Toe Vakaiʻi Hono 16 ʻo e Fakataukei Fakatokāteliné

Fakaʻaongaʻi ‘o e Ngaahi Potufolofola Fakataukei Fakatokāteliné

ʻE lava ke tāpuekina koe ʻi ha ngaahi founga lahi ʻi hoʻo ako ke fakaʻaongaʻi e folofola ʻa e ʻEikí ʻi he ngaahi folofola māʻoniʻoní. ʻE lava ke tokoni ʻa e lēsoni ko ʻení ke ke fakaʻaongaʻi e ngaahi moʻoni mei he ngaahi potufolofola fakataukei fakatokāteline ʻi he konga hono ua ʻo e Tohi ʻa Molomoná ki hoʻo moʻuí.

Ko hono fakaʻaongaʻi ‘o e ngaahi potufolofola fakataukei fakatokāteliné. ʻOange ha ngaahi faingamālie ki he kau akó ke fakaʻaongaʻi ʻa e tokāteline ʻoku nau ako mei he ngaahi potufolofola fakataukei fakatokāteliné ki ha ngaahi tūkunga moʻoni ʻo e moʻuí. ʻE lava ke fakamamafaʻi ʻe he founga ko ʻení ʻa hono mahuʻinga ʻo e ngaahi potufolofola ko ʻení ki heʻenau moʻuí.

Teuteu ʻa e tokotaha akó: Fakaafeʻi e kau akó ke omi mateuteu ke vahevahe ha ngaahi tāpuaki pe lelei kuo nau fakatokangaʻi ʻi heʻenau feinga ke fakaʻaongaʻi e folofolá ʻi heʻenau moʻuí.

Ngaahi ʻEkitivitī Ako ʻOku Ala Fakahokó

ʻE ala fiemaʻu ke akoʻi ha lēsoni potufolofola fakataukei fakatokāteline ʻo fetongi ʻaki ʻa hono toe fakamanatu ʻo e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakavāhengá pe vahefonuá pe kouʻōtineitá ke fakapapauʻi ʻe akoʻi e lēsoni kotoa pē ʻo e fakataukei fakatokāteline ki he potufolofolá lolotonga e fakahoko ʻa e seminelí.

Ngaahi tāpuaki ʻo hono fakaʻaongaʻi ʻo e folofolá

Fakakaukau ke fakaʻaliʻali ʻa e ngaahi fakahinohino mo e fakamatala ko ʻení. Fakaafeʻi e kau akó ke vahevahe ʻa e meʻa naʻa nau maʻú.

ʻI he fakamatala ko ʻení, naʻe vahevahe ai ʻe Palesiteni Poni H. Kōtoni, Palesiteni Lahi ʻo e Kau Finemuí, ʻa e ngaahi tāpuaki ʻe lava ke maʻu mei hono ako ʻo e folofolá. ʻI hoʻo lau ʻene ngaahi leá, fakalaulauloto ki he meʻa ʻoku makehe kiate koé.

ʻOku hanga ʻe hono ako lahi ange ʻo e folofolá ʻo fakamaama hotau ʻatamaí, tanumaki hotau laumālié, tali ʻetau ngaahi fehuʻí, fakatupulaki ʻetau falala ki he ʻEikí pea tokoni ke fakatefito ʻetau moʻuí ʻiate Ia. (Bonnie H. Cordon, “Falala ki he ʻEikí pea ʻOua Naʻá ke Faʻaki ki Ho Potó,” Liahona, Mē 2017, 7)

• Ko e hā ha ngaahi tāpuaki kehe ʻe lava ke tau maʻu mei hono ako ʻo e folofolá?

Mahalo ʻe kamata ke tau aʻusia ha niʻihi ʻo e ngaahi tāpuakí ni ʻi heʻetau ako e folofolá, ka ʻe lava ke hokohoko atu mo tupulaki ia ʻi heʻetau fakaʻaongaʻi e folofolá ʻi heʻetau moʻuí.

• ʻOku ʻuhinga ki he hā ke fakaʻaongaʻi ʻa e folofolá ʻi heʻetau moʻuí?

Kapau ʻokú ke fie fanongo ki he fakamoʻoni ʻa ha tangata kau ki he mahuʻinga ʻo e fakalaulaulotó mo e feinga ke fakaʻaongaʻi e folofolá, sio ʻi he Ko Hono Fakaleleiʻi e Ngaahi Palopalema ʻo e Moʻuí ʻAki ʻa e Tohi ʻa Molomoná” (1:00), ʻoku maʻu ʻi he ChurchofJesusChrist.org.

Ko hono fakaʻaongaʻi ʻo e folofolá

Ke ʻahiʻahi hono fakaʻaongaʻi ʻo e folofolá [ʻi heʻetau moʻuí], lau ʻa e ngaahi tūkunga ko ʻení pea fili ha tūkunga ʻe taha.

ʻE lava ke ke liliu e ngaahi tūkunga ko ʻení ke mahuʻingamālie ange ki hoʻo kau akó.

1. ʻOku loto ha talavou ke maʻu ha fakamoʻoni mālohi pea ke toe ofi ange ki he ʻEikí.

2. ʻOku faingataʻaʻia ha finemui koeʻuhí ʻoku ʻi ai haʻane ngaahi tōʻonga kovi kuo teʻeki ke ne lava ʻo ikunaʻi.

3. ʻOku aʻusia ʻe ha talavou ha ngaahi ongo ʻo e ʻikai ha mahuʻinga fakatāutahá mo fefaʻuhi ke ne ongoʻi e ʻofa ʻa e ʻOtuá kiate iá.

Kapau te ke fiemaʻu, te ke lava foki ʻo faʻu ha tūkunga foʻou ʻoku fekauʻaki vāofi ange mo hoʻo moʻuí pe moʻui ʻa kinautolu ʻokú ke ʻiló.

Fakaʻaliʻali pe ʻoange ki he kau akó ʻa e ngaahi fakahinohino mo e saati ko ʻení.

Lau e ngaahi kupuʻi lea fakafolofola mahuʻinga ʻi laló, pea kumi ha kupuʻi lea ʻe taha ʻokú ke ongoʻi ʻe lava ʻo tokoni ki he tokotaha ʻi he tūkunga naʻá ke filí. Lau kakato ʻa e potufolofolá, pea fakahoko e ngaahi meʻá ni:

1. Fakaʻilongaʻi ha foʻi moʻoni ʻoku akoʻi mai ʻe he potufolofolá ʻe ala tokoní.

2. Feinga ke ʻiloʻi ha founga ʻe taha ʻe lava ke fakaʻaongaʻi ai ʻe he tokotaha ʻi he tūkungá ʻa e potufolofolá ki heʻene moʻuí.

3. Fakamatalaʻi ʻa e ngaahi tāpuaki ʻe lava ke ne aʻusia ʻi hono fakaʻaongaʻi ʻa e potufolofolá ʻi he founga ko iá.

(Kapau ʻokú ke loto ki ai, te ke lava ʻo toe fakahoko ʻa e ngāue ko ʻení mo ha potufolofola fakataukei fakatokāteline ʻe taha ʻe ala tokoni ki he tūkunga naʻá ke filí.)

Fakataukei Fakatokāteline ʻo e Tohi ʻa Molomoná: ʻAlamā–Molonai

Tohi ʻa Molomoná – Tohi Lēsoni ʻa e Faiakó (2024)

Fakamoʻoni Fakafolofolá	Kupuʻi Lea Fakafolofola Mahuʻingá
Fakamoʻoni Fakafolofolá ʻAlamā 7:11–13	Kupuʻi Lea Fakafolofola Mahuʻingá “Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē.”
Fakamoʻoni Fakafolofolá ʻAlamā 34:9–10	Kupuʻi Lea Fakafolofola Mahuʻingá “Kuo pau ke fai ha fakalelei, … ko ha feilaulau taʻe-fakangatangata mo taʻengata.”
Fakamoʻoni Fakafolofolá ʻAlamā 39:9	Kupuʻi Lea Fakafolofola Mahuʻingá “ʻIkai toe muimui ʻi he ngaahi holi ʻa ho matá.”
Fakamoʻoni Fakafolofolá ʻAlamā 41:10	Kupuʻi Lea Fakafolofola Mahuʻingá “Kuo teʻeki ai hoko ʻa e faiangahalá ko e fiefia.”
Fakamoʻoni Fakafolofolá Hilamani 5:12	Kupuʻi Lea Fakafolofola Mahuʻingá “ʻOku makatuʻunga ʻi he maka ʻo hotau Huhuʻí … kuo pau ke mo langa ai homo makatuʻungá.”
Fakamoʻoni Fakafolofolá 3 Nīfai 11:10–11	Kupuʻi Lea Fakafolofola Mahuʻingá “Kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.”
Fakamoʻoni Fakafolofolá 3 Nīfai 12:48	Kupuʻi Lea Fakafolofola Mahuʻingá “Ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí.”
Fakamoʻoni Fakafolofolá 3 Nīfai 27:20	Kupuʻi Lea Fakafolofola Mahuʻingá “Haʻu kiate au ʻo papitaiso … koeʻuhí ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.”
Fakamoʻoni Fakafolofolá ʻEta 12:6	Kupuʻi Lea Fakafolofola Mahuʻingá “ʻOku ʻikai te mou maʻu ha fakamoʻoni kae ʻoua kuo hili hono ʻahiʻahiʻi ʻo hoʻomou tuí.”
Fakamoʻoni Fakafolofolá ʻEta 12:27	Kupuʻi Lea Fakafolofola Mahuʻingá “Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”
Fakamoʻoni Fakafolofolá Molonai 7:45–48	Kupuʻi Lea Fakafolofola Mahuʻingá “Ko e manavaʻofá ʻa e ʻofa haohaoa ʻa Kalaisí.”
Fakamoʻoni Fakafolofolá Molonai 10:4–5	Kupuʻi Lea Fakafolofola Mahuʻingá “Mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi … [pea] ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.”

© 2023 by Intellectual Reserve, Inc. All rights reserved.

Hili hono maʻu ʻe he kau akó ha taimi feʻunga ke teuteu ʻenau ngaahi talí, fakaafeʻi kinautolu ke vahevahe ʻa e ngaahi tali ko iá ʻi ha ngaahi hoa pe kulupu iiki kimuʻa pea vahevahe ha faʻahinga mo e kalasí. Hili iá pea fakakaukau ke fakaʻaliʻali e ngaahi fakahinohino ko ʻení pea fakaafeʻi e kau akó ke fakaʻaongaʻi ha potufolofola ki heʻenau moʻuí.

Toe vakaiʻi e ngaahi veesi fakataukei fakatokāteliné, pea fili ha veesi ʻe taha ʻokú ke ongoʻi ʻe hoko ko ha tāpuaki ke ke fakaʻaongaʻi ʻi hoʻo moʻuí. Tā ha fakatātā faingofua pe tohi fekauʻaki mo ha founga te ke fakaʻaongaʻi ai ʻa e potufolofola ko iá. Te ke lava foki ʻo fakakau ha tāpuaki ʻe taha pe lahi ange ʻe ala maʻu mei aí.

Tukupā ke muimuiʻi e ngāue naʻá ke fakakaukau ki aí.

ʻI he ʻosi e ngāue ʻa e kau akó, fakakaukau ke fakaafeʻi kinautolu ke vahevahe ʻenau ngaahi fakatātaá pe fakamatalá mo e kalasí pea ʻi ʻapi mo e kau mēmipa ʻo e fāmilí pe ngaahi kaungāmeʻa mamaé.