Hilamani 13–16

Vakai Fakalūkufuá

Naʻe angatuʻu ha kau Nīfai tokolahi ki he ʻOtuá mo ʻEne ngaahi fekaú, ko ia naʻe fekauʻi mai ʻe he ʻOtuá ʻa Samuela ko e tangata Leimaná kiate kinautolu mo ha pōpoaki ke fakatomala. Naʻe fokotuʻu ʻe Samuela ʻene moʻuí ʻi ha tūkunga fakatuʻutāmaki ke akoʻi kiate kinautolu ko e fakatomalá ko ha meʻaʻofa ia meia Sīsū Kalaisi ʻoku fakaiku ki he fiefiá mo e fakamoʻuí. Naʻá ne fakamatala ki ha ngaahi fakaʻilonga te ne fakahā ʻa e ʻaloʻi mo e pekia ʻa Sīsū Kalaisí, ko ha konga ʻo ʻene ngaahi kikité.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Hilamani 13–16

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e fatongia ʻo e kau palōfitá mo e founga ʻoku nau tokoniʻi ai kitautolú.

• Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ʻa e founga ʻoku nau ʻiloʻi ai naʻe ʻi he kau palōfita ʻo e kuonga muʻá ʻa e ʻEikí pea ʻoku ʻi he taimí ni mo ʻEne kau palōfita ʻo onopōní.

• Meʻa ke fakaʻaliʻalí: Ko e saati ʻi he kamataʻanga ʻo e lēsoní; ngaahi ʻīmisi ʻo Samuela ko e tangata Leimaná, Noa, Mōsese, Pita mo Siosefa Sāmita

• Naunau maʻá e kau akó: Ko ha ngaahi tatau ʻo e makasini Liahona ʻo e konifelenisi lahi fakamuimui tahá

• Fokotuʻu ki hono akoʻi ʻi he konifelenisi vitioó: ʻI hono toe vakaiʻi ʻe he kau akó ʻa e ngaahi sīpinga ʻo e founga naʻe ʻafio ai ʻa e ʻOtuá mo Noa, Mōsese, Pita, mo Siosefa Sāmitá, fakakaukau ke vahevahe ʻa e kalasí ki ha loki fakataha ʻe fā. ʻE lava ke vahe ʻa e loki takitaha ke nau ako mo teuteu ke vahevahe fekauʻaki mo ha taha ʻo e kau palōfita ko ʻení ʻi he taimi ʻe toe fakataha mai ai ʻa e ngaahi kulupú.

Hilamani 13, Konga 1

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e natula ʻaloʻofa mo faʻa fakamolemole ʻo e ʻEikí.

• Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ʻa e ongo naʻa nau maʻu hili ʻenau aʻusia ʻa e natula ʻaloʻofa mo faʻa fakamolemole ʻo e ʻEikí ʻi heʻenau moʻuí. Fakamanatu ange ke ʻoua naʻa nau vahevahe ha meʻa ʻoku fuʻu fakataautaha.

• Ngaahi Vitioó: “Fakatomalá mo e Uluí” (14:35; mamata mei he taimi 0:00 ki he 0:50 pea mei he 0:50 ki he 1:27); “Vali ki ha Tulikí” (3:41)

• Meʻa ke fakaʻaliʻalí: Ko e fakahinohino ki he ʻekitivitī A, E, mo e F

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ʻa e ongo faifekau taimi kakato ʻoku ngāue ʻi homou feituʻú ke na omi ki he kalasí ʻo vahevahe ha talanoa fekauʻaki mo ha taha kuó na akoʻi ʻi heʻena ngāue fakafaifekaú ʻa ia naʻá ne aʻusia ʻa e ʻaloʻofa mo e ʻofa ʻa Sīsū Kalaisí ʻo fakafou ʻi he fakatomalá. Fakapapauʻi ke maʻu ha ngofua mei hoʻo kouʻōtineitá pe pule ʻo e polokalamá mo e kau taki lakanga fakataulaʻeiki fakalotofonuá kimuʻa pea toki fakahoko ʻa e fakaafé.

Hilamani 13, Konga 2

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke ikunaʻi ʻe he kau akó ha faʻahinga fakafeʻātungia pē ke fakatomalá.

• Teuteu ʻa e tokotaha akó: Fakaafeʻi ʻa e kau akó ke fakalaulauloto pe ko e foʻi lea ʻe fiha mei he ngaahi lea ko ʻení te nau fakaʻaongaʻi ke fakamatalaʻi ʻaki ʻa e fakatomalá mo e ʻuhingá: tauteá, ʻamanaki leleí, tāpuakí, liliú, fakalakalaká, mamahí.

• Laʻiʻata ke fakaʻaliʻalí: Ko ha anovai ʻi he tafaʻaki moʻungá

• Naunau maʻá e kau akó: Ko ha tatau ʻo e fakamatala palakalafi-tolu ʻa Palesiteni Lāsolo M. Nalesoni maʻá e tokotaha ako takitaha

• Fokotuʻu ki hono akoʻi ʻi he konifelenisi vitioó: Fakaʻaliʻali ʻa e ngaahi fakamatala ʻa Palesiteni Nalesoní mei he lēsoní ʻi he screen. Fakaʻatā ke fakaʻaongaʻi ʻe he kau akó ʻa e polokalama tā fakatātaá ke fakaʻilongaʻi ʻaki ʻa e ngaahi kupuʻi lea ʻoku nau pehē ʻe lava ʻo tokoni ke tau ikunaʻi ai ʻa e ngaahi fakafeʻātungia ke fakatomalá. Fakaafeʻi ʻa e kau akó ke vahevahe ʻa e ʻuhinga naʻa nau fakaʻilongaʻi ai ʻa e meʻa ne nau fakahokó.

Hilamani 14

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke fakamālohia ʻenau tui kia Sīsū Kalaisí ʻi he mahino kiate kinautolu ʻa e ngaahi fakaʻilonga kuo foaki mai ʻe he ʻOtuá kiate kitautolú.

• Teuteu ʻa e tokotaha akó: Fakaafeʻi ʻa e kau akó ke teuteu ke vahevahe ʻa e founga ʻe lava ke fakafehoanaki ai ʻa e māmá kia Sīsū Kalaisí. Te nau lava ʻo fakakaukau ki ha ngaahi kasa, ngaahi foʻi ʻuhila, pe maama fakanatula hangē ko e laʻaá mo e ngaahi fetuʻú.

• Meʻa ke fakaʻaliʻalí: Ko ha fanongonongo ki ha meʻa naʻe hoko ʻi hoʻo moʻuí naʻá ke tomuʻa tufotufa ki he niʻihi ʻokú ke ʻofa aí; ko ha sivi fakatauhoa

• Naunau maʻá e kau akó: Pepa, kala, peni fakaʻilonga, mo ha ngaahi naunau kehe ki hono faʻu ʻo ha fanongonongó

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ʻa e kau akó ke faʻu ha ngaahi fanongonongo fakaʻilekitulōnika ki he ʻaloʻi pe pekia ʻa e Fakamoʻuí. Tuku leva ke vahevahe ʻe he kau akó ʻenau screen ʻi heʻenau fakamatalaʻi ʻa e ngaahi fanongonongo naʻa nau faʻú. Pe ko hono faʻu ʻe he kau akó ha ngaahi fanongonongo ʻo fakaʻaongaʻi ʻa e pepá, peni fakaʻilongá, pe kalá pea fakaʻaliʻali pē kinautolu ʻi he meʻafaitaá.

Toe Vakaiʻi ʻo e Fakataukei Fakatokāteliné Hono 18

Taumuʻa ʻo e lēsoní: ʻE ʻoange ʻe he lēsoni ko ʻení ha faingamālie ki he kau akó ke fakaloloto ʻa e mahino ʻoku nau maʻú ki he ngaahi moʻoni ʻoku akoʻi ʻi ha ngaahi potufolofola fakataukei fakatokāteline kehekehe ʻo e Tohi ʻa Molomoná.

• Teuteu ʻa e tokotaha akó: Fakaafeʻi ʻa e kau akó ke fili ʻi he faʻa lotu ha potufolofola fakataukei fakatokāteline ʻo e Tohi ʻa Molomoná ʻe lava ke ne faitāpuekina ʻenau moʻuí ʻi heʻenau ako iá.

• Naunau maʻá e kau akó: Laʻipepa maʻá e fakafoʻituituí mo e ngaahi kulupú

• Meʻa ke fakaʻaliʻalí: “Fakataukei Fakatokāteline ki he Tohi ʻa Molomoná: ʻAlamā–Molonai”; ko ha fakatātā ʻo Sīsū Kalaisi

• Fokotuʻu ki hono akoʻi ʻi he konifelenisi vitioó: Fakaafeʻi ʻa e kau akó ʻi he kamataʻanga ʻo e lēsoní ke hiki ha ngaahi sētesi fekauʻaki mo kinautolu pē. Kapau ʻe lava, fakaafeʻi ʻa e kau akó ke ʻoatu fakahangatonu pē ʻenau ngaahi talí kiate koe ʻo fakaʻaongaʻi ʻa e polokalama fetalanoaʻaki fakatāutahá. ʻE lava heni ke mateʻi ʻe he kau akó pe ko hai naʻá ne hiki ʻa e ngaahi talí ʻi he taimi te ke lau ai kinautolu ki he kalasí.