Atamai i Aoaoga Faavae Iloiloga 12

Malamalama ma Faaaoga

O lenei lesona o le a fesoasoani ia te oe e iloilo ma faataitai ai le malamalama ma le faaaogaina o fuaitau o le atamai i aoaoga faavae sa e suesueina.

O le fesoasoani ai i tagata aoga ia avea ma tagata auai mataalia. A o e sauniuni e aoao atu, taulai atu i mea o le a faia e tagata aoao. Uunaia tagata aoga e fai se taumafaiga e aoao ai mai tusitusiga paia ma mai le tasi ma le isi. A o auai ai tagata aoga, o le a faateleina lo latou mautinoa i lo latou gafatia e aoao ai upumoni o le talalelei. O le a sili atu foi ona ono faaaogaina e tagata aoga mea latou te aoaoina.

Sauniuniga a le tagata aoga: Mafaufau e valaaulia tagata aoga e filifili ni fuaitau se lua o le atamai i aoaoga faavae i le va o le 1 Nifae ma le Mosaea ma mafaufau loloto i mea e mafai ona latou faia e malamalama ai ma faaaoga.

Gaoioiga e Ono Mafai Ona Aoao Ai

Atonu e manaomia ona aoao atu se lesona o fuaitau o le atamai i aoaoga faavae e suitulaga i lenei lesona toe faamanatu. Tagai i le faasologa faatulagaina ua saunia e le faatonu po o le taitai faamaopoopo o le eria po o le itulagi ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

O le malamalama ai i fuaitau o le atamai i aoaoga faavae

Manatu faapea ua e maua le avanoa e talanoa ai i se tasi e manatu latou te le malamalama i tusitusiga paia ma e le o mautinoa pe latou te mananao e taumafai.

• Aisea e taua ai le taumafai ia malamalama i tusitusiga paia?

• Afai e te tuuina atu se fautuaga e uiga i mea e mafai e se tasi ona fai e faateleina ai lo latou malamalama, o le a sau tala e fai atu?

Mafaufau e tusi manatu o tagata aoga i luga o le laupapa. O nisi o manatu e ono talafeagai o loo lisiina atu i lalo. Ona valaaulia lea o tagata aoga e filifili ni fuaitau se lua o le atamai i aoaoga faavae ma faaaoga se tasi o manatu o i le laupapa e fesoasoani e faaloloto ai lo latou malamalama i le fuaitau.

O nisi o auala e faaloloto ai lou malamalama e aofia ai

• le vaai o upu e te le malamalama i ai;

• faitauina o le ulutala o le mataupu po o fuaiupu ia e muamua pe i le mae’a o le fuaitau o loo e suesueina mo le faatatauga;

• faitauina o mau-fefaasinoa’i i vaefaamatalaga;

• vaavaai i upu taua i le Taiala o Autu po o le O le Taiala i Tusitusiga Paia;

• fesili atu i se matua, faiaoga, po o se taitai o le Ekalesia mo se fesoasoani;

• faailoaina o upumoni e uiga ia Iesu Keriso; ma

• mafaufau loloto pe mafai faapefea e le ola ai i na upumoni ona fesoasoani ia te oe e latalata atili atu ai i le Faaola.

Faaali pe tuu atu i tagata aoga se kopi o le siata lenei.

Fuaitau ma Fasifuaitai Autu Muamua e 12 o le Atamai i Aoaoga Faavae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino 1 Nifae 3:7	Fasifuaitau Autu o le Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o le Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o le Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o le Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o le Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o le Mau “Ia taumamafa fiafia i afioga a Keriso; aua faauta, o afioga a Keriso o le a taʼu mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o le Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o le Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o le Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o le Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o le Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o le Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”

© 2023 by Intellectual Reserve, Inc. Ua taofia aiā tatau uma.

Faaaogaina o fuaitau o le atamai i aoaoga faavae

O gaoioiga nei e mafai ona fesoasoani i tagata aoga e faataitai ai le faaaogaina o fuaitau o le atamai i aoaoga faavae. Atonu e te manao e faaaoga tau o se tasi o na mea, pe e mafai foi ona e faatagaina tagata aoga e filifili po o le fea o mea latou te faia e fua i mea latou te fiafia i ai po o gafatia. Tuu i tagata aoga e galulue faatasi i ni vaega toalaiti.

Gaoioiga A. Fatu se vaaiga faataitai

1. I le tasi itu o se fasipepa, tusi ai se fesili o le talalelei e mafai ona taliina po o se tulaga e mafai ona fesoasoani e faaaoga ai lenei fuaitau o le atamai i aoaoga faavae.

2. I le isi itu, tusi ai le mau faasino o le atamai i aoaoga faavae, fasifuaitau autu, ma se faamalamalamaga puupuu o le auala e mafai ai ona fesoasoani.

Afai e na o le pau lea o le gaoioiga e fai e tagata aoga, e mafai ona latou ao mai i totonu a latou pepa. Ona mafai lea ona e faitauina tulaga faataitai po o fesili ma valaaulia le vasega e faailoa mai upumoni mai fuaitau o le atamai i aoaoga faavae e mafai ona fesoasoani. O se isi auala, mafaufau e valaaulia tagata aoga e savavali faataamilo i le potu, fefaasoaai ma le tasi ma le isi ia tulaga po o fesili na latou tusia ma tuuina atu le avanoa i isi tagata aoga e taumafai e mafaufau i upumoni e faatatau i ai.

Gaoioiga E. Fai se otootoga o se vitio

Mafaufau faapea ua filifilia e lau siteki se tasi o fuaitau autu o mau o le atamai i aoaoga faavae e fai ma autu mo le konafesi a le autalavou. Ua latou talosagaina oe e fuafua se vitio e faalauiloa atu ai le autu. Fatu se otootoga mo se vitio e aofia ai

• le fasifuaitau autu o le mau ma le mau faasino,

• se auala fatufatuai e faamalamalama ai le uiga o le fuaitau o le atamai i aoaoga faavae ma pe aisea e taua ai i le autalavou, ma

• pe faapefea ona faatatau i o tatou olaga ma fesoasoani ia i tatou ia latalata atili atu i le Faaola. (E mafai ona e faaaofia ai se faataitaiga po o se tala mai tusitusiga paia, konafesi aoao, po o lou lava olaga.)

Afai e na o le pau lea o le gaoioiga e fai e tagata aoga, mafaufau e valaaulia ni tagata aoga eseese e faasoa mai o latou manatu. Afai e mafai, mafaufau e tuu atu i tagata aoga e fai le vitio.

Afai e mafai e tagata aoga ona fai se tasi o gaoioiga, valaaulia i latou e faasoa mai mea na latou faia i le vaega o totoe o le vasega.