“Atamai i Aoaoga Faavae Iloiloga 11: Tauloto ma Malamalama,” Tusi Lesona a le Faiaoga o le Tusi a Mamona (2024)

“Atamai i Aoaoga Faavae Iloiloga 11,” Tusi Lesona a le Faiaoga o le Tusi a Mamona

Atamai i Aoaoga Faavae Iloiloga 11

Tauloto ma Malamalama

tagata aoga o loo sii le lima e fai atu se fesili

O le taulotoina o fuaitau o le atamai i aoaoga faavae ma le malamalama i le aoaoga faavae latou te aoaoina e mafai ona valaaulia ai le Agaga Paia i lou olaga ma fesoasoani ia te oe ia avea atili e faapei o Iesu Keriso. O lenei lesona ua faamoemoe e fesoasoani ia te oe e tauloto fuaitau autu o mau mai fuaitau muamua e 12 o le atamai i aoaoga faavae o le Tusi a Mamona ma saili le malamalama atili e ala i le fesili atu ma le taliina o fesili musuia.

Fesoasoani i tagata aoga e atiina ae tomai o le suesueina o tusitusiga paia. Uunaia tagata aoga e fai fesili i le vasega ma i le taimi o a latou suesuega faaletagata lava ia. O le aoao e fai fesili ma saili tali mai tusitusiga paia e mafai ona faaleleia ai se aafiaga suesue a se tagata aoga. Fesoasoani i tagata aoga ia malamalama o mau e faatatau i fesili ma luitau o loo feagai ma i latou i le taimi nei, pe tetele pe laiti.

Sauniuniga a le tagata aoga: Valaaulia tagata aoga e filifili mai fuaitau muamua e 12 o le atamai i aoaoga faavae se fuaitau se tasi latou te mananao e aoao atili i ai. Uunaia i latou e o mai saunia i le vasega e faasoa mai le fuaitau na latou filifilia ma ia le itiiti ifo ma le tasi se fesili latou te lagona e mafai ona fesoasoani ia i latou e aoao atili ai e uiga i lena fuaitau.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina ua saunia e le faatonu po o le taitai faamaopoopo o le eria po o le itulagi ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

Tauloto mau faasino ma fasifuaitau autu o mau

Fuaitau ma Fasifuaitau Autu Muamua e 12 o le Atamai i Aoaoga Faavae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino 1 Nifae 3:7	Fasifuaitau Autu o le Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o le Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o le Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o le Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o le Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o le Mau “Ia taumamafa fiafia i afioga a Keriso; aua faauta, o afioga a Keriso o le a taʼu mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o le Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o le Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o le Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o le Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o le Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o le Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

Faia o ni fesili musuia

O fesili musuia o se vaega taua o le faagasologa o le aoaoina. I le taimi o Lana galuega i la le tino, sa tele ina faia e le Faaola ni fesili na valaaulia ai tagata aoao e mafaufau, lagona, ma faatino ia upumoni sa Ia aoao atu (tagai Mataio 16:13–16; Ioane 6:66–69). Atonu na e maitauina se mātua, faiaoga, po o se taitai o le Ekalesia na faia ni fesili na fesoasoani ia te oe e malamalama atili ai i le talalelei pe faafesootai ai mea o loo e aoaoina i lou lava olaga. O le faia ma le taliina o fesili musuia e mafai ona avea ai le faagasologa o le aoaoina o se aafiaga e sili atu ona faaauai ma anoa mo oe.

Mafaufau e lisi vaega nei e tolu o fesili i luga o le laupapa. Ina ia saunia tagata aoga mo le gaoioiga, filifili se tasi o fuaitau muamua e 12 o le atamai i aoaoga faavae ma fatu se fesili mai lena fuaitau mo vaega taitasi. E mafai foi ona e valaaulia tagata aoga e fautua mai ni fesili mo vaega taitasi. O fesili mo faataitaiga e faaaoga ai le 2 Nifae 32:8–9 o loo tuuina atu.

O faataitaiga nei o ituaiga o fesili eseese e mafai ona faaaoga pe a suesue i tusitusiga paia. O fesili mo faataitaiga e faatatau i upumoni o loo aoaoina i le 2 Nifae 32:8–9.

O fesili e fesoasoani ai ia te oe ia malamalama i le matalalaga o mau

O ai o loo tautala i le 2 Nifae 32:8–9?
O ai o loo tautala i ai o ia? Aisea?

O fesili e fesoasoani ai ia te oe ia malamalama i le anotusi poo uiga o mau

O nei fesili e mafai ona fesoasoani ia i tatou e faailoa ai aoaoga faavae ma mataupu faavae.

O le a se mea na faamoemoe le tusitala tatou te aoaoina?
O le a sou manatu i le uiga o le “tatalo e le aunoa, ma ia le faavaivai”? (2 Nifae 32:9).

O fesili e fesoasoani ai ia te oe e malamalama ai i aoaoga faavae ma mataupu faavae i tusitusiga paia

O le a sou manatu e mafai faapefea e le tatalo e le aunoa ona aafia ai lo tatou sootaga ma le Tama Faalelagi?
O le a se mea e mafai ona fesoasoani tatou te manatua ai e tatalo e le aunoa, e tusa lava pe tatou te le fia faia?

A uma ona faataitai nisi o fesili faataitai ma tagata aoga, mafaufau e vaevae i latou i ni paga po o ni vaega toalaiti mo le gaoioiga lenei:

I a latou vaega, tuu i tagata aoga e filifili se tasi o fuaitau muamua e 12 o le atamai i aoaoga faavae ma faitau faatasi le fuaitau atoa. Ona mafai lea ona latou fatuina ia le itiiti ifo ma le tasi se fesili mai vaega taitasi e tolu o loo i luga o le laupapa. A uma ona fatuina e tagata aoga a latou fesili e tolu, tuu atu ia i latou e tuufaatasi ma se isi paga po o se vaega. Valaaulia le paga po o le vaega muamua e faasoa mai le latou fuaitau filifilia ma fesili, ma valaaulia le paga po o le vaega lona lua e tali atu i fesili taitasi. Ona tuu atu lea i tagata aoga e fesuiai matafaioi.

Afai e lava le taimi, toe fai le gaoioiga ae tuu i vaega taitasi e filifili se isi fuaitau o mau.

Uunaia tagata aoga e faaaoga le tomai o le faia o fesili i le taimi o a latou suesuega faaletagata lava ia ma i le vasega.