Alma 24

“Kita Molubong Kanila sa Ilawom sa Yuta”

Usahay makaplagan nato ang atong mga kaugalingon nga nagpahinunot sa samang sala ug nagbuhat og dili maayo nga batasan [habit] o bisan ang pagkaadik. Ang pagbuntog niini nga mga sala mahimong lisod kaayo. Daghan sa mga Anti-Nephi-Lehi ang nakahimo og makasasala nga mga binuhatan sa wala pa sila makabig ngadto sa Ginoo. Sa dihang nasinati nila ang pagpasaylo sa Manluluwas, nadasig sila sa paglikay sa pagbalik niadto nga mga sala. Kini nga leksiyon makatabang kanimo sa pagbuntog sa sala ug sa dili maayo nga mga batasan [habit] uban sa tabang sa Manluluwas.

Tabangi ang mga tigkat-on sa pagtinguha og pagkakabig. Ang pagkakabig labaw pa sa kausaban sa kinaiya; kini usa ka kausaban sa kasingkasing nga gidala pinaagi sa Espiritu Santo. Samtang nagkat-on ang mga estudyante sa paghimo og epektibo, matarong nga lihok, dasiga sila sa pag-ampo ngadto sa Langitnong Amahan alang sa Iyang paggiya pinaagi sa Espiritu.

Pagpangandam sa estudyante: Dapita ang mga estudyante sa pagbasa sa Alma 24:7–16 ug motambong nga andam sa pagpakigbahin sa unsay ilang nakat-onan gikan sa mga Anti-Nephi-Lehi mahitungod sa Manluluwas, paghinulsol, ug pagpasaylo.

Posible nga mga Kalihokan sa Pagkat-on

Pagbuntog sa sala uban sa tabang sa Manluluwas

Timan-i nga kini nga leksiyon gidisenyo nga itudlo human sa leksiyon sa Alma 23.

Basaha ang mosunod nga senaryo:

Si Samantha nakigbisog sa usa ka partikular nga sala sulod sa mga katuigan. Samtang mas nakabig siya sa Ginoo, mihimo siya og dakong mga paningkamot sa paghinulsol ug pagdangop ngadto sa Manluluwas alang sa kalig-on sa pagbuntog sa iyang problema. Gibati niya ang kapasayloan ug gugma sa Ginoo. Bisan pa man, sa mga higayon sa kahuyang, usahay mobalik siya sa maong sala.

• Unsa kaha ang bation ni Samantha niini nga sitwasyon?

Kon ang mga estudyante adunay mga kahigayonan sa pagsukod sa kaugalingon, makatabang kini kanila nga mobati nga mas naapil sa leksiyon ug matinguhaon nga makat-on sa wala pa nila mahibaloi. Ang pagdapit sa estudyante sa pagpamalandong sa hilom sa mosunod maoy usa ka paagi nga makatabang ka sa mga estudyante sa pagbuhat niini.

Pamalandongi kon unsa ka maayo ang imong gibati nga makatabang ka ni Samantha ug unsa pa tingali ang kinahanglan nimong masayran ug masabtan aron mas makatabang kaniya. Ug usab, paghunahuna og mga isyu nga imong gibati nga ang Ginoo makatabang nimo sa pagbuntog. Samtang magtuon ka, pangitaa ang mga kamatuoran nga, kon gamiton, makadapit sa Manluluwas sa pagtabang ni Samantha ug kanimo sa pagbuntog sa sala.

Ang mga katawhan sa Anti-Nephi-Lehi

Ang mga katawhan sa Anti-Nephi-Lehi mga Lamanite kinsa kaniadto migamit sa ilang mga espada sa pagpatay sa uban. Hinoon, human sila “makabig ngadto sa Ginoo,” sila “mihunong sa paggamit sa mga hinagiban sa ilang pagsukol” (Alma 23:6–7).

Basaha ang Alma 24:1–4 aron makita kon giunsa pagsanong sa ubang mga Lamanite.

• Kon usa ka sa mga Anti-Nephi-Lehi, unsa kaha nga mga hunahuna ug mga pagbati ang anaa kanimo niining panahona? Ngano man?

Si Ammon ug ang iyang mga igsoon nga lalaki naghimo og usa ka panagtigom uban ni Hari Lamoni ug sa iyang igsoon nga lalaki, ang hari sa mga katawhan kinsa ginganlan nga si Anti-Nephi-Lehi (tan-awa sa Alma 24:5). Unya nakigsulti ang hari sa iyang mga katawhan.

Kon gibati nimo nga kini makapadugang sa espiritu diha sa klase, ikonsiderar ang pagdapit og usa ka estudyante nga matinahurong mobasa sa mosunod nga mga bersikulo nga daw siya ang lider sa mga Anti-Nephi-Lehi. Dapita ang mga estudyante sa paghanduraw nga makadungog niini nga pakigpulong isip usa sa mga Anti-Nephi-Lehi ug sa pagpamalandong sa mga hunahuna ug mga pagbati nga tingali anaa kanila.

Basaha ang pakigpulong sa hari diha sa Alma 24:7–16. Pangitaa ug ikonsiderar ang pagmarka sa mga pulong o mga hugpong sa mga pulong nga naghulagway sa mosunod:

1. Unsa ang gibuhat sa Dios alang niining mga tawhana

2. Unsa ang gibuhat sa mga tawo sa paghinulsol

3. Unsa ang gitambag sa hari nga ilang buhaton aron biyaan ang ilang mga sala

Pahinumdomi ang mga estudyante sa ilang pagpangandam sa klase. Hisgoti ang mga pulong ug mga hugpong sa mga pulong nga gimarkahan sa mga estudyante sa miaging kalihokan. Hangyoa ang mga estudyante sa pagpasabot kon unsay gipasabot sa mga pulong ug mga hugpong sa mga pulong ug dapita ang klase nga magtinabangay aron mas masabtan kini. Ikonsiderar ang pagtudlo sa mga hugpong sa mga pulong nga ingon og mahinungdanon ug hisgoti usab kana.

• Unsa nga mga hunahuna ug mga pagbati ang mahimo nimong naangkon kon naa ka didto naminaw niini nga pakigpulong? Ngano man?

• Unsa nga mga pulong o mga hugpong sa mga pulong ang makapadasig kanimo sa pagpaningkamot nga dili na mobalik sa imong mga sala?

Paglubong sa ilang mga hinagiban sa gubat

Basaha ang Alma 24:17–19 ug markahi kon giunsa pagsanong sa mga tawo pagkahuman niini nga pakigpulong ug ngano.

• Sa unsang paagi kaha sa imong hunahuna nga ang kasinatian sa mga Anti-Nephi-Lehi mahimong magamit kanato?

Usa ka kamatuoran nga atong maila gikan niini nga asoy mao nga ang atong gugma ug pasalig kang Jesukristo makatabang kanato sa pagbiya sa atong mga sala.

Paggahin og gamay nga panahon sa pagpamalandong nganong kini nga baroganan tinuod.

• Kon magtinguha sa pagbiya sa sala, nganong makatabang man ang paghinumdom sa gugma sa Langitnong Amahan ug ni Jesukristo ug unsay Ilang nabuhat alang kanato? (Mahimong makatabang ang pagpamalandong sa mga pulong sama sa “siya mipasaylo kanato” [Alma 24:10], “ang gamhanan nga Dios adunay kaluoy kanato” [Alma 24:14], ug “siya naghigugma sa atong mga kalag” [Alma 24:14].)

• Sa unsang paagi nga ang paglubong sa ilang mga espada “sa ilawom sa yuta” (Alma 24:17) nakatabang niini nga mga tawo sa pagbiya sa ilang mga sala?

Tan-awa ang mosunod nga mga hugpong sa mga pulong diha sa bersikulo 18 (gibutangan og emphasis):

• “Kay sa magpaagas sa dugo sa ilang mga kaigsoonan sila motugyan sa ilang kaugalingon nga mga kinabuhi.”

• “Kay sa mokuha gikan sa usa ka igsoon nga lalaki sila mohatag ngadto kaniya.”

• “Kay sa mogugol sa ilang mga adlaw diha sa katapolan sila maghago pag-ayo gamit ang ilang mga kamot.”

Sa lintunganay, ang mga Anti-Nephi-Lehi wala lang molubong sa ilang mga hinagiban sa gubat; gipulihan usab nila ang ilang nangaging mga sala ug mga positibo nga mga binuhatan.

• Sa unsa nga paagi nga ang pagbuhat niini makatabang kanato sa pagbiya sa sala?

• Unsa ang pipila ka mga paagi nga mahimo nato kini karon?

Aron makakita og ehemplo, tan-awa ang bidyo nga “Ang Gahom sa Basahon ni Mormon sa Pagkakabig” gikan sa time code 6:11 hangtod sa 8:12, anaa sa ChurchofJesusChrist.org.

Ang pasalig sa mga katawhan sa Anti-Nephi-Lehi

Basaha ang Alma 24:20–27 aron makita kon sa unsang paagi gisunod sa mga Anti-Nephi-Lehi ang ilang pasalig sa pagbiya sa sala. Samtang nagbasa ka, hunahunaa nga anaa ka didto. Pamalandongi ang mga talan-awon, mga tingog, ug mga pagbati nga tingali imong nasinati samtang ikaw miyukbo sa pag-ampo, nga nasayod nga ikaw walay ikadepensa sa imong kaugalingon ug nga ikaw hingpit nga anaa sa mga kamot sa Ginoo.

• Unsay nakapadani nimo sa ilang pasalig?

Si Elder Dale G. Renlund sa Korum sa Napulog Duha ka Apostoles mihulagway kon sa unsang paagi ang mga pagsakripisyo sa mga Anti-Nephi-Lehi may magamit kanato karon.

Ilubong sa hingpit ang mga hinagiban sa rebelyon nga dili na magsiwil ang mga pul-an. Tungod sa Pag-ula ni Jesukristo, ang paghimo og mga pakigsaad uban sa tinuod nga katuyoan sa padayong pagtahod niini makausab sa inyong kinabuhi sa hangtod. Mas mahisama kamo sa Manluluwas kon kanunay kamong mohinumdom Kaniya, mosunod Kaniya, ug magadayeg Kaniya. Mopamatuod ko nga si Jesus ang lig-on nga pundasyon. Kasaligan Siya, ug ang Iyang mga saad sigurado. (Dale G. Renlund, “Walay Pagkapaling nga Pasalig ngadto kang Jesukristo,” Liahona, Nob. 2019, 25)

Si Elder Renlund mipakigbahin usab og gamhanang ehemplo sa pasalig sa mga Santos sa Congo. Ikonsiderar ang pagpakigbahin sa mga estudyante sa bidyo nga “Walay Pagkapaling nga Pasalig ngadto kang Jesukristo“ gikan sa time code 0:00 hangtod sa 1:39, anaa sa ChurchofJesusChrist.org.

Unsaon pagbiya sa sala

Ikonsiderar ang pagdapit sa mga estudyante sa pagbuhat sa mosunod nga kalihokan diha sa ginagmay nga mga grupo aron ilang magamit unsa ang ilang nakat-onan diha sa tinuod nga sitwasyon sa kinabuhi.

Hinumdomi ang senaryo ni Samantha sa sinugdanan sa leksiyon. Ipasabot kon unsaon nimo pagrekomendar nga iyang gamiton ang mga baroganan nga imong gitun-an karon. Ilakip ang mosunod:

• mga paagi nga iyang mahinumduman ang gugma sa Ginoo alang kaniya

• mga piho nga mga lihok nga iyang mahimo aron malikayan ang pagbalik sa iyang nangaging mga sala

Dapita ang pipila ka mga estudyante sa pagpakigbahin sa ilang mga ideya. Samtang maminaw ang mga estudyante sa usag usa, dapita sila sa pagpamalandong kon sa unsang paagi ang pagpatuman niini nga mga plano makatabang kanila sa pagbuntog sa ilang mga sala.

Pagbiya sa imong mga sala

Sa imong journal sa pagtuon, isulat kon unsaon nimo paggamit ang imong nakat-onan karon sa imong kaugalingong kinabuhi. Pagsulat og mga lakang nga imong mahimo sa paghinumdom sa gugma sa Ginoo. Ilakip ang praktikal nga mga lakang sa pagbiya sa sala ug pagbantay batok sa pagbalik niini.

Samtang maningkamot ka sa pagsunod sa imong plano, salig nga ang Manluluwas nahigugma nimo ug motabang nimo samtang maningkamot ka sa paglikay sa mga kahimtang nga makadala nimo sa pagpakasala.

Pagpamatuod sa gugma sa Ginoo alang sa matag estudyante ug nga Siya motabang kanila kon sila maningkamot nga mas mahisama Kaniya, bisan tuod sila usahay mapakyas sa ilang mga paningkamot.

Komentaryo ug Background nga Impormasyon

Nganong kinahanglan nga magbantay kita batok sa pagbalik sa sala?

Si Elder Richard G. Scott (1928–2015) sa Korum sa Napulog Duha ka Apostoles mitudlo:

Ang [atong] mga pagpili kaniadto [nakapasinati kanato] sa kalibotanong kahinam nga mahimong makamugna na usab [kanato] og kahuyang nga maoy gamiton ni Satanas.

Si Satanas mosulay sa paggamit sa atong panumdoman sa nangaging mga sala aron pagdani nato. Kinahanglang magbantay kita aron malikayan ang iyang mga paglingla. (Richard G. Scott, “Personal nga Kalig-on pinaagi sa Pag-ula ni Jesukristo,” Liahona, Nob. 2013, 83)

Si Elder Neil L. Andersen sa Korum sa Napulog Duha ka Apostoles mipasabot:

Ang pagbiya sa usa ka sala nagpasabot nga dili na nato kini balikon—dili na gayod mobalik niini—dili sa lihok o sa pulong o bisan sa atong hunahuna. Ang pagbiya nagpasabot nga ang sala hingpit na sa atong kagahapon. Ang pagbiya sa usa ka sala nagpasabot og labaw pa kay sa pagbati lamang sa pagbasol ug kasubo nga nadala niini kanato ug sa uban nga atong nasakitan; kini nagpasabot sa pagkasiguro nga dili nato ibutang ang atong kaugalingon sa parehas nga posisyon nga nagdala sa sala kaniadto. Kini magpasabot sa pagpakig-uban sa kasaligang mga higala ug pamilya nga motabang kanato sa pagpadayon. Alang sa uban, mahimong magpasabot kini nga alisdan ang mga higala, tingali alisdan ang atong trabaho o sa kon unsa ang buhaton nato sa atong panahon. Magpasabot kini nga walay gitagoan ug matinuoron uban sa kasaligan nga mga kauban samtang nagpadayon kita. Dili na kita gustong mobalik sa atong mga sala kaniadto. (Neil L. Andersen, The Divine Gift of Forgiveness [2019], 207–8)

Dugang nga mga Kalihokan sa Pagkat-on

Mga Sitwasyon [Senaryo]

Ikonsiderar ang paggamit sa mosunod nga mga senaryo kon ang mga estudyante makabenepisyo gikan sa pagbansay sa paggamit, gamit ang mga senaryo nga adunay dugang nga mga detalye.

• Kanunay nga gilapas ni Kona ang Pulong sa Kaalam.

• Kanunay nga makig-away si Alice sa iyang mga igsuon.

• Si Taft mogahin og panahon sa iyang telepono imbes nga moapil sa mga leksiyon sa simbahan, pagtuon sa pamilya, ug mga kahigayonan sa pag-alagad.

• Si Lia nagtan-aw og pornograpiya kon siya nag-inusara o wala malipay.

Paglikay sa mga kahimtang nga mosangpot sa pagpakasala

Ikonsiderar ang paggamit sa mosunod nga kalihokan sa tukma nga dapit sa leksiyon. Dapita ang mga estudyante sa paghanduraw sa usa ka tanaman nga puno sa mga sagbot ug dayon sa paghanduraw sa mao gihapon nga tanaman human kini gilimpyohan. Dayon dapita ang mga estudyante sa pagtubag sa mosunod nga mga pangutana:

• Unsa ang kinahanglang buhaton aron masiguro nga kini nga tanaman magpabilin nga walay mga sagbot?

• Sa unsang paagi kini may kalabotan sa unsay kinahanglan natong buhaton human kita mapasaylo sa sala?

Alma 24:20–27. Samtang kita motuman sa atong mga pakigsaad, kita makatabang sa uban nga makabig

Dapita ang mga estudyante sa pagbasa sa Alma 24:20–27, mangita kon unsay nahitabo samtang ang mga Lamanite misulong sa mga Anti-Nephi-Lehi. Tabangi ang mga estudyante sa pag-ila ug paghisgot sa mosunod nga baroganan: Samtang magtuman kita sa atong mga pakigsaad, makatabang kita sa uban nga makabig.

Ikonsiderar ang pagpangutana sama sa “Unsa ang pipila ka mga kahigayonan nga anaa kanimo aron sa pagpakita og ehemplo sa uban pinaagi sa pagtuman sa imong mga pakigsaad?” o “Sa unsang paagi nga ang pagtuman sa imong mga pakigsaad niini nga mga sitwasyon makatabang sa uban nga makabig?”