“3 Nīfai 11:18–41: Ko e Fakahā ʻe Sīsū Kalaisi ʻEne Tokāteliné,” Tohi ʻa Molomoná – Tohi Lēsoni ʻa e Faiakó (2024)
“3 Nīfai 11:18–41,” Tohi ʻa Molomoná – Tohi Lēsoni ʻa e Faiakó
3 Nīfai 11:18–41
Ko e Fakahā ‘e Sīsū Kalaisi ‘Ene Tokāteliné
Kuó ke fakakaukau nai ki he ngaahi moʻoni ʻoku vahevahe ʻe he kau faifekaú kiate kinautolu ʻoku nau akoʻí? Ko e taha ʻo ʻenau ngaahi pōpoaki mahuʻinga tahá ʻoku fekauʻaki ia mo e meʻa kuo pau ke tau fai ke maʻu ʻa e ngaahi tāpuaki ʻo e moʻui taʻengatá. ʻOku faʻa ui ʻa e pōpoaki ko ʻení ʻi he taimi ʻe niʻihi ko e tokāteline ʻo Kalaisí (2 Nīfai 31:21). Naʻe akoʻi ʻe he Fakamoʻuí ʻa e tokāteline ko ʻení ki he kau Nīfaí hili pē ha taimi nounou mei heʻene hā kiate kinautolu ʻi he temipalé. ʻE tokoni ʻa e lēsoni ko ʻení ke fakamatalaʻi ʻa e tokāteline ʻo Sīsū Kalaisí mo ke maʻu ha mahino lahi ange.
Ko hono poupouʻi ʻo e kau akó ke teuteu ke akó. ʻI he taimi ʻoku teuteu ai ʻa e kau akó ke akó, ʻoku nau teuteuʻi honau lotó ke maʻu ʻa e Laumālie Māʻoniʻoní. ʻE lava ke teuteu ʻa e kau akó ki he kalasí ʻaki haʻanau lau ha konga folofola, fakalaulauloto ki ha fehuʻi, pe fakakaukau ki ha aʻusia ke vahevahe. Fakaafeʻi ʻa e tokotaha akó ke teuteu, pea tuku ha ngaahi faingamālie ki he kau akó ke nau vakai ki he founga ʻoku tākiekina ai ʻe heʻenau teuteú ʻenau akó.
Teuteu ʻa e tokotaha akó: Fakaafeʻi e kau akó ke ako fekauʻaki mo e tokāteline ʻo Kalaisí ʻi he kalasí. Te nau lava ʻo ako ʻa e ngaahi akonaki ʻa e Fakamoʻuí ʻi he 3 Nīfai 11:31–41 pe fekumi ʻi he “tokāteline ʻa Kalaisí” ʻi he Gospel Library app ChurchofJesusChrist.org.
Ngaahi ʻEkitivitī Ako ʻOku Ala Fakahokó
ʻOku fakatefito ʻa e ngaahi ʻekitivitī ako ʻi he lēsoni ko ʻení ʻi he tokāteline ʻa Sīsū Kalaisi naʻe akoʻi ʻi he 3 Nīfai 11:31–41. Kapau ʻe fiemaʻu, fakaʻaongaʻi ʻa e konga ki he “Ngaahi ʻEitivitī Fakalahi ki he Akó” ke tokoni ke mahino ki he kau akó ʻa e ngaahi akonaki kehe ʻa e Fakamoʻuí ʻi he 3 Nīfai 11 fekauʻaki mo e fakakikihí pea pehē foki ki he founga totonu ki hono papitaiso ʻo ha tahá.
Hoko ko ha tokotaha muimui ʻo Sīsū Kalaisi
Fakakaukau ke fakaafeʻi ha kau ako ʻe niʻihi ke fakafaivaʻi ʻa e tūkunga ko ʻení ʻi muʻa ʻi he kalasí. Ke ʻoange ha faingamālie ki ha kau ako tokolahi ange ke fai ha vahevahé, fakakaukau ke vahe kinautolu ki ha fanga kiʻi kulupu iiki pea fakaafeʻi kinautolu ke taufetongi ʻi hono vahevahe ʻenau ngaahi talí.
Fakakaukau ʻoku ʻi ai hao kaungāmeʻa ʻokú ne fie ʻilo ki he Siasí. ʻOku talaatu ʻe hoʻo kaungāmeʻá ʻokú ne ongoʻi fiefia ʻi he meʻa kuó ne ako mo aʻusiá. ʻOkú ne fie ʻilo ki he meʻa ʻoku totonu ke ne hoko atu ki ai ke muimui kakato ange ki he Fakamoʻuí.
-
Ko e hā te ke fakaafeʻi ho kaungāmeʻá ke ne faí? Ko e hā hono ʻuhingá?
“Ko ʻeku tokāteliné ʻeni”
Hili ha taimi nounou mei he hā ʻa e Fakamoʻui kuo toetuʻú ki he kau Nīfaí ʻi he fonua ko Mahú, naʻá Ne akoʻi kiate kinautolu ʻEne tokāteliné. ʻOku faʻa ui ʻa e tokāteline ko ʻení ʻi he taimi ʻe niʻihi “ko e tokāteline ʻo Kalaisí” (2 Nīfai 31:21), ʻoku tokoni ia ke mahino kiate kitautolu ʻa e founga te tau lava ai ʻo muimui ʻia Sīsū Kalaisi mo maʻu ʻa e ngaahi tāpuaki ʻo e moʻui taʻengatá. Te ke maʻu ʻi he ʻahó ni ha faingamālie ke mahino lelei ange kiate koe ʻa e tokāteline ʻo Kalaisí pea fakamatalaʻi ia ʻi he fakalea pē ʻaʻau.
Talaange ki he kau akó te nau maʻu ʻa e faingamālie ke teuteu mo akoʻi ha lēsoni ʻoku kau ki he tokāteline ʻo Kalaisí ki ha kiʻi kulupu tokosiʻi ʻo ʻenau kalasí. Fakaʻaliʻali ʻa e ngaahi fakahinohino ko ʻení ke lava ʻa e kau akó ʻo vakai ki ai ʻi hono teuteu ʻenau ngaahi lēsoní.
-
Ako e ngaahi akonaki ʻa e Fakamoʻuí kau ki Heʻene tokāteliné ʻi he 3 Nīfai 11:31–41.
-
Kapau ʻe fiemaʻu, ako mo ha ngaahi akonaki lahi ange fekauʻaki mo e tokāteline pe ongoongolelei ʻo Sīsū Kalaisí, hangē ko e 2 Nīfai 31:17–21 pe 3 Nīfai 27:19–22. Te ke lava foki ʻo fekumi ki he “tokāteline ʻo Kalaisí” ʻi he Gospel Library app ChurchofJesusChrist.org.
-
Teuteu ha lēsoni miniti ʻe tolu-ki-he-nima fekauʻaki mo e tokāteline ʻo Kalaisí. Fakaʻaongaʻi e sīpinga ʻoku ʻoatu ʻi laló ke tokoni atu ki hono teuteuʻi hoʻo fokotuʻutuʻú. Te ke lava ʻo fakakaukauloto ko ha faifekau koe ʻokú ke teuteuʻi ʻa e lēsoni ko ʻení ki ha taha ʻokú ke akoʻi. Pe ko hoʻo fakakaukau ki ha taha ʻokú ke maheni mo ia pea teuteu ʻo hangē pē te ke vahevahe ʻa e lēsoní kiate kinautolú.
Tufa ki he kau akó ha ngaahi tatau ʻo e laʻipepa tufa ʻo e lēsoní. ʻOange ha taimi feʻunga ke nau teuteu ai ʻenau lēsoní.
Fakapapauʻi ke ʻoange ha ngaahi founga kehe ki he kau ako ʻoku nau ongoʻi vēkevēke ke faiako leʻolahí. ʻOku kau ʻi he ngaahi meʻa ke fili mei aí hano ʻoatu ha fokotuʻutuʻu ki heʻenau lēsoní pe ngāue mo ha hoa ʻoku loto-fiemālie ange pe taukei fakafaiako. ʻE ala tokoni ki he kau akó kapau te ke fakatātaaʻi nounou ʻa e founga ke teuteuʻi ai ha lēsoni nounoú.
Ko e Palani ʻo e Lēsoni ʻo e Tokāteline ʻo Kalaisí
Tohi ʻa Molomoná – Tohi Lēsoni ʻa e Faiakó (2024)—”3 Nīfai 11:18–41: ʻOku Fakahā ʻe Sīsū Kalaisi ʻEne Tokāteliné”
-
Hiki ha fakamatala fakanounou ʻo e tokāteline ʻo Kalaisí mei he meʻa kuó ke ako mo akoʻí.
-
Hiki ha fehuʻi ʻe ua pe tolu te ke lava ʻo fai ke tokoni kiate kinautolu ʻokú ke akoʻí ke mahino mo nau fakakaukau lahi ange ki he tokāteline ʻo Kalaisí.
-
Fakamatalaʻi ʻa e ʻuhinga ʻokú ke ongoʻi ai ʻoku mahuʻinga ke ke muimui ʻi he ngaahi akonaki ko ʻeni ʻa e Fakamoʻuí? Kapau ʻe lava, fakakau ai haʻo ngaahi aʻusia ʻokú ne fakahaaʻi e founga kuo faitāpuekina ai ʻe he ngaahi akonaki ko ʻení hoʻo moʻuí.
-
Hiki ha fakaafe ʻe taha pe ua te ke lava ʻo fai ke tokoniʻi ʻa kinautolu ʻokú ke akoʻí ke nau fakaʻaongaʻi ʻa e meʻa kuo nau ako fekauʻaki mo e tokāteline ʻo Kalaisí.
-
(Fili pē) Fakakaukau ki ha meʻa pe ʻekitivitī ke tokoni ke mahino lelei ange kiate kinautolu ʻokú ke akoʻí ʻa e tokāteline ʻo Kalaisí.
© 2023 ʻe he Intellectual Reserve, Inc. All rights reserved.
Hili hono maʻu ʻe he kau akó ha taimi feʻunga ke teuteu aí, ʻoange ha faingamālie ke nau akoʻi ʻenau lēsoní ki ha ngaahi hoa pe fanga kiʻi kulupu iiki. Tokanga ke ʻoua naʻá ke fakamālohiʻi ʻa e kau ako ʻoku nau fuʻu loto-vēkeveke ke akoʻi leʻolahi ʻenau lēsoní. Te ke lava ʻo fakaafeʻi ha kau ako ʻe loto-lelei ke nau akoʻi kotoa ʻa e kalasí.
ʻI he ʻosi e faiako ʻa e kau akó, mahalo naʻa ʻi ai pē ha taimi ke aleaʻi ai ʻa e meʻa naʻa nau akó. Fakakaukau ke hiki ʻa e moʻoni ko ʻení ʻi he palakipoé: ke hū ki he puleʻanga ʻo e ʻOtuá, kuo pau ke tau muimui ki he tokāteline ʻa e Fakamoʻuí ʻaki ʻetau tui kiate Ia, fakatomala, papitaiso, maʻu ʻa e Laumālie Māʻoniʻoní, pea kātaki ki he ngataʻangá.
Te ke lava ʻo ngāue ʻaki ha ngaahi fehuʻi hangē ko ʻení lolotonga hoʻomou fealeaʻakí:
-
ʻOkú ke pehē ko e hā naʻe kau ai ʻa e tokāteline ko ʻení ʻi he ngaahi ʻuluaki meʻa naʻe akoʻi ʻe he Fakamoʻuí ki he kau Nīfaí?
-
Ko e hā ʻokú ke ongoʻi ai ʻoku fiemaʻu ʻa e ngaahi tefitoʻi moʻoni mo e ngaahi ouau ko ʻení ki hono maʻu ʻa e puleʻanga ʻo e ʻOtuá?
-
Ko e hā te ke lava ʻo fai ke hoko ʻa e ngaahi tefitoʻi moʻoni mo e ouaú ko ha konga mahuʻinga ʻo hoʻo moʻuí?
Siviʻi pē ʻo kitá
Kapau ʻe ʻi ai ha taimi hili hono vahevahe ʻe he kau akó ʻenau ngaahi lēsoní, ʻe lava ke nau fakalaulauloto ki ha ngaahi founga ki hono fakaʻaongaʻi ʻo e tokāteline ʻa Kalaisí ʻi heʻenau moʻuí ʻi he ʻaho takitaha. Fakakaukau ke vahevahe ʻa e sivi ko ʻení mo tuku ha taimi ki he kau akó ke siviʻi fakalongolongo pē kinautolu:
ʻI hoʻo fakaʻosi ʻa e lēsoní, tuku ha taimi ke ke fakalaulauloto ai ki he founga ʻe lava ke ke fakaʻaongaʻi ai e tokāteline ʻo Kalaisí ʻi hoʻo moʻuí he ʻaho takitaha. ʻE lava ke tokoni ʻa hono siviʻi kitá ke ke ʻiloʻi ʻa e ngaahi founga ʻokú ke lolotonga moʻui ʻaki ai ʻa e tokāteline ʻa e Fakamoʻuí, pea pehē ki he ngaahi founga te ke lava ai ʻo tupulakí.
Tali ki he fakamatala takitaha ko ʻení ʻaki ha taha ʻo e ngaahi tali ko ʻení: “maʻu pē,” “taimi ʻe niʻihi,” pe “tātaaitaha.”
-
ʻOku ou fakaʻaongaʻi ʻeku tui kia Sīsū Kalaisí ʻaki ʻeku feinga ke tauhi ʻa e ngaahi fekaú mo falala te Ne lava ʻo tokoniʻi au ke u ikunaʻi hoku ngaahi faingataʻaʻiá.
-
ʻOku ou fakatomala fakaʻaho koeʻuhí ko ʻeku ngaahi fehalaākí pea feinga ke maʻu e mālohi ʻo e Fakamoʻuí ke ne tokoniʻi au ke u hoko ange ʻo hangē ko Iá.
-
ʻOku ou feinga ke tauhi ʻeku ngaahi fuakava ʻi he papitaisó pea fakafoʻou fakauike ʻa e feinga ke moʻui taau ki hono maʻu ʻo e sākalamēnití.
-
ʻOku ou fakaafeʻi ʻa e Laumālie Māʻoniʻoní ki heʻeku moʻuí ʻi he lotu maʻu pē ki he Tamai Hēvaní pea ako mo feinga ke ngāue ʻo fakatatau ki he ngaahi ueʻi fakalaumālié.
Poupouʻi e kau akó ke fakakaukau ki ha tafaʻaki ʻo e tokāteline ʻa e Fakamoʻuí te nau lava ʻo fakaʻaongaʻi kakato ange ʻi heʻenau moʻuí pea faʻu leva ha palani ke fai ia. Fakamoʻoni ki he ngaahi moʻoni kuo mou aleaʻí. Poupouʻi e kau akó ke nau kumi ha ngaahi faingamālie ke vahevahe ai ʻenau fakamoʻoní mo e niʻihi kehé.