituʻu kehe ʻi hoʻo tohinoa akó.
-
Ako lahi ange fekauʻaki mo e ʻulungaanga ko ʻení. Fakakaukau ke fakaʻaongaʻi ha ngaahi maʻuʻanga tokoni fakafolofola hangē ko e Fakahinohino ki he Ngaahi Folofolá ke tokoni ʻi he meʻá ni. Hiki ʻa e meʻa naʻá ke akó.
-
Lisi e ngaahi faingataʻa ʻo hono fakatupulaki e ʻulungaanga naʻá ke filí mo e ʻuhinga ʻokú ke pehē ʻoku tuku ai ʻe he ʻOtuá ke ke aʻusia e ngaahi faingataʻa ko iá.
-
Hiki ha founga kehekehe ʻe ua ki he tolu ʻe lelei ange ai hoʻo moʻuí hili hono maʻu e ʻulungaanga ko ʻení.
-
Fakahā ha sīpinga mei he moʻui ʻa e Fakamoʻuí ʻa ia naʻá Ne fakafōtunga ai ʻa e ʻulungaanga ko ʻení. Pe ko hoʻo lisi ha sīpinga mei he moʻui ʻa ha taha ʻokú ke ʻiloʻi ʻa ia naʻá ne fakafōtunga ai ʻa e ʻulungaanga faka-Kalaisi ko ʻení.
-
Feinga ke ʻiloʻi ha ngāue ʻe taha pe lahi ange te ke lava ʻo fai te ne fakaafeʻi e tokoni ʻa e ʻOtuá ʻi hoʻo fāifeinga ke fakatupulaki e ʻulungaanga ko ʻení. Faʻu ha palani ki he founga ke fakahoko ai ʻa e ngāue ko iá ʻi hoʻo moʻuí. Ko e founga ʻe taha te ke ala feinga ai ke fakahoko ʻa e ngāue ko ʻení ko haʻo talanoa mo e Tamai Hēvaní ʻi hoʻo ngaahi lotu fakaʻahó fekauʻaki mo hoʻo fakalakalaká pea kolea ʻEne tokoní ʻi he meʻa ʻokú ke tōnounou aí.
Fakakaukau ke vahevahe fakakulupu iiki hoʻo kalasí. ʻE lava ke fakamatalaʻi nounou ʻe he tokotaha takitaha ʻi he kulupú ʻa e meʻa naʻá ne ako mo ongoʻi fekauʻaki mo e ʻulungaanga naʻá ne filí pea mo e ʻuhinga ʻokú ne fie fakatupulaki ai iá. Pe ko ʻenau vahevahe ʻa e ʻulungaanga naʻa nau filí pea mo e sīpinga mei he moʻui ʻa e Fakamoʻuí pe ko ha sīpinga mei he moʻui ʻa ha taha ʻoku nau ʻilo. Poupouʻi e kau akó ke nau ngāueʻi ʻenau ngaahi palaní. Fakamoʻoniʻi ange ʻe tokoniʻi kinautolu ʻe he Tamai Hēvaní mo Sīsū Kalaisi ʻi heʻenau ngaahi feingá.