Seminare
Alema 10–11: “E tusa ai ma le Agaga o le Alii”

“Alema 10–11: ‘E Tusa ai ma le Agaga o le Alii’,” Tusi Lesona a le Faiaoga o le Tusi a Mamona (2024)

“Alema 10–11,” Tusi Lesona a le Faiaoga o le Tusi a Mamona

Alema 10–11

“E tusa ai ma le Agaga o le Alii”

Amoleka ma Seseroma

Na i ai se taimi na faaseseina ai oe? E te manatua na faapefea ou lagona? Ina ua la molimau atu i le nuu o Amonaea, sa fetaiai Alema ma Amoleka ma tagata o e sa faaaogaina le taufaasese e taumafai ai e taofi i laua. O lenei taufaasese na faaali atu ia Alema ma Amoleka e ala i le Agaga Paia. O lenei lesona e mafai ona fesoasoani ia te oe e talia atili ai le Agaga Paia ia iloa le upumoni ma iloa ai taufaasese iloagatā a le fili.

Fesoasoani i tagata aoao e faafesootai tusitusiga paia i o latou olaga. A faafesootai e tagata aoga mea sa latou faitauina i tusitusiga paia i o latou tulaga, o le a sili atu ona faaosofia i latou e aoao ma faaaoga aoaoga o le talalelei. E mafai foi ona latou vaai pe faapefea ona saunia e tusitusiga paia ia tali ma le taitaiga e taiala ai i latou i tulaga moni o le olaga.

Sauniuniga a le tagata aoga: Valaaulia tagata aoga e mafaufau loloto i auala e ono taumafai ai Satani e faasese i latou.

Gaoioiga e Ono Mafai Ona Aoao Ai

Ia Nofouta i le tiapolo

Sa faasoa mai e Elder Neil L. Andersen o le Korama a Aposetolo e Toasefululua le tala lenei i se uo sa faigaluega o se tagata sailiili mo le malo o le Iunaite Setete. Vaavaai mo mea e mafai ona e aoaoina mai lenei aafiaga e uiga i le aloese mai le taufaasese.

9:52
Elder Neil L. Andersen

Na suesueina e la’u uo se vaega solitulafono sa fela’ua’ia fualaau faasaina i totonu o le Iunaite Setete.

I se tasi aso, sa la o atu ai ma se isi leoleo i se fale sa la talitonu sa i ai se alii sa tufatufaina atu fualaau faasaina o le kokeini. Na faamatalaina e la’u uo le mea na tupu:

“Sa ma tu’itu’i i le faitotoa o le alii ua masalomia i fualaau faasaina. Sa tatala mai e le alii ua masalomia le faitotoa, ma ina ua vaai mai ia i ma’ua, sa taumafai loa ia pupuni i ma’ua ina ia aua nei o ma iloa atu totonu o le potu. Ae sa tuai; sa mafai ona ma iloaina atu kokeini i luga o lana laulau.

“Sa faatopetope ona tapena ese e se alii ma se tamaitai sa i ai i le laulau ia kokeini. E tatau ona ma taofia mai i la’ua mai le faaleagaina o faamaoniga, o lea sa vave ai ona ou tuleieseina le alii na masalomia lea sa taofiofia le faitotoa. A o ou tuleia o ia, sa maua lelei ona mata i la’u vaai. O le mea uiga ese sa i ai, sa leai sona foliga ita pe fefe foi. Sa ataata mai o ia ia te au.

“O ona mata ma lana ataata e faaleano i ai, na ou maua ai se lagona e le leaga o ia, o lea na ou tuua ai o ia ae ou savali atu i le laulau. O le taimi lea ua tu ai le alii masalomia i solitulafono i o’u tua. Ma o le taimi lava lena, na oo mai ai se lagona mautinoa ma le malosi i lo’u mafaufau: ‘Faaeteete i le tiapolo o loo i tua o mata ataata.’

“Sa vave ona ou toe faliu atu i le alii masalomia i solitulafono. O lona lima o loo i totonu o lana taga pito i luma. Na vave ona ou mau i lona lima ma toso mai fafo o lana taga. O le taimi lena na faatoa ou vaai ai, o uu i lona lima se tamai fana otometi ua sauni o le a faapa. Na sosoo ai ma ni gaoioiga faavavave lea na ou aveesea mai ai le fana mai le alii.” (Neil L. Andersen, “Ia Faaeteete i le Tiapolo o Loo i tua o Mata Ataata,” Liahona, Me 2005, 46)

  • O le a se mea e tulaga ese ia te oe mai le aafiaga na faasoa mai e Elder Andersen?

  • O a ni auala e ono taumafai ai Satani e faasese i tatou i aso nei?

Mafaufau e tusi tali a tagata aoga i luga o le laupapa.

A o e suesue i le asō, vaavaai mo auala e mafai ona e iloa ai le taufaasese ina ia mafai ai ona e aloese mai mea e ono afaina faaleagaga ai oe.

Lapataia i le taufaasese

Nai lo le otootoga o loo i lalo, e mafai ona tuu atu i tagata aoga le Alema 10:15–17; 11:21–25; 12:2–7 faatasi ai ma le valaaulia e tali fesili nei: O le a le taufaasese na faaaogaina? Na faapefea ona faaalia?

Ina ua molimau atu Amoleka i le nuu o Amonaea e faapea sa valaauina o ia e le Atua, sa maofa nisi o tagata (tagai Alema 10:12). O ia “o se tagata e le itiiti le taualoa” (Alema 10:4) i lona nuu, ma sa ia auai faatasi ma Alema i le molimau atu e faasaga ia i latou. Sa mananao nisi o loia popoto e faasese ia Alema ma Amoleka ma maua ai ni tupe i le faagaioiga (tagai Alema 10:13; 11:20).

Faitau le Alema 10:15–17, ma vaavaai pe na faapefea ona tali atu Amoleka i nei loia.

  • O a ni auala e pei ai taufaasese o “mailei po o togafiti”? (Alema 10:17).

A o faaauau lau suesuega, vaavaai pe mafai faapefea e Amoleka ona iloa mafaufauga ma mailei a loia.

O Seseroma, o se tasi o loia sa “poto tele i ala a le tiapolo” (Alema 11:21), na faatuina se mailei.

Faitau le Alema 11:21–25, ma vaavaai pe na faapefea ona taumafai Seseroma e faasese ma faaosooso Amoleka e faafitia le i ai o le Atua. Atonu e fesoasoani le iloa o nei “oneti ario e ono” (Alema 11:22) o le totogi o le pe tusa ma le ono vaiaso o se loia (tagai Alema 11:3, 11–13).

Ina ia malamalama atili i le mea na ofoina atu e Seseroma ia Amoleka, atonu e mananao tagata aoga ia iloa pe fia se totogi o se loia i lou nuu i le ono vaiaso.

  • O le a se mea na e aoaoina mai le tali a Amoleka?

E tusa lava pe sa faafitia e Amoleka le Atua, sa lei faamoemoe Seseroma e avatu ia te ia le tupe; sa na ona ia ofoina atu e taumafai ai e tauleagaina ma “faaumatia” Amoleka (Alema 11:25).

Na faamatala mulimuli ane e Alema ia Seseroma le ala na mafai ai e Alema ma Amoleka ona iloa ana taufaasese ma mailei. Faitau le Alema 12:2–7, ma vaavaai mo le tali.

A o faasoa e tagata aoga mea na latou mauaina, tusi mataupu faavae nei i le laupapa. Afai e faafaigata i tagata aoga ona tali mai, valaaulia i latou e toefaitau le Alema 12:3.

O se upumoni e tasi e mafai ona tatou aoaoina e faapea, e mafai e le Atua ona fesoasoani ia i tatou ia iloa taufaasese a Satani e ala i le Agaga Paia.

  • Na faapefea ona avea le tala a Elder Andersen ma se faataitaiga o lenei mataupu faavae?

    Nai lo le fai atu o le fesili o loo i lalo, mafaufau e vaevae le vasega i ni vaega toalaiti e aoao ai pe faapefea ona fesootai mai le Agaga Paia. Valaaulia i latou e suesue i punaoa o loo i puipui i lalo ma lipoti mai mea latou te maua. A o latou faasoa mai, mafaufau e fesili atu, “E mafai faapefea e le iloaina o lenei faamatalaga ona fesoasoani ia i tatou pe a tatou feagai ma le taufaasese?”

  • O a ni nai auala e mafai ona talanoa mai ai le Agaga Paia ia i tatou? (Afai e aoga, mafaufau e faitau le Mataupu Faavae ma Feagaiga 8:2–3; 9:7–9; 11:12 po o le suesueina o le “Agaga Paia” i le Taiala i Autu po o le O Le Taiala i Tusitusiga Paia.)

  • E faapefea e filifiliga tatou te faia ona aafia ai lo tatou tomai e taialaina e le Agaga Paia?

Mafaufau e faailoga soo se fasifuaitau i le Alema 11:22 o loo faaalia ai le naunautaiga o Amoleka e mulimuli i le Agaga. Mafaufau loloto pe na faapefea ona fesoasoani lenei filifiliga ia te ia.

Aloese mai le taufaasese e ala i le iloaina o le upumoni

O se tasi auala e saili ai Satani e faasese i tatou o le fenumiai lea o lo tatou malamalama ia Iesu Keriso.

Nai lo le faitauina o fuaiupu nei o se vasega, mafaufau e valaaulia ni tagata aoga se toalua e o mai i luma o le vasega ma faitau le talanoaga a Amoleka ma Seseroma. Mafaufau e lolomi le anotusi ma faailoga vaega e lua, ma aveese fuaitau faamatala e pei o le “ma sa ia tali atu” (Alema 11:29).

Faitau le Alema 11:26–37, 40–41, ma vaavaai mo aoaoga sese a Seseroma e uiga ia Iesu Keriso ma le ala na tali atu ai Amoleka.

Ina ia fesoasoani ia te oe e malamalama i nei fuaiupu, mafaufau e tusi le siata lenei i lau api talaaga mo suesuega. I lalo o aoaoga taitasi, tusi ai uiga faaalia, manatu, po o amioga e ono taitai atu i ai aoaoga taitasi.

Mafaufau e tusi i luga o le laupapa le siata lenei. A o tali mai tagata aoga, tusi o latou manatu i lalo o le ulutala talafeagai.

Aoaoga pepelo: O le a laveaiina i tatou e Iesu Keriso “i [a tatou] agasala” e aunoa ma le salamo (Alema 11:34).

Aoaoga moni: O le a laveaiina i tatou e Iesu Keriso mai a tatou agasala ao tatou liliu atu ma le faamaoni ia te Ia ma salamo.

  • Aisea e taua ai le iloa e mafai e Iesu Keriso ona laveai i tatou mai a tatou agasala ae le i a tatou agasala?

  • O le a se mea e mafai ona e aoao mai i le ala na tali atu ai Amoleka i fesili a Seseroma?

E mafai e tagata aoga ona faaaoga taufaasese o loo tusia i luga o le laupapa i le amataga o le vasega i le gaoioiga lenei.

Fai se lisi o ni auala moni se tolu atonu e taumafai Satani e faasese ai talavou i aso nei. E mafai ona e faaaofia ai taufaasese na feagai ma Amoleka, e pei o talitonuga sese e uiga i le Atua, o le folafolaga o le tamaoaiga po o le pule, po o osofaia o a tatou molimau i le Atua. O isi taufaasese e ono i ai o le faia lea o se mea lelei e foliga mai e leaga po o le faafeagai (tagai Isaia 5:20) ma le pepelo faapea e leai se mea e ta’u o le sa’o po o le sese (tagai 2 Nifae 28:22).

I tafatafa o auala taitasi ia e ono taumafai ai Satani e faasese i tatou, tusi ia le itiiti ifo ma le tasi se auala e mafai ona tatou sailia ai le fesoasoani mai le Atua e ala i le Agaga Paia e faatoilalo ai lena faaosoosoga. Tusi i lalo ni mea patino e te iloa e uiga i le Agaga Paia e mafai ona fesoasoani.

Uunaia tagata aoga e valaaulia le Agaga Paia e fesoasoani ia i latou e tetee atu i le taufaasese. Molimau atu i le matafaioi a le Agaga Paia ma le mafai ona avea ai o Ia o se faamanuiaga i o latou olaga.