Hilamani 1–6

Vakai Fakalūkufuá

Naʻe ʻikai fuoloa mei he pekia ʻa e ʻEikitau ko Molonaí, Hilamani, mo e tuʻi fakamaau lahi ko Peiholaní, naʻe tofanga ʻa e kau Nīfaí ʻi he ngaahi nunuʻa ʻo ha fakakikihi lahi. Naʻe manatuʻi ʻe he ongo foha ʻo Hilamaní, ʻa Nīfai mo Līhai, ʻa hono fakahā ʻe heʻena tamaí ko kinautolu naʻe langa ʻa e makatuʻunga ʻo ʻenau moʻuí “ʻi he maka ʻo hotau Huhuʻí” (Hilamani 5:12) te nau maʻu ʻa e mālohi ke tekeʻi ʻa e koví pea kei faivelenga pē. ʻI he taimi naʻe ʻufiʻufi ai ʻe he fakapoʻulí ha kulupu ʻo ha kau Leimana faiangahala, naʻe akoʻi kinautolu ke nau fakatomala mo tui kia Sīsū Kalaisi. Hili ha ngaahi taʻu lahi mei ai, ʻi hono fakanounouʻi ʻe Molomona ʻa e hisitōlia ʻo e kau Nīfaí pea lekooti ia ki he ʻū lauʻi peleti koulá, naʻá ne faʻa fakamahinoʻi ha ngaahi moʻoni mahuʻinga ʻo fakaʻaongaʻi ha ngaahi konga lea hangē ko e “ko ia ʻoku tau vakaí.” ʻE lava ke tokoniʻi kitautolu ʻe he ngaahi moʻoni naʻá ne fakamahinoʻí ʻi he ngaahi faingataʻa ʻoku tau fehangahangai mo ia ʻi he ʻaho ní.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Hilamani 1-4; 6

Fakatokangaʻi ange: ʻOku aleaʻi ʻa e siakale ʻo e hīkisiá ʻi he Tohi ʻa Molomoná ʻi he lēsoni ʻo e Hilamani 1–6 ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2024. ʻI he tohi lēsoni ko ʻení, ʻe fakamamafaʻi ʻa e siakale ʻo e hīkisiá ʻi he lēsoni Hilamani 11–12.

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e ngaahi nunuʻa ʻo e fakakikihí mo e founga ke maʻu ai ʻa e melinó ʻia Kalaisi ʻi ha māmani fakakikihi.

• Teuteu ʻa e tokotaha akó: Fakaafeʻi e kau akó ke lotua ha tokotaha pe ha meʻa kuo hoko ko ha tupuʻanga ʻo e fakakikihí ʻi heʻenau moʻuí.

• Meʻa ke fakaʻaliʻalí: Ko ha fakatātā ʻo e fanga kiʻi siakale ke hiki ʻe he kau akó ʻi heʻenau tohinoá

• Vitiō: “Ko e Mālohi ʻo e Ivi Fakalaumālié” (17:17; mamata mei he taimi 1:38 ki he 3:31)

• Fokotuʻu ki hono akoʻi ʻi he konifelenisi vitioó: ʻE lava ke fakaʻaliʻali ʻe he kau akó ʻenau ngaahi fakatātā ʻo e fanga kiʻi siakale kuo ʻosí pea mo e fakamatala ʻo e tefitoʻi moʻoni naʻa nau ʻilo mei heʻenau akó. Te nau lava ʻo fai ʻeni ʻaki haʻanau ʻai ha fakatātā fakaʻilekitulōnika ʻo ʻenau fakatātā ʻo e fanga kiʻi siakalé mo vahevahe ʻenau monitoá, pe ko ʻenau hiki hake ʻenau fakatātaá ki heʻenau meʻafaitā.

Hilamani 3; 6

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ʻiloʻi ha ngaahi moʻoni mei he folofolá pea vakavakaiʻi ʻa e founga ʻe lava ke liliu ai ʻe he ngaahi moʻoni ko iá ʻenau moʻuí.

• Teuteu ʻa e tokotaha akó: Fakaafeʻi e kau akó ke kumi ha foʻi moʻoni mahuʻinga ʻe taha pe ua lolotonga ʻenau ako folofola fakatāutahá pe fakafāmilí. Kole ange ke nau teuteu ke fakamatalaʻi ʻa e founga ʻoku nau maʻu ai ha moʻoni mahuʻingamālie ʻi he folofolá.

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ʻa e kau akó ke vahevahe ʻi he polokalama fetalanoaʻakí ha ngaahi tefitoʻi moʻoni kehekehe ne nau maʻu ʻi he Hilamani 3 mo e Hilamani 6.

Hilamani 5:1–13

Taumuʻa ʻo e lēsoní: ʻE lava ke tokoni ʻa e lēsoni ko ʻení ke matuʻuaki ʻe he kau akó ʻa e tēvoló pea langa honau ngaahi makatuʻungá ʻia Sīsū Kalaisi.

• Teuteu ʻa e tokotaha akó: Fakaafeʻi ʻa e kau akó ke lau ʻa e Hilamani 5:12 pea fakaʻilongaʻi ʻa e ngaahi foʻi lea pe ngaahi kupuʻi lea ʻoku ʻuhingamālie kiate kinautolú. Fakakaukau foki ke fakaafeʻi ʻa e kau akó ke kamata ako maʻuloto ʻa e potufolofolá kakato.

• ʻĪmisí: Ko ha tā ʻo e Temipale Salt Lake

• Ngaahi Vitioó: “Ko e Temipalé mo Ho Fakavaʻe Fakalaumālié” (18:59; mamata mei he taimi 3:19 ki he 4:26); “Ngaahi Faingataʻa Fakalaumālié” (2:24)

• Fokotuʻu ki hono akoʻi ʻi he konifelenisi vitioó: ʻI hono vahevahe ʻe he kau akó ʻa e ngaahi founga ke langa ai honau makatuʻungá ʻia Sīsū Kalaisí, fakakaukau ke fakaʻaongaʻi ʻa e polokalama palakipoé ke hiki ai ʻenau ngaahi talí pea tokoniʻi kinautolu ke ʻanalaiso ha niʻihi ʻo kinautolu.

Fakataukei Fakatokāteliné: Hilamani 5:12

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e fakamoʻoni folofola ki he fakataukei fakatokāteliné mo e kupuʻi lea fakafolofola mahuʻinga ki he Hilamani 5:12, fakamatalaʻi ʻa e tokāteline ʻoku akoʻi atu ʻi he potufolofola ko ʻení, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi ʻa e kau akó ke hokohoko atu ʻenau feinga ke ako maʻuloto ʻa e potufolofola Hilamani 5:12.

• Vitiō: “Kuo Toetuʻu ʻa Kalaisi; ʻE Hiki e Ngaahi Moʻungá ʻi he Tui Kiate Iá” (16:22; mamata mei he taimi 8:42 ki he 9:43)

• Ngaahi ʻAtá: ʻĪmisi ʻo ha tokotaha kei talavou ʻoku tuʻu ʻi ha funga maka

• Naunau maʻá e kau akó: Fanga kiʻi maka iiki, laʻi pepa, kulū, tepi, lapapeni, mo ha ngaahi foʻi peni maaka

• Fokotuʻu ki hono akoʻi ʻi he konifelenisi vitioó: Fakakaukau ke vahe ʻa e kau akó ki ha fanga kiʻi kulupu fakataha ke aleaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié. Te ke lava ʻo vahe kinautolu ki ha ngaahi kulupu kehekehe ki he tefitoʻi moʻoni takitaha.

Hilamani 5:14–52

Taumuʻa ʻo e lēsoní: ʻE lava ke tokoni ʻa e lēsoni ko ʻení ke fakafalala ʻa e kau akó kia Sīsū Kalaisi ke toʻo atu ʻa e ngaahi ongo ʻo e manavasiʻí mo e fakapoʻulí pea fetongi kinautolu ʻaki ʻEne fiefiá, melinó, mo e māmá.

• Teuteu ʻa e tokotaha akó: Fakaafeʻi e kau akó ke fakalaulauloto ki he ngaahi founga ʻoku hangē ai ʻa Sīsū Kalaisi ko e māmá (vakai, Sione 8:12).

• Lēsoni fakataumuʻá: Ko ha kasa

• Fokotuʻu ki hono akoʻí ʻi he konifelenisi vitioó: Ke kamata ʻa e kalasí, fakakaukau ke aleaʻi ʻa e founga ʻoku liliu ai ʻe he maama leleí mo e maama koví ʻa e fakaʻofoʻofa ʻo e ʻasi ʻa e kau akó ʻi he meʻafaitaá. Te ke lava ʻo fakaafeʻi ʻa e kau akó ke fakamoʻui ha maama lahi ange ke tokoni ke nau ʻasi lelei ange ʻi he screen.