Alema 43, 48–50

Aoaoina mai Mataupu o Taua

O le vaega mulimuli o le tusi a Alema o loo faamatala ai se taimi o finauga ma taua. O fuafuaga faatino na faaaoga e sa Nifaē i nei taua e mafai ona fesoasoani ia i tatou e atiina a’e ai fuafuaga faatino e mafai ona tatou faaaogaina i a tatou taua i aso taitasi e faasaga ia Satani. O lenei lesona e mafai ona fesoasoani ia te oe e faatatau ai tusitusiga paia ia te oe lava ia ina ia maua ai le puipuiga a le Alii mai osofaiga faifai pea ma faateteleina a le fili.

Fesoasoani i tagata aoga ia maua le uiga patino i tusitusiga paia. Uunaia tagata aoga e faaaoga tomai eseese e suesue ai e faalautele ai lo latou malamalama i tusitusiga paia. E mafai ona latou vaavaai mo auiliiliga i le faasologa o tala, fai ni faatusatusaga ma ni fesootaiga i le va o tala faatusi paia ma o latou lava olaga, ma fuafua pe o le a faapefea ona latou faaaogaina mea sa latou aoaoina.

Sauniuniga a le tagata aoga: Valaaulia tagata aoga e suesue le Alema 43:18–21, 37–38, ma vaavaai mo lesona ia e mafai ona fesoasoani ia i latou i la latou taua e faasaga ia Satani.

Gaoioiga e Mafai Ona Aoao Ai

Iloaina o le fili

Mafaufau e faaali atu lenei faamatalaga ao talanoaina e tagata aoga a latou tali i fesili o loo mulimuli mai.

Sa lapatai mai Peresitene Boyd K.Packer (1924–2015) o le Korama a Aposetolo e Toasefululua:

O loo outou ola a’e i laufanua o le fili. … [O le fili] ua i ai o ia i totonu o fale, o faafiafiaga, o ala o faasalalauga, gagana—o mea uma o siomia ai outou. O le tele o taimi, e lē mafai ona iloa lona i ai. (Boyd K. Packer, “Pe Faapefea ona Ola i le Teritori a le Fili,” Liahona, Oke. 2012, 2)

• O a ni ou manatu po o ni lagona e uiga i lenei saunoaga?

• O a ni faataitaiga e mafai ona e mafaufau i ai e faapupula mai ai le mea na saunoa mai ai Peresitene Packer?

E ao ona mafaufau tagata aoga e uiga i a latou tali i fesili o i le parakalafa lenei, nai lo le taliina leotele.

Manatunatu mo sina taimi i le auala e faatatau ai le saunoaga a Peresitene Packer ia te oe. O a nisi o auala e te maitauina ai faaosoosoga a Satani o faatosinaina oe po o tagata e pele ia te oe? O a ni taumafaiga o loo e faia e puipuia ai oe lava mai ana osofaiga?

O taua i le va o sa Nifaē ma sa Lamanā

O le faaiuga o le tusi a Alema o loo faamatala ai nisi o taua na tutupu i le va o sa Nifaē ma sa Lamanā. A o e suesue i nei tala, e mafai ona e aoaoina ai ni lesona taua ia e mafai ona fesoasoani ia te oe i lau taua e faasaga ia Satani. Mo se faataitaiga, o faamoemoega ma togafiti a sa Lamanā e mafai ona faatusatusa i faamoemoega ma togafiti a Satani e faasaga ia i tatou.

Mafaufau e tusi mau faasino ma igoa nei i luga o le laupapa. I luga a’e o le Alema 43:5–8, tusi ai Seraemina. I luga a’e o le Alema 46:3–5, 10, tusi ai Amalekia. E mafai ona vaevae tagata aoga i ni vaega ma tofia e suesue se seti se tasi o fuaiupu.

Faitau le Alema 43:5–8; 46:3–5, 10, ma vaavaai mo mea na faia e taitai amioleaga o sa Lamanā ia e foliga tutusa ma faamoemoega ma togafiti a Satani.

Mafaufau e valaaulia ni nai volenitia e o mai i le laupapa ma tusi i lalo faamoemoega ma togafiti na faaaoga e le tagata sa latou suesueina.

• Na faapefea ona pei faamoemoega ma togafiti a nei taitai e faapei o faamoemoega ma togafiti a Satani?

O autau a sa Nifaē sa taitaia e se tagata amiotonu e igoa ia Moronae.

Mafaufau e tusi le mau faasino lenei i luga o le laupapa i tafatafa o mau faasino muamua e uiga ia Seraemina ma Amalekia. Tusi Moronae i luga a’e o le mau faasino fou.

Faitau le Alema 48:11–13, 17, ma vaavaai mo uiga faa-Keriso po o uiga o Moronae.

Valaaulia ni nai volenitia e o mai i le laupapa ma tusi i lalo uiga o Moronae ia e faamanatu atu ai ia i latou e uiga i le Faaola.

• O le a se mea sa e mauaina?

Faatatauina o tusitusiga paia ia te oe lava ia

O faatusatusaga ua e faia i tusitusiga paia e oo mai i le taimi nei e mafai ona saunia ai oe e faatatau, pe faafesootai, isi auiliiliga mai nei tala i lou lava olaga.

Faaali atu laasaga nei ina ia mafai ai e tagata aoga ona tagai i ai i le taimi atoa o le lesona.

O le faagasologa lenei e mafai ona fesoasoani ia te oe e faatatau ai tusitusiga paia i lou olaga. Tusifaamaumau nei laasaga i lau api talaaga o suesuega.

1. Saili mo auiliiliga taua.

2. Fai ni faatusatusaga i lou olaga.

3. Saili lesona aoga.

4. Fuafua le faaaogaina ai mo oe lava ia.

Faataitai le tomai o le suesueina o tusitusiga paia o le faatatauina e ala i le faaaogaina o lenei faagasologa a o e aoao e uiga i se tasi o taua i le va o sa Nifaē ma sa Lamanā.

O mea nei ua faamoemoe e taiala ai tagata aoga i le faatatauina o tusitusiga paia ma ia saunia ai i latou e faia lenei mea e i latou lava i se taimi mulimuli ane o le lesona.

Laasaga 1: Saili auiliiliga taua

Faitau le Alema 43:17–21, 37–39, 51–54, ma vaavaai mo auiliiliga taua. E mafai ona aofia i nei auiliiliga ia tagata, nofoaga, meafaitino, po o faatinoga o loo faamamafaina ai.

Fai atu i tagata aoga e faasoa mai ni auiliiliga taua na latou maua i nei fuaiupu. E mafai ona tusia nei mea i luga o le laupapa. Afai e manaomia, fesoasoani i tagata aoga e faailoa mai auiliiliga taua nei.

O nisi o auiliiliga atonu na e maitauina e aofia ai Moronae o loo puipuia ana autau i ofutau ma ofu mafiafia, o sa Lamanā e leai ni ofutau puipui, ma sa Nifaē o loo faatoilaloina ia sa Lamanā e ui ina matuā sili atu lo latou toatele .

Laasaga 2: Fai ni faatusatusaga i lou olaga

Mafaufau pe mafai faapefea ona faatusatusa ia auiliiliga na e faailoaina i le laasaga na uma atu i se mea faaleagaga po o tulaga i lou olaga.

• O a faatusatusaga e mafai ona e faia i auiliiliga na e faailoaina i le laasaga na mavae atu nei? (Afai e manaomia, tagai i le Mataupu Faavae ma Feagaiga 27:1, 15–18 po o le Efeso 6:11–16. E mafai ona e fefaasinoa’iina nei fuaiupu ma fuaiupu o i le Alema 43.)

Atonu na e faatusatusaina le ofutau o sa Nifaē i le ofutau o le Atua. Atonu foi na e faatusatusaina le manumalo o sa Nifaē i le faatoilaloina o Satani ma ana faaosoosoga.

Laasaga 3: Saili lesona e aoga

Mafaufau e uiga i mea ua e aoaoina mai lenei tala lea e mafai ona faatatau ia te oe. E mafai foi ona e mafaufau e uiga i mea ua e aoaoina e uiga i le Faaola.

Valaaulia ni tagata aoga e faasoa mai a latou tali i fesili nei.

• O a nisi o lesona ua e aoaoina mai lenei taua i le va o sa Nifaē ma sa Lamanā lea e mafai ona fesoasoani ia te oe i au taua e faasaga ia Satani?

• O le a se mea o aoao mai e lenei tala ia te oe e uiga ia Iesu Keriso?

O se tasi o mataupu faavae e mafai ona tatou aoaoina e faapea, ua ofoina mai e Iesu Keriso ia i tatou le puipuiga tatou te manaomia i la tatou taua e faasaga ia Satani.

Laasaga 4: Fuafua le faaaogaina patino

Manatunatu pe mafai faapefea ona e faaaogaina lesona na e faailoaina i le laasaga na sei mavae atu.

• O le a se mea e mafai ona e faia ia maua ai le puipuiga a Iesu Keriso e faasaga ia Satani?

I totonu o le tele o auala e faaaoga ai lenei upumoni, atonu na e mafaufau pe o faapefea ona maua le puipuiga a le Faaola e ala i faatinoga faamaoni e pei o le tatalo (tagai Mataupu Faavae ma Feagaiga 10:5), suesueina o tusitusiga paia (tagai 1 Nifae 15:24), po o le tausia o poloaiga a le Alii (tagai Mosaea 2:41).

Toe faataitai le faatatauina o tusitusiga paia

O mea nei ua faamoemoe e fesoasoani ai i tagata aoga e faaaoga le tomai o le faatatauina o tusitusiga paia e i latou lava. Afai e manaomia, atofa i tagata aoga se paga po o se vaega e galulue faatasi ai. Faaali atu mau nei, ma faasino tagata aoga i laasaga e fa na faaali muamua atu i le lesona ina ia mafai ai ona latou faaaogaina i latou a o suesue ai.

Filifili ia lē itiiti ifo ma le lua o seti nei o fuaiupu, ma, a o e suesue, faataitai ona faaaoga le faagasologa laasaga-fa mo le faatatauina o tusitusiga paia.

• Alema 48:7–9; 49:13–15

• Alema 48:14–16

• Alema 49:1–5, 8–9

• Alema 49:18–23

• Alema 50:1–6

• Alema 50:17–23

Tuu atu i tagata aoga se avanoa e faasoa mai ai mea sa latou aoaoina mai a latou suesuega. E mafai foi ona e mafaufau e faaopoopo i ai ou lava malamalamaaga mai nei fuaiupu.

• O a ni auiliiliga taua na e faailoaina mai se tala na e suesueina?

• O a nisi o faatusatusaga na e faia i le va o na auiliiliga ma tulaga o lou olaga?

• O le a se lesona se tasi pe sili atu na e aoaoina mai lenei tala?

• E faapefea ona e faaaogaina nei lesona i lou olaga?

Manatu ma Talaaga o Faamatalaga

O a ni auala o loo tatou i ai i totonu o se taua faaleagaga i aso nei?

Na aoao mai Peresitene Russell M. Nelson:

O le taua ma le agasala e moni. Ua matuā faateleina e le tiapolo ana taumafaiga e faavaivaia molimau ma taotaomia le galuega a le Alii. O loo ia faaauupegaina ana au i meatau malolosi e taofia i tatou mai le mauaina o le olioli ma le alofa o le Alii. (Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 68)

Ua faateteleina e le fili ana osofaiga i le faatuatua ma o tatou luga ma o tatou aiga i se saoasaoa matuā uigaese. Ina ia sao mai ai faaleagaga, tatou te manaomiaina ni fuafuaga faasagatau i le fili ma ni fuafuaga mamao. (Peresitene Russell M. Nelson, “Malelega Amata,” Liahona, Nov. 2018, 7)

O le a se mea e mafai ona ou faia e puipuia ai mai le fili?

Na faamatala mai e Peresitene Russell M. Nelson:

Ua folafola mai ia i tatou e faapea “afai ua [tatou] saunia o le a [tatou] le matatau” [Mataupu Faavae ma Feagaiga 38:30]. O lenei faamautinoaga ua i ai ni faatatauga loloto i aso nei. Ua ta’utino mai e le Alii e faapea e ui i luitau lēmafaatusalia tele o nei aso, ae o i latou o ē atia’e o latou faavae i luga o Iesu Keriso, ma a’oa’o i le auala e utuvai ai mai Lona mana, e lē manaomia ona lolo atu i lagona popolevale o lenei vaitau. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 94)

O le a se mea e mafai ona ou faia ia avea ai lo’u aiga o se nofoaga o le saogalemu?

Matamata i le vitiō lenei e aoao atili ai e uiga i lenei mea.

Gaoioiga Faaopoopo e Aoao Ai

Alema 50:17–23. “Sa leai se taimi sili atu ona fiafia”

Fesoasoani i tagata aoga e mafaufau i ni taimi fiafia i o latou olaga. E mafai ona e valaaulia tagata aoga e faitau le Alema 50:17–23, ma vaavaai pe aisea na faamanuiaina ma fiafia ai sa Nifaē. Ona mafai lea ona outou talanoaina fesili e pei o le “O le a se mea ua e aoaoina e uiga i le Alii mai le fuaiupu 19 lea e mafai ona fesoasoani ia te oe i lou olaga?” ma le “O le a se mea e mafai ona tatou manatua e uiga i le usiusitai i le Alii, e tusa lava pe tatou te oo i taimi faigata i le olaga?”

Na faamatala mai e Peresitene Russell M. Nelson e faapea “afai o le taulaiga o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.” (“Olioli ma le Ola ai Faaleagaga,” Liahona, Nov. 2016, 82).

Alema 50–51. Aloese mai fevaevaeaiga ma finauga ina ia faatumauina ai le filemu

Mafaufau e tusi ni nai uiga tutusa o le upu finauga i luga o le laupapa pe tusi ni nai atatusi faigofie ia e mafai ona faapupula ai finauga. Fesili atu i tagata aoga pe na faapefea ona latou vaaia finauga o aafia lē lelei ai olaga.

E mafai e tagata aoga ona faitau mau faasino nei, ma vaavaai mo le aafiaga o finauga i luga o sa Nifaē.

• Alema 50:23–26, 35–36

• Alema 51:1–8, 14–16, 21

Fesoasoani i tagata aoga ia iloa pe faapefea ona latou faaaogaina mea ua latou aoaoina i o latou lava olaga e ala i le talanoaina o fesili e pei o nei: O le a le uiga ia te oe o le mauaina o le filemu i lou aiga, i au uo, pe i totonu o lou lotoifale? E mafai faapefea ona e fesoasoani e foia finauga i soo se vaega nei o lou olaga?

Alema 50:1–6. Aua lava nei taofia le saunia

E mafai e tagata aoga ona faitau le Alema 50:1–6 ma tusi se ata e faatusa i sauniuniga a sa Nifaē. Mafaufau e faaaoga le saunoaga lenei a Peresitene Nelson e fesoasoani ai i tagata aoga ia malamalama i le taua o le saunia e tusa lava pe lē o manino mai se tulaga lamatia:

“E oo lava i taimi na sologa lelei ai mea uma, sa faaauau pea e Kapeteni Moronae ona saunia lona nuu. Na te le’i taofi lava. Sa le’i avea o ia o se tagata faasamasamanoa.

“E lē taofia foi le osofai a le fili. O lea, e lē mafai ona tuu lo tatou saunia!” (Russell M. Nelson, “Opogi le Lumanai i le Faatuatua,” Liahona, Nov. 2020, 75)