Siviʻi Hono 6 Hoʻo Akó

ʻAlamā 17–ʻAlamā 52

ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi e ngaahi taumuʻa kuó ke fokotuʻú, pea mo e tupulaki kuó ke aʻusia lolotonga hoʻo ako kimuí ni ʻa e Tohi ʻa Molomoná.

Tokoniʻi e kau akó ke nau ako ke fakamahuʻingaʻi ʻenau vakaiʻi-fakatāutahá. ʻE lava ke tokoni ki he kau akó hono toutou vakaiʻi fakataautaha kinautolú ke nau vakai ki he founga ʻoku nau hangē ange ai ko e Fakamoʻuí. Fakaafeʻi e kau akó ke fakakaukau ʻi he faʻa lotu ki he meʻa ʻoku nau ʻiló mo ʻenau ongo kau kia Sīsū Kalaisí. Poupouʻi kinautolu ke fakafuofuaʻi fakamātoato ʻenau fakalakalaká mo fakakaukauʻi ha ngaahi liliu te nau lava ʻo fakahoko ʻi heʻenau feinga ke moʻui ʻaki ʻEne ongoongoleleí.

Teuteu ʻa e tokotaha akó: Fakaafeʻi e kau akó ke omi mateuteu ke vahevahe ʻa e meʻa kuo nau akó pe ngaahi founga kuo nau tupulaki fakalaumālie ai ʻi he ngaahi uike siʻi kuo hilí. Mahalo ʻe tokoni ke toe vakaiʻi ʻe he kau akó ʻenau tohinoa akó pe ngaahi fakamatala ʻi heʻenau folofolá.

Ngaahi ʻEkitivitī Ako ʻOku Ala Fakahokó

Vakaiʻi ʻo e Tupulakí

• Ko e hā ʻoku fakaʻaongaʻi ki ai e ngaahi meʻangāue ko ʻení?

Fakakaukau ke fakaʻaliʻali ha fakatātā ʻo e ngaahi meʻangāue ko ʻení pe ʻomi ha niʻihi ʻo e ngaahi meʻa totonú, kapau ʻe lava.

• ʻOku mahuʻinga fēfē nai e ngaahi meʻangāue takitaha ko ʻení?

Hangē pē ko e mahuʻinga ke sivi ʻa e tuʻunga moʻui lelei fakaesinó mo e tupulakí, ʻoku mahuʻinga pehē pē foki mo hono fakafuofuaʻi hoʻo tuʻunga moʻui fakalaumālié mo e fakalakalaká. ʻE ʻoatu ʻe he lēsoni ko ʻení ha faingamālie ke ke fakahoko ai ʻeni.

Tokoni ki he kau akó ke fakakaukau ki heʻenau fakalakalaka fakalaumālie kimui ní ʻaki haʻo fai ha ngaahi fehuʻi hangē ko ʻení. Fakakaukau ke fakaʻaliʻali e ngaahi fehuʻi ko ʻení pea fakaafeʻi e kau akó ke hiki ʻenau ngaahi talí ʻi heʻenau tohinoa akó kimuʻa pea vahevahe ʻenau ngaahi talí mo e kalasí.

• Ko e hā kuó ke ako kimuí ni ʻokú ke houngaʻia ai?

• Ko e hā ha ngaahi liliu kuó ke fakatokangaʻi kimuí ni mai ʻi hoʻo ngaahi ongó mo e ngaahi tōʻongá?

• Ko e hā ha ngaahi founga ʻe niʻihi kuó ke fakaʻaongaʻi ai ʻa e meʻa kuó ke akó?

Fakakakato e ngaahi ʻekitivitī ko ʻení ke fakafuofuaʻi hoʻo ako mo e tupulaki fakalaumālié. Fakakaukau ke kole ki he Tamai Hēvaní ke tokoni atu ke ʻiloʻi ʻa e fakalakalaka kuó ke aʻusiá mo e ngaahi tafaʻaki ʻe ala fiemaʻu ke ke fakaleleiʻí.

Mahalo kuo fakamamafaʻi ʻi he ako ʻe hoʻo kalasí ʻa e ʻAlamaá ha ngaahi moʻoni kehe mei he ngaahi moʻoni ʻi he ongo ʻekitivitī ko ʻení. Liliu e ongo ʻekitivitī ko ʻení ke fakakau ai e ngaahi moʻoni naʻá ke fakamamafaʻí. Manatuʻi ʻoku ʻikai fiemaʻu ke akoʻi kotoa e ngaahi fakakaukau ʻi he lēsoni ko ʻení pe ʻi he fakahokohoko ʻoku ʻoatu aí.

Fakamatalaʻi ha ngaahi moʻoni mahuʻinga fekauʻaki mo e palani ʻo e fakamoʻuí mo e fatongia ʻo Sīsū Kalaisí

ʻOku fakataumuʻa ʻa e konga ko ʻeni ʻo e lēsoní ke tokoniʻi ke fakamatalaʻi ʻe he kau akó e ngaahi tafaʻaki ʻo e palani ʻo e fakamoʻuí pea mo e fatongia ʻo Sīsū Kalaisi mei heʻenau ako folofola kimuí ni maí. Liliu ʻeni ʻi ha founga ʻe tokoni ki he kau akó ke nau fakakaukau mo fakamatalaʻi ʻi he lelei taha te nau lavá ʻa e meʻa naʻa nau akó ʻo makatuʻunga ʻi he founga pe meʻa naʻá ke akoʻí.

ʻI hoʻo ako ʻa e ʻAlamaá, mahalo kuó ke ako ai ha ngaahi meʻa ʻe niʻihi ʻe lava ʻo tokoni ke ke fakamatalaʻi lelei ange ai e ngaahi moʻoni fekauʻaki mo e palani ʻo e fakamoʻuí pea mo e fatongia mahuʻinga ʻo Sīsū Kalaisí.

Fili ha taha ʻo e ongo ʻekitivitī ko ʻení ke fakakakato.

Fakakaukau ke fakaʻaliʻali e ngaahi tūkunga mo e ongo fehuʻi ko ʻení ke tali ʻe he kau akó.

‘Ekitivitī 1: Ko e palani ʻo e fakamoʻuí

Fakakaukauloto naʻe mālōlō kimuí ni ha taha ʻo e ngaahi ʻofaʻanga ʻo ha taha ho ngaahi kaungāmeʻá.

• ʻI hoʻo fakakaukau ki ha niʻihi ʻo e ngaahi moʻoni mei hoʻo ako kimuí ní, ko e hā te ke lava ʻo vahevahe mo ho kaungāmeʻá fekauʻaki mo e palani ʻo e fakamoʻuí? ʻE tokoni fēfē nai ʻeni kiate iá? (Vakai, ʻAlamā 11; 12; 40.)

Kapau ʻoku fiemaʻu tokoni ʻa e kau akó, fakakaukau ke mou vakai ki ha ngaahi potufolofola pau fekauʻaki mo e palani ʻo e fakamoʻuí, hangē ko e ʻAlamā 11:41–45; 12:24–25; 22:13–14; 40:11–14, 21, 23.

ʻEkitivitī 2: Ko e fatongia ʻo Sīsū Kalaisí

Fakakaukauloto ʻokú ke talanoa ki ha taha ʻoku taʻe-tui fekauʻaki mo hoʻo tui kia Sīsū Kalaisí.

• ʻI hoʻo fakakaukau ki ha niʻihi ʻo e ngaahi moʻoni mei hoʻo ako kimuí ni maí, ko e hā te ke lava ʻo vahevahe mo e tokotahá ni fekauʻaki mo e fatongia mahuʻinga ʻo Sīsū Kalaisí? (Vakai, ʻAlamā 26; 34; 36.)

Kapau ʻoku fiemaʻu tokoni ʻa e kau akó, fakakaukau ke mou vakai ki ha ngaahi potufolofola pau fekauʻaki mo e fatongia ʻo Sīsū Kalaisí, hangē ko e ʻAlamā 26:12–14, 16, 22, 35–37; 34:8–10; 36:16–21. Mahalo ʻe tokoni ke talaange ki he kau akó, ʻe lava ke ʻuhinga e ngaahi lea ʻa ʻĀmoni kau ki he ʻOtuá ʻi he ʻAlamā 26 ki he Tamai Hēvaní mo Sīsū Kalaisi fakatouʻosi.

Ongoʻi ha holi lahi ange ke liliu koeʻuhí ko Sīsū Kalaisi

ʻI hoʻo ako kimuí ni maí, kuó ke ako ai fekauʻaki mo ha kakai tokolahi naʻe liliu koeʻuhí naʻa nau ako fekauʻaki mo Sīsū Kalaisi.

Fakakaukau ke fakaafeʻi e kau akó ke talaatu ha niʻihi ʻo e kakai kuo nau ako ʻi he Tohi ʻa Molomoná naʻa nau aʻusia ha liliu koeʻuhí ko Sīsū Kalaisi. ʻE lava ke vahevahe ʻa e sīpinga ʻe tolu ko ʻení ʻo ka fiemaʻu. ʻE lava ke vahevahe ʻa e kau akó ki ha ngaahi kulupu pea vahe ange ke nau toe vakaiʻi ha taha ʻo e ngaahi veesi ko ʻení. Hili iá, ʻe lava ke fakamatalaʻi fakanounou ʻe ha tokotaha ako mei he kulupu takitaha ʻa e meʻa naʻe lau ʻe he kulupú ki he toenga ʻo e kalasí.

• Kau Leimana naʻe akoʻi ʻe ʻĀmoní: ʻAlamā 17:13–16 (kimuʻá); ʻAlamā 19:33, 36 (kimuí)

• Tamai ʻa e Tuʻi ko Lamōnaí: ʻAlamā 20:8–14 (kimuʻá); ʻAlamā 22:15–18 (kimuí)

• ʻAlamā ko e Siʻí: ʻAlamā 36:6 (kimuʻá); ʻAlamā 36:18, 24–26 (kimuí)

• Ko e hā naʻá ke fakatokangaʻi fekauʻaki mo ʻenau loto-vilitaki ke liliú?

Fakakaukau ki hoʻo loto-holi ke liliu koeʻuhí ko Sīsū Kalaisí. ʻE ala tokoni atu e ngaahi fehuʻí ni ke fakahoko ʻeni. Mahalo te ke fakakaukau ke tali ʻeni ʻi hoʻo tohinoa akó.

ʻE lava ke fakaʻaliʻali e ngaahi fehuʻi ko ʻení, pea ʻe lava ke fili ʻe he kau akó ke tali kinautolu ʻi heʻenau tohinoa akó.

• Kuó ke ongoʻi nai ha niʻihi ʻo e ngaahi holi tatau naʻe maʻu ʻe he kakai ko ʻeni ʻi he Tohi ʻa Molomoná? Ko e hā naʻá ke ongoʻi pehē aí?

• ʻOkú ke pehē ko e hā te ne tākiekina pe kuó ne ʻosi tākiekina koe ke ke ongoʻi e ngaahi loto-holi tatau ko ʻení?

Maʻu fakahā mei he Laumālie Māʻoniʻoní

Ko ha taumuʻa mahuʻinga ʻi he seminelí ke tokoniʻi koe ke fakatupulaki hoʻo malava ke maʻu ha fakahā fakataautaha mei he Laumālie Māʻoniʻoní.

Fakakaukau ki ha ngaahi aʻusia kimuí ni mai kuó ke maʻu ai ha fakahā fakataautaha mei he Laumālie Māʻoniʻoní. Te ke lava ʻo toe vakaiʻi ha niʻihi ʻo e ngaahi fakamatala naʻá ke hiki ʻi hoʻo folofolá pe tohinoa akó ʻi hoʻo ako ʻi he kalasí pe ʻi ʻapí.

Kimuʻa pea kamata ʻa e fealēleaʻaki ko ʻení, ʻe ala tokoni ke huluʻi ʻa e “Ngaahi Sīpinga ʻo e Māmá: Laumālie ʻo e Fakahaá” (3:04) ke tokoni ke ʻiloʻi ʻe he kau akó ha niʻihi ʻo e ngaahi founga ʻoku folofola mai ai ʻa e Laumālie Māʻoniʻoní kiate kitautolú. ʻOku maʻu ʻa e vitioó ni ʻi he ChurchofJesusChrist.org.

Fakaafeʻi e kau akó ke aleaʻi ha niʻihi ʻo e ngaahi founga kuo tāpuekina ai kinautolu kimuí ni mai ʻi hono maʻu ha fakahā fakataautaha ʻo fakafou ʻi he Laumālie Māʻoniʻoní. ʻE lava ke tokoni e ngaahi fehuʻi ko ʻení ʻi he meʻá ni.

• Ko e hā ha ngaahi fakakaukau kuó ke maʻu mei he Laumālie Māʻoniʻoní ʻi hoʻo ako e Tohi ʻa Molomoná kimui ní?

• Ko e hā kuo tokoni atu ʻa e Laumālié ke mahino kiate koe pe te ke ongoʻi fekauʻaki mo e Tamai Hēvaní mo Sīsū Kalaisí?

• Ko e hā ha ngaahi ngāue māʻoniʻoni kuo ueʻi koe ʻe he Laumālie Māʻoniʻoní kimuí ni ke ke fakahokó?

Poupouʻi e kau akó ke hokohoko atu ʻenau fekumi mo ngāueʻi ʻa e fakahā fakataautaha mei he Laumālie Māʻoniʻoní.

Ngaahi ʻEkitivitī Fakalahi ki he Akó

Ko ha founga ʻe taha ke kamata ʻaki e lēsoní

Fakakaukau ke fakaʻaliʻali ha fakatātā ʻo e konga kimuʻa ʻo e loto kaá mo e kotoa ʻo e ngaahi maama fakaʻilongá. Tokoni ke mahino ki he kau akó ʻoku ʻomi ʻe he ngaahi fakaʻilonga ʻi he konga kimuʻa ʻo ha loto kā ha fakamatala mahuʻinga ʻokú ne fakahaaʻi ʻa e tuʻunga ngāue ʻo e meʻalelé mo ha ngaahi fakatokanga kapau ʻoku ʻi ai ha meʻa ʻoku fehalaaki. ʻE lava ke kumi ʻe he kau akó ʻa e ʻuhinga mo e taumuʻa ʻo e ngaahi fakaʻilonga ʻi he meʻalelé ki he lahi taha te nau lavá ʻi he konga kimuʻa ʻo e loto kā ʻoku ʻasi atú. Fakamatalaʻi ange, hangē ko e ngaahi fakaʻilonga ʻi he konga kimuʻa ʻo ha kā, ʻe lava ke tokoni e ngaahi lēsoni Siviʻi Hoʻo Akó ʻi he seminelí ke nau ʻilo honau tuʻunga fakalaumālié mo fakafuofuaʻi ʻenau tupulakí mo e founga kuo nau fakahoko ʻaki ʻenau ako ʻa e ongoongoleleí.