Hilamani 5:14–52

“ʻE Toʻo Atu ʻa e ʻAo Fakapoʻulí”

ʻI taimi ʻoku tau ʻi ha loki fakapoʻuli ai, ʻe lava ke tau fakamoʻui ha maama. Ka ko e hā te tau lava ʻo fai ʻi he taimi ʻoku tau ʻi he fakapoʻuli fakalaumālié aí? ʻI he taimi naʻe ʻufiʻufi ai ʻe he fakapoʻulí ha kulupu ʻo ha kau Leimana faiangahala, naʻe akoʻi kinautolu ke nau fakatomala mo tui kia Sīsū Kalaisi. ʻE lava ke tokoniʻi koe ʻe he lēsoni ko ʻení ke ke falala kia Sīsū Kalaisi ke toʻo atu ʻa e ngaahi ongo ʻo e ilifiá mo e fakapoʻulí pea fetongi kinautolu ʻaki ʻEne fiefiá, melinó, mo e māmá.

Poupouʻi ʻa e kau akó ke nau fakalaulauloto. ʻI he taimi ʻoku maʻu ai ʻe he kau akó ha taimi ke fakakaukau lahi ange ki heʻenau moʻuí mo e meʻa ʻoku nau akó, ʻe lava ke fakahā ʻe he Laumālie Māʻoniʻoní ha ngaahi moʻoni fakataautaha mo ʻaonga kiate kinautolu. Fakaafeʻi ʻa e kau akó ke fakalaulauloto ki he founga ʻoku nau fakaafeʻi ai ʻa e maama mo e mālohi ʻo Sīsū Kalaisí ki heʻenau moʻuí.

Teuteu ʻa e tokotaha akó: Fakaafeʻi ʻa e kau akó ke fakalaulauloto ki he ngaahi founga ʻoku hangē ai ʻa Sīsū Kalaisi ko e māmá (vakai, Sione 8:12).

Ngaahi ʻEkitivitī Ako ʻOku Ala Fakahokó

Fakapoʻulí mo e māmá

Tokoni ki he kau akó ke nau kamata fakakaukau ki he māmá mo e fakapoʻulí. Te ke lava ʻo fakaʻaongaʻi ha ngaahi meʻahulu pe telefoni toʻotoʻo ke fakatātaaʻi ʻaki ʻa e founga ʻe lava ke toʻo ai ʻe hono fakamoʻui ha māmá ʻa e fakapoʻulí mei ha loki. Te ke lava ʻo hiki ʻa e ngaahi meʻa ʻoku fakatokangaʻi ʻe he kau akó ʻi he palakipoé pea feinga ke fakafekauʻaki ʻenau ngaahi fakakaukaú ʻamui ange ʻi he lēsoní ʻi he taimi te nau ʻiloʻi ai ha ngaahi tefitoʻi moʻoni fekauʻaki mo Sīsū Kalaisí.

Fakakaukau ki ha taimi naʻá ke ʻi ha feituʻu fakapoʻuli ai mo ha kiʻi maama siʻisiʻi pe ʻikai ha maama. ʻOkú ke manatuʻi nai pe ko e hā naʻe faingataʻa ai ʻi he ʻikai ke ke lava ʻo sio leleí?

• Makehe mei haʻatau ʻi ha loki fakapoʻulí, ko e hā ha ngaahi founga kehe te tau ala aʻusia ai ʻa e fakapoʻulí ʻi heʻetau moʻuí? Ko e hā ha ngaahi ongo ʻe niʻihi te ke ala maʻu ʻi he fakapoʻulí?

ʻOku totonu ke mahino ki he kau akó ʻi he lēsoní, ko e fakapoʻuli kotoa pē ʻoku ʻikai ko ha ola ia ʻo ha ngaahi fili hala ka ʻe lava ke toʻo ʻa e fakapoʻulí ʻi hono ngāue ʻaki ʻa e tui kia Sīsū Kalaisí.

Fakakaukau ki hoʻo moʻuí mo ha faʻahinga fakapoʻuli pē ʻokú ke aʻusia. ʻI hoʻo ako ʻi he ʻaho ní, kumi ʻa e meʻa te ke lava ʻo fai ke fakafonu hoʻo moʻuí ʻaki ʻa e māmá ke tokoni ke toʻo ʻa e fakapoʻulí.

Ngāue fakafaifekau ʻa Nīfai mo Līhaí

Naʻe malangaʻi ʻe he ongo foha ʻo Hilamaní, Nīfai mo Līhai, ʻa e ongoongolelei ʻo Sīsū Kalaisí. Naʻá na akoʻi ha kau Nīfai tokolahi kuo nau angatuʻu pea nau kau fakataha mo e kau Leimaná. Naʻe fakatomala ʻa e kau Nīfai ko ʻení pea nau feinga ke fakaleleiʻi ha faʻahinga maumau pē naʻa nau fakahoko. Naʻe malanga ʻa Nīfai mo Līhai ʻi he fuʻu mālohi lahi, pea naʻe fili ha kau Leimana ʻe toko 8,000 ke fakatomala pea papitaiso (vakai, Hilamani 4:4; 5:14–19).

Lau ʻa e Hilamani 5:20–22, ʻo kumi ʻa e founga naʻe uesia ai ʻenau lavameʻá.

Ko e taimi pē ʻoku tau fehangahangai ai mo e fakafepakí pe aʻusia ha ngaahi ʻahiʻahi, mahalo te tau fakakaukau ko ha ngaahi taimi fakapoʻuli ʻeni ʻi heʻetau moʻuí. Mahalo te tau fehuʻia ʻa e ʻuhinga ʻoku tuku ai ʻe he ʻOtuá ke hoko ʻa e ngaahi meʻá ni. Ka neongo ia, kapau te tau mātuʻaki tokanga, te tau fakatokangaʻi ʻoku ngāue maʻu pē ʻa e ʻOtuá ʻi heʻetau moʻuí mo finangalo ke tāpuekina kitautolu.

Ke tokoni ki he kau akó ke kau longomoʻui ki he akó, ʻe lava ke ke vahevahe ʻa e kalasí ke nau tauhoa ke nau lau ʻa e ngaahi veesi ko ʻení. ʻE lava ke kumi ʻe ha tokotaha ako ha fakamoʻoni ʻo e ʻOtuá ʻi he moʻui ʻa Nīfai mo Līhaí (vakai, Hilamani 5:23–26). ʻE lava ke laukonga ʻa e tokotaha ako ʻe tahá fekauʻaki mo hono faitokonia ʻe he ʻOtuá ʻa e kau Leimaná (vakai, Hilamani 5:28–33).

Lau ʻa e Hilamani 5:23–33, ʻo kumi ʻa e meʻa naʻe fakahoko mo folofola ʻaki ʻe he ʻOtuá. Kapau ʻoku maʻu ʻa e ongo ʻo e Hilamani 5, ʻe lava ke ke fanongo ki ai pea lau fakataha mo ia. Fakapapauʻi ke kiʻi taʻofi pea toe fakafoki ʻo ka fiemaʻu.

• Ko e hā ʻokú ke ako fekauʻaki mo e ʻOtuá mei he ngaahi veesi ko ʻení? Ko e hā ha ngaahi ongo ʻokú ke maʻu kiate Ia koeʻuhí ko e meʻa ʻokú ke akó?

  Te ke lava ʻo fakaafeʻi ʻa e kau akó ke nau hiki ʻi he palakipoé ʻa e meʻa naʻa nau maʻú. Aleaʻi ʻa e ngaahi founga ʻoku tokoniʻi mo tāpuekina ai kitautolu ʻe he ʻOtuá.

• ʻE tokoniʻi fēfē nai koe ʻe he fakaafe ʻa e ʻOtuá ʻi he veesi 29 mo e 32 ke ke vakai ki Heʻene ʻofa ki he tokotaha kotoa peé?

ʻE lava ke ke laineʻi ʻa e ngaahi lea ʻi he Hilamani 5:29, 32 ʻa ia ʻoku kau ai ʻa e fakaafe mei he ʻOtuá.

Naʻe fakamalumalu ʻa kinautolu ʻi he fale fakapōpulá ʻe he fakapoʻulí. Naʻe ʻikai ke nau ʻilo ʻa e meʻa ke faí, pea koeʻuhí ko ʻenau ilifiá, naʻe ʻikai ke nau lava ʻo toe ngaue (vakai, Hilamani 5:34, 40).

Lau ʻa e Hilamani 5:35–41 ke ʻiloʻi pe naʻe tokoniʻi fēfē nai kinautolu ʻe ha tangata ko hono hingoá ko ʻAminatapi ke mahino kiate kinautolu ʻa e founga ke toʻo ai ʻa e fakapoʻulí.

• Ko e hā ha moʻoni te tau lava ʻo ako mei he meʻa naʻe lea ʻaki ʻe ʻAminatapi ʻi he veesi 41?

Ko e tefitoʻi moʻoni ʻe taha te tau lava ʻo akó ʻe lava ke toʻo ʻe Sīsū Kalaisi ʻa e fakapoʻulí mei heʻetau moʻuí ʻi he taimi ʻoku tau tui ai kiate Ia mo fakatomalá.

ʻOku mahuʻinga ke aleaʻi fakaikiiki ange ʻa e meʻa naʻe lea ʻaki ʻe ʻAminatapi ʻi he veesi 41. ʻE lava ke ʻaonga ki he kau akó hono aleaʻi ʻa e ʻuhinga naʻe pehē ai ʻe ʻAminatapi “kuo pau ke mou fakatomala” mo e ʻuhinga naʻá ne fakahinohinoʻi ai kinautolu ke lotu ki he ʻOtuá kae ʻoua kuo nau maʻu ʻa e tui kia Sīsū Kalaisí.

ʻE lava ke ke tokoni ki he kau akó ke fakafehoanaki ʻa hono fakamoʻui ha kasa pe kamosi ha meʻa kamosi ʻo e māmá ki hono ngāue ʻaki ʻo e tui kia Sīsū Kalaisí mo e fakatomalá.

• ʻOkú ke pehē ʻe tokoni fēfē nai ʻa e tui kia Sīsū Kalaisí mo e fakatomalá ke toʻo atu ʻa e fakapoʻulí?

Naʻe vahevahe ʻe ʻEletā Lōpeti D. Heili (1932–2017) ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi founga pau te tau lava ai ʻo fakaafeʻi ʻa e maama ʻa e ʻEikí ki heʻetau moʻuí.

ʻE faʻu ʻe he maama ʻa [Sīsū Kalaisí] ha pā maluʻi ʻi ho vahaʻa mo e fakapoʻuli ʻo e filí ʻi hoʻo moʻui taau mo iá. ʻOkú ke fiemaʻu ʻa e maama ko iá. ʻOku tau fiemaʻu ʻa e maama ko iá. Ako fakalelei ʻa e folofolá mo e [tohi tufa] Ki hono Fakamālohia ʻo e Toʻu Tupú pea fakafanongo ki he ngaahi akonaki ʻa hoʻo mātuʻá pea mo e kau takí. Pea ʻi hoʻo talangofua ki he faleʻi fakapotopotó, ako ke ke ʻekea ʻa e maama maluʻi ʻo e ongoongoleleí ʻo ʻai ia maʻau.

Mahalo te ke fifili, “Te u lava fēfē nai ʻo fakahoko iá?” ʻOku taha pē ʻa e foungá: kuo pau ke ke ako ke fakatupu ʻa e maama ko iá ʻi he ʻaho takitaha ʻaki haʻo tui kia Sīsū Kalaisi mo muimui ki Heʻene ngaahi fekaú. (Robert D. Hales, “Out of Darkness into His Marvelous Light,” Liahona, May 2002, 70)

• Ko e hā ʻokú ke ʻilo fekauʻaki mo Sīsū Kalaisi ʻoku tokoni ke mahino kiate koe te Ne lava ʻo maluʻi kitautolu mei he fakapoʻulí pe toʻo ʻa e fakapoʻulí mei heʻetau moʻuí?

ʻE lava ke fakaafeʻi ʻa e kau akó ke nau fakakaukau ki he huafa ʻo Sīsū Kalaisi ko e Maama ʻo e Māmaní pea mo e founga ʻe lava ke fakalahi ai ʻe he huafa ko ʻení ʻa e mahino ʻoku nau maʻú. (Vakai, Jesus Christ, Light of the World, Topical Guide; Tokāteline mo e Ngaahi Fuakava 88:6–13.)

Hiki leva ʻa e kupuʻi lea ko ʻení ʻi he palakipoé.

• Ngaahi tāpuaki mei hono ngāue ʻaki ʻo e tui kia Sīsū Kalaisí mo e fakatomalá

Lau ʻa e Hilamani 5:42–49 pea hiki ha lisi ʻo e ngaahi tāpuaki naʻe aʻusia ʻe he kakaí ʻi he taimi naʻa nau fakatomala ai mo ngāue ʻaki ʻa e tui kia Sīsū Kalaisí. Fakaʻilongaʻi ʻa e ngaahi tāpuaki ʻokú ke ongoʻi ʻoku fiemaʻu lahi taha ʻe he kakai ʻo e ʻaho ní.

Te ke lava ʻo kole ki he kau akó ke nau kau ki ha fanga kiʻi kulupu iiki pea aleaʻi ʻa e ngaahi tāpuaki naʻa nau ʻiló. Te nau lava foki ʻo ngāue fakataha ʻi he ngaahi ueʻi takitaha ʻi laló.

Fili ha tāpuaki ʻe taha ʻokú ke ongoʻi ʻoku mahuʻinga pea fakaʻaongaʻi ia ke fakamatalaʻi nounou ʻa e ʻuhinga te ke poupouʻi ai ha taha ke tui kia Sīsū Kalaisí.

Fili ha tāpuaki ʻe taha ʻokú ke ongoʻi kuó ke maʻu koeʻuhí ko hoʻo tui kia Sīsū Kalaisí. Fakamatalaʻi nounou ʻa e ʻuhinga ʻoku ʻuhingamālie ai ʻeni kiate koé.

Fakalaulauloto mei he meʻa kuó ke ako mo ongoʻi ʻi he ʻaho ní, ki ha meʻa te ke lava ʻo fai ke ke falala ai kia Sīsū Kalaisi mo maʻu ʻEne ngaahi tāpuakí. Fai ha tukupā pea fakakaukau ke fokotuʻu pe fakaleleiʻi ha taumuʻa ke tokoni atu ke ke tauhi ia.

Poupouʻi ʻa e kau akó ke ngāue ʻi he tui ʻo fakatatau ki he meʻa naʻa nau ako ʻi he ʻaho ní. Fakamoʻoni ki he tuʻunga malava mo e finangalo ʻo e ʻEikí ke tāpuakiʻi kinautolu ʻaki ʻEne māmá.

Fakamatala Fakamahinó mo e Puipuituʻá

Fēfē nai kapau ko e fakapoʻuli ʻoku ou ongoʻí ko ha fokoutua fakaʻatamai pe fakaeloto?

Naʻe akonaki ʻa Sisitā Leina I. ʻApeto ʻo e Kau Palesitenisī Lahi mālōlō ʻo e Fineʻofá ʻo pehē:

ʻE lava foki ke fakatupu ha ngaahi ʻao fakapoʻuli ʻi heʻetau moʻuí, ʻa ia te ne lava ʻo fakakuihi kitautolu mei he maama ʻa e ʻOtuá, pea aʻu ʻo ne fakatupunga haʻatau fehuʻia pe ʻoku kei ʻi ai nai e maama ko iá maʻatautolu pe ʻikai. ʻOku kau ʻi he ngaahi ʻao ko iá ʻa e ongoʻi loto-taʻotaʻomiá, loto-hohaʻá, mo e ngaahi fakafōtunga kehe ʻo e faingataʻaʻia fakaeʻatamaí mo fakaelotó. ʻE lava ke nau fakakeheʻi e anga ʻetau vakai kiate kitautolú, niʻihi kehé, pea naʻa mo e ʻOtuá foki. ʻOku nau uesia e kakai fefine mo e kakai tangata ʻo e toʻu kotoa pē ʻi he ngaahi tapa kotoa pē ʻo e māmaní. …

Kapau ʻoku ʻākilotoa maʻu pē koe ʻe ha “ʻao fakapoʻuli” [1 Nīfai 8:23], tafoki ki he Tamai Hēvaní. He ʻikai lava ʻe ha meʻa kuó ke aʻusia ʻo liliu e foʻi moʻoni taʻengata ko ia ko ʻEne fānau koe pea ʻokú Ne ʻofa ʻiate koé. Manatuʻi ko Kalaisi ho Fakamoʻuí mo e Huhuʻí, pea ko e ʻOtuá ʻa hoʻo Tamaí. ʻOku mahino kiate Kinaua. Fakakaukau ʻokú Na ofi atu kiate koe, ʻo fanongo mo ʻoatu ha tokoni. (Reyna I. Aburto, “Lolotonga e Ngaahi Faingataʻá, ʻEiki Ta Feʻao Pē!,” Liahona, Nōvema 2019, 57, 58)

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOua ʻaupito naʻá ke tālafili [ki he ʻofa ʻa e ʻOtuá maʻaú], pea ʻoua ʻaupito naʻá ke fakafefeka ho lotó. Tulifua faivelenga ki he ngaahi founga fakalotu ʻoku nau ʻomi ʻa e Laumālie ʻo e ʻEikí ki hoʻo moʻuí. Kumi faleʻi mei he niʻihi ʻoku nau maʻu ʻa e ngaahi kī ki hoʻo lelei fakalaumālié. Kole peá ke mataʻikoloaʻaki ʻa e ngaahi tāpuaki ʻo e lakanga fakataulaʻeikí. Maʻu fakauike ʻa e sākalamēnití peá ke pikitai ki he ngaahi talaʻofa haohaoa ʻo e Fakalelei ʻa Sīsū Kalaisí. Tui ki he ngaahi maná. Kuo lahi ha ngaahi mana kuó u mātā neongo hono talamai he ʻikai toe felave ha meʻá. He ʻikai ʻaupito teitei mole ʻa e ʻamanaki leleí ia. Kapau he ʻikai hoko mai leva mo kakato e ngaahi mana ko iá pe hangehangē ka ʻikai pē ke hoko maí, manatuʻi ʻa e sīpinga ne tā ʻe he Fakamoʻuí Heʻene mamahí: kapau he ʻikai fakalaka ʻa e ipu mahí meiate koe, inu ia peá ke toʻa, ʻo falala ʻoku ʻi ai ha ngaahi ʻaho fakafiefia ʻoku toka mei muʻa. (Jeffrey R. Holland, “Hangē ha Ipu Kuo Maumaú,” Liahona, Nōvema 2013, 40–41)

Ngaahi ʻEkitivitī Fakalahi ki he Akó

Ngaahi sīpinga ʻi he folofolá ʻo e maama mo e maluʻi ʻa e ʻEikí

Hili hoʻo laukonga kau kia Nīfai mo Līhai ʻi hono takatakaiʻi kinaua ʻe he afí mo ʻiloʻi “ko e ʻOtuá [iá]” (Hilamani 5:26), fakakaukau ke fakaʻaongaʻi ha ngaahi sīpinga kehe mei he folofolá ʻo e maama mo e maluʻi ʻa e ʻEikí. Fakaafeʻi ʻa e kau akó ke ʻai ha lisi ʻo ha ngaahi sīpinga fakafolofola ʻoku faitatau mo e Hilamani 5. ʻE lava ke ke fakaʻaliʻali ha ngaahi ʻīmisi pe ngaahi fakamoʻoni fakafolofola, pea fakaafeʻi ʻa e kau akó ke fakaʻaongaʻi ha faʻahinga founga ako folofola pē. ʻOku kau ʻi he ngaahi sīpinga ʻe lava ke aleaʻi mo fakafehoanaki ʻe he kau akó ʻa e ngaahi meʻá ni:

• Ko e pou afi ʻi he vahaʻa ʻo e fānau ʻo ʻIsilelí mo e kau tau ʻa Feló ʻi he Tahi Kulokulá (vakai, ʻEkesōtosi 14:24)

• Ko Setaleki, Mēsake, mo ʻApitenikō ʻi he afi kakahá (vakai, Taniela 3:25–27)

• Naʻe maluʻi ʻa ʻApinetai ke fakahoko ʻene pōpoaki ki he Tuʻi ko Noá (vakai, Mōsaia 13:1–5)

• Ko e kau ākonga Nīfai ʻe toko tolú (vakai, 3 Nīfai 28:18–23)

Ko e maama maluʻi ʻo Sīsū Kalaisí

ʻE lava ke ke fakaafeʻi ʻa e kau akó ke nau lau ʻa e lea ʻa ʻEletā Heili ʻi he lēsoní pea tā ha fakatātā ʻo fakatefito ʻi he meʻa ʻoku nau akó. ʻE lava ke kamataʻi ʻe he ʻekitivitī ko ʻení ha fealēleaʻaki fekauʻaki mo e ngaahi founga ke fakaafeʻi ai ʻa e maama maluʻi ʻa e Fakamoʻuí ki heʻenau moʻuí. Lolotonga hono vahevahe ʻe he kau akó ha ngaahi fakakaukaú, ʻeke ha ngaahi fehuʻi vakaiʻi hangē ko e “Ko e hā ha founga kuó ke fakatokangaʻi ai ha maama lahi ange ʻi hoʻo moʻuí ʻo hangē ko ia ʻokú ke maʻú?”

Fakafehoanaki ʻa e Hilamani 5 mo e Siosefa Sāmita—Hisitōlia 1

ʻE ala ʻaonga ki he kau akó hono fakafehoanaki ha ngaahi konga ʻo e Hilamani 5 mo e ngaahi konga ʻo e meʻa naʻe aʻusia ʻe Siosefa Sāmita ʻi heʻene kei taʻu hongofulu tupú ʻi heʻene fekumi ki he moʻoní. Fakafehoanaki ʻa e ʻao fakapoʻuli naʻe aʻusia ʻe he kakai ʻi he fale fakapōpulá ki he “fakapoʻuli mo e puputuʻu” naʻe aʻusia ʻe Siosefa Sāmita mo e niʻihi kehe ʻi hono kuongá (Siosefa Sāmita—Hisitōlia 1:13). Fakakaukau ke fakafehoanaki ʻa e Hilamani 5:28 mo e Siosefa Sāmita—Hisitōlia 1:15. Tokoniʻi leva ʻa e kau akó ke nau ʻiloʻi ʻa e founga ʻi he ongo sīpingá fakatouʻosi, naʻe ikunaʻi ai ʻe he kakaí ʻa e fakapoʻulí ʻaki ʻenau ui ki he ʻOtuá (vakai, Hilamani 5:42; Siosefa Sāmita–Hisitōlia 1:16).