ʻAlamā 8–12

Vakai Fakalūkufuá

Naʻe ngāue ʻaki ʻe ʻAlamā mo ʻAmuleki ʻa e tuí peá na tala ki he kakai ʻo ʻAmonaihaá ke nau fakatomala. Naʻá na fehangahangai mo ha kakai naʻa nau fakaʻaongaʻi ʻa e kākaá ke feinga ke taʻofi kinaua, pea naʻe fakahā ʻe he Laumālie Māʻoniʻoní ʻa e kākā ko iá kiate kinaua. ʻI he kamata ke ʻeke ʻe he loea ko Sisolomé ha ngaahi fehuʻi fakamātoato kia ʻAlamā mo ʻAmulekí, naʻe akoʻi ʻe ʻAlamā ko kinautolu ʻoku ʻikai fakafefeka honau lotó te nau lava ʻo ako ke ʻilo ʻa e ngaahi meʻa ʻa e ʻOtuá. Naʻá ne akoʻi foki ʻa e palani ʻo e huhuʻí mo poupouʻi e kakaí ke nau fakafuofuaʻi honau lotó.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

ʻAlamā 8

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau fanongo mo talangofua ki he Tamai Hēvaní ʻi heʻenau moʻuí.

• Teuteu ʻa e tokotaha akó: Fakaafeʻi ʻa e kau akó ke nau lotu ʻo fehuʻi ki he Tamai Hēvaní pe ko e hā ʻokú Ne finangalo ke nau fai ke muimui kakato ange ai kiate Iá.

• Ngaahi Vitiō: “ʻOku Fakahaofi ʻa ʻAlamā mo ʻAmuleki ʻe he Mālohi ʻo e ʻOtuá” (22:56; mamata mei he taimi 0:36 ki he 2:22 pea mei he 2:22 ki he 4:03); “ ʻOku ʻIkai Hokonoa ʻa e Tuí, ka ʻi hoʻo Fili Ki ai” (15:01; mamata mei he taimi 1:40 ki he 4:25)

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ʻa e kau akó ke kuikui honau matá, fakafanongo, mo fakakaukauloto lolotonga hoʻo huluʻi e ongo mei he “ʻOku Fakahaofi ʻa ʻAlamā mo ʻAmuleki ʻi he Mālohi ʻo e ʻOtuá” mei he taimi 2:22 ki he 4:03. Te ke lava ʻo fakaafeʻi ʻa e kau akó ke nau fakamatalaʻi ʻa e meʻa ʻoku nau sioloto ki aí.

ʻAlamā 9

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke nau fakatokangaʻi mo manatuʻi ʻa e ngaahi tāpuaki kuo foaki ange ʻe he ʻEikí kiate kinautolú.

• Teuteu ʻa e tokotaha akó: Fakakaukau ke fakaafeʻi ʻa e kau akó ke nau fakaʻaongaʻi ha miniti ʻe taha pe ua ke hiki ha ngaahi sīpinga ʻo e ngaahi tāpuaki kuo nau maʻu mei he Tamai Hēvaní mo Sīsū Kalaisí.

• Meʻa ke fakaʻaliʻalí: Ko e saati ʻokú ne fakafehoanaki ʻa e kau Leimaná ki he kakai ʻo ʻAmonaihaá, ʻo fakaʻaliʻali pe hiki hano tatau ʻi he palakipoé; ko e ngaahi fehuʻi ʻi lalo ʻi he ʻuluʻi tohi “Ko e hā kuo foaki atu ʻe he ʻEikí maʻaú?” ke fakalaulauloto ki ai e kau akó

• Fokotuʻu ki hono akoʻi ʻi he konifelenisi vitioó: ʻI he fakaʻosinga ʻo e lēsoní, fakakaukau ke fakaafeʻi ʻa e kau akó ke nau talanoa ki ha niʻihi ʻo honau ngaahi tāpuakí pea mo ha founga ʻe taha te nau feinga ai ke manatuʻi kinautolú. Te ke lava ʻo ʻai ha tokotaha ako ʻe taha ke ne tokangaʻi pea fakaafeʻi ia ke ne ui ʻa e kau ako kehé ʻi he hokohoko ʻoku nau ʻasi ai ʻi heʻene screen. Fakamahinoʻi ange ʻe lava ke taʻe-kau ʻa e kau akó ʻi he faingamālie ko ʻení kapau ʻoku nau ongoʻi taʻefiemālie. Fakakaukau ke vahevahe foki mo hoʻo ngaahi fakakaukaú.

ʻAlamā 10–11

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau ongoʻingofua ange ʻa e Laumālie Māʻoniʻoní ke nau ʻilo ʻa e moʻoní mo fakatokangaʻi ʻa e ngaahi kākā olopoto ʻa e filí.

• Teuteu ʻa e tokotaha akó: Fakaafeʻi ʻa e kau akó ke nau fakalaulauloto ki he ngaahi founga ʻe ala feinga ai ʻa Sētane ke kākaaʻi kinautolú.

• Meʻa ke fakaʻaliʻalí: Ko e saati fekauʻaki mo e ngaahi akonaki halá, ke fakaʻaliʻali pe hiki tatau ʻi he palakipoé

• Naunau maʻá e kau akó (fili pē): Ko ha fakamatala ʻoku fakatefito ʻi he ʻAlamā 11:26–37, 40–41, ʻo ʻoange ki ha ongo tamaiki ako ke na lava ʻo lau pe fakatātaaʻi ʻa e fepōtalanoaʻaki ʻa ʻAmuleki mo Sisolomé (Kapau te ke fili ʻeni, toʻo e ngaahi kupuʻi lea hangē ko e “Naʻe pehē ʻe Sisolome” [ʻAlamā 11:28] mo e “Pea tali ange ʻe ia” [ʻAlamā 11:29].)

• Vitiō: “Tokanga Telia ʻa e Kovi ʻoku Toitoi Mai he Mata Malimalí” (9:52; sio mei he taimi 0:30 ki he 2:35)

• Fokotuʻu ki hono akoʻi ʻi he konifelenisi vitioó: Ke tokoni ke mahino ki he kau akó ʻa e meʻa naʻe feinga ʻa Sisolome ke totongi fakafihiʻi ʻaki ʻa ʻAmulekí, fakakaukau ke fakaafeʻi kinautolu ke nau fekumi ʻi he ʻinitanetí ke ʻiloʻi pe ko e hā ʻa e lahi ʻo e vahe ʻe lava ke maʻu ʻe ha taha ʻoku ʻi ai haʻane ngāue ʻoku vāhenga māʻolunga, hangē ko ha loea, ʻi homou koló ʻi haʻane ngāue ʻi ha uike ʻe ono.

ʻAlamā 12

Taumuʻa ʻo e lēsoní: ʻE lava ke tokoni ʻa e lēsoni ko ʻení ke fakafuofuaʻi ʻe he kau akó honau lotó mo ʻenau loto-fiemālie ke maʻu ʻa e folofola ʻa e ʻOtuá.

• Teuteu ʻa e tokotaha akó:Fakakaukau ke ʻoange ki he kau akó ha tatau ʻo e laʻipepa vakaiʻi fakataautaha ʻoku fakakau ʻi he lēsoni ko ʻení. Fakaafeʻi ke nau fakafuofuaʻi pē kinautolu pea fakalaulauloto ki he founga ʻoku tokoniʻi ai kinautolu ʻe heʻenau ngaahi talí.

• Naunau maʻá e kau akó: Ko ha ʻumea maʻá e kau akó ke nau fakafuo ha meʻa ke tokoniʻi kinautolu ke nau fakakaukau ki he loto-fefeká mo e loto-vaivaí (ʻE ala tokoni hono ʻoange ki ha niʻihi ʻo e kau akó ha ʻumea mōmoa pe ʻumea fefeká ʻi ha fealeaʻaki fekauʻaki mo e faikehekehe ʻo e loto-fefeká mo e loto-vaivaí.)

• ʻŪ Fakatātaá: ʻŪ tā fakatātā ʻo ha foʻi haati molū mo ha foʻi haati fefeka ʻi he palakipoé (Te ke lava ʻo tānaki atu ha fanga kiʻi fakamatala ki he ongo fakatātā ko ʻení lolotonga e lele ʻa e lēsoní.)

• Fokotuʻu ki hono akoʻi ʻi he konifelenisi vitioó: Fakakaukau ke tomuʻa fakaafeʻi ha kau ako ʻe niʻihi ke nau teuteu ke fakaʻaliʻali ha meʻa molū mo ha meʻa fefeka mei honau ngaahi ʻapí. Kole ki he kau ako ko ʻení ke fakamatalaʻi ʻa e founga ʻe ala tokoni ai e ngaahi meʻa ko ʻení ke mahino kiate kinautolu ʻa e mahuʻinga ke maʻu ha loto-vaivaí pea fakaʻehiʻehi mei hono fakafefeka honau lotó.

Toe Vakaiʻi Hono 11 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa e lēsoni ko ʻení ke tokoni ki he kau akó ke ako maʻuloto e ngaahi kupuʻi lea folofola mahuʻinga mei he fuofua potufolofola fakataukei fakatokāteline ʻe 12 ʻo e Tohi ʻa Molomoná pea fekumi ki ha mahino lahi ange ʻaki hano ʻeke mo tali ʻa e ngaahi fehuʻi kuo ueʻi fakalaumālié.

• Teuteu ʻa e tokotaha akó: Fakaafeʻi ʻa e kau akó ke fili mei he ʻuluaki potufolofola fakataukei fakatokāteline ʻe 12 ha potufolofola ʻe taha te nau fie ako lahi ange ki ai. Poupouʻi ke nau omi mateuteu ki he kalasí ke vahevahe ʻa e potufolofola naʻa nau filí pea mo ha fehuʻi ʻe taha ʻoku nau ongoʻi ʻe lava ʻo tokoni ke nau ako lahi ange fekauʻaki mo e potufolofola ko iá.

• Laʻipepa Tufa: “ʻUluaki Potufolofola Fakataukei Fakatokāteline ʻe 12 mo e Ngaahi Kupuʻi Lea Mahuʻingá”

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ʻa e kau akó ke nau vahevahe ʻi he polokalama fetalanoaʻakí ʻa e potufolofola fakataukei fakatokāteline naʻa nau filí pea mo e taha ʻo e ngaahi fehuʻi naʻa nau fakakaukau ki aí. Te ke lava leva ʻo poupouʻi kinautolu ke nau tali ʻa e ngaahi fehuʻi ʻa e niʻihi kehé.