Alema 12

O Se Loto Maaa pe Agamalu

O le a sou manatu i le uiga o le i ai o se loto maaa po o se loto agamalu agai i le Alii? Ina ua amata ona fesili Seseroma ia Alema ma Amoleka i fesili faamaoni, na aoao atu Alema o i latou e le faamaaaina o latou loto e mafai ona aoaoina mea a le Atua. Na aoao atu e Alema le fuafuaga o le togiola ma uunaia tagata e suesue o latou loto. O lenei lesona e mafai ona fesoasoani ia te oe e iloilo ai lou loto ma lou naunautaiga e talia le afioga a le Atua.

Uunaia tagata aoao ina ia mafaufau loloto. Tuu atu i tagata aoga se taimi e mafaufau loloto ai i mea ua latou aoaoina e uiga ia Iesu Keriso i tusitusiga paia ma upu a perofeta. Uunaia i latou e manatunatu pe faapefea ona faaalia Lona mana i tusitusiga paia ma i o latou lava olaga.

Sauniuniga a le tagata aoga: Mafaufau e tuu atu i tagata aoga taitasi se kopi o le iloiloga patino faaletagata lava ia o loo i lenei lesona. Valaaulia i latou e iloilo i latou lava ma mafaufau loloto pe faapefea ona aafia i latou i a latou tali.

Gaoioiga e Ono Mafai Ona Aoao Ai

Faatusatusaina o le loto i le kelei

Mafaufau e fai atu i ni tagata aoga se toalua e fai se mea mai le kelei i le minute e tasi. Afai e mafai, tuu atu i se tasi tagata aoga se kelei vaivai ma se kelei mago pe malo i le isi. Afai o lava se kelei o totoe, e mafai ona e tuu atu i tagata aoga uma i le vasega se fasi kelei itiiti mo lenei gaoioiga.

• E faapefea e le faaaogaina o se kelei vaivai pe malo ona aafia ai lou gafatia e mamanu ai?

Mafaufau e tusi ata o ni fatu faapei o fatu nei i luga o le laupapa.

I lau api talaaga mo suesuega, tusi ai ni fatu se lua, faaigoa le tasi i le “loto maaa” a o le isi i le “loto agamalu.” Atonu e fesoasoani le iloa e faapea i tusitusiga paia o le loto e masani ona faatusa i le “mafaufau ma le finagalo” o se tasi (O le Taiala i Tusitusiga Paia, “Loto,” scriptures.ChurchofJesusChrist.org).

Faatusatusa o tatou loto i le kelei ma le Alii i le tagata o loo mamanuina. A o e suesueina lenei lesona, saili le fesoasoani a le Alii e tali ai fesili nei:

• O le a le uiga o le i ai o se loto maaa po o se loto agamalu? Aisea e taua ai le tulaga o lo’u loto?

• O a ni auala ou te maua ai se loto maaa po o se loto agamalu?

• Afai e maaa lo’u loto, e mafai faapefea ona ou sailia le fesoasoani a le Alii e faamaluluina ai?

Atonu e aoga le lisi o nei fesili i luga o le laupapa ina ia mafai ai e tagata aoga ona tusi a latou tali i a latou api talaaga mo suesuega i le lesona atoa. E le tatau ona faamoemoe tagata aoga e tali nei fesili i le vaega lenei o le lesona.

A o e aoao, mafaufau e tusi ni faamatalaga i lalo ifo o fatu taitasi sa e tusia i lau api talaaga mo suesuega.

Loto maaa ma loto agamalu

A o amata ona outou suesue faatasi i le Alema 12, e ono fesoasoani le fesili atu i tagata aoga po o le a se mea latou te manatua e uiga ia Seseroma ma ana fegalegaleaiga ma Alema ma Amoleka.

Sa taumafai Seseroma ma isi e faasese ma tauleagaina Alema ma Amoleka e ala i le faia o fesili e maileia ai i laua (tagai Alema 11:21). Sa tali atu Amoleka e ala i le Agaga, ma molimau atu i le Faaola ma le Faamasinoga Mulimuli (tagai Alema 11:26–46). Na faamatala e Alema e faapea na la iloa ma Amoleka ia taufaasese a Seseroma e ala i le Agaga (tagai Alema 12:3–6).

Faitau le Alema 12:7–8, ma vaavaai mo le mea na tupu ia Seseroma.

• O a fasifuaitau o loo ta’u mai ai ia te oe e faapea ua sui Seseroma?

• O le a se eseesega e te manatu atonu na i ai i uiga o Seseroma i lona gafatia e maua ai tali?

Ona sa matuai manao lava Seseroma e fia iloa e uiga i le Faamasinoga Mulimuli, sa faaaoga ai e Alema lenei avanoa e aoao atu ai e uiga i le fuafuaga o le togiola a le Atua. Peitai, sa muai lapataia e Alema ia Seseroma e tatau ona sa’o lona loto i luma o le Atua.

A o e faitauina le Alema 12:9–11, faailoga upu po o fasifuaitau e fesoasoani ia te oe e malamalama ai i le mea e tupu ona o le tulaga o o tatou loto. Atonu e fesoasoani le iloaina o “mealilo a le Atua o upumoni faaleagaga ia, e na o faaaliga e mafai ai ona malamalama iai” (O le Taiala i Tusitusiga Paia, “Mealilo a le Atua,” scriptures.churchofJesusChrist.org).

Valaaulia tagata aoga e faasoa mai mea na latou aoaoina. Tusi i luga o le laupapa so o se mataupu faavae latou te faasoaina mai.

O mataupu faavae e lua atonu na e faailoaina mai o le (1) afai tatou te le faamaaaina o tatou loto ma tatou gauai atu ma le filiga i le afioga a le Atua, e mafai ona tatou iloa mealilo a le Atua ma le (2) afai tatou te faamaaa o tatou loto, o le a faaitiitia le afioga a le Atua tatou te maua seia oo ina tatou le iloa se mea e uiga i mealilo a le Atua. Mafaufau e tusi upumoni taitasi i tafatafa o fatu na e tusia i lau api talaaga.

Ina ia maua se malamalama sili atu e uiga i le i ai o se loto maaa po o mea e mafai ona tatou faia mo le Alii e faamaluluina ai o tatou loto, faitau nisi o fuaiupu nei. I tafatafa o fatu talafeagai i lau api talaaga mo suesuega, tusi ai mea ua e aoaoina po o fasifuaitau taua mai nei fuaiupu ma fuaiupu e te faitauina mai le Alema 12:7–11.

• Tagata o loo faamaaa o latou loto: 1 Nifae 15:3; 2 Nifae 33:2; Mosaea 11:29.

• O mea na faia e tagata mo le Alii e faamaluluina ai o latou loto: 1 Nifae 2:16; Alema 24:8.

Valaaulia tagata aoga e tusi i luga o le laupapa i tafatafa o fatu e lua mea sa latou aoaoina po o fasifuaitau mai fuaiupu. I tafatafa o le fatu vaivai, e mafai e tagata aoga ona fautua mai nisi o manatu nei e taitai atu ai i se loto agamalu: “tagi atu [ai] i le Alii” (1 Nifae 2:16); “fesili … ma le filiga” e uiga i le talalelei (Alema 12:8); tuu atu le “gauai ma le filiga” i mea ua tuuina mai e le Alii ia i tatou (Alema 12:9); ma fai mea e valaaulia ai Lona Agaga i o tatou olaga (tagai Alema 24:8).

Valaaulia tagata aoga e talanoaina pe aisea e talafeagai ai le tulaga o i ai o tatou loto. O se tasi auala e faia ai lenei mea o le valaaulia lea o ni nai tagata aoga e volenitia e tali fesili i se laulau a fono. E mafai ona latou nonofo i luga o nofoa i le pito i luma o le potu. Mafaufau e tusi fesili nei i luga o le laupapa. E mafai e le vasega ona fesili atu i le laulau a fono fesili nei poo isi fesili e talanoaina ai le taua o le tulaga o o tatou loto.

• O le a sou manatu o le a faape’i se tasi e fai mai ni fesili ma se loto maaa? O le a faape’i le fesili atu e tuuina atu ai le “gauai ma le filiga” (Alema 12:9) i le Alii?

• Aisea tatou te ono lagona ai i nisi taimi le faaosoosoina e faamaaa o tatou loto?

• Aisea e te manatu ai o le tulaga o o tatou loto i le Alii e mafai ona faia se eseesega i o tatou olaga?

Fuafuaga o le togiola a le Atua

Ona sa amata ona i ai se manao faamaoni o Seseroma ia malamalama i le toetu ma le Aso Faamasino, na aoaoina ai o ia e Alema e uiga i le fuafuaga o le togiola a le Atua. Sa ia aoao mai o lenei olaga o “se taimi e saunia ai e fetaiai ma le Atua” ma e uiga i le matafaioi taua a le Faaola i le faatoilaloina o a tatou agasala ma le oti (tagai Alema 12:16–18, 24–28, 33). Sa Ia faailoa mai le taua o le le faamaaaina o o tatou loto.

Mafaufau e valaaulia tagata aoga e moeiini o latou mata a o latou faia mea nei.

Faaalu sina taimi e vaai faalemafaufau ai pe faape’i le tu atu i luma o le Atua i le Faamasinoga Mulimuli pe a mavae le ola ai ma se loto maaa. Mafaufau foi pe faape’i pe a mavae ona ola ai ma se loto ua faamaluluina.

Faitau le Alema 12:12–15, 33–37, ma vaavaai pe mafai faapefea e lou loto ona aafia ai lou sootaga ma le Tama Faalelagi ma Iesu Keriso i le Faamasinoga Mulimuli. Atonu e te manao e faailoga upu po o fasifuaitau taua i au tusitusiga paia.

• E tusa ai ma le Alema 12:33–34, aisea e taua ai le le faamaaaina o o tatou loto ma ia salamo?

• Na faapefea ona avea le Faaola ma se faataitaiga atoatoa o le i ai o se loto agamalu ma le lotomaualalo i Lona Tama? (Tagai i le Mataio 26:39; 2 Nifae 31:4–7; Mataupu Faavae ma Feagaiga 19:18–19.)

Lou loto

Fesoasoani i tagata aoga e fai se iloiloga patino o o latou loto. E tatau ona avea lenei mea ma se aafiaga patino mo tagata aoga taitasi. E mafai ona e faaaogaina le iloiloga lenei pe fatu sau oe lava iloiloga. E mafai ona e faaali atu faatonuga ma faamatalaga o i luga o le laupapa, ma e mafai e tagata aoga ona faamaumau a latou tali i a latou api talaaga.

Ina ia fesoasoani ia te oe e iloilo lou lava loto, tali fesili nei i se fuafaatatau mai le 1 i le 5, ma le 1 o lona uiga “e le moni lava ia te au” ma le 5 o lona uiga “e moni pea ia te au.”

• Ou te manao i le taitaiga mai le Tama Faalelagi i vaega uma o lo’u olaga.

• Ua ou naunau e usitai i le Tama Faalelagi.

• Ou te talia faasa’oga.

• Ou te lagona le manaomia o le fesoasoani a le Faaola i lo’u olaga.

• Ua ou naunau e liliu atu i le Faaola ma salamo.

Ina ia fesoasoani i tagata aoga e manatunatu i mea sa latou aoaoina i lenei lesona, faasoa atu le tulaga faataitai lenei ma uunaia tagata aoga e faaaoga mau i a latou tali.

Vaai faalemafaufau e faapea sa lagona e se tasi sa ia te ia se loto maaa i nisi o auala ma sa manaomia le fesoasoani a le Alii ina ia faamaluluina. E mafai faapefea ona e faaaogaina mea ua e aoaoina i le aso e fesoasoani ai ia i latou? E mafai foi ona e faasoa atu le faataitaiga a le Faaola ma ou lava aafiaga patino.

Mafaufau e faaiu i le faasoa atu o lau molimau i upumoni i lenei lesona ma le gafatia o le Alii e faamaluluina ai o tatou loto ina ia maua atili Ana afioga.

Manatu ma Talaaga o Faamatalaga

Alema 12:10–11. O le a se mea e eseese ai e uiga ia i latou o e faamaaa o latou loto ma i latou e le faamaaaina o latou loto?

Na aoao mai Elder Donald L. Hallstrom o le Fitugafulu:

“Fai mai le Aposetolo o Iakopo, “A ia fai outou ma e anaana i le upu, a e aua le na ona faalogologo i ai” (Iakopo 1:22).

O nisi o i tatou e filifili i mea e “faalogo” ai ma “faia” pe a talafeagai. Ae mo i latou o e avatu o latou loto ma mafaufau i le Alii, pe mama pe mamafa le avega e leai lava se eseesega. Tatou te faaalia se loto ma le mafaufau faapaiaina e ala i le mulimuli pea i poloaiga a le Atua e tusa lava po o le a le faigata o tulaga. (Donald L. Hallstrom, “The Heart and a Willing Mind,” Ensign, Iun. 2011, 32)

O le a se mea e mafai ona ou faia e filifili ai le tulaga o lo’u loto?

A o avea ai o se tasi o Fitugafulu, sa faamalamalama mai ai e Elder Gerald N. Lund:

O le iloiloina ma le toto’a o tulaga o o tatou loto o se tasi lea o mea aupito taua e mafai ona tatou faia i lenei olaga. …

… O le tulaga o o tatou loto e aafia tonu ai lava lo tatou mataalia i mea faaleagaga. Ia tatou faia o se vaega o a tatou taumafaiga i aso uma le tatala o o tatou loto i le Agaga. Talu ai o i tatou lava o leoleo i o tatou loto, e mafai ona tatou filifili e faia faapea. Tatou te filifili i mea tatou te tuuina i totonu pe taofi i fafo. O le mea e lelei ai, o loo naunau lava le Alii e fesoasoani mai ia i tatou ia filifili ma le poto. (Gerald N. Lund, “Tatalaina o o Tatou Loto,” Liahona, Me 2008, 33–34)

Gaoioiga Faaopoopo e Aoao Ai

Loto maaa

E ono fesoasoani mo tagata aoga le suesueina o fuaiupu o mau o loo aoao mai ai e uiga i taunuuga o le i ai o se loto maaa. Mafaufau e vaevae tagata aoga i ni paga ma atofa atu ia i latou se tasi o poloka mau nei: Eperu 3:12–19; 1 Nifae 15:7–11; Alema 34:30–35; 3 Nifae 2:1–3. Valaaulia tagata aoga e faitau faatasi fuaiupu. E mafai e se tagata aoga se toatasi ona vaavaai pe faapefea ona faamaaa loto o tagata a o vaavaai le isi tagata aoga mo taunuuga.

Ua molimau atu Alema ia Iesu Keriso

Ina ia fesoasoani i tagata aoga ia lagona le moni o le molimau a Alema o loo faamaumau i le Alema 12–13, mafaufau e faaaoga le vitio “Ua Lapataia e Alema ia Seseroma” (3:59), o loo maua i le ChurchofJesusChrist.org. Valaaulia tagata aoga e faalogologo mo taunuuga o le faamaaaina o o tatou loto ma faamanuiaga o loo avanoa e ala mai ia Iesu Keriso ia i latou e le faamaaaina o latou loto. Mafaufau e taofi le vitio i vaega eseese e faamamafa atu, ona faitau lea ma talanoaina faamatalaga e sili ona aoga i au tagata aoga.

Alema 12:19–37. O le fuafuaga o le togiola

Afai o le a manuia tagata i le talanoaina atili o le fuafuaga o le togiola, faamalamalama atu o se tagata e igoa ia Anetiona, o le sa avea ma se tasi o taitai sili i Amonaea, na faia ni fesili e faatatau i mea na aoao atu e Alema ma Amoleka e uiga i le toetu. Sa ia fai mai na aoao mai tusitusiga paia o le a tatou le toetutu pe ola e faavavau ona sa taofia e le Atua ia Atamu ma Eva mai le aai i le fua o le laau o le ola ina ua uma ona la ’aia le fua faasaina i le Faatoaga o Etena. (Tagai i le Alema 12:20–21.)

Faitau le Alema 12:22–37, ma vaavaai pe na faapefea ona tali atu Alema e ala i le aoao atu e uiga i le fuafuaga o le togiola. Mafaufau e talanoaina lo tatou faamoemoega i le lalolagi (tagai Alema 12:24) ma mea na faia e le Tama Faalelagi ma Iesu Keriso mo i tatou e toe foi atu ai i lo La’ua afioaga (tagai Alema 12:25, 30, 32–34).

Alema 12:32. O le fuafuaga o le faaolataga ma poloaiga

Fesili i tagata aoga pe na aoao mai e le Atua ia i tatou le ata o le faaolataga pe na muamua tuuina mai ia i tatou poloaiga. Valaaulia i latou e faitau le Alema 12:32 e sue ai le tali. Valaaulia tagata aoga e tusi pe otooto le ata o le faaolataga i a latou api talaaga mo suesuega ma faamalamalama atu i se paga po o se vaega toalaiti le auala e mafai ai ona fesoasoani lo tatou iloaina o lea vaega e malamalama ai i le mafuaaga e manaomia ai ona tatou tausia poloaiga.