Alema 15

O Le Mana Faamalolo o Iesu Keriso

O le aapa atu ia i latou na puapuagatia o se taulaiga lea o le galuega a Iesu Keriso i le lalolagi. Sa tutusa lava le taulaiga a Alema ma Amoleka ina ua uma ona laveaiina faavavega mai le falepuipui e le aao o le Atua. O lenei lesona e mafai ona fesoasoani ia te oe e maua ai le mana faamalolo o loo avanoa e ala mai ia Iesu Keriso.

Valaaulia le aoao ma le filiga. Fesoasoani i tagata aoga ia malamalama o le aoaoina o le talalelei e le faapea o se aafiaga faasamasamanoa. E manaomia ai le mafaufau toto’a, suesue, tatalo, ma faatinoga. E mafai ona e fesoasoani i au tagata aoga e ala i le fatuina o aafiaga o le a uunaia ai i latou e auai i talanoaga, faasoa mai o latou aafiaga, ma fai ni fesili.

Sauniuniga a le tagata aoga: Valaaulia tagata aoga e faitau le manatu mo le suesuega faaleaiga o tusitusiga paia i lalo o le Alema 15:1–12 i le otootoga o suesuega “24–30 Iuni. Alema 13–16: ‘Ulu atu i le Malologa o le Alii’” i le Sau, Mulimuli Mai ia te Au—Mo Tagata Taitoatasi ma Aiga: Tusi a Mamona 2024.

Gaoioiga e Ono Mafai Ona Aoao Ai

Ma’i faaletino ma le faaleagaga

O mea nei ua faamoemoe e fesoasoani e saunia ai tagata aoga ia iloa auga, po o aafiaga, o le agasala. E mafai ona e filifilia tulaga o gasegase e sili atu ona masani ai tagata aoga nai lo tulaga o loo i le lisi pe a manaomia.

Iloilo le lisi lenei o tulaga o faama’i/gasegase. Manatunatu toto’a i o latou auga faapea foi ma soo se togafitiga e faaaoga e foia pe faamalolo ai i latou.

• Faama’i o le fatu

• Kanesa

• Ponaivi gaui

• O le a le mea e tupu pe afai e na ona togafitia lava e se tasi o auga o nei tulaga e aunoa ma le saili ia malamalama i faafitauli autu?

Pe a folasia atu le parakalafa lenei ma fesili e ono i ai, aua le sailia pe faatagaina tagata aoga e faailoa mai agasala patino.

E pei o ma’i faaletino, o agasala—po o ma’i faaleagaga—e i ai foi auga. Mafaufau po o a ni auga o le agasala, ma faaalu sina taimi e mafaufau ai e uiga i le tulaga o lou soifua maloloina faaleagaga. O fesili nei e mafai ona fesoasoani ia te oe e faia ai lenei mea.

• E tusa ai ma le tusiga o le Autu o le Talalelei “Agasala” (topics.ChurchofJesusChrist.org), o a aafiaga o le agasala?

• E mafai faapefea e le agasala ona aafia ai o tatou lagona e uiga ia i tatou lava ma aafia ai lo tatou sootaga ma isi?

A o e suesue, faalogo mo le Agaga Paia e aoao oe i le ala e mafai ai ona e maua atili le mana faamalolo o Iesu Keriso e faaleleia ai lou soifua manuia faaleagaga.

Tulaga o Seseroma

Ina ua mavae le laveaiina faavavega mai le falepuipui i Amonaea e le aao o le Atua, sa malaga Alema ma Amoleka i Saitoma (tagai Alema 15:1–2). A o i ai i Saitoma, sa laua auauna atu ia i latou o e na tuliesea mai Amonaea ona o le talitonuina o la laua savali ia Iesu Keriso. O se tasi o tagata sa la auauna atu i ai o Seseroma.

Mafaufau e tufa atu pepa nei mo tagata aoga. E mafai ona latou galulue faatasi i ni vaega toalaiti, e faaaoga ai le Alema 15:4–12 e faailoa mai ai po o a auga o Seseroma ma fuafua ai le talavai e mafai ona faamalolo ai o ia.

Ma’i Faaleagaga

Faitau mau o loo lisiina i lalo o “Auga.” I lalo ifo [o auga], lisi soo se upu po o fasifuaitau o loo faamatala ai le tulaga o Seseroma.

• E mafai faapefea ona e faamatalaina le tulaga o Seseroma, e aofia ai lona soifua manuia faaleagaga?

• O le a se mea e te manatua e uiga ia Seseroma o le a mafua ai ona faapena ona lagona?

Mafaufau e valaaulia se tagata aoga e faasoa mai nisi o tala i le olaga o Seseroma i aso ua tuanai. E mafai ona fesoasoani fuaiupu nei: Alema 10:31; 11:21–22; 12:1, 7–8. E ono mafai foi ona e mafaufau e faasoa atu le saunoaga a Peresitene Ezra Taft Benson i le vaega o “Manatu ma Talaaga o Faamatalaga”.

O gasegase faaletino e le fesootai i taimi uma ma le agasala (tagai Ioane 9:2–3). Maitau lagona o le tausalaina o Seseroma i le Alema 14:6. E ui o le lagonaina o le tausalaga e le o se mea logolelei, ae o loo i ai se faamoemoega. Na faamalamalama mai e Elder David A. Bednar o le Korama a Aposetolo e Toasefululua le faamoemoega e mafai ona maua e nei lagona. Matamata le vitio “Matou te Talitonu i le Nofomama” mai le faailo taimi 13:15 i le 13:49, o loo maua i le ChurchofJesusChrist.org, pe faitau le faamatalaga o loo i lalo.

Ua tatou oo uma lava i le tiga o se lavea po o se manu’a faaletino. A oo ia i tatou ia tiga, e masani lava ona tatou sailia se toomaga ma e faafetai foi mo vailaau ma togafitiga ia e fesoasoani e faaitiitia ai lo tatou mafatia. Mafaufau i le agasala e faapea o se manu’a faaleagaga e afua ai lagona tausalaina poo le, e pei ona faamatalaina e Alema i lona atalii o Korianetona, “faanoanoa o le mafaufau” (Alema 42:18). O le tausalaga i o tatou agaga e faapei o le tiga lea i o tatou tino—o se lapataiga i se tulaga matautia ma o se puipuiga mai faataumaoi sili atu. (David A. Bednar, “Matou Te Talitonu i le Nofomama,” Liahona, Me 2013, 44)

• E tusa ai ma le saunoaga a Elder Bednar, o le a se tasi o faamoemoega o le tausalaga?

• E mafai faapefea e lenei mea ona suia la tatou vaai po o le vaaiga o le lagonaina o le tausalaga pe a uma ona faia se mea sese?

• O a ni auala e te manatu na pei ai auga o Seseroma “o se lapataiga i se tulaga matautia ma o se puipuiga mai faataumaoi sili atu”?

Faamalologa e ala i le mana o Iesu Keriso

Faitau ma le toto’a e uiga i le faamalologa o Seseroma i le Alema 15:4–12. Atonu e te manao e matamata le vitio “Ua Faamaloloina ma Papatisoina Seseroma” (2:42), o loo maua i le ChurchofJesusChrist.org. A o e faitau, ia taulai toto’a atu i faamatalaga auiliili na saofaga i le faamalologa o Seseroma. Mafaufau e tusi ni faamatalaga o nei auiliiliga i lalo o le vaega o le “Talavai” o le faamatalaga a lau fomai.

• O a ni mataupu faavae po o ni upumoni e mafai ona tatou aoaoina mai le faamalologa o Seseroma?

O se tasi o mataupu faavae tatou te aoao mai i nei fuaiupu o le a o tatou faatinoina le faatuatua ia Iesu Keriso, e mafai ona faamaloloina i tatou.

• O le a le faamaoniga na e vaaia i nei fuaiupu o le faatinoina o le faatuatua o Seseroma ia Iesu Keriso a o lei faamaloloina ma ina ua uma ona faamaloloina?

• E mafai faapefea ona tatou faatinoina le faatuatua ia Iesu Keriso i le ala lava e tasi?

Sa faamalamalama mai e Elder David A. Bednar le auala e mafai ai ona tatou faatinoina le faatuatua. Matamata le vitio “Matou te Talitonu i le Nofomama” mai le faailo taimi 13:49 i le 14:17, o loo maua i le, pe faitau le faamatalaga o loo i lalo.

E tele taimi e faasino atu i le Faaola o le Fomai Sili, ma o lenei faalagiga e taua i se tulaga faa-faatusa ma e saolele foi. … Mai le Togiola a le Faaola e maua mai ai le suauu faamafanafana e mafai ona faamaloloina ai o tatou manu’a faaleagaga ma aveesea ai le tausalaina. Peitai, o lenei suauu e na o mataupu faavae lava o le faatuatua i le Alii o Iesu Keriso e mafai ai ona faaaoga, salamo, ma le usiusitai faifai pea. O taunuuga o le salamo ma le loto faamaoni o le filemu o le mafaufau, mafanafana, ma le faamalologa ma le faafouga faaleagaga. (David A. Bednar, “Matou Te Talitonu i le Nofomama,” Liahona, Me 2013, 44)

O le a manaomia ona aumai e tagata aoga ni tali manino i le fesili muamua e sauniuni ai mo le gaoioiga faaiu o le lesona. A o outou talanoaina lenei fesili i le vasega, atonu e te manao e lisi manatu o tagata aoga i luga o le laupapa. Fesoasoani ia i latou ia maua ni manatu eseese.

O isi fesili e lua e mafai ona faaaoga o ni fesili tulitatao e avea o se vaega o lenei talanoaga.

• O a nisi o auala e mafai ona tatou maua ai mana faamalolo o le Tama Faalelagi ma Iesu Keriso?

• Aisea e te manatu ai ”o le Fomai Sili” o se faalagiga talafeagai lea mo le Faaola? Aisea e te manatu ai e mafai e Ia ona faamalolo i tatou?

  Afai o le a manuia tagata aoga mai nisi o mau e faamautu ai o loo ia Keriso le mana e faamalolo ai, mafaufau e faasoa atu nisi o mea nei: Salamo 30:2; 147:3; Isaia 53:5.

• O anafea na e oo ai (pe o anafea foi na oo ai se tasi e te iloa) i le faamalologa a le Faaola?

E ui atonu tatou te le puapuagatia uma e faapei o Seseroma, e tofu i tatou uma ma faafitauli ma oo i mafatiaga lea e mafai ona fesoasoani mai ai le Faaola ia i tatou. Mafaufau i nisi o aafiaga o agasala po o mea sese e ono oo i ai talavou ma pe faapefea ona latou manaomia le mana faamalolo o le Faaola.

Mafaufau e lisi i luga o le laupapa ia manatu o tagata aoga. E mafai foi ona latou galulue i ni paga po o ni vaega toalaiti e mafaufau ai i manatu ona fefaasoaai lea o ni manatu o se vasega.

Fatu se faamatalaga a se isi fomai e fesoasoani ai i se tasi. Faitau le 3 Nifae 9:13–14, ma faaaoga mea ua e aoaoina i le asō e fatu ai se talavai. E mafai ona e faasino i le Alema 15. Faasoa atu pe mafai faapefea ona fesoasoani Iesu Keriso ma pe faape’ī le faatinoina o le faatuatua ia te Ia. Ia mautinoa e faamaea le faamatalaga le atoatoa lenei:

• Afai o lagona e se tasi [lisi auga o le agasala] … , ona manaomia lea ona latou manatua e [lisi o le talavai po o ni fofo] …

Faamanatu i tagata aoga tatou te manaomia uma lo tatou Tama Faalelagi ma Iesu Keriso ma le faamalologa e mafai ona Laua tuuina mai ia i tatou. Molimau atu o le faatinoina o le faatuatua ma le talitonu ia Iesu Keriso o le a fesoasoani pea ia i tatou. Mafaufau e valaaulia tagata aoga e faasoa mai mea na latou aoaoina po o mea na sili ona tulaga ese ia i latou mai a latou suesuega i le asō.

Manatu ma Talaaga o Faamatalaga

O ai e mafai ona faamaloloina a’u?

Na molimau mai Elder Matthew S. Holland o le Fitugafulu:

E tusa lava po o a mafuaaga o o tatou tiga matuitui ma loto tiga, o le punavai autu o le toomaga e tutusa lava: o Iesu Keriso. Ua na o Ia lava e umia le mana atoa ma le pulu pasama faamalolo e faasa’oina mea sese uma, faalelei amioga sese, fetuunai ni lē atoatoa uma, faaleleia manu’a uma, ma tuuina mai faamanuiaga uma e tuai ona oo mai. (Matthew S. Holland, “O Le Meaalofa Silisili o le Alo,” Liahona, Nov. 2020, 46)

E mafai faapefea ona ou faalagolago lelei atili ia Iesu Keriso e faamalolo ma fesoasoani ia te a’u?

Sa aoao mai Peresitene Dallin H. Oaks o le Au Peresitene Sili:

A ia i tatou le faatuatua i le Alii o Iesu Keriso, e tatau ona tatou faalagolago ia te ia. E tatau ona lava lo tatou faalagolago ia te ia ina ia tatou malilie e talia lona finagalo, ma le iloaina o loo ia silafia le mea e sili mo i tatou. …

… O le faatuatua, tusa lava po o le a le malosi, e le mafai ona maua ai se taunuuga e feteenai ma le finagalo o lē e ona le mana. … E le mafai ona tatou maua le faatuatua moni i le Alii e aunoa foi ma le i ai o le faalagolago atoa i le finagalo o le Alii ma i le taimi a le Alii. (Dallin H. Oaks, “Faith in the Lord Jesus Christ,” Ensign, Me 1994, 99–100).

Aisea e mafai ai pea ona ou manatuaina a’u agasala e tusa lava pe ua faamagaloina a’u?

Matamata le vitio “O le Togiola a Iesu Keriso” mai le faailo taimi 5:48 i le 6:56 (o loo maua i le ChurchofJesusChrist.org), lea na faamalamalama mai ai e Brother Tad R. Callister, o le sa avea muamua ma Peresitene Aoao o le Aoga Sa ma se Fitugafulu o le Pulega Aoao ua malolo faamamaluina, se mafuaaga e mafai ai ona tatou manatuaina a tatou agasala tusa lava pe ua uma ona forgiven.

O a nisi o aafiaga o le agasala?

Na faamalamalama mai e Peresitene Ezra Taft Benson (1899–1994):

E le mafai ona [e] faia ni mea sese ma maua ai ni lagona lelei—e le mafai. Soo se taimi lava e soli ai e se tasi se tulafono a le Atua, na te totogia le sala i le lototiga, i le faanoanoa, i le salamo, i le leai o se faaaloalo mo ia lava, ma ia aveesea ai o ia lava mai le fesootaiga ma le Agaga o le Atua. (Aoaoga a Peresitene o le Ekalesia: Ezra Taft Benson [2014], 221)

Alema 15:8–9. Pe ua lava ea le na ona tautino atu tatou te talitonu ia Iesu Keriso?

Sa faamalamalama mai e Peresitene Dallin H. Oaks o le Au Peresitene Sili le manaomia ona faia o mea e sili atu nai lo le na o le talitonu ia Iesu Keriso:

O le liua e manaomia [e Iesu] mo i latou o le a ulu atu i le malo o le lagi (tagai Mata. 18:3) e sili atu nai lo le na ona liua e molimau atu ai i le moni o le talalelei. O le molimau atu o le iloa ma ia tautino atu. Ua luitauina i tatou e le talalelei ina ia “liua,” lea e manaomia ai lo tatou faia ma avea ai. Afai e i ai se tasi o i tatou e faalagolago na o lo tatou lava malamalama ma le molimau i le talalelei, o loo tatou i ai i le tulaga lava e tasi e pei o Aposetolo sa faamanuia i ai ae le’i atoatoa lea na luitauina ai e Iesu e ao ina “liua.” (Dallin H. Oaks, “The Challenge to Become,” Ensign, Nov. 2000, 33)

Gaoioiga Faaopoopo e Aoao Ai

Ua i ai i le Faaola ma Lana talalelei le mana e faamalolo ai

Mafaufau e valaaulia tagata aoga e suesue nisi o fuaiupu nei, ma vaavaai mo mea e mafai ona latou aoaoina ma lagonaina e uiga i le mana o le Faaola e faamalolo ai: Salamo 30:2; 147:3; Isaia 53:5; Mataio 4:23; Iakopo 2:8. O le a se mea e tulaga ese ia te oe mai nei fuaiupu? E mafai faapefea e le malamalama ai i nei mea ona fesoasoani e faaaoga le mana o le Faaola i lou olaga?

Lesona na aoaoina mai ia Amoleka

Mafaufau e valaaulia tagata aoga e suesue le soifuaga o Amoleka. Valaaulia tagata aoga e faitau le Alema 15:16–18, e manatunatu ai po o a lagona, faalogona, ma tofotofoga na oo i ai Amoleka. O le a le mea na lafoaia e Amoleka e ala i le filifili e ola i le talalelei ma auauna atu o se faifeautalai? O le a mea sa ia mauaina mai ai? O le a se mea na manaomia e fesoasoani e faamalosia ai o ia? Atonu e te manao e faasino atu tagata aoga i le saunoaga a Peresitene Dieter F. Uchtdorf “Aoao mai ia Alema ma Amoleka” (Liahona, Nov. 2016, 71–74).