ʻAlamā 23–29

Vakai Fakalūkufuá

Naʻe fakafou ʻi he ngaahi akonaki ʻa ʻĀmoni mo hono ngaahi tokouá, ʻa hono “[faka]ului ki he ʻEikí” ha lauafe ʻo e kau Leimaná pea “naʻe ʻikai ke nau toe hē” (ʻAlamā 23:6). Naʻe fakaʻaongaʻi ʻe he kau papi ului ko ʻení ʻa e hingoa ko e kau ʻAnitai-Nīfai-Līhaí. Kimuʻa pea ului ʻa e kau ʻAnitai-Nīfai-Līhaí, naʻe anga ʻaki ʻe hanau tokolahi ha ngaahi tōʻonga faiangahala. ʻI he taimi ne nau aʻusia ai e fakamolemole ʻa e Fakamoʻuí, naʻe ueʻi kinautolu ke nau fakaʻehiʻehi mei he toe foki ki he ngaahi angahala ko iá. Naʻe fiefia ʻa ʻĀmoni mo hono ngaahi tokouá ʻi heʻenau ngāue fakafaifekau taʻu ʻe 14, pea ne nau fie vahevahe ʻenau ngaahi aʻusiá.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

ʻAlamā 23

Taumuʻa ʻo e lēsoní: Ko e taumuʻa ʻo e lēsoni ko ʻení ke tokoniʻi ʻa e kau akó ke nau holi ke ului kakato ange ki he ʻEikí mo ʻiloʻi ha faʻahinga faingataʻa pē ki he ului ko iá.

• Teuteu ʻa e tokotaha akó: Fakaafeʻi e kau akó ke nau omi mateuteu ke vahevahe ʻenau fakakaukau ki he ʻuhinga ʻo e “ului ki he ʻEikí” (ʻAlamā 23:6) pea mo e ʻuhinga ʻoku mātuʻaki mahuʻinga ai ʻa e ului kiate Iá. ʻE lava ke nau vakai ki he Fakahinohino ki he Ngaahi Folofolá ki he “Fakauluí” kapau ʻoku nau fiemaʻu tokoni.

• ʻĪmisi: Ko ha ʻata ʻo e Fakamoʻuí

• Meʻa ke fakaʻaliʻalí: Ko e ongo lea ʻa ʻEletā Tēvita A. Petinā mo Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ngaahi meʻa ʻe lava ke hoko ko ha ngaahi mahafu ʻoku tau angatuʻu ʻakí

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ha tokotaha ne toki papi ului foʻou ke kau atu ki he kalasí pea talanoa fekauʻaki mo ha niʻihi ʻo e “ngaahi mahafu tau ʻo e angatuʻú” naʻe pau ke ne siʻaki kae lava ke muimui ki he Fakamoʻuí pea kau ki Hono Siasí. Fakapapauʻi ke maʻu ha ngofua mei hoʻo kouʻōtineitá pe pule ʻo e polokalamá mo e kau taki lakanga fakataulaʻeiki fakalotofonuá kimuʻa pea fakahoko e fakaafé.

ʻAlamā 24

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ikunaʻi ʻa e angahalá mo e ngaahi tōʻonga koví ʻi he tokoni ʻa e Fakamoʻuí.

• Teuteu ʻa e tokotaha akó: Fakaafeʻi e kau akó ke lau ʻa e ʻAlamā 24:7–16 pea omi mateuteu ke vahevahe ʻa e meʻa ʻoku nau ako mei he kau ʻAnitai-Nīfai-Līhaí fekauʻaki mo e Fakamoʻuí, fakatomalá, mo e fakamolemolé.

• Ongo Vitioó: “Ko e Mālohi ʻo e Tohi ʻa Molomoná ʻi he Fakauluí” (9:01; mamata mei he taimi 6:11 ki he 8:12); “Tukupā Taʻeueʻia kia Sīsū Kalaisí” (13:52; mamata mei he taimi 0:00 ki he 1:39 pea mo e taimi 12:45 ki he 13:31)

• Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki ha ngaahi kulupu tautau toko tolu pe fā ʻi he ngaahi loki fakatahá ke nau fekumi ki ha ngaahi foʻi lea mo ha ngaahi kupuʻi lea mahuʻinga ʻi he ʻAlamā 24:7–16. Fakaafeʻi e kulupu takitaha ke fili ha taki ke vahevahe mo e kalasí e ngaahi foʻi lea mo e kupuʻi lea naʻe maʻu ʻe he kulupú.

ʻAlamā 26

Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó ha loto-houngaʻia moʻoni mo ʻofa ki he ʻEikí pea mo e ngaahi tāpuaki ʻokú Ne foaki ki heʻenau moʻuí.

• Teuteu ʻa e tokotaha akó: ʻE lava ke lau ʻe he kau akó ʻa e ʻAlamā 26:11–16 pea fakalaulauloto ki he ʻuhinga kiate kinautolu ʻa e “vīkiviki ʻi he ʻEikí.”

• Ngaahi ʻĪmisí: Ko ha ngaahi ʻata ʻe niʻihi ʻo e ngāue fakafaifekau ʻa ʻĀmoní

• Naunau maʻá e kau akó: Ko ha laʻipepa maʻá e tokotaha ako takitaha

• Fokotuʻu ki hono akoʻi ʻi he konifelenisi vitioó: Te ke lava ʻo kole ki he kau akó ke faʻu ha kōlomu ʻe tolu ʻi he polokalama palakipoé fakataha mo e kalasí, kae ʻikai ʻi ha laʻipepa. Ko ha founga ʻe taha, te ke lava ʻo vahevahe kinautolu ki ha fanga kiʻi loki fakataha pea kole ki he kulupu takitaha ke faʻu ha kōlomu ʻe tolu ʻi ha laʻipepa fakaʻilekitulōnika. ʻI he toe fakataha mai ʻa e kau akó, ʻe lava ke vahevahe ʻe he kulupu takitaha ʻenau fakamatalá mo e kalasí.

ʻAlamā 29

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke vakaiʻi e ngaahi holi honau lotó pea fakafenāpasi kinautolu mo e finangalo ʻo e ʻEikí.

• Teuteu ʻa e tokotaha akó: Fakakaukau ke fakaafeʻi e kau akó ke lau ʻa e ʻAlamā 29:1–6 pea fakalaulauloto ki he meʻa ʻoku nau ako fekauʻaki mo e ngaahi holi ʻo e lotó.

• ʻĪmisí: Ko e fakaului ʻo ʻAlamā ko e Siʻí

• Meʻa ke fakaʻaliʻalí: Fakaʻaliʻali ʻi he palakipoé pe ʻi ha ngaahi feituʻu kehe ʻi he lokí ʻa e ngaahi fehuʻi mo e fakahinohino ʻi he ʻuluʻitohi “Ko e mahuʻinga ʻo e ngaahi holi ʻo e lotó.”

• Fokotuʻu ki hono akoʻi ʻi he konifelenisi vitioó: ʻI he kamataʻanga ʻo e lēsoní, ʻi he taimi ʻoku fakaafeʻi ai e kau akó ke fakakaukau ki he meʻa te nau fakaʻamu ki aí, fakakaukau ke fakaafeʻi kinautolu ke fakaʻaongaʻi ha ngaahi miniti siʻi ʻo fekumi ki ha ʻīmisi ʻokú ne fakatātaaʻi ʻa e meʻa te nau fakaʻamu ki aí. ʻE lava ke taufetongi e kau akó ʻi hono fakaʻaliʻali mo fakamatalaʻi e ngaahi ʻīmisi naʻa nau filí.

Toe Vakaiʻi Hono 13 ʻo e Fakataukei Fakatokāteliné

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke nau maʻu e potufolofola fakataukei fakatokāteline ʻe 12 ʻi he konga hono ua ʻo e Tohi ʻa Molomoná.

• Teuteu ʻa e tokotaha akó: Fakaafeʻi e kau akó ke kole ki hanau kaungāmeʻa pe kau mēmipa ʻo e fāmilí ke fakaʻaliʻali ange ha ngaahi founga kehekehe ʻoku nau fakaʻilongaʻi ai e ngaahi potufolofolá mo hono ʻuhingá.

• Laʻipepa Tufa: “Fakataukei Fakatokāteline ki he Tohi ʻa Molomoná: ʻAlamā–Molonai”

• Fokotuʻu ki hono akoʻi ʻi he konifelenisi vitioó: Ke fakaʻatā e kau akó ke ngāue mo ha niʻihi tokolahi ange ʻo honau kaungā akó ʻi heʻenau kumi e ngaahi potufolofola fakataukei fakatokāteline ʻe 12, fakakaukau ke vahevahe e kau akó ki ha ngaahi loki fakataha kehekehe maʻá e potufolofola takitaha. ʻI he kamataʻanga ʻo e takai takitaha, te ke lava ʻo fokotuʻu ange ha ngaahi fehuʻi kehekehe te nau lava ʻo ʻeke ki honau hoá pe kulupú ke tokoni ke nau toe maheni lelei ange.