ʻAlamā 9

Manatuʻi ʻa e Ngaahi Tāpuaki ʻa e ʻEikí

Kuo tāpuekina fēfē nai koe ʻe he ʻEikí? Ko e hā ʻokú Ne ʻamanaki mai te ke fakahoko ʻi he hili hoʻo maʻu e ngaahi tāpuaki ko iá? ʻI he taimi naʻe ui ai ʻe ʻAlamā mo ʻAmuleki ʻa e kakai ʻo ʻAmonaihaá ke nau fakatomalá, naʻe fakafisingaʻi ʻe he kakaí ʻena ngaahi akonakí. Naʻe akoʻi ʻe ʻAlamā naʻe ʻamanaki ʻa e ʻEikí te nau māʻoniʻoni ange ʻi he kakai Leimaná, ʻa ē kuo teʻeki akoʻi ki ai ʻa e moʻoní. Naʻá ne tapou ki he kakaí ke nau manatuʻi ʻa e ngaahi tāpuaki ʻa e ʻEikí. ʻOku fakataumuʻa ʻa e lēsoni ko ʻení ke tokoniʻi koe ke ke ʻiloʻi mo manatuʻi ʻa e ngaahi tāpuaki kuo foaki atu ʻe he ʻEikí kiate koé.

Fai ha ngaahi fehuʻi te ne tokoniʻi e kau akó ke nau ako ʻaki e Laumālie Māʻoniʻoní. ʻE lava ʻe ha ngaahi foʻi lea siʻi kuo filifili fakalelei ke fakatupulaki ʻa e ola lelei ʻo ha fehuʻi. ʻE fakaʻā ʻe he fehuʻi kuo faʻu leleí ʻa e ʻatamai mo e loto ʻo hoʻo kau akó pea maʻu ai ʻe he Laumālie Māʻoniʻoní ha faingamālie ke faiako.

Teuteu ʻa e tokotaha akó: Fakakaukau ke fakaafeʻi ʻa e kau akó ke nau fakaʻaongaʻi ha miniti ʻe taha pe ua ke hiki ha ngaahi sīpinga ʻo e ngaahi tāpuaki kuo nau maʻu mei he Tamai Hēvaní mo Sīsū Kalaisí.

Ngaahi ʻEkitivitī Ako ʻOku Ala Fakahokó

Ko e ngaahi tāpuaki ʻa e ʻEikí kiate koé

Toʻo ha ngaahi miniti siʻi ke lisi ʻi hoʻo tohinoa akó ha ngaahi tāpuaki kuó ke maʻu mei he Tamai Hēvaní mo Sīsū Kalaisi. (Fakakaukau ke fakakau e ngaahi tāpuaki kuó ke maʻu koeʻuhí ko ha mēmipa koe ʻo e Siasi ʻo Kalaisí.)

Te ke lava ʻo fakaafeʻi ha kau ako ʻe niʻihi ke nau hiki ʻi he palakipoé ha tāpuaki pe meʻafoaki ʻe taha pe ua kuo nau maʻu. ʻEke ki he kau akó ʻa e ongo ʻoku nau maʻu fekauʻaki mo e ngaahi meʻafoaki ko iá pea mo hono ʻuhingá. Fakakaukau ke tānaki atu foki mo ha ngaahi tāpuaki naʻá ke fakakaukau ki ai.

• ʻOku liliu fēfē nai koe ʻi hoʻo manatuʻi e ngaahi tāpuaki mo e ngaahi meʻafoaki ko ʻení?

• ʻOku tuʻo fiha nai hoʻo fakakaukau ki he ngaahi tāpuaki ko ʻení? ʻOku ʻi ai nai ha meʻa te ke lava ʻo fai ke ke tokanga lahi ange ai ki he ngaahi tāpuaki ko iá?

ʻI hoʻo ako he ʻaho ní, te ke maʻu ai ha ngaahi faingamālie ke tānaki atu ki hoʻo lisí. Fekumi ki he fakahinohino ʻa e Tamai Hēvaní ke ke ʻiloʻi ʻEne ngaahi tāpuaki maʻaú pea mo ʻiloʻi e founga te ke lava ai ʻo manatuʻi kinautolu ʻi he toenga hoʻo moʻuí.

Ko e malanga ʻa ʻAlamā mo ʻAmuleki ki he kakai ʻo ʻAmonaihaá

ʻI he taimi naʻe malangaʻi ai ʻe ʻAlamā mo ʻAmuleki ʻa e folofola ʻa e ʻOtuá ki he kakai ʻo ʻAmonaihaá, naʻe loto-fefeka ʻa e kakaí.

Lau e ngaahi lea naʻe lea ʻaki ʻe ʻAlamā kiate kinautolu ʻi he ʻAlamā 9:8–11, 20–22, ʻo kumi e ngaahi foʻi lea mo e ngaahi kupuʻi lea ʻoku nau fakahaaʻi e ngaahi tāpuaki naʻe foaki ʻe he ʻEikí ki he kakaí ni ʻa ia naʻe ngalo ʻiate kinautolú.

• Ko e hā naʻá ke maʻú?

• Ko e hā e ngaahi ʻulungaanga ʻo e ʻEikí naʻe fakamamafaʻi ʻe ʻAlamā ʻi he veesi 11? (Fakakaukau ke fakaʻilongaʻi e ngaahi ʻulungaanga ko ‘ení ‘i hoʻo folofolá.)

Mahalo ʻe tokoni ke ʻiloʻi ʻoku ʻuhinga ʻa e foʻi lea kātaki fuoloá ki he faʻa kātaki mo e mapuleʻi ʻe he ʻEikí ʻa e taimi ʻoku ʻi ai ai ha ʻuhinga ke houhaú.

Tuku ha kiʻi taimi ke ke fakalaulauloto ai ki he ngaahi founga kuo fakahaaʻi atu ai ʻe he ʻEikí ʻa e faʻa kātakí. Mahalo te ke fie tānaki atu e ngaahi sīpinga ko ʻení ki hoʻo lisi ʻo e ngaahi tāpuakí.

Fakakaukau ke fakaafeʻi ʻa e kau akó ke vahevahe ʻenau ngaahi fakakaukaú.

Naʻe fakamoʻoni ʻa ʻAlamā kimui ange ki ha ngaahi ʻulungaanga kehe ʻo e ʻEikí ʻe lava ʻo tokoni ke mahino kiate kitautolu ʻa e pōpoaki ʻa ʻAlamaá. Lau ʻa e ʻAlamā 9:26 pea fakakaukau ke fakaʻilongaʻi ʻa e ngaahi ʻulungaanga ko ʻení. Mahalo ʻe tokoni ke ʻiloʻi ʻoku ʻuhinga ʻa e foʻi lea angatonú ki he “potupotutatau” pe ko e “fakamaau totonu.”

ʻI he hokohoko atu e malanga ʻa ʻAlamaá, naʻá ne fakamamafaʻi ʻoku fonu ʻa Sīsū Kalaisi ʻi he ʻofa, angatonu, moʻoni, kātaki, ʻaloʻofa mo e kātaki fuoloa. Fakalaulauloto ki he ʻuhinga naʻe fiemaʻu ai ʻe ʻAlamā ke mahino ki he kakai ʻo ʻAmonaihaá ʻa e ngaahi ʻulungaanga ko ʻeni ʻo e Fakamoʻuí.

Ko e fakafehoanaki mo e fakafaikehekeheʻi ʻo ha faʻahinga kakai ʻe ua

ʻOku faʻa fakafehoanaki pe fakafaikehekeheʻi ʻe he folofolá ʻa e ngaahi fakakaukaú, ngaahi meʻa naʻe hokó, mo e kakaí ʻi ha founga ʻokú ne akoʻi ʻa e ngaahi tefitoʻi moʻoni ʻo e ongoongoleleí. ʻE lava ke hoko ʻa e fekumi ki he ngaahi fakafehoanaki pe fakafaikehekehe ko ʻení ko ha taukei ako folofola ʻaonga. Naʻe fakafehoanaki ʻe ʻAlamā ha kulupu ʻe ua ʻo e kakai naʻe ʻi ha ngaahi tūkunga kehekehe—ko e kakai Leimaná mo e kakai ʻo ʻAmonaihaá. Fakakakato ʻa e saati ko ení ʻi hoʻo tohinoa akó. Fekumi ki he founga naʻe fakamamafaʻi ʻaki ʻe ʻAlamā ʻa e ngaahi ʻulungaanga ʻo e Fakamoʻuí.

Faʻu ʻa e saati ko ʻení ʻi he palakipoé pea ʻai ke toe faʻu ia ʻe he kau akó ʻi heʻenau tohinoá. Mahalo te ke fie vahevahe ʻa e kalasí ki ha kulupu ʻe ua pea ʻai ke ako ʻe he kulupu ʻe taha ʻa e kakai Leimaná pea ako ʻe he kulupu ʻe tahá ʻa e kakai ʻo ʻAmonaihaá. Pe ko hoʻo vahevahe hoʻo kalasí ki ha fanga kiʻi kulupu iiki ange pea tuku ke nau fakafonu fakataha ʻa e sātí.

	Ko e meʻa ʻokú ke ako fekauʻaki mo e kakaí	Ko e founga ʻoku fakahaaʻi ai ʻe he ʻEikí ʻa e ʻofá, angatonú, moʻoní, kātakí, ʻaloʻofá, pe kātaki fuoloá ki he kakai ko ʻení
Kakai Leimaná (ʻAlamā 9:14–17)
Kakai ʻo ʻAmonaihaá (ʻAlamā 9:20–25)

ʻI heʻenau ʻosí, kole ange ki he kau akó ke vahevahe ʻa e meʻa naʻa nau akó. Mahalo te ke fie fakamahinoʻi ange neongo ʻoku ʻaloʻofa ʻa e ʻEikí kiate kinautolu ʻoku ʻikai ke nau tokanga ki Heʻene ngaahi fekaú (vakai ki he ʻAlamā 9:16), ka ko kinautolu ʻoku angatuʻu ʻi he ʻiloʻilo pau ki he ongoongoleleí mo ʻikai loto ke fakatomalá te nau maʻu ha tautea lahi ange (vakai ki he veesi 23–24). ʻE lava foki ke fakafekauʻaki ʻe he kau akó ʻa e Tokāteline mo e Ngaahi Fuakava 82:3 mo e ngaahi veesi ko ʻení. Fakapapauʻi ʻoku ongoʻi mo mamata ʻa e kau akó ki he ʻaloʻofa maʻongoʻonga ʻa e ʻEikí kiate kinautolu kotoa ʻoku loto-fiemālie ke fakatomalá.

• Naʻe fakahaaʻi fēfē ʻe hono fekauʻi ʻa ʻAlamā mo ʻAmuleki ke na fakatokanga mo fakamoʻoni ki he kakai ʻo ʻAmonaihaá ʻa e ʻaloʻofa ʻa e ʻEikí?

• ʻOkú ke pehē ko e hā ʻoku mahuʻinga ai ke tau manatuʻi ʻi hotau kuongá ni ʻa e ngaahi akonaki ʻa ʻAlamā fekauʻaki mo e ʻOtuá ʻi he ʻAlamā 9?

Ko e hā kuo foaki atu ʻe he ʻEikí maʻaú?

Naʻe ofo ʻa ʻAlamā ʻi he vave ʻo e ngalo ʻi he kakai ʻo ʻAmonaihaá ʻa e ngaahi tāpuaki naʻe foaki ange ʻe he ʻEikí maʻanautolu ko ha kakaí (vakai ki he ʻAlamā 9:8–11). Naʻe fakamanatu ange ʻe ʻAlamā kiate kinautolu ʻa e ngaahi tāpuaki lahi kuo nau maʻú, ke tokoniʻi kinautolu ke nau fakatomala pea tafoki ki he ʻEikí (vakai ki he veesi 20–24).

• Ko e hā ha ngaahi ʻuhinga ʻe niʻihi ʻe lava ke ngalo ai ʻiate kitautolu ʻa e meʻa kuo fai ʻe he ʻEikí maʻatautolú?

ʻOange ha taimi ki he kau akó ke nau fakalaulauloto ai ki he ngaahi tāpuaki kuo nau maʻu fakataautaha mei he ʻOtuá. Poupouʻi kinautolu ke nau tānaki atu ki he lisi naʻa nau hiki ʻi he kamataʻanga ʻo e kalasí pea tokoni ke nau fakakaukau ki ha ngaahi founga ke manatuʻi ai e ngaahi tāpuaki ko ʻení. Te ke lava ʻo fakaʻaliʻali e ngaahi fehuʻi ko ʻení ke fakalaulauloto fakalongolongo ai ʻa e kau akó.

• Ko e hā kuo “fakahā kiate [koe ʻe he ʻEikí] ʻo fakatatau mo [hoʻo] ngaahi holí, mo [hoʻo] tuí, pea mo e ngaahi lotú”? (ʻAlamā 9:20).

• Kuo tāpuekina fēfē koe ʻe he ngaahi meʻafoaki ʻo e Laumālié ʻoku lau ki ai ʻi he ʻAlamā 9:21?

• Kuo fakahaofi fēfē koe ʻe he ʻOtuá mei he ngaahi ʻahiʻahí? (Vakai ki he ʻAlamā 9:22.)

Fakakaukau ke fakaafeʻi ha kau ako ʻe niʻihi ke vahevahe ʻenau ngaahi talí.

Fakaʻaongaʻi ha kiʻi taimi ke ke fai ai ha meʻa ke tokoniʻi koe ke ke manatuʻi ʻa e ngaahi tāpuaki kuo foaki atu ʻe he ʻEikí. Ko ha ngaahi fakakaukau ʻeni:

• Faitaaʻi e lisi naʻá ke faʻu ʻi he kalasí pea tuku ia ʻi ha feituʻu te ke lava ʻo sio maʻu pē ki ai, hangē ko e wallpaper ʻi hoʻo telefoní.

• Hiki hoʻo ngaahi ongó ʻi hoʻo tohinoa akó pea faʻu ha palani ke lekooti maʻu pē hoʻo ngaahi tāpuakí.

• Fokotuʻu ha fakamanatu ʻi hoʻo tohi-māhiná ke ke toutou fakakaukau maʻu pē ki he meʻa kuo fai ʻe he ʻEikí maʻaú.

Fakakaukau ke fakaafeʻi ha niʻihi ʻo e kau akó ke vahevahe ʻa e meʻa naʻa nau faí pe ko e meʻa ʻoku nau palani ke faí mo e ongo ʻoku nau maʻu ki aí. Te ke lava foki ʻo vahevahe mo hoʻo ngaahi palani pē ʻaʻaú.

Fai hoʻo fakamoʻoni ki he ngaahi tefitoʻi moʻoni naʻe akoʻi ʻi he lēsoni ko ʻení pea mo e ʻofa ʻa e ʻOtuá ki Heʻene fānaú.

Fakamatala Fakamahinó mo e Puipuituʻá

Ko e hā ha niʻihi ʻo e ngaahi tāpuaki kuo foaki ʻe he ʻEikí ki he kau mēmipa ʻo Hono Siasí?

Naʻe vahevahe ʻe ʻEletā Niila L.ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e naahi meʻaʻofa kuo foaki mai ʻe he ʻEiki maʻatautolú:

ʻOku faʻa ʻeke ʻe ha niʻihi, “ʻIkai ʻoku lahi pē e ngaahi tui kehe ʻoku nau ʻofa ʻia Kalaisi?” ʻOku moʻoni ia! Ka neongo iá, ʻi heʻetau hoko ko e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, pea maʻu ha fakamoʻoni ki Hono moʻoní, ʻo ʻikai mei he Tohi Tapú pē, ka mei he Tohi ʻa Molomoná foki; pea ʻilo kuo fakafoki mai Hono lakanga fakataulaʻeikí ki māmani; pea fai mo e ngaahi fuakava toputapu ke muimui kiate Ia pea maʻu mo e meʻafoaki ʻo e Laumālie Māʻoniʻoní; pea ʻi hono fakakoloaʻaki e mālohi ʻi Hono temipale māʻoniʻoní, pea kau he teuteu atu ki Heʻene toe hāʻele nāunauʻia mai ki he māmaní; he ʻikai ke tau lava ʻo fakafehoanaki ʻa e meʻa te tau aʻusiá mo kinautolu kuo teʻeki ai ke nau maʻu e ngaahi moʻoni ko ʻení. ʻKo ia ʻoku foaki ki ai ʻa e meʻa lahí ʻoku ʻekeʻi ʻa e meʻa lahi meiate ia’ [Tokāteline mo e Ngaahi Fuakava 82:3].” (Neil L. Andersen, “ʻOua Naʻa Liʻaki Ia,” Liahona, Nōvema 2010, 41)

Naʻe fakamoʻoni ʻa Sisitā Seli L. Tiu, ʻa ia naʻe hoko ko ha tokoni ʻi he Kau Palesitenisī Lahi ʻo e Fineʻofá, ki he ngaahi tāpuaki tatau:

ʻOku tau makehe. ʻOku tau makehé koeʻuhí ko ʻetau ngaahi fuakavá, ngaahi tāpuaki fakalaumālié, pea mo e ngaahi fatongia ʻoku kaunga kiate kinaua fakatouʻosí. ʻOku foaki mai kiate kitautolu ʻa e mālohi mo e meʻafoaki ʻo e Laumālie Māʻoniʻoní. ʻOku ʻi ai ʻetau palōfita moʻui ke tataki kitautolu, ngaahi ouau ke haʻi kitautolu ki he ʻEikí mo e taha kotoa pē, pea mo e mālohi ʻo e lakanga fakataulaʻeikí ʻi hotau lotolotongá. ʻOku mahino kiate kitautolu ʻa e feituʻu ʻoku tau tuʻu aí ʻi he palani lahi ʻo e fiefiá. Pea ʻoku tau ʻilo ko e ʻOtuá ʻa ʻetau Tamaí pea ko Hono ʻAló ʻa hotau Fakalaloa paú.

ʻOku haʻu fakataha mo e ngaahi faingamālie ko ʻení ha fatongia lahi, he “ko ia ʻoku foaki ki ai ʻa e meʻa lahí ʻoku ʻekeʻi ʻa e meʻa lahi meiate ia” (Tokāteline mo e Ngaahi Fuakava 82:3). (Sheri L. Dew, “We Are Women of God,” Ensign, Nov. 1999, 98)

Ngaahi ʻEkitivitī Fakalahi ki he Akó

ʻAlamā 9:1–7. Ko e tali ʻa e kakai ʻo ʻAmonaihaá

Kapau ʻe ʻaonga, fakaafeʻi ʻa e kau akó ke nau lau ʻa e ʻAlamā 9:1–7, ʻo kumi e tali ʻa e kakai ʻo ʻAmonaihaá kia ʻAlamā mo ʻAmulekí. Fakakaukau ke fai ange ha ngaahi fehuʻi hangē ko ʻení: Ko e hā ha ngaahi foʻi lea pe kupuʻi lea naʻá ne fakahaaʻi naʻe ʻikai mahino kiate kinautolu ʻa e ʻOtuá mo e founga ʻo ʻEne ngāue ʻi he lotolotonga ʻo ʻEne fānaú? Naʻe uesia fēfē ʻe heʻenau taʻetuí ʻa ʻenau loto-fiemālie ke fanongo ki he ongo tamaioʻeiki ʻa e ʻEikí? Ko e hā ʻokú ke ʻilo fekauʻaki mo e ʻOtuá ʻoku tokoni atu ke ke fanongo ai ki Heʻene kau palōfitá?

Vitiō

Kapau ʻe ʻaonga, fakakaukau ke huluʻi e foʻi vitiō “ʻOku Fakahaofi ʻa ʻAlamā mo ʻAmuleki ʻi he Mālohi ʻo e ʻOtuá” (22:56) mei he taimi 4:20 ki he 6:23, ʻoku maʻu atu ʻi he ChurchofJesusChrist.org. ʻOku fakaʻaliʻali ʻe he vitiō ko ʻení hano fakamatalaʻi fakanounou ʻo e meʻa naʻe fakamoʻoniʻi ʻe ʻAlamā ki he kakai ʻo ʻAmonaihaá mo e founga naʻa nau tali ai iá.

ʻAlamā 10:22–23. “Ngaahi Lotu ʻa e kau māʻoniʻoní”

Kapau ʻe ʻaonga ki hoʻo kau akó hono aleaʻi ʻa e mālohi ʻo e ngaahi lotu ʻa e kau māʻoniʻoní, fakamatalaʻi ange naʻe hili e akoʻi mo e fakamoʻoni ʻa ʻAlamaá, naʻe ʻamanaki ke puke pōpula ia. Naʻe taʻofi ia ʻe ʻAmuleki ʻi heʻene fakamatala ki he ʻaʻahi mai ʻa e ʻāngeló kiate iá. Fakaafeʻi ʻa e kau akó ke nau lau ʻa e ʻAlamā 10:22–23, ʻo kumi e ola ʻo e ngaahi lotu ʻa e kau māʻoniʻoní ʻi he kakai ʻo ʻAmonaihaá. ʻE lava foki ke lau ʻe he kau akó ʻa e ʻAlamā 62:40 mo e Hilamani 13:12–14 ke ʻiloʻi pe naʻe tokoniʻi fēfē ʻe he ngaahi lotu ʻa e kau māʻoniʻoní ʻa e kau Nīfaí lolotonga e taimi ʻo e ʻEikitau ko Molonaí mo Samuela ko e tangata Leimaná. Fakaafeʻi ʻa e kau akó ke nau aleaʻi e founga ʻe lava ke hoko ai e ngaahi lotu ʻa e kau māʻoniʻoní ko ha tāpuaki kiate kitautolu mo e niʻihi kehé he ʻaho ní.

Mahalo ʻe ʻaonga ke fakamatalaʻi ange ko e taimi pē naʻe fakaʻauha ai e kau māʻoniʻoní pe mavahe mei ʻAmonaihaá, naʻe ʻikai toe maluʻi ʻe he ngaahi lotu ʻa e kau māʻoniʻoní ʻa e koló, pea naʻe “fakaʻauha ʻa e kakai moʻui kātoa ʻo e kau ʻAmonaihaá” ʻe he kau Leimaná (ʻAlamā 16:9).