ʻAlamā 43–52

Vakai Fakalūkufuá

ʻOku fakamatalaʻi ʻe he konga fakaʻosi ʻo e tohi ʻa ʻAlamaá ha taimi ʻo e fakakikihí mo e taú. ʻI he taimi naʻe mamata ai ʻa Molonai naʻe kamata ke ngalo ʻi ha tokolahi ʻo e kau Nīfaí ʻa e ʻEikí, naʻá ne tokanga ki he lelei fakalaumālie mo fakatuʻasino ʻa hono kakaí. Naʻá ne faʻu ʻa e fuka ʻo e tauʻatāiná, pea naʻá ne lisi ai ha ngaahi meʻa mahuʻinga ke manatuʻi maʻu pē ʻe hono kakaí. Naʻe ueʻi kinautolu ʻe Heʻene ngaahi leá ke fakamālohia ʻenau tukupā ki he ʻOtuá. ʻE lava ke tokoniʻi kitautolu ʻe he ngaahi founga naʻa nau fakaʻaongaʻi ʻi heʻenau ngaahi tau mo e kau Leimaná ke fakatupulaki ha ngaahi founga te tau lava ʻo fakaʻaongaʻi ʻi heʻetau tauʻi fakaʻaho ʻa Sētané.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

ʻAlamā 43, 48–50

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke fakatatau ʻa e folofolá kiate kinautolu ke nau maʻu ʻa e maluʻi ʻa e ʻEikí mei he ngaahi ʻohofi taʻe-tūkua mo fakautuutu ʻa e filí.

• Teuteu ʻa e tokotaha akó: Fakaafeʻi e kau akó ke ako ʻa e ʻAlamā 43:18–21, 37–38, ʻo kumi e ngaahi lēsoni ʻe lava ʻo tokoni kiate kinautolu ʻi heʻenau tauʻi ʻa Sētané.

• Meʻa ke fakaʻaliʻalí: Ko e sitepu ʻe fā ki hono fakatatau ʻo e folofolá kiate kitautolú

• Fokotuʻu ki hono akoʻi ʻi he konifelenisi vitioó: Fakaʻaliʻali ʻa e sitepu ʻe fā ki hono fakatatau ʻo e folofolá. Tomuʻa talaange ki he kau akó te nau fakaʻaongaʻi e ngaahi sitepu ko ʻení ʻiate kinautolu pē hili ʻenau ngāue ko ha kalasi ki ha foʻi sīpinga ʻe taha. ʻE lava heni ke poupouʻi kinautolu ke tuku moʻui ʻenau ngaahi meʻafaitaá pea tokanga lolotonga ʻa e konga ʻuluaki ʻo e lēsoní koeʻuhí ke nau mateuteu ke lelei ange ʻenau ngāue ʻiate kinautolu peé.

ʻAlamā 45–46

Taumuʻa ʻo e lēsoní: ʻE lava ke tokoni e lēsoni ko ʻení ke mahino ki he kau akó e ngaahi founga te nau lava ai ʻo fakahaaʻi ʻenau tukupā ki he ʻOtuá.

• Teuteu ʻa e tokotaha akó: Fakaafeʻi e kau akó ke nau hiki ha lisi ʻo e ngaahi meʻa ʻoku nau ueʻi pe fakamanatu kiate kinautolu ke tauhi e ngaahi fekau ʻa e ʻOtuá.

• Laʻipepa Tufa: “Ngaahi Akonaki ʻo e Kuongá ni ʻOku Fekauʻaki mo e Fuka ʻo e Tauʻatāiná”

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ʻa e ngaahi fakamatala takitaha mei he kau taki māʻolunga ʻo e Siasí koeʻuhí ke lava ʻa e kau akó ʻo muimui ki ai ʻi hoʻo lau leʻolahi kinautolú.

ʻAlamā 47–48

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke tekeʻi ʻa e feinga ʻa Sētane ke maʻu ha mālohi kiate kinautolú.

• Teuteu ʻa e tokotaha akó: Fakaafeʻi e kau akó ke lau ʻa e 2 Nīfai 28:7–8, 21–22 pea fakakaukau ki ha ngaahi sīpinga ʻoku fakaʻaongaʻi ai ʻe Sētane ʻa e ngaahi founga ko ʻení ʻi hotau kuongá.

• Laʻiʻata: Ko ha vaʻakau taumātaʻu mo ha mounu

• Vitiō: “ʻOiauē, ʻa e Palani Olopoto ʻa e Tokotaha Angakoví” (16:56; mamata mei he taimi 0:43 ki he 2:30)

• Fakatātā: Lehonitai mo ʻAmalekaia ʻi he Moʻunga ʻAnitipasí

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama palakipoé ke fakaʻaliʻali ʻa e fakatātā ʻo Lehonitai ʻi ʻolunga ʻi he moʻungá. Fakaafeʻi e kau akó ke nau fakahoko fakataha ʻa e ʻekitivitī tā fakatātaá ʻi he palakipoé. Poupouʻi kinautolu takitaha ke nau kau ki ai.

Siviʻi Hoʻo Ako Hono 6

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke vakaiʻi e ngaahi taumuʻa kuo nau fokotuʻú pea mo e tupulaki kuo nau aʻusia lolotonga ʻenau ako kimuí ni ʻa e Tohi ʻa Molomoná.

• Teuteu ʻa e tokotaha akó: Fakaafeʻi e kau akó ke nau omi mateuteu ke vahevahe ʻa e meʻa kuo nau akó pe ngaahi founga kuo nau tupulaki fakalaumālie ai ʻi he ngaahi uike siʻi kuo hilí. Mahalo ʻe tokoni ke toe vakaiʻi ʻe he kau akó ʻenau tohinoa akó pe ngaahi fakamatala ʻi heʻenau folofolá.

• Ngaahi ʻAtá: Ngaahi meʻangāue ʻoku fakaʻaongaʻi ke fua ʻaki e moʻui lelei fakatuʻasinó pe tupulakí

• Fokotuʻu ki hono akoʻi ʻi he konifelenisi vitioó: Ki he konga “Fakamatalaʻi ha ngaahi moʻoni mahuʻinga fekauʻaki mo e palani ʻo e fakamoʻuí pe ko e fatongia ʻo Sīsū Kalaisí,” te ke lava ʻo vahevahe ʻa e kau akó ki ha kulupu ʻe ua pea tuku ʻa e kulupu takitaha ki ha kiʻi loki fakataha. ʻE lava ke vahe ki ha kulupu ʻe taha ke nau aleaʻi ʻa e ʻekitivitī 1, pea aleaʻi ʻe he kulupu ʻe tahá ʻa e ʻekitivitī 2. Hili e fealēleaʻakí, ʻe lava ʻe ha tokotaha mei he kulupu takitaha ʻo fakamatalaʻi fakanounou ʻa e tali ʻa ʻenau kulupú mo e toenga ʻo e kalasí.

Toe Vakaiʻi Hono 15 ʻo e Fakataukei Fakatokāteliné

Taumuʻa ʻo e lēsoní: ʻE lava ke tokoni e lēsoni ko ʻení ke fakatupulaki e mahino ʻa e kau akó mo ʻenau malava ke fakamatalaʻi e ngaahi moʻoni ʻoku maʻu ʻi he ngaahi potufolofola fakataukei fakatokāteline mei he Tohi ʻa Molomoná.

• Teuteu ʻa e tokotaha akó: Fakaafeʻi e kau akó ke fakakaukau ki ha meʻa ʻoku mahino lelei kiate kinautolu, hangē ko ha meʻa ʻoku nau manako ai, sipoti, pe lēsoni fakaako. ʻAi ke nau fakakaukau ki he meʻa kuó ne tokoniʻi kinautolu ke nau maʻu ha mahino lahi peheé pea fakaafeʻi kinautolu ke vahevahe ʻenau ngaahi fakakaukaú.

• Ngaahi Vitioó: “Ke Hoko Kotoa Ia, pea ʻOfa Ai” (13:29; mamata mei he taimi 4:50 ki he 5:44); “ʻOku ʻIkai Haohaoa ʻa e Moʻui Tāú” (10:52; mamata mei he taimi 0:00 ki he 0:27)

• Meʻa ke fakaʻaliʻalí: “Fakataukei Fakatokāteline ʻo e Tohi ʻa Molomoná: ʻAlamā–Molonai”

• Fokotuʻu ki hono akoʻi ʻi he konifelenisi vitioó: Kimuʻa pea kamata e lēsoní, fakakaukau ke fakaʻaongaʻi ʻa e polokalama palakipoé ke hiki ʻa e foʻi lea maʻuhalá pea fakaafeʻi e kau akó ke vahevahe ʻa e meʻa ʻoku haʻu ki honau ʻatamaí ʻi heʻenau fakakaukau ki he foʻi lea ko ʻení. Hili iá pea vahevahe ʻa e ngaahi fakamatala ʻoku ʻoatu ʻi he lēsoní. Ko ha founga ʻe taha, fakakaukau ke vahevahe ha aʻusia fakataautaha ʻo ha maʻuhala.