Alema 14

“Ia Faia Lava e Tusa ai ma le Finagalo o le Alii”

Ona o loo tatou ola ai i se lalolagi pa’ū, e toatele tagata o lo o taulimaina ma le saua ma le le tonu. A o aoao atu e Alema ma Amoleka le talalelei a Iesu Keriso i le aai o Amonaea, sa faataugā e tagata amioleaga e na talitonu ma fasiotia i latou i le afi. Ona faafalepuipuiina ai lea o Alema ma Amoleka ma matuai sauaina lava. O le faamoemoega o lenei lesona o le fesoasoani lea ia te oe ia faalagolago i le Alii pe a feagai ma faigata, mafatiaga, ma le le tonu.

Aoao atu e ala i le mana o le Agaga Paia. E molimau mai le Agaga Paia i upumoni uma ma molimau mai i le Tama ma le Alo. Na aoao mai Peresitene Henry B. Eyring, “E le mafai e a tatou tagata aoga ona iloa le Atua, ma alolofa e pei ona tatau ai ona latou alolofa atu, sei vagana ua aoaoina i latou e le Agaga Paia” (“To Know and to Love God” [afiafi faatasi ma se Pulega Aoao, Fep. 26, 2010], 2).

Sauniuniga a le tagata aoga: Valaaulia tagata aoga e manatunatu i so o se tofotofoga na latou onosaia. Uunaia i latou e mafaufau pe na faapefea e lo latou faatuatuaina o le Tama Faalelagi ma Iesu Keriso ona fesoasoani ia i latou pe e mafai foi ona fesoasoani ia i latou e onosaia o latou tofotofoga.

Gaoioiga e Ono Mafai Ona Aoao Ai

Luitau o le olaga faitino

Faitau le saunoaga lenei a Elder Anthony D. Perkins o le Fitugafulu:

Po o fea lava e te nofo ai, o mafatiaga faaletino pe faalelagona mai tofotofoga eseese ma vaivaiga o le olaga nei sa avea, o loo avea pea nei, pe o le a i ai se aso e avea ai o se vaega o lou olaga. (Anthony D. Perkins, “Ia Manatua Lau Au Paia Mafatia, Lo Matou Atua e,” Liahona, Nov. 2021, 103)

Uunaia tagata aoga e mafaufau i le tele o tali e ono mafai ona iai i le fesili lenei, ma mafaufau e lisi i luga o le laupapa.

• O a nisi o auala eseese e mafai ona tatou tali atu ai i tofotofoga?

Alema 14 o se tala o tagata amiotonu o e na feagai ma tofotofoga ogaoga. O le tele o nei tofotofoga sa faamalosia i o latou luga e tagata o e sa faaaogaina sese lo latou lotofaitalia. A o e suesue, mafaufau pe mafai faapefea e upumoni ua e mauaina mai faataitaiga a Alema, Amoleka, ma isi tagata amiotonu ona fesoasoani ia te oe e tali atu ai i tofotofoga i le taimi nei ma i le lumanai.

Mafaufau e tusi igoa nei i luga o le laupapa. Valaaulia tagata aoga e o mai i le laupapa ma tusi mea na mafatia ai i latou taitoatasi e pei ona faamatalaina i le Alema 14:1–9. Afai e te faaaogaina le vitio “Ua Talitonu Seseroma, ma ua Sauaina e Amiotonu” (3:51), o loo maua i le ChurchofJesusChrist.org, mafaufau e taofi i le faailo taimi 2:03.

• Alema ma Amoleka

• Seseroma

• O e talitonu i afioga a le Atua

Faitau le Alema 14:1–9, vaavaai mo faataitaiga o mafatiaga na oo i ai tagata eseese. Atonu foi e te manao e matamata le vitio “Ua Talitonu Seseroma, ma ua Sauaina e Amiotonu” (3:51), o loo maua i le ChurchofJesusChrist.org.

• O a ni au fesili atonu o i ai pe afai na e oo i ni tofotofoga e pei o nisi o nei tagata?

Mafaufau e faaaoga le gaoioiga faaopoopo e aoao ai ua faaautuina “Alema 14:11. Vaaiga e faavavau” e fesoasoani ai i tagata aoga e iloilo pe faapefea ona suesue manatu faavae ma fesili faatasi ai ma se vaaiga e faavavau.

Faalagolago ai i le Alii

E mafai ona tatou tali atu i le tele o auala pe a tatou oo i mafatiaga po o le molimauina o mafatiaga o isi. Faitau le Alema 14:10–11, vaavaai pe na faapefea ona tali atu Amoleka ma Alema i mafatiaga o e na talitonu.

• Pe na i ai se taimi na e manao ai e laveai oe lava po o isi mai le tiga o se tofotofoga, e pei o Amoleka? Aisea?

• O le a se mea ua e aoaoina e uiga i le Atua mai le tali a Alema i le fuaiupu 11?

Faitau le Alema 14:12–13, vaavaai mo se upumoni na aoao mai e Alema e uiga i le ala e tali atu ai pe a tatou oo i puapuaga.

• Na faapefea ona faaalia e upu a Alema le faalagolago i le Alii?

• O le a se mataupu faavae e mafai ona tatou aoao mai i le faataitaiga a Alema?

O se tasi o mataupu faavae e mafai ona tatou aoaoina o le taimi tatou te feagai ai ma tofotofoga ma puapuaga, e mafai ona tatou filifili e faalagolago i le Alii e tusa lava po o le a le taunuuga. Mafaufau e tusi le mataupu faavae lenei i lau api talaaga mo suesuega ma faailoga le fasifuaitau “Ia faia lava e tusa ai ma le finagalo o le Alii” i au tusitusiga paia.

• O a ni auala e te manatu o le faalagolago i le Alii o se filifiliga?

• E mafai faapefea ona e faaaogaina le fasifuaitau “Ia faia lava e tusa ai ma le finagalo o le Alii” i se mea o loo feagai ma oe i le taimi nei?

Mafaufau pe mafai faapefea ona e fesoasoani i tagata aoga e iloilo lo latou gafatia e faalagolago ai i le Alii i taimi o o latou tofotofoga. Mafaufau e lisi faamatalaga nei i luga o le laupapa, ma tuu atu i tagata aoga se taimi mo se iloiloga filemu faaletagata lava ia.

Mafaufau i lou olaga ma tulaga. O le a lau mea e fai pe a oo oe po o i latou e te alofa i ai i sauaga, tofotofoga, po o le le tonu? Tali atu i faamatalaga nei i taimi uma, nisi taimi, po o le leai.

1. Ou te faalagolago i le finagalo ma le taimi a le Alii pe a tatalo atu mo se toomaga mai ou tofotofoga.

2. Ou te sailia ma le faamaoni le onosai ma le malamalama pe a foliga mai e le tonu le olaga.

3. Ou te faatotonugalemuina lo’u faatuatua ia Iesu Keriso ma Ana folafolaga e faavavau nai lo se taunuuga faapitoa ou te faamoemoe i ai.

Sa faasoa mai e Elder Quentin L. Cook o le Korama a Aposetolo e Toasefululua se vaaiga e mafai ona fesoasoani ia i tatou e faalagolago ai i le Alii i taimi o o tatou tofotofoga. Maimoa le vitio “O Le Filemu o Le Tagata Lava Ia: O Le Taui lea o le Amiotonu” mai le faailo taimi 9:02 i le 9:33 ChurchofJesusChrist.org, o loo maua i le, pe faitau mea nei:

Na tatou tofusao uma i fonotaga i le lagi lea na saunia mo le faitalia saoloto mama, ma le iloa o le a i ai tiga i le tino e oo lava i mala e le mafaamatalaina ona o le faaaoga sese o le faitalia. Sa tatou malamalama o lea mea e ono tuua ai i tatou ma le lotoita, fememea’i, lēmapuipuia, ma le faatasinaina. Ae sa tatou iloaina foi o le Togiola a le Faaola o le a faatoilaloina ai ma toe tauia ai mea uma e le o tonu o le olaga nei ma aumaia ia i tatou le filemu. (Quentin L. Cook, “Filemu o le Tagata Lava Ia: O Le Taui lea o le Amiotonu,” Liahona, Me 2013, 33–34)

• O le a se mea ua e aoaoina e mafai ona fesoasoani ia te oe pe a e oo i puapuaga po o le iloaina ai o puapuaga o isi?

Ia mautinoa ua malamalama tagata aoga i faamatalaga nei o se vaega o le talanoaga.

E taua le manatua afai o loo e tiga pe sauaina i soo se auala, e tatau ona e sailia se fesoasoani mai se matua po o se taitai o le Ekalesia ina ia mafai ona latou fesoasoani ia te oe e foia le faafitauli. E alofa le Alii ia te oe ma e finagalo ia e lagona le filemu ma le fiafia.

Faaauau ai i le faatuatua ma le faalagolago i le Alii

Ina ua uma ona faamalosia Alema ma Amoleka e molimauina le susunuina o e amiotonu na talitonu, sa tauemuina i laua, sasaina, ma faafalepuipuiina e taitai o Amonaea (tagai Alema 14:14–17).

Filifili pe o le a le auala lelei sili e faaauai ai tagata aoga i lau vasega a o latou suesue i fuaiupu nei. Atonu e fiafia tagata aoga e faitau faatasi pe faalogologo i se faiga faaleopue ma mulimuli ai.

Afai e manuia tagata aoga mai le faatusatusaina o lenei tala i le soifuaga o le Faaola, mafaufau e faaaoga le gaoioiga faaopoopo faafaiaoga “Alema 14:14–24. Mulimuli i le faataitaiga a Iesu Keriso.”

Faitau le Alema 14:18–29, vaavaai pe na faapefea ona faalagolago Alema ma Amoleka i le Alii i le taimi o o laua puapuaga. Atonu foi e te manao e matamata le vitio “Ua Laveai Faavavega Alema ma Amoleka mai le Falepuipui” (2:45), o loo maua i le ChurchofJesusChrist.org.

• Na faapefea ona faaauau e Alema ma Amoleka ona faalagolago i le Alii i le taimi o o laua mafatiaga?

O ai e te iloaina?

Mafaufau e vaevae tagata aoga i ni paga ma valaaulia i latou e faasoa mai e uiga i tagata latou te iloa o ni faataitaiga lelei o le faalagolago i le Alii i taimi o tofotofoga. E mafai foi e tagata aoga ona faasoa mai ni manatu e uiga i auala e mafai ai ona latou faalagolago atili i le Alii i taimi o o latou tofotofoga.

Mafaufau i se tasi i lou olaga o loo taumafai e faalagolago i le Alii i taimi o tofotofoga ma mafatiaga. O le a se mea ua e aoao mai i lana faataitaiga? O a ni mea talitutusa o e vaaia i le va o le tali a lenei tagata ma le ala na tali atu ai Alema ma Amoleka i faigata?

Tusi se mea patino se tasi pe lua e mafai ona e faia e faalagolago atili ai i le Alii pe a faigata le olaga pe foliga mai e le tonu. Mafaufau e tuu mea e te tusia i se nofoaga o le a e vaai soo i ai.

Manatu ma Talaaga o Faamatalaga

E mafai faapefea ona fesoasoani Iesu Keriso ia te au pe a le tonu le olaga?

Na tautino mai Elder Dale G. Renlund o le Korama a Aposetolo e Toasefululua:

Ona sa onosa’ia e Iesu Keriso le taulaga togiola e le i’u, o lea ua Ia gaualofa atoa ai ia i tatou. E silafia e Ia i tatou e le aunoa ma o tatou tulaga.

I le olaga nei, e mafai ona tatou “faalatalata atu ai ma le faamalosi” i le Faaola ma maua ai le mutimutialofa, faamalologa, ma le fesoasoani [tagai Eperu 4:16]. Tusa lava foi pe a tatou mafatia le mafuatiaina, e mafai e le Atua ona faamanuiaina i tatou i ni ala faigofie, masani, ma le taua. A o tatou aoao ia iloa nei faamanuiaga, o le a faateleina lo tatou faalagolago i le Atua. I olaga o le faavavau, o le a foia e le Tama Faalelagi ma Iesu Keriso faiga le tonu uma. Tatou te mananao manino ia iloa pe faapefea ma pe o afea. Pe faapefea ona Laua faia lena mea? Pe o afea Laua te faia ai lena mea? I lo’u iloa i ai, Laua te lei faaalia maia pe faapefea po o afea. O le mea ua ou iloa o le a Laua faia.

I tulaga e le tonu pe faaitu’au, o se tasi o a tatou mea e fai o le faatuatua lea “o mea uma e le tonu e uiga i le olaga e mafai ona faasa’o e ala i le Togiola a Iesu Keriso” [Talai La’u Talalelei: O se Taiala mo Auaunaga Faifeautalai (2018), 52]. Na manumalo Iesu Keriso i le lalolagi ma “miti’ia” ai faiga faaitu’au uma. Ona o Ia, ua mafai ai ona tatou maua le filemu i lenei lalolagi ma ia loto tetele. (Dale G. Renlund, “Faapito’au Faaosolilivau,” Liahona, Me 2021, 43)

Gaoioiga Faaopoopo e Aoao Ai

Alema 14:11. Vaaiga e faavavau

Atonu e aoga mo tagata aoga le toe iloilo o le mataupu faavae lona lua o le mauaina o le malamalama faaleagaga, suesueina o manatu ma fesili faatasi ma se vaaiga e faavavau. Mo se faataitaiga, e mafai ona e valaaulia tagata aoga e vaai faalemafaufau faapea o se tasi e latalata atu ia i latou na oo i se faalavelave ma fesili ane, “Aisea e tutupu ai mea leaga i tagata lelei?” Ona mafai lea e tagata aoga ona faaaoga upumoni ma mataupu faavae mai le Alema 14:11 e fesoasoani ai i la latou uo e toefaaupu le fesili ma se vaaiga e faavavau.

Alema 14:13. “Ia faia lava e tusa ai ma le finagalo o le Alii.”

Afai e mafai ona manuia tagata aoga mai le iloiloina atili o le uiga ma le taua o lenei fasifuaitau, mafaufau e valaaulia i latou e suesue i tusitusiga paia mo ni faamatalaga ma ni manatu talitutusa. Mo se faataitaiga, e mafai ona e lisiina mau faasino nei i luga o le laupapa ma vaevae i tagata aoga. E mafai ona e valaaulia tagata aoga e faasoa mai mea na latou aoaoina ma pe faapefea ona fesootai i le faamatalaga o le faatuatua o Alema i le Alema 14:13.

• Tanielu 3:12–18

• Mataio 26:36–39

• 1 Nifae 18:11–16

• Iosefa Samita—Talafaasolopito 1:22–25

• O le valitaina ma le faafulumanuina o Eteuati Paterika (tagai Au Paia, vol. 1, O Le Tagavai o le Upumoni, 179–80)

Alema 14:14–24. Mulimuli i le faataitaiga a Iesu Keriso

Alema 14:14–24 o loo i ai se tala mamana e uiga ia Alema ma Amoleka i le mulimuli ai i le faataitaiga a Iesu Keriso. E mafai ona e valaaulia tagata aoga e faitau le 1 Nifae 19:9 ma faafesootai i le Alema 14:14–24 i a latou tusitusiga paia. Ona mafai lea e tagata aoga ona iloilo le Alema 14:14–24, ma vaavaai mo mea e talitutusa ai le tali a le Faaola i puapuaga (tagai Mataio 26:57–67; 27:26–31) ma le tali a Alema ma Amoleka. Mafaufau e faailoa atu le mataupu faavae lenei ona valaaulia lea o tagata aoga e mafaufau i tagata latou te iloa o e o loo taumafai e ola i lena ala: Pe a tatou oo i mafatiaga ma puapuaga, e mafai ona tatou filifili e mulimuli ma le lotomaualalo i le faataitaiga a Iesu Keriso.

‘Autusitala

A uma ona faamaea e tagata aoga le galuega atofaina o le faitauga i le Alema 14:18–29, mafaufau e valaaulia i latou e vaai faalemafaufau faapea o i latou o ni ‘autusitala o i ai se avanoa e faatalanoa ai Alema ma Amoleka e uiga i o laua aafiaga i le aai o Amonaea. Uunaia tagata aoga e mafaufau i fesili e ono mafai ona latou fai atu ia Amoleka ma Alema e faatatau i mea sa laua aoaoina e uiga i le Alii ma pe faapefea ona faalagolago atili ia te Ia i taimi o tofotofoga. Lisi na fesili i luga o le laupapa. Ona mafai lea ona e vaevaeina tagata aoga i ni vaega taitoafa e faatinoina o se tala, o ni tagata aoga se toalua e faatinoina le matafaioi a le ‘autusitala ma ni tagata aoga se toalua e faatinoina le matafaioi a Alema ma Amoleka. O tagata aoga o loo faatinoina tulaga o ni ‘autusitala e mafai ona faaaoga fesili o loo i luga o le laupapa mo le faatalanoaga. E mafai ona e uunaia tagata aoga o loo fai ma Alema ma Amoleka e faaaoga mataupu faavae ma manatu mai le Alema 14 e fesoasoani ia i latou e tali atu ai.