3 Nīfai 8–11

Vakai Fakalūkufuá

Naʻe fakaʻilongaʻi ʻe he fakaʻauha mo e fakapoʻuli lahi ʻi he ongo ʻAmeliká, ʻa hono Tutuki ʻo e Fakamoʻuí. Naʻe folofola ʻa Sīsū Kalaisi ki he kakaí ʻi ha taimi lolotonga e ʻaho ʻe tolu ʻo e fakapoʻuli matolú. “Naʻá ne hāʻele hifo ʻo tuʻu ʻi honau haʻohaʻongá” (3 Nīfai 11:8). Naʻá Ne akoʻi kiate kinautolu Hono misioná mo e meʻa kotoa pē kuó Ne fai maʻanautolú. Naʻá Ne fakaafeʻi ʻa e kakaí ke nau fakamoʻoni fakataautaha naʻe fakapoongi ia maʻá e ngaahi angahala ʻo e māmaní. Ne nau fakafeʻiloaki tahataha kiate Ia ʻo ala ki he matakafo ʻi Hono vakavaká mo e matakafo ʻo e faʻó ʻi Hono nimá mo e toʻukupu kelekelé. Naʻá Ne fakahā leva ʻEne tokāteliné kiate kinautolu.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

3 Nīfai 8–10

Taumuʻa ʻo e lēsoní: ʻE ʻomi ʻe he lēsoni ko ʻení ha ngaahi ʻulungaanga ʻo Sīsū Kalaisí ʻe lava ʻo tokoni ke ongoʻi ʻe he kau akó ha ʻofa mo ha falala lahi ange kiate Ia.

• Teuteu ʻa e tokotaha akó: Fakaafeʻi e kau akó ke lau ʻa e 3 Nīfai 8, ʻo fakakaukauloto pe naʻe mei fēfē kapau naʻa nau ʻi ai lolotonga e ngaahi meʻa ko ʻeni naʻe hokó.

• Vitioó: “Ko e Hā ʻa Sīsū Kalaisi ʻi he Ongo ʻAmelika he Kuonga Muʻá” (16:43; mamata mei he taimi 0:35 ki he 3:19)

• Fokotuʻu ki hono akoʻi ʻi he konifelenisi vitioó: ʻE kamata ʻe he kau akó ʻi he lēsoni ko ʻení ha lisi ʻo e ngaahi meʻa ʻoku nau ako fekauʻaki mo Sīsū Kalaisí. ʻE tupulaki ʻa e lisi ko ʻení ʻi he hokohoko atu ʻenau ako ki Heʻene ngāue fakafaifekau ʻi he ongo ʻAmeliká ʻi he kuonga muʻá. Fakakaukau ke faʻu ha lisi ʻa e kalasí fakalūkufua ʻe lava ke fakaʻaongaʻi ʻi he ngaahi lēsoni ka hokó. ʻE lava ke hoko ʻeni ko ha lisi fakaʻilekitulōnika pe fealēleaʻaki ʻe lava ke hū mo tānaki atu ki ai ʻa e kau akó.

3 Nīfai 11:1–11

Taumuʻa ʻo e lēsoní: ʻE lava ke tokoni ʻa e lēsoni ko ʻení ke fakatupulaki e ʻofa mo e houngaʻia ʻa e kau akó kia Sīsū Kalaisí koeʻuhí ko Ia mo e meʻa naʻá Ne fai maʻanautolú.

• Teuteu ʻa e tokotaha akó: Fakaafeʻi e kau akó ke kumi ha potufolofola pe fakamatala mei ha taki ʻo e Siasí ʻoku tokoni ke mahino lahi ange kiate kinautolu ʻa e meʻa kuo fai ʻe Sīsū Kalaisi maʻanautolú.

• Vitioó: “Ko e Hā ʻa Sīsū Kalaisi ʻi he Ongo ʻAmelika he Kuonga Muʻá” (16:43; mamata mei he taimi 11:19 ki he 13:29)

• Meʻa ke fakaʻaliʻalí: Ngaahi potufolofola ke ako ʻe he kau akó ʻi he fakaʻosinga ʻo e lēsoní

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama palakipoé ke lisi ʻa e meʻa naʻe ako ʻe he kau akó fekauʻaki mo Sīsū Kalaisi ʻi heʻenau ako ʻa e 3 Nīfai 11:1–11. ʻE lava ke tokoni ʻeni ki he kau akó ke tānaki atu ki he lisi naʻe fakaafeʻi kinautolu ke kamataʻi ʻi he lēsoni kimuʻá.

Fakataukei Fakatokāteliné: 3 Nīfai 11:10–11

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea folofola mahuʻinga ki he 3 Nīfai 11:10–11, fakamatalaʻi ʻa e tokāteline naʻe akoʻi ʻi he potufolofola ko ʻení, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke kole ki ha mēmipa ʻo e fāmilí pe taki ʻo e Siasí ke fakamatalaʻi ʻa e ʻuhinga naʻa nau fili ai ke muimui ʻia Sīsū Kalaisí.

• ʻĪmisí: Ko e hā ʻa Sīsū Kalaisi ʻi he temipalé

• Meʻa ke fakaʻaliʻalí: Saati fekauʻaki mo e muimui ki he niʻihi kehé pe muimui kia Sīsū Kalaisí

• Fokotuʻu ki hono akoʻi ʻi he konifelenisi vitioó: Makehe mei hono vahevahe ha ngaahi ʻuhinga mei he sātí ke tokoni kia Sesikā ke fili ke muimui kia Sīsū Kalaisí, ʻe lava ke kole ki he kau akó ke fakaʻaongaʻi honau ʻātakaí. Fakakaukau ke fakaafeʻi kinautolu ke fakaʻaliʻali ha meʻa ʻi honau ʻapí ʻoku tokoni ke nau manatu ki heʻenau tukupā ke muimui kia Sīsū Kalaisí pea mo e ngaahi tāpuaki ʻoku nau maʻu ʻi hono fai iá.

3 Nīfai 11:12–17

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke maʻu pe fakamālohia ʻenau fakamoʻoni ko Sīsū Kalaisi honau Fakamoʻui fakatāutahá.

• Teuteu ʻa e tokotaha akó: Fakaafeʻi e kau akó ke lau ʻa e 3 Nīfai 11:12–17 pea fakakaukauloto pe naʻa nau mei ongoʻi fēfē ʻi haʻanau fengāueʻaki fakataautaha mo Sīsū Kalaisi.

• Vitioó: “Ngaahi Fili ki he Taʻengatá” (31:24; mamata mei he taimi 26:05 ki he 26:28); “Ko e Hā ʻa Sīsū Kalaisi ʻi he Ongo ʻAmelika he Kuonga Muʻá” (16:43; mamata mei he taimi 13:29 ki he 16:03)

• Fokotuʻu ki hono akoʻi ʻi he konifelenisi vitioó: Lolotonga e lēsoní, fakakaukau ke fakaafeʻi ʻa e kau akó ke fakakaukauloto ki he ngaahi meʻa naʻe hoko ʻoku lekooti ʻi he 3 Nīfai 11:12–15. Poupouʻi kinautolu ke tamateʻi ʻenau maiká pea tāmateʻi ʻenau meʻafaitaá ke nau lava ʻo kau lelei ki he ʻekitivitií mo ongoʻi fiemālie ange. Hili ha taimi pau, fakaafeʻi kinautolu ke toe fakamoʻui ʻenau maiká mo e meʻafaitaá pea vahevahe ʻenau ngaahi fakakaukaú mo e ongó.

3 Nīfai 11:18–41

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó mo nau fakamatalaʻi ʻa e tokāteline ʻo Sīsū Kalaisí.

• Teuteu ʻa e tokotaha akó: Fakaafeʻi e kau akó ke ako fekauʻaki mo e tokāteline ʻo Kalaisí kimuʻa ʻi he kalasí. Te nau lava ʻo ako ʻa e ngaahi akonaki ʻa e Fakamoʻuí ʻi he 3 Nīfai 11:31–41 pe kumi ʻa e “Tokāteline ʻa Kalaisí” ʻi he Gospel Library app ChurchofJesusChrist.org.

• Laʻipepa tufá: “Ko e Palani Lēsoni ʻo e Tokāteline ʻa Kalaisí”

• Meʻa ke fakaʻaliʻalí: Ko e ngaahi fehuʻi vakaiʻi fakataautaha ʻi he fakaʻosinga ʻo e lēsoní

• Fokotuʻu ki hono akoʻi ʻi he konifelenisi vitioó: ʻE lava ke fakaafeʻi ʻa e kau ako ʻe loto-fiemālié ke vahevahe ʻenau lēsoní mo e kalasí kotoa. Te ke lava foki ʻo fakaʻaongaʻi ha fanga kiʻi loki fakataha pea fakaafeʻi e kau akó ke akoʻi ʻenau lēsoní ki ha kiʻi kulupu tokosiʻi.