Hilamani 14

Ngaahi Fakaʻilonga ʻo e Fakamoʻuí

ʻOku fekauʻi mai ʻe he Tamai Hēvaní ʻa e kau palōfitá ke tokoniʻi ʻEne fānaú ke tui ki Hono ʻAlo ʻOfaʻangá, ʻo hangē ko e taimi naʻá Ne fakahinohinoʻi ai ʻa Samuela ko e tangata Leimaná ke kikite ki he kau Nīfaí. Naʻe fakamatala ʻa Samuela ki ha ngaahi fakaʻilonga te ne fakahā ʻa e ʻaloʻi mo e pekia ʻa Sīsū Kalaisí, ko ha konga ʻo ʻene ngaahi fakahaá. ʻE lava ke tokoniʻi koe ʻe he lēsoni ko ʻení ke fakamālohia hoʻo tui kia Sīsū Kalaisí ʻi he mahino kiate koe ʻa e ngaahi fakaʻilonga kuo foaki mai ʻe he ʻOtuá kiate kitautolú.

Poupouʻi ʻa e tokotaha ako takitaha ke tānaki ki he aʻusia fakaakó. Fokotuʻu ha ngaahi founga kehekehe ke kau atu ai ʻa e kau akó ki he kalasí. ʻE lava ke kau heni ʻa e tā fakatātaá, tohi ʻi he palakipoé, fakamatalaʻi ʻa e meʻa ʻoku mahino kiate kinautolú, pe fakamoʻoní. Fakaʻilongaʻi ʻa e ngaahi ngāue ʻa e kau akó pea fakalotolahiʻi ʻa e tokotaha kotoa ke poupouʻi ʻa e ngaahi tānaki ʻa honau kaungā-akó.

Teuteu ʻa e tokotaha akó: Fakaafeʻi ʻa e kau akó ke teuteu ke vahevahe ʻa e founga ʻe lava ke fakafehoanaki ai ʻa e māmá kia Sīsū Kalaisí. ʻE lava ke nau fakakaukau ki ha ngaahi meʻahulu ʻi ha ngaahi feituʻu fakapoʻulí, ngaahi foʻi ʻuhila maama ʻi ha fale, pe maama fakanatula hangē ko e laʻaá mo e ngaahi fetuʻú.

Ngaahi ʻEkitivitī Ako ʻOku Ala Fakahokó

Ngaahi Fanongonongó

Fakakaukau ki ha ngaahi meʻa ʻi hoʻo moʻuí ʻoku mātuʻaki mahuʻinga ʻa ia te ke tomuʻa fakahaaʻi kinautolu ki ho ngaahi kaungāmeʻá mo e fāmilí. ʻI ha ngaahi anga fakafonua lahi, ʻoku faʻu mo tufaki ʻa e ngaahi fanongonongo fakaʻosi akó, malí, ngaahi ʻaho fāʻeleʻi mahuʻingá, mo ha ngaahi meʻa kehe pē ʻi ha ngaahi uike pe ngaahi māhina kimuʻa.

Fakakaukau ke fakaʻaliʻali ki he kau akó ha ngaahi sīpinga ʻo ha ngaahi fanongonongo pe talanoa kiate kinautolu ha meʻa naʻe hoko ʻi hoʻo moʻuí naʻe tomuʻa fanongonongo kimuʻa ki he niʻihi ʻokú ke ʻofa aí.

• Ko e hā ha ngaahi ʻuhinga ʻe tufa ai ʻe he kakaí ʻa e ngaahi fanongonongo ko ʻení kimuʻa ʻi he ʻaho ʻo e polokalamá?

• Ko e hā ha ngaahi meʻa kuo fili ʻe he Tamai Hēvaní ke tomuʻa fakahā ʻo fakafou mai ʻi Heʻene kau palōfitá? ʻOkú ke pehē ko e hā ʻoku mātuʻaki mahuʻinga ai ke fakahā ʻa e ngaahi meʻa ko iá?

Naʻe fakahā ʻe he ʻOtuá ki he kau Nīfaí ʻo fakafou ʻi he ngaahi kikite ʻa Samuela ko e tangata Leimaná, ha ngaahi meʻa mahuʻinga ʻe hoko ʻi he kahaʻú mo ha ngaahi fakaʻilonga ʻe hoko fakataha mo e ngaahi meʻa ko iá.

Lau ʻa e Hilamani 14:12, ʻo kumi ʻa e ngaahi ʻuhinga naʻe fekau ai ʻe he ʻOtuá ʻa Samuela ke ne kikiteʻi ʻa e ngaahi fakaʻilonga ko ʻení.

Tokoni ke ʻiloʻi ʻe he kau akó ha tefitoʻi moʻoni ʻaki hono fakaafeʻi kinautolu ke fakamatalaʻi fakanounou ʻa e meʻa naʻa nau ako mei he veesi ko ʻení. ʻE lava ke fakaʻaongaʻi ʻe he kau akó ha ngaahi lea kehekehe, ka ʻe lava ke faitatau ʻa e moʻoni te nau ʻiló mo ʻeni.

Ko e moʻoni ʻe taha ʻe lava ke tau akó, ʻe lava ʻe heʻetau ʻiloʻi ʻa e ngaahi fakaʻilonga kuo ʻomi ʻe he ʻOtuá ʻo fakapapauʻi ʻetau tui kia Sīsū Kalaisí.

ʻOkú ke pehē naʻe mei liliu fēfē nai koe ʻe haʻo mamata ki he ngaahi fakaʻilonga naʻe pehē ʻe Samuela te ne fakahā ʻa e ʻaloʻi mo e pekia ʻa Sīsū Kalaisí? Fakalaulauloto ki he ngaahi fakaʻilonga pe ngaahi aʻusia kuo foaki atu ʻe he ʻOtuá ke fakapapauʻi ʻaki hoʻo tui ki he Fakamoʻuí. ʻE lava ke kau heni ʻa e ngaahi fakaʻilonga ʻe hoko kimuʻa ʻi he Hāʻele ʻAnga Ua Mai ʻa e Fakamoʻuí.

Ngaahi fakaʻilonga ʻo e ʻaloʻi mo e pekia ʻa e Fakamoʻuí

Kapau te ke fakaʻaongaʻi ʻa e ʻekitivitī ko ʻení, ʻoange ki he kau akó ha taimi pau koeʻuhí ke ʻi ai ha taimi ki he toenga ʻo e ngaahi meʻa ʻoku fiemaʻu ʻe hoʻo kau akó. ʻE lava ke ngāue ʻa e kau akó ʻi ha fanga kiʻi kulupu iiki, pea te ke lava ʻo vahe ki ha ngaahi kulupu kehekehe ke ako ʻa e ʻaloʻi ʻo Kalaisí pe ko ʻEne pekiá. Fakamanatu ki he kau akó ke fakaʻapaʻapaʻi Hono ʻaloʻí mo e pekiá ʻi heʻenau faʻu ʻenau ngaahi fanongonongó.

Ko ha founga ʻe taha ko hono faʻu ʻe he ngaahi kulupú kotoa ha ngaahi fanongonongo fekauʻaki mo e ʻaloʻi ʻo Kalaisí pea aleaʻi ʻi heʻenau kulupú ʻa e founga ʻoku fakamoʻoni ai ʻa e ngaahi fakaʻilonga ko iá kiate Iá. Hili iá, ʻe lava ke ako fakakalasi ʻe he kau akó ʻa e ngaahi fakaʻilonga ʻo e pekia ʻa Kalaisí pea aleaʻi e founga ʻoku fakamoʻoni ai ʻa e ngaahi fakaʻilonga ko iá kiate Iá.

ʻOange ha ngaahi naunau hangē ko ha kala mo ha pepa ʻo ka fiemaʻu. ʻE lava ke fakaʻaongaʻi ʻe he kau akó ha ngaahi meʻangāue fakaʻilekitulōnika, kapau ʻoku maʻu, kae ʻikai ko ha pepa.

ʻI hono fakaʻaongaʻi ʻo e ngaahi kikite ko ʻení, faʻu ha ngaahi fanongonongo maʻá e kau Nīfai ʻi he kuonga ʻo Samuelá ʻo e ʻaloʻi mo e pekia ʻa e Fakamoʻuí. Feinga ke maʻu ʻa e fiefiá ʻi he ʻaloʻi ʻo e Fakamoʻuí pea mo e mafatukituki ʻo ʻEne pekiá. Fakakau foki mo e ʻuhinga ʻoku totonu ke teuteu ai ʻa e kakaí ki he ngaahi meʻa ʻe hoko mai ko ʻení.

• Ngaahi fakaʻilonga ʻo Hono ʻaloʻí: Hilamani 14:2–8

• Ngaahi fakaʻilonga ʻo ʻEne pekiá: Hilamani 14:14–15, 20–27

Fakaafeʻi ʻa e kulupu takitaha ke fakamatalaʻi ʻenau fanongonongó ki ha kulupu ʻe taha. Kapau naʻe fakatefito ha ngaahi kulupu kehekehe ʻi ha ngaahi fakaʻilonga kehekehe, fakaafeʻi kinautolu ke fakamatalaʻi ia ki ha kulupu naʻa nau ako ha fakaʻilonga kehe.

Fakaafeʻi leva ha fealēleaʻaki fakakalasi fekauʻaki mo e Fakamoʻuí ʻaki hano fai ha ngaahi fehuʻi hangē ko ʻení.

• ʻOkú ke pehē ko e hā naʻe fakahaaʻi ai ʻe he ngaahi fakaʻilonga naʻe kau ai ʻa e māmá mo e fakapoʻulí ʻa e ʻaloʻi mo e pekia ʻa e Fakamoʻuí?

• Naʻe fakapapauʻi fēfē nai ʻe he mamata ki he ngaahi fakaʻilonga ko ʻení ʻa e tui ʻa e kau Nīfaí ki he Fakamoʻuí?

Kapau ʻe tokoni ki he kau akó, fakakaukau ke fakaafeʻi kinautolu ke kumi ha feituʻu ʻi he folofolá ʻoku fakafehoanaki ai ʻa e Fakamoʻuí ki he māmá—hangē ko ʻení, Sione 8:12. Fakakaukau ke fehuʻi ange, “Kuo hoko fēfē nai ʻa Sīsū Kalaisi ko ha maama kiate koe?”

Ngaahi Fakaʻilonga ʻo e Hāʻele ʻAnga Ua Maí

Hangē pē ko hono fakaʻaongaʻi ʻe he Tamai Hēvaní ha ngaahi fakaʻilonga ke teuteuʻi ʻa e kau Nīfai ʻo e kuonga muʻá ki he hāʻele mai Hono ʻAló, ʻokú Ne fakaʻaongaʻi ha ngaahi fakaʻilonga ʻi hotau kuongá ke tokoni ki heʻetau teuteu ki he Hāʻele ʻAnga Ua Mai Hono ʻAló.

ʻOku fakataumuʻa ʻa e konga ko ʻení ke tokoni ke mahino ki he kau akó ha niʻihi ʻo e ngaahi fakaʻilonga kimuʻa ʻi he Hāʻele ʻAnga Ua Maí. Ko e sivi fakatauhoa ʻi laló ko ha founga ia ʻe taha ke tokoni ki he kau akó ke fakahoko ʻeni. Te ke lava foki ʻo fakaʻaongaʻi ha ngaahi founga kehe, hangē ko hono fakaʻaliʻali ha lisi ʻo e ngaahi fakaʻilongá kae tali ʻe he kau akó ʻa e ngaahi fehuʻi ʻi he fakaʻosinga ʻo e lēsoní. Pe ko hoʻo kole ki he tokotaha ako takitaha ke fili ha potufolofola ʻe taha ke ne lau pea lipooti ki he kalasí ʻa e fakaʻilonga naʻá ne maʻú.

Ngaahi talí: 1-h, 2-e, 3-a, 4-f, 5-i

Ke tokoniʻi koe ke ke maheni ange pe manatuʻi ha niʻihi ʻo e ngaahi fakaʻilonga kimuʻa ʻi he Hāʻele ʻAnga Ua Maí, lau ʻa e ngaahi potufolofola ko ʻení pea fakahoa kinautolu ki he fakamatala ʻo e fakaʻilongá. Kapau ʻokú ke fie ako ha ngaahi fakaʻilonga lahi ange, vakai, “Fakaʻilonga ʻo e Ngaahi Kuongá, Ngaahi” ʻi he Fakahinohino ki he Ngaahi Folofolá (scriptures.ChurchofJesusChrist.org).

1 Nīfai 14:14	ʻE tākiekina ʻa e kakai mei he ngaahi puleʻanga kotoa pē ki he temipale ʻo e ʻOtuá
2 Nīfai 3:6, 11, 15	ʻE ʻomi ʻe ha hako ʻo Siosefa ʻo ʻIsipité (Siosefa Sāmita) ʻa e folofola ʻa e ʻOtuá (ko e Tohi ʻa Molomoná)
ʻĪsaia 2:2–3	ʻE malanga ʻaki ʻa e ongoongoleleí ki he māmaní kotoa
Mātiu 24:14	ʻE ʻilo ʻa e kakai ʻo e ʻEikí ʻi he funga kotoa ʻo e māmaní pea ʻe tāpuekina kinautolu ʻaki ʻa e mālohi ʻo e ʻOtuá
2 Tīmote 3:1–7	ʻE siokita mo faiangahala ʻa e kakaí pea te nau tafoki mei he ʻOtuá

• Kuó ke vakai fēfē nai ki ha niʻihi ʻo e ngaahi fakaʻilonga ʻo e Hāʻele ʻAnga Ua Mai ʻa e Fakamoʻuí kuo fakahoko?

ʻE lava ke mahuʻinga ʻa e fehuʻi ko ʻení ke fakalaulauloto ki ai ʻa e kau akó. Kimuʻa pea nau talí, fakakaukau ke ʻoange ha taimi ke nau fakakaukau ai ki he founga kuo tokoniʻi ai ʻe he Siasi ʻo Sīsū Kalaisi kuo fakafoki maí, ngāue fakafaifekaú, ngaahi temipalé, Palōfita ko Siosefa Sāmitá, mo e Tohi ʻa Molomoná ʻa ʻenau tui ki he Fakamoʻuí.

• Kuo fakapapauʻi fēfē nai hoʻo tui ki he Fakamoʻuí ʻi he hoko ʻa e ngaahi fakaʻilonga ko ʻení?

• Fakatatau ki he Hilamani 14:13, 28–29, ko e hā ʻoku mātuʻaki mahuʻinga ai ke tau tui kia Kalaisí?

• Ko e hā ha ngaahi founga kuo hoko ai hoʻo tui kia Sīsū Kalaisí ko ha tāpuaki kiate koe?

Fakakaukau ke fakaafeʻi ʻa e kau akó ke lekooti ʻa e ngaahi fakakaukau ʻoku nau maʻu fekauʻaki mo e ngaahi meʻá ni ʻi heʻenau tohinoa akó.

ʻI hoʻo ako ʻa e 3 Nīfai 1–10 ʻi he ngaahi lēsoni ka hokó, te ke lau ai fekauʻaki mo hono fakahoko ʻo e ngaahi fakaʻilonga naʻe ʻomi ʻe Samuela ki he ʻaloʻi mo e pekia ʻa e Fakamoʻuí. Naʻe maʻu ʻe he kakai ʻi he kuonga ʻo Samuelá naʻa nau tui ki he ngaahi kikité mo teuteu ki he hāʻele mai ʻa Kalaisí ha aʻusia naʻe kehekehe ʻaupito ia meiate kinautolu naʻe ʻikai ke nau tui ki aí.

Tohi ʻi hoʻo tohinoa akó fekauʻaki mo hoʻo tui ki he Fakamoʻuí mo e ngaahi aʻusia naʻá ne tataki koe ki aí. ʻE lava foki ke ke fakakau ai ʻa e founga te ke lava ʻo fakamālohia ai ʻa e tui ko iá (hangē ko ʻení, ʻi he hokohoko atu hono ako ʻa e Tohi ʻa Molomoná pe ʻalu ki he temipalé).

Fakamatala Fakamahinó mo e Puipuituʻá

ʻOku fakafofongaʻi fēfē nai ʻe he māmá ʻa Sīsū Kalaisí?

Naʻe fakamatala ʻe Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻOku hoko ʻa Sīsū Kalaisi ko e maama ʻo e māmaní he ko e tupuʻanga Ia ʻo e maama ʻokú ne fakaake ʻetau mahinó, koeʻuhí he ʻoku fakamaama ʻe Heʻene ngaahi akonakí mo e faʻifaʻitakiʻangá ʻa hotau halá, pea koeʻuhí he ʻoku fakalotoa ʻe Hono mālohí ʻa kitautolu ke tau fai lelei. (Dallin H. Oaks, “The Light and Life of the World,” Ensign, Nov. 1987, 64)

Ko e hā ha ngaahi fakaʻilonga mei he ʻOtuá pea ko e hā ʻokú Ne foaki mai ai kinautolú?

“Ko e ngaahi fakaʻilongá ko ha ngaahi meʻa ia naʻe hoko pe ngaahi aʻusia ʻokú ne fakahaaʻi e mālohi ʻo e ʻOtuá. ʻOku nau faʻa fakaofo. ʻOku nau ʻomi mo fanongonongo ha ngaahi meʻa naʻe hoko, hangē ko e ʻaloʻi ʻo e Fakamoʻuí, pekiá, mo e Hāʻele ʻAnga Ua Maí. …

“ʻOku pehē ʻe ha kakai ʻe niʻihi te nau tui ki he ʻOtuá pe ko ʻEne ngāué kapau te nau maʻu ha fakaʻilonga. Ka ʻoku ʻikai maʻu ʻa e tuí ʻi he ngaahi fakaʻilongá; ʻoku fakafou mai ia ʻi he Laumālie Māʻoniʻoní ʻi hono ako ʻe he fakafoʻituituí ʻa e folofolá mo fekumi ʻi he faʻa lotu ke ʻilo e palani ʻa e ʻOtuá. … ʻOku foaki ʻa e ngaahi fakaʻilonga peheé kiate kinautolu ʻoku tui faivelenga mo talangofuá ke fakamālohia kinautolu ʻi heʻenau tuí pea mo tokoniʻi kinautolu ke fakahoko ʻa e finangalo ʻo e ʻOtuá” (Gospel Topics, “Signs,” topics.ChurchofJesusChrist.org). (Vakai foki, Tokāteline mo e Ngaahi Fuakava 63:7–10.)

ʻOku totonu ke liliu fēfē nai ʻetau moʻuí ʻe heʻetau ʻilo ki he Hāʻele ʻAnga Ua Mai ʻa Sīsū Kalaisí?

Naʻe akoʻi ʻe Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻE fēfē nai kapau ko e ʻaho te Ne hāʻele mai aí ko ʻapongipongi? Kapau naʻa tau ʻilo te tau feʻiloaki mo e ʻEikí ʻapongipongi—ʻi haʻatau mate fakafokifā pe ko ʻEne hāʻele fakatuʻupakē maí—ko e hā te tau fakahoko he ʻaho ní? Ko e hā ha ngaahi vetehia te tau fakahoko? Ko e hā ha ngaahi angafai te tau taʻofi? Ko e hā ha ngaahi moʻua te tau totongi? Ko e hā ha ngaahi fakamolemole te tau fakahoko? Ko e hā ha ngaahi fakamoʻoni te tau fai?

Kapau te tau fai ʻa e ngaahi meʻa ko ʻení ʻi he taimi ko iá, ko e hā ʻoku ʻikai ke tau fai ai ia ʻi he taimi ní? Ko e hā ʻoku ʻikai ke tau fekumi ai ki he melinó ʻi he kei lava ʻo maʻu ʻa e melinó? (Dallin H. Oaks, “Preparation for the Second Coming,” Liahona, May 2004, 9)

Ngaahi ʻEkitivitī Fakalahi ki he Akó

Ko hono fakahoko ʻo e ngaahi kikite ʻa Samuelá

Kapau ʻe tokoni ki he kau akó ke fakaʻilongaʻi hono fakahoko ʻo e ngaahi kikite ʻa Samuelá, fakaafeʻi kinautolu ke fakafekauʻaki pe fakafehokotaki ʻa e 3 Nīfai 1:15–21 ki he Hilamani 14:2–7 mo e 3 Nīfai 8:17–23 ki he Hilamani 14:20–27.

Ko Sīsū Kalaisi ʻa e Maama ʻo e Māmaní

Hili hono ako ʻa e ngaahi fakaʻilonga ʻo e ʻaloʻi mo e pekia ʻa Sīsuú, fakakaukau ke tamateʻi ʻa e ngaahi maama ʻi he lokí. Kole ki he kau akó ke nau aleaʻi ʻa e founga ʻe lava ke fakafofongaʻi ai ʻe he fakapoʻulí ʻa e moʻui taʻe-kau ai ʻa e Fakamoʻuí. Hili iá pea toe fakamoʻui ʻa e māmá pea fehuʻi ki he kau akó pe ʻoku anga fēfē nai ʻa e hangē ʻa e Fakamoʻuí ko ha maama kiate kitautolú.

Te ke lava foki ʻo huluʻi ʻa e foʻi vitiō “Sio ki he Māmá” (4:28) ke vakai ki ha ngaahi sīpinga ʻo ha niʻihi fakafoʻituitui naʻa nau ʻi ha fakapoʻuli fakalaumālie kae ʻoua kuo nau maʻu ʻa e maama ʻoku foaki ʻe Kalaisí.

Hilamani 14:13–19. Naʻe ikunaʻi ʻe Sīsū Kalaisi ʻa e mate fakatuʻasinó mo e fakalaumālié

Tokoni ke mahino ki he kau akó ʻe lava ke fakaʻuhingaʻi ʻa e foʻi lea maté ko e “mavahe.”

Ko e mate fakaesinó ko e mavahe ia ʻa e laumālié mei he sino fakamatelié. Ko e mate fakalaumālié ko e mavahe ia hotau laumālié mei he ʻOtuá mo e ngaahi meʻa ʻoku kau ki he māʻoniʻoní (vakai, ʻAlamā 12:16, 32).

Fakakaukau ke fakaʻaliʻali ʻa e fakatātā ko ʻení pea fakaafeʻi ʻa e kau akó ke nau ako e ngaahi kongá ʻi hono fakahokohoko fakamataʻifiká.

ʻI he ʻosi e ako ʻa e kau akó, fakaafeʻi ha niʻihi ʻe loto fiemālie ke fakamatalaʻi ki he kalasí ʻa e founga naʻe fakahaofi ai kitautolu ʻe Sīsū Kalaisi mei he mate fakatuʻasinó pea mei he ʻuluaki mate fakalaumālié. Fakaafeʻi leva kinautolu ke fakamatalaʻi ʻa e founga naʻá Ne fakafaingamālieʻi ai hono fakahaofi kitautolu mei he mate fakalaumālie hono uá.