ʻAlamā 8

Ko e Fanongo mo Talangofua ki he Tamai Hēvaní

ʻE lava ke faingataʻa ʻa e talangofua ki he Tamai Hēvaní, ka ʻoku fakatau ia ki he fiefia maʻongoʻonga tahá. ʻI he ngāue ʻaki ʻe ʻAlamā mo ʻAmuleki e tuí mo muimui ki he fakahinohino ʻa e ʻOtuá, naʻe tāpuakiʻi kinaua ʻe he ʻOtuá mo kinautolu naʻa nau feohí. ʻE lava ke tokoniʻi koe ʻe he lēsoni ko ʻení ke ke fanongo mo talangofua ki heʻEikí ʻi hoʻo moʻuí.

Tokoni ke ongoʻi ʻe he kau akó ʻoku fakamahuʻingaʻi ʻenau ngaahi tānakí. ʻOku fiemaʻu ki he fakafanongó ha faiako ʻoku tokanga lahi ange ki he ngaahi fiemaʻu ʻa e tokotaha akó kae ʻikai ko e meʻa hoko ʻi he fokotuʻutuʻu ʻo e lēsoní. Loto-fiemālie ke tuku ki he tafaʻakí ʻa e meʻa kuó ke palaní, ʻi hono ueʻi koe ʻe he Laumālié, ka ke fakafanongo ki he ngaahi ngaahi fakakaukau ʻa e kau akó. Tuku ke nau ʻiloʻi ʻi hoʻo leá mo e tōʻongá ʻokú ke vēkeveke ke fanongo kiate kinautolu.

Teuteu ʻa e tokotaha akó: Fakaafeʻi ʻa e kau akó ke nau lotu ʻo fehuʻi ki he Tamai Hēvaní pe ko e hā ʻokú Ne finangalo ke nau fai ke muimui kakato ange ai kiate Iá.

Ngaahi ʻEkitivitī Ako ʻOku Ala Fakahokó

Ko e muimui ki he Tamai Hēvaní

Kapau ʻe mahuʻinga ange ki he kau akó ʻi he ngaahi sīpinga ʻi laló, kamata ʻaki hano fakaafeʻi ʻa e kau akó ke vahevahe e ngaahi meʻa faingataʻa ʻe ala kole ange ʻe he ʻEikí ke nau faí.

Fakakaukau ki he ongo te ke maʻu kapau ʻe kole atu ʻe he Tamai Hēvaní ke ke fai ʻa e ngaahi meʻa ko ʻení mo e ʻuhinga te ke ongoʻi pehē aí:

• Vahevahe ʻa e ongoongoleleí mo ha taha kuó ne fakafisingaʻi hoʻo ngaahi fakaafe ʻi he kuohilí.

• Fakakaumeʻa mo tokoniʻi ha taha ʻi ho ʻapiakó ʻoku fehiʻanekinaʻi pe fakasītuʻaʻi.

  Fakaafeʻi ha kau ako ʻe niʻihi ke vahevahe e meʻa te nau mei ongoʻí pea mo hono ʻuhingá.

• Ko e hā ha ngaahi fekau pe ngaahi ueʻi kehe ʻe ala ʻomi ʻe he Tamai Hēvaní ʻe ala faingataʻa ke tau tali mo talangofua ki ai? Ko e hā ka faingataʻa ai e ngaahi tūkunga ko ʻení?

ʻI he vahe te ke ako he ʻaho ní, naʻe fakahinohinoʻi ʻe he ʻOtuá ʻa ʻAlamā ke fehangahangai mo ha meʻa tatau mo e tūkunga ʻuluaki ʻi ʻolungá, pea naʻe fehangahangai ʻa ʻAmuleki mo ha tūkunga tatau mo e meʻa hono uá. Tuku ha kiʻi taimi ke ke fakalaulauloto ai pe ʻoku ʻi ai nai ha ngaahi fekau pe ueʻi mei he ʻOtuá ʻoku faingataʻa ke ke talangofua ki ai. ʻI hoʻo akó, kumi e founga naʻe ikunaʻi ai ʻe ʻAlamā mo ʻAmuleki hona ngaahi faingataʻaʻiá kae muimui ki he ngaahi fekau ʻa e ʻOtuá. Fekumi ki he tokoni ʻa e Tamai Hēvaní ke ke ʻiloʻi e founga te ke lava ai ʻo fanongo mo muimui lelei ange kiate Iá.

ʻE ala ʻaonga ki he kau akó ke nau ngāue mo ha kaungā ako ke lau mo vahevahe e ngaahi fakamatala ʻa ʻAlamā mo ʻAmulekí ʻo hangē ko ia ʻoku hiki atu ʻi he ngaahi ʻuluʻi tohi kehekehe ʻi laló. Pe fakaafeʻi e vaeua ʻo e kau akó ke nau lau e fakamatala ʻa ʻAlamaá pea lau ʻe he vaeua ʻe tahá ʻa e fakamatala ʻa ʻAmulekí. ʻE lava leva ke hoa ʻa e kau akó mo ha kaungāako naʻá ne lau ʻa e fakamatala ʻe tahá pea nau feakoʻiʻaki ʻa e meʻa naʻa nau laú. Fakaʻaliʻali e ngaahi fehuʻi ko ʻení ke lava ʻe he kau akó ʻo vakai ki ai lolotonga ʻenau laukongá.

Aʻusia ʻa ʻAlamaá

Lau ʻa e ʻAlamā 8:8–18, ʻo kumi e meʻa naʻe kole ʻe he ʻOtuá kia ʻAlamā ke ne faí pea mo e ʻuhinga naʻe ngali faingataʻa ai kiate iá. Feinga ke ke fakakaukauloto ki he ngaahi meʻa naʻe hokó lolotonga hoʻo laukongá. Mahalo te ke fie mamata ʻi he foʻi vitiō ”ʻOku Fakahaofi ʻa ʻAlamā mo ʻAmuleki ʻi he Mālohi ʻo e ʻOtuá” mei he taimi 0:36 ki he 2:22, ʻoku maʻu ʻi he ChurchofJesusChrist.org, pea muimui ki ai ʻi hoʻo folofolá.

• Ko e hā ha ngaahi kupuʻi lea ʻi he veesi 14 ʻokú ne fakahaaʻi ʻa e ongo naʻe maʻu ʻe ʻAlamā ʻi he taimi naʻá ne maʻu ai ʻa e fekau ko ʻení?

• Ko e hā ʻa e kupuʻi lea ʻi he veesi 18 ʻokú ne fakamatalaʻi ʻa e fuoloa pea toki talangofua ʻa ʻAlamaá?

• ʻOkú ke pehē ko e hā naʻe talangofua vave ai ʻa ʻAlamā lolotonga ʻene ongoʻi loto-mamahi peheé?

Aʻusia ʻa ʻAmulekí

Lau ʻa e ʻAlamā 8:19–21; 10:4–11 ke vakai ki he meʻa naʻe hoko atu aí. (Mahalo ʻe tokoni ke ʻiloʻi naʻe fakamatalaʻi ʻe ʻAmuleki ʻene aʻusiá ʻi he ʻAlamā 10:4–11.) Feinga ke fakakaukauloto ki he ngaahi meʻa naʻe hokó ʻi hoʻo lau kinautolú. Mahalo te ke fie hoko atu hono mamataʻi e vitiō “ʻOku Fakahaofi ʻa ʻAlamā moʻAmuleki ʻi he Mālohi ʻo e ʻOtuá” mei he taimi 2:22 ki he 4:03, ʻoku maʻu atu ʻi he ChurchofJesusChrist.org.

• Ko e hā ʻoku tau ako ʻi he ʻAlamā 10:4–6 fekauʻaki mo ʻAmulekí? Ko e hā naʻe hanga ai ʻe he ngaahi meʻa ko ʻení ʻo ʻai ke faingataʻa ʻene talangofua ki he ʻOtuá?

• ʻOkú ke pehē ko e hā naʻe hokohoko atu ai e tokoni ʻa e Tamai Hēvaní kia ʻAmulekí neongo naʻe ʻikai ke talangofua [ʻa ʻAmuleki] ʻi he kuohilí?

Lau ʻa e ʻAlamā 8:26–32 ke ʻiloʻi e founga naʻe tāpuekina ai ʻa ʻAmuleki mo ʻAlamā ʻi heʻena ngaahi ngāué.

• Ko e hā e ngaahi tefitoʻi moʻoni naʻá ke ako mei he talanoa kia ʻAlamā mo ʻAmulekí?

Fakafanongo ki he vahevahe ʻa e kau akó. Hiki ha faʻahinga tefitoʻi moʻoni pē ʻi he palakipoé. Fehuʻi ange pe ko e hā ʻoku mahuʻinga ai ke mahino ʻa e ngaahi tefitoʻi moʻoni ko ʻení. Fakaʻaongaʻi e ngaahi lea ʻa e kau akó ke hiki he palakipoé ha tefitoʻi moʻoni tatau mo ia ʻi laló.

Ko e taha ʻo e ngaahi tefitoʻi moʻoni mahalo kuó ke ʻiló ko e taimi ʻoku tau fanongo mo talangofua ai ki he Tamai Hēvaní, ʻokú Ne tāpuakiʻi kitautolu mo e niʻihi kehé. Te tau lava ʻo fanongo ki he folofola ʻa e ʻOtuá ʻi ha ngaahi founga kehekehe. Hangē ko ʻení, naʻe fakatou fanongo ʻa ʻAlamā mo ʻAmuleki ki he folofola ʻa e ʻOtuá mei ha ʻāngelo.

Mahalo ʻe tokoni ke aleaʻi mo e kau akó ʻa e ngaahi founga kehekehe te tau lava ai ʻo fanongo ki he folofola ʻa e ʻOtuá. Mahalo te ke fiemaʻu ke toe vakaiʻi ʻe he kau akó ʻa e “Fakahaá” ʻi he Fakahinohino ki he Ngaahi Folofolá.

Ko e Fanongo kiate Ia

ʻOku fakataumuʻa ʻa e ʻekitivitī ʻi laló ke tokoni ki he kau akó ke nau ikunaʻi ʻa e ngaahi faingataʻa te nau ala fehangahangai mo ia ʻi heʻenau fanongo mo talangofua ki he ʻOtuá. Mahalo ʻe lelei taha ke fai ʻeni ʻi he fealēleaʻaki fakakalasí pe ʻi ha fanga kiʻi kulupu iiki. ʻE lava ke vahevahe ʻe he kau akó ha ngaahi fakakaukau pea lisi kinautolu ʻi he palakipoé. Poupouʻi e kau akó ke nau fai ha ngaahi fehuʻi pea fetokoniʻaki ke maʻu e ngaahi talí. Mahalo te ke fie fokotuʻu pe fakaʻaongaʻi ha niʻihi ʻo e ngaahi fakakaukau ʻi laló, ko ha konga ʻo e ʻekitivitī ko ʻení.

Naʻe pehē ʻe ʻAmuleki, “Naʻe tuʻo lahi hono ui au kae ʻikai te u fie fanongó” (ʻAlamā 10:6). ʻI he konga kimuʻa ʻo e moʻui ʻa ʻAlamaá, naʻe ʻikai ke ne fanongo ki he ʻOtuá ʻi ha vahaʻa taimi (vakai ki he Mōsaia 27:8).

Fakakaukauloto ʻoku faingataʻa ki ha taha ʻokú ke ʻiloʻi ke ne fanongo mo talangofua ki he ʻOtuá. Fakaʻaongaʻi ha ngaahi miniti siʻi ke fealēleaʻaki mo fevahevaheʻaki ai ha ngaahi fakakaukau ki he meʻa te ne ala fakaʻaiʻai e tokotaha ko iá ke falala ki he ʻEikí. ʻE lava ke kau heni e ngaahi meʻa ko ʻení:

• Ko e sīpinga talangofua ʻa ʻAlamā mo ʻAmulekí

• Ngaahi sīpinga ʻo e talangofua ʻa e Fakamoʻuí ki he Tamaí

• Ngaahi talanoa kehe mei he folofolá ʻo ha taimi naʻe fanongo mo talangofua ai ha taha ki he ʻOtuá

• Ngaahi tāpuaki kuó ke aʻusia ʻi hoʻo feinga ke talangofua ki he ʻOtuá

Fakakaukau ke mamata ʻi he foʻi vitiō “ʻOku ʻIkai Hokonoa ʻa e Tuí, ka ʻi Hoʻo Fili Ki Ai” mei he taimi 1:40 ki he 4:25, ʻoku maʻu atu ʻi he ChurchofJesusChrist.org. ʻOku fakamatalaʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he vitioó ha talavou ʻoku tui faivelenga mo talangofua ke ngāueʻi ha ueʻi fakalaumālie lolotonga ha taimi taʻepau.

Fakaafeʻi ha niʻihi ʻo e kau akó ke vahevahe ʻenau ngaahi fakakaukaú. Fakakaukau ke vahevahe foki mo hoʻo ngaahi fakakaukaú.

Tuku ha taimi ke lekooti ai ha faʻahinga ongo naʻá ke maʻu mei he Tamai Hēvaní. Fakakaukau ki he meʻa te ke lava ʻo fai ke ngāueʻi ai e ngaahi ongo ko ʻení. ʻE lava ke kau heni ʻa e tukupā ke talangofua ki ha ngaahi fekau pau pe ngaahi ueʻi fakalaumālie pea mo ha faʻahinga sitepu pē ʻoku totonu ke ke fakahoko. Kapau ʻoku faingataʻa ʻa e talangofua ki he ngaahi fekau ko ʻení, fakakaukau ke ke lotu ke tokoniʻi koe ʻe he Tamai Hēvaní.

Fakaafeʻi ʻa e kau akó ke vahevahe ʻa e meʻa ʻoku nau loto ke manatuʻi mei he ngaahi sīpinga ʻa ʻAlamā mo ʻAmulekí.

Vahevahe hoʻo fakamoʻoní mo hoʻo kau akó ʻe tokoniʻi kinautolu ʻe he Tamai Hēvaní ʻi heʻenau feinga ke fanongo mo talangofua kiate Iá.

Fakamatala Fakamahinó mo e Puipuituʻá

Ko e hā ha niʻihi ʻo e ngaahi tāpuaki ʻoku maʻu mei heʻetau talangofua ki he ʻOtuá?

Naʻe pehē ʻe Palesiteni Siaosi Q. Kēnoni (1827–1901):

ʻOku hanga ʻe he talangofua ki he Ongoongoleleí ʻo ʻomi [ʻa e kakaí] ki ha vā fetuʻutaki vāofi ʻaupito mo e ʻEikí. ʻOku fokotuʻu ai ha fetuʻutaki vāofi he vā ʻo e tangatá ʻi he māmaní pea mo hotau Tupuʻanga Maʻongoʻonga ʻi he langí. ʻOku ʻomi ai ki he fakakaukau ʻa e tangatá ha loto-falala kakato ki he Māfimafí mo ʻEne hoifua ke fanongo mai mo tali e ngaahi kole ʻa kinautolu ʻoku falala kiate Iá. ʻI he ngaahi taimi ʻo e ʻahiʻahí mo e faingataʻá, ʻoku ʻikai mafakatataua ʻa e loto-falala ko ʻení. ʻE lava ke hoko ʻa e faingataʻá ki he tokotahá pe kakaí, ʻe lava ke tuʻunuku mai e fakatamakí pea ngali siva e ʻamanaki ʻa e kakai kotoa pē, ka ʻi hono fakaʻaongaʻi ʻe he kakaí e faingamālie ʻoku ʻomi ʻe he talangofua ki he Ongoongoleleí, ʻoku nau maʻu ai ha fakavaʻe pau; ʻoku tuʻu maʻu honau vaʻé ʻi ha maka ʻoku taʻeueʻia. (Gospel Truth: Discourses and Writings of George Q. Cannon, sel. Jerreld L. Newquist [1987], 116)

Ko e hā ha meʻa te tau lava ʻo ako meia ʻAmuleki?

Naʻe akoʻi ʻe Palesiteni Tieta F. ʻUkitofa, lolotonga ʻene ʻi he Kau Palesitenisī ʻUluakí, ʻo pehē:

Pea hangē ko ʻAmulekí, mahalo ʻokú ke ʻilo ʻi ho lotó, kuo tā tuʻo lahi hono “ui [koe]” ʻe he ʻEikí, ka naʻe ʻikai ke ke “fie fanongo.”

Ka neongo ia, ʻoku ʻafioʻi ʻe he ʻEikí ʻoku ʻiate koe ʻa e meʻa tatau mo ia naʻá Ne ʻafioʻi ʻia ʻAmulekí—ʻa e malava ke hoko ko ha tamaioʻeiki lototoʻa ʻoku ʻi ai ha ngāue mahuʻinga ke fai pea mo ha fakamoʻoni ke vahevahe. ʻOku ʻi ai ha ngāue he ʻikai lava ia ke toe fakahoko tatau ʻe ha taha kehe. Kuo falala atu ʻa e ʻEikí ʻo ʻoatu Hono lakanga fakataulaʻeiki māʻoniʻoní, ʻa ia ʻoku ʻi ai ʻa e malava fakalangi ke tāpuakiʻi mo hiki hake ʻa e niʻihi kehé. Fakafanongo ʻaki ho lotó pea muimui he ngaahi ueʻi ʻa e Laumālié. (Dieter F. Uchtdorf, “Ako meia ʻAlamā mo ‘Amuleki,” Liahona, Nōvema 2016, 73)

Ngaahi ʻEkitivitī Fakalahi ki he Akó

Ko e Tauʻatāina ke Filí ʻi he palani ʻa e Tamai Hēvaní

Naʻe akoʻi ʻe ʻAlamā ʻa e ongoongoleleí ki he kakai ʻi Mīleki mo ʻAmonaihaá mo ha ngaahi ola kehekehe. ʻE lava ke fakafehoanaki ʻe he kau akó ʻa e ngaahi fakafōtunga ki he pōpoaki ʻa ʻAlamā ʻi he ʻAlamā 8:3–5, 8–13 pea aleaʻi ʻa e ʻuhinga ʻoku mahuʻingaʻia ai ʻa e Tamai Hēvaní ʻi he tauʻatāina ke filí. ʻE lava ke hiki ʻe he kalasí ha lisi ʻo e ngaahi fili fakaʻaho ʻoku tokoni kiate kinautolu ke nau ofi ange ai ki he Tamai Hēvaní mo e ngaahi fili ʻokú ne fakamavaheʻi kinautolu meiate Iá. Fakakaukau ke fakaafeʻi kinautolu ke fakaʻaongaʻi ʻenau tauʻatāina ke filí ke nau ofi ange ai ki he ʻEikí.

Ko e fakaafeʻi ʻo e niʻihi kehé ke haʻu kia Sīsū Kalaisí

ʻOku hoko ʻa ʻAlamā mo ʻAmuleki ko ha sīpinga lelei ʻo e kau ākonga naʻa nau vilitaki mo faʻa kātaki ʻi hono fakaafeʻi e niʻihi kehé ke haʻu kia Sīsū Kalaisí. Fakakaukau ke fakaafeʻi e kalasí ke lau ʻa e ʻAlamā 8:10–21, 27–32, ʻo kumi e founga naʻe fakahaaʻi ʻaki ʻe ʻAlamā mo ʻAmuleki ʻena kātakí mo e tuí. ʻE lava ke vahevahe ʻe he kau akó ha ngaahi founga te nau lava ai ʻo vilitaki mo faʻa kātaki ʻi heʻenau feinga ke tokoniʻi e niʻihi kehé ke haʻu kia Sīsū Kalaisí. Te nau lava ʻo palani pe fakatātaaʻi ʻa e founga te nau lava ai ʻo tali ʻi he ʻofa mo e faʻa kātaki kapau ʻe ʻikai tali ʻe ha taha ha fakaafe meiate kinautolu.

Naʻe ongoʻi loto-foʻi ʻa ʻAlamā

ʻE lava ke ke fakaafeʻi ʻa e kau akó ke nau fakakaukau ki he founga naʻe tokoniʻi ai ʻe he ʻEikí ʻa ʻAlamā ʻi he taimi naʻá ne ongoʻi loto-foʻi aí (vakai ki he ʻAlamā 8:14). ʻE ala tokoni ke vakai ki he founga naʻe tali ʻaki ʻe he ʻEikí ʻa e ngaahi hohaʻa ʻa ʻAlamaá (vakai ki he veesi 15) mo e meʻa naʻe fai ʻe ʻAlamā kimui aí (vakai ki he veesi 18). Fakaafeʻi ʻa e kau akó ke nau fai ha kiʻi tohi fakalotolahi ki ha taha ʻoku nau ʻiloʻi ʻe ala ongoʻi loto-foʻi.

He ʻikai ke siʻaki kitautolu ʻe he Tamai Hēvaní

Fakakaukau ke fakaafeʻi ʻa e kau akó ke nau ako ha niʻihi ʻo e ngaahi fakamatala ko ʻení, ʻo kumi ha ngaahi sīpinga ʻoku hokohoko atu ai hono tokoniʻi ʻe he ʻEikí ʻa e kakaí.

• Kakai ʻo Mīlekí (ʻAlamā 8:3–5)

• Kakai ʻo ʻAmonaihaá (ʻAlamā 8:8–10, 13, 16, 18, 29)

• ʻAlamā (ʻAlamā 8:14–15, 30–32)

• ʻAmuleki (ʻAlamā 10:4–7, 11, 30–32)

ʻE lava leva ke fakakaukau ʻa e kau akó ki he founga kuo tokoniʻi pe lolotonga tokoniʻi ai kinautolu ʻe he ʻEikí.