“Iloilo Lou Aoaoina 5: Mosaea 18–Alema 16,” Tusi Lesona a le Faiaoga o le Tusi a Mamona (2024)
“Iloilo Lou Aoaoina 5,” Tusi Lesona a le Faiaoga o le Tusi a Mamona
Iloilo Lou Aoaoina 5
O lenei lesona ua faamoemoe e fesoasoani ia te oe e iloilo ai sini ua e faatuina, ma le tuputupu a’e na e oo i ai mai i le taimi o au suesuega o le Tusi a Mamona.
Fesoasoani i tagata aoga ia talia ma faaaloalo le tasi i le isi. Fatu ni aafiaga e mafai ai e tagata aoga ona maua mai ai le malosi mai le tasi ma le isi ma mai i o latou manaoga tutusa ia maua ai le faamalologa, alofa tunoa ma le filemu o le Faaola. A o iloa e tagata aoga mea latou te tutusa ai, o le a sili atu ona latou saofaga i ni auala gaualofa.
Sauniuniga a le tagata aoga: E mafai ona valaaulia tagata aoga e sue se mau i le Mosaea 18–Alema 16 e uiga i le Togiola a Iesu Keriso e taua ia i latou.
Gaoioiga e Ono Mafai Ona Aoao Ai
Ua faamoemoeina lenei lesona e fesoasoani i tagata aoga e iloilo sini na latou faatuina, lo latou gafatia e faamatala ai aoaoga i le Tusi a Mamona, po o auala ua suia ai o latou uiga, manaoga, ma le gafatia e ola ai i le talalelei. O le suesuega a le vasega o le Mosaea 18 e oo i le Alema 16 atonu ua faamamafaina ai isi upumoni nai lo o upumoni i nei gaoioiga. Afai o lea, e mafai ona fetuunai gaoioiga e faaaofia ai na upumoni.
Toe tepa i tua, i le agai ai i luma
Mafaufau e faasoa atu se aafiaga patino o le alu i se savaliga sopo po o se tietiega uila, vaaia ai o lou alualu i luma, ma faaauau atu ai pea i lou taunuuga. Afai e mafai, faasoa atu ni ata o lau tafaoga. E mafai foi ona valaaulia tagata aoga e faasoa mai a latou lava aafiaga talitutusa.
Mafaufau i se taimi na e alu ai i se savaliga sopo, tietiega uila, po o se malaga tau mamao. A o e vaavaai atu i luma ma amata ona faimalaga, atonu e te lagona e foliga o loo itiiti lou alualu i luma. O le a le mea e tupu pe a e faaalu sina taimi e toe tepa ai i tua i le mea sa e i ai? Atonu o le a e maitauina ua e faimalaga mamao atu nai lo le mea na e iloaina.
-
O le a le aoga o le iloaina o le mea sa e i ai ma le mea o loo e agai atu i ai?
E mafai ona faatusatusa o tatou olaga i se faigamalaga. O le tomanatu ai i le mea o loo e i ai ma le mea o loo e agai atu i ai i se faigamalaga e mafai ona pei o le tomanatu faavaitaimi i au sini o loo ia te oe mo lou lava atina’ega patino.
-
Na faapefea ona faamanuiaina oe mai le faaaluina o le taimi e iloilo ai au sini ma le alualu i luma?
O lenei lesona o le a fesoasoani ia te oe e iloilo ai le alualu i luma ua e faia i lau faigamalaga o se soo o Iesu Keriso. Saili le musumusuga a le Agaga Paia a o e tomanatu ai i lou alualu i luma.
O le avea ai o se soo o Iesu Keriso
O lenei gaoioiga ua faamoemoe e fesoasoani ai i tagata aoga e tomanatu ai i mea na latou suesueina i le Tusi a Mamona e oo mai i le taimi nei. Ua mamanuina foi e fesoasoani ai i tagata aoga e mafaufau i sini atonu latou te mananao e fai e faatonutonu ai a latou suesuega ma le aoaoina i le vaega o totoe o le Tusi a Mamona. E mafai ona e faaali atu pe tusi se ata faigofie e pei o le ata o loo i lalo i luga o le laupapa ma faasoa atu faatonuga o loo mulimuli mai. Mafaufau e fetuunai le gaoioiga pe a manaomia e fesoasoani ai i tagata aoga ia maua ni aafiaga anoa a o latou tomanatu i lo latou aoaoina. Uunaia tagata aoga e faailoa mai fuaiupu o mau mai le Tusi a Mamona e lagolago ai a latou tali.
Tusi se ata o se auala e faatusa i le ala o feagaiga ma lau malaga o se soo o Iesu Keriso. Ia aofia ai le malo selesitila i le faaiuga o le ala. Tusi se ata o oe lava ia i le ogatotonu o le ala.
Toe iloilo mea na e suesueina i le Tusi a Mamona ma au faamatalaga i lau api talaaga mo suesuega e fesoasoani e te manatua ai mea sa e aoaoina. I tua atu o le ata o oe lava ia, tusi i lalo mea na e aoaoina i le taimi o lau suesuega o le afa muamua o le Tusi a Mamona lea na fesoasoani ia te oe e avea ai o se soo o Iesu Keriso. E mafai ona e faaaofia ai le malamalama ua e mauaina, uiga faaalia po o manaoga o loo e atinaeina, po o faatinoga ua e faia.
A uma ona faia e tagata aoga, tuu atu ia i latou e faasoa mai. Atonu e te tuu atu i tagata aoga naunautai e lisi nisi o a latou tali i luga o le laupapa i tua atu o le tagata o loo i luga o le ala. Ona mafai lea ona e amataina se talanoaga faalauaitele e ala i le tuuina atu ia i latou e faasoa mai so o se mea na latou lagonaina sa sili ona anoa. Pe e mafai foi ona e fesili i tagata aoga e uiga i le malamalama na latou maua lea ua mafai ona latou faamatalaina lelei atili i le taimi nei, o uiga po o manaoga latou te lagona ua fetuunaia pe suia ona o mea ua latou aoaoina, po o amioga o loo latou faaaogaina i o latou olaga mai le Tusi a Mamona. E mafai foi ona e faasino atu i se tasi o tali o loo tusia i luga o le laupapa ma valaaulia tagata aoga e faasoa mai ni fuaitau faapitoa o mau po o tala na musuia ai a latou tali. E mafai foi ona e fai atu i tagata aoga naunautai e filifili se tali i luga o le laupapa e le o sa latou tali ma faasoa mai pe aisea e faagaeetia ai i latou e lena tali. Uunaia tagata aoga e aua nei faasoa maia ni mea e patino tele pe e le faalauaiteleina.
A uma ona faasoa mai tagata aoga, tuu atu ia i latou e mafaufau po o le a se malamalama faaopoopo latou te faamoemoe e maua a o latou suesueina pea le Tusi a Mamona. E mafai ona e faasoa atu faatonuga nei ma tuu atu i tagata aoga e faaopoopo i la latou itulau i a latou api talaaga mo suesuega.
Toe tagai i le ata i lau api talaaga mo suesuega. I luga o le ala i luma o le ata lea e faatusa ia te oe, tusi ai i lalo faatinoga e te manao e fai pe faaauau pea ona e faia a o e taumafai e avea e faapei o Iesu Keriso.
-
O le a se isi mea e te faamoemoe e aoao a o e suesue i le isi afa o le Tusi a Mamona?
-
O le a se mea e te faamoemoe o le a e iloa, lagona, pe faia i le faaiuga o lenei tausaga o se taunuuga o lau suesuega o le afa lona lua o le Tusi a Mamona?
Oo i se liuga o le loto
O lenei gaoioiga e mafai ona fesoasoani i tagata aoga e tomanatu ai i auala o loo latou oo ai i se liuga o le loto.
Talu ai nei na e faitau ai e uiga i le toatele o tagata na oo i se liuga o le loto. Mo nisi, e pei o Alema le Itiiti ma atalii o Mosaea, sa vave ma maoae le liuga. Mo isi, e pei o Amoleka ma le nuu o Limae, o lo latou liuga o le loto na tupu i le aluga o taimi.
Na fesili atu Alema i le nuu o Saraemila, “Ua oo ea lenei liuga tele i o outou loto?” (Alema 5:14). Ma afai o lea, “e mafai ea ona outou lagonaina nei?” (Alema 5:26). Mafaufau loloto i le alualu i luma o lou lava liuga o le loto. Pe faigata ea i nisi taimi ona iloa pe faapefea ona fesoasoani le Alii ia te oe ia sui? O a ni auala na e vaaia ai oe lava i nisi o tala sa e suesueina?
Faitau le Alema 5:14–19, 26–29, ma mafaufau loloto ma le agaga tatalo i fesili a Alema.
Atonu na e faamaumauina au tali i fesili a Alema i lau api talaaga mo suesuega ina ua e suesueina muamua na fuaiupu. Faatusatusa mea na e tusia i lena taimi i le auala o le a e taliina ai fesili i le taimi nei. O le a se mea o e maitauina? O le a sou manatu o le a le mea e finagalo lou Tama o i le Lagi e te iloa, lagona, pe faia pe a uma ona faatusatusa au tali?
Mafaufau e tusifaamaumau au tali fou po o ou lagona e uiga i lou alualu i luma.
Fesoasoani i tagata aoga ia malamalama o nisi taimi atonu e faigata ai ona iloa le tuputupu ae faaletagata lava ia. Vaavaai mo avanoa e fesoasoani ai i tagata aoga taitoatasi ia iloa lo latou tuputupu ae ma le alualu i luma. Afai e te maitauina ni auala na oo ai se tagata aoga patino i se liuga o le loto, faasoa atu lena mea ia te ia.
Faamalamalamaina atu o le aoaoga faavae o le Togiola a Iesu Keriso
O le gaoioiga lenei e mafai ona fesoasoani i tagata aoga e faataitai ai le faamalamalamaina o le aoaoga faavae o le Togiola a Iesu Keriso. O se tasi o auala e fesoasoani ai i tagata aoga e fai lenei mea o le tuu atu lea ia i latou e galulue i ni paga. E mafai e tagata aoga taitasi ona tusi i lalo se tulaga po o se fesili lea e mafai ona fesoasoani ai le malamalama ai i le Togiola a le Faaola. A uma ona tusi le tulaga po o le fesili, e mafai e tagata aoga ona faafesuiai pepa ona tusi lea o se tali. A uma ona latou tusitusi, e mafai e tagata aoga ona fefaasoaai a latou tali i le tasi ma le isi.
Tusi se tulaga faataitai po o se tulaga e mafai ai e le iloaina e uiga i le Togiola a Iesu Keriso ona fesoasoani i se tasi. Mo se faataitaiga, ua taumanatunatu se tamaitai talavou pe mafai ona faamagaloina o ia, po o se alii talavou ua lagona le tuuatoatasi i ona tofotofoga. Po o le, nai lo o se tulaga, e mafai ona e tusia i lalo se fesili atonu o ia te oe po o se isi tagata e uiga i le Togiola a le Faaola.
Mafaufau i mea ua e aoaoina e uiga i le Togiola a Iesu Keriso e ala i le suesueina o le Tusi a Mamona. Vaai i mau na e faailogaina po o faamatalaga i lau api talaaga mo suesuega. Atonu na e makaina ni mau pe tusia ni faamatalaga mai lau suesuega o le Mosaea 26 po o le Alema 7 (tagai foi 2 Nifae 9; Mosaea 14–16).
Tusi mea o le a e ono fai atu e tali atu ai i le tulaga po o le fesili. Faamatala pe mafai faapefea e le malamalama i le aoaoga faavae o le Togiola a Iesu Keriso ona fesoasoani i le tulaga pe tali i le fesili. Taumafai e faaaoga se fuaitau se tasi pe sili atu mai le Tusi a Mamona.
Mafaufau e faasoa atu lau molimau ma valaaulia tagata aoga e molimau atu i le Togiola a Iesu Keriso.