“Alma 30:30–60: ‘Adunay Makagagahom nga Tiglalang,’” Manwal sa Magtutudlo sa Basahon ni Mormon (2024)
“Alma 30:30–60,” Manwal sa Magtutudlo sa Basahon ni Mormon
Alma 30:30–60
“Adunay Makagagahom nga Tiglalang”
Si Alma mipamatuod nga “ang tanan nga mga butang nagpakita nga adunay Dios” (Alma 30:44). Apan nganong dili ang tanan moila o mosugid nga adunay ebidensiya nga ang Dios tinuod? Si Korihor milimod sa pagkaanaa sa Dios hangtod nga siya naamang pinaagi sa gahom sa Dios. Kini nga leksiyon makatabang kanimo sa pag-ila sa ebidensiya nga ang Dios anaa ug mopili nga motuo Kaniya.
Pagdasig sa kaugalingon nga eksaminasyon [introspection] ug pagsukod. Pangutana og dinasig nga mga pangutana aron ang mga estudyante makaila sa unsay ila nang nahibaloan ug gituohan. Dasiga ang mga estudyante sa pagdapit sa Espiritu Santo sa pagtabang kanila sa pag-ila kon unsay kinahanglan nilang masayran ug sa pagsaksi sa mga kamatuoran nga ilang gitinguha.
Pagpangandam sa estudyante: Dapita ang mga estudyante sa pagbasa sa Alma 30:40–41 o sa Moises 6:63. Hangyoa sila sa pagpangita og ebidensiya sa Dios sa ilang palibot ug tingali pagkuha og hulagway aron ipakita sa klase.
Posible nga mga Kalihokan sa Pagkat-on
Ang pagkaanaa sa Dios
Ikonsiderar ang pagpakita og daghang mga hulagway nga imong gibati nga nagpakita og ebidensiya sa pagkaanaa sa Dios. Mahimo usab nga moreport ang mga estudyante sa ilang pagpangandam alang sa klase. Hisgoti ang pipila o ang tanan sa mosunod nga mga pangutana.
-
Sa inyong eskwelahan o komunidad, daw unsa ka sagad sa mga tawo nga makakita og ebidensiya sa pagkaanaa sa Dios sa kalibotan diha sa ilang palibot (pananglitan, samtang nagtan-aw sa pagsalop sa adlaw o sa mga bituon)?
-
Ngano sa imong hunahuna nga ang mga tawo makatan-aw sa parehas nga mga butang ug makahimo og lainlaing mga konklusyon bahin sa Dios?
-
Unsa kaha ang makaimpluwensiya sa abilidad sa usa ka tawo aron pag-ila sa kalambigitan sa Dios sa ilang kinabuhi?
Pamalandongi kon sa unsang paagi ka mapanalanginan kon imong makita ang Dios ug ang Iyang kalambigitan nga mas klaro diha sa imong kinabuhi. Samtang magtuon ka karon, tinguhaa nga madugangan ang imong abilidad nga makakita og ebidensiya sa Dios sa unsay imong nakita ug nasinati.
Gipasanginlan ni Korihor ang mga lider sa Simbahan
Si Korihor, usa ka anti-Kristo, adunay daghang kalamposan sa pagpakatap sa iyang maulog-ulogon nga mga mensahe sa yuta sa Zarahemla (tan-awa sa Alma 30:12, 17–18). Misulay usab siya sa pagtudlo sa mga tawo sa Jershon ug Gideon. Didto, ang mga magtutuo sa Dios misupak kang Korihor ug midala kaniya aron makigkita sa labaw nga maghuhukom ug kang Alma, ang halangdon nga pari [high priest].
Basaha ang Alma 30:30–36, mangita kon giunsa pagtubag ni Alma ang mga pag-atake ni Korihor sa Dios ug sa Simbahan.
Mahimo nimong dapiton ang mga estudyante sa pagrekord sa mga kahulugan sa mosunod nga mga pulong diha sa ilang mga kasulatan aron matabangan sila nga makasabot ug makahinumdom unsay ilang nakat-onan.
Mahimong makatabang ang pagkahibalo nga ang pagpanamastamas sa bersikulo 30 nagpasabot sa pagbiaybiay sa Dios o pagsulti nga “walay pamatasan o walay balaan nga pagtahod sa Dios o sa sagrado nga mga butang” (Giya ngadto sa mga Kasulatan, “Pagpanamastamas, Panamastamas,” scriptures.ChurchofJesusChrist.org). Ang pulong nga magpatagbaw niini nga mga bersikulo nagpasabot sa pagpadato gikan sa ingon.
-
Unsa ang gipasangil ni Korihor sa mga lider sa Simbahan? (Tan-awa sa Alma 30:31.)
Ang pagpamatuod ni Alma sa Dios
Sa dihang gipangutana ni Alma si Korihor kon siya mituo ba sa Dios, si Korihor miingon nga siya dili (tan-awa sa Alma 30:37–38).
Basaha ang Alma 30:39–44, mangita kon giunsa pagtubag ni Alma si Korihor.
-
Unsa ang mipatigbabaw kanimo gikan sa tubag ni Alma?
-
Unsa nga mga kamatuoran mahitungod sa Dios ang imong mahibaloan sa Alma 30:41, 44?
Ikonsiderar ang pagdapit sa mga estudyante sa pag-cross-reference niini nga mga bersikulo ngadto sa Moises 6:63. Tugoti ang mga estudyante sa pagpakigbahinsa bisan unsang kamatuoran nga ilang gibati nga gitudlo niini nga mga bersikulo. Mahimong mailhan nila ang mga kamatuoran sama sa mosunod nga ehemplo.
Usa ka kamatuoran nga mahimo natong makat-onan mao nga ang tanang butang nagpamatuod sa Dios.
Ang mosunod nga kalihokan makatabang sa mga estudyante sa pag-ila sa ebidensiya sa Dios diha sa ilang mga kinabuhi. Pangita og mga paagi nga makaapil ang matag estudyante sa klase. Ikonsiderar ang paghimo og lista sa mga tubag sa estudyante alang sa lakang 1 ug 2 diha sa pisara. Mahimo usab ang mga estudyante nga magsulat og usa ka butang alang sa mga lakang 3 ug 4 diha sa ilang mga journal ug dayon moboluntaryo sa pagpakigbahin. Ang ubang mga estudyante mahimong dili makamatikod sa mga kasinatian nga ilang nasinati hangtod nga sila makadungog sa uban nga mopakigbahin.
-
Paghimo og lista sa unsay gisulti ni Alma nga naghatag og ebidensiya sa pagkaanaa sa Dios.
-
Pagpuno og bisan unsang dugang nga ebidensiya nga imong mahunahunaan.
-
Pangitaa ang mga butang diha sa imong listahan nga personal nga nakatabang kanimo nga makakita og ebidensiya sa Dios. Mahimo nimong isulat ang pipila ka mga detalye gikan sa imong mga kasinatian.
-
Mahimo usab ka nga mopili og usa o daghan pa nga mga aytem sa imong lista ug ipakigbahin kon sa unsang paagi kini makatabang kanimo nga madugangan ang imong abilidad nga makakita og ebidensiya sa Dios.
Ang mosunod nga pamahayag makatabang sa mga estudyante kinsa tingali naglisod sa pagmatikod sa mga kasinatian uban sa Dios. Ikonsiderar ang pagpakigbahin niini ug dapita ang mga estudyante sa pagpakigbahin unsay ilang nakat-onan. Tabangi ang mga estudyante nga dili mobati nga nawad-an og kadasig ug dapita sila sa pagsunod sa imbitasyon ni Presidente Nelson.
Si Presidente Russell M. Nelson mihatag sa mosunod nga tambag mahitungod sa pagkasayod nga ang Dios anaa.
Sabta nga kon wala ang mga kasinatian uban sa Dios, ang tawo posibling magduda nga adunay Dios. Busa, pangita’g paagi nga makabaton kamo og mga kasinatian uban Kaniya. Ipaubos ang inyong kaugalingon. Mag-ampo aron makaangkon og mga mata nga makakita sa kamot sa Dios sa inyong kinabuhi ug sa kalibotan libot kaninyo. Hangyoa Siya nga sultihan kamo nga Siya anaa gayod—kon Siya nakaila ba kaha kaninyo. Pangutan-a Siya unsay Iyang gibati bahin kaninyo. Ug dayon, maminaw. (Russell M. Nelson, “Dali, Sunod Kanako,” Liahona, Mayo 2019, 90)
Imbes nga mogamit og hugot nga pagtuo aron makabaton og kasinatian uban sa Dios, gusto ni Korihor nga danihon siya ni Alma sa gahom sa Dios ug balik-balik nga gihagit si Alma sa pagpakita kaniya og timailhan (tan-awa sa Alma 30:43, 45, 48).
-
Unsa sa imong hunahuna ang kalahian sa usa ka tawo nga nagsunod sa pagdapit ni Presidente Nelson ug sa usa ka tawo nga nangayo og usa ka timailhan?
Basaha ang Alma 30:48–53, 59–60, mangita kon sa unsang paagi si Korihor nakombinser sa gahom sa Dios.
-
Unsa ang atong makat-onan gikan sa kasinatian ni Korihor?
Pamatikdi unsa nga mga leksiyon ang gipunting ni Mormon sa hugpong sa mga pulong nga “sa ingon kita makakita” diha sa bersikulo 60. Hunahunaa kon sa unsang paagi gilingla gihapon sa yawa ang mga tawo karon ug misulay sa pagkombinser kanila sa paglimod sa ilang nahibaloan nga tinuod.
Paghatag og pagpamatuod sa pagkaanaa sa Dios ug dapita ang mga estudyante sa pagpaningkamot nga makita ang Dios sa kalibotan nga naglibot kanila.