3 Nīfai 12–16

Vakai Fakalūkufuá

ʻI hono akoʻi ʻe Sīsū ʻa e kakai ʻi he fonua ko Mahú, naʻá Ne fakahā ha ngaahi tāpuaki lahi te tau lava ʻo maʻu mo e ngaahi founga te tau lava ai ʻo hangē ange ko Iá ʻi ha malanga ʻoku faitatau mo ʻEne Malanga ʻi he Moʻungá. Naʻá Ne tokoni ke mahino ki he kakaí ʻa ʻEne ʻofá mo ʻEne fakaʻamu ke tānaki fakataha ʻa e fānau kotoa ʻa e ʻOtuá.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

3 Nīfai 12:1–16

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau teuteu ke maʻu ʻa e ngaahi tāpuaki naʻe folofola ki ai ʻa e Fakamoʻuí ʻi heʻenau feinga ke muimui ki Heʻene enginakí.

• Teuteu ʻa e tokotaha akó: Ke tokoni ki hono teuteuʻi ʻa e loto ʻo e kau akó ke ako e malanga ʻa e Fakamoʻuí ʻi he 3 Nīfaí, ʻa ia ʻoku fuʻu faitatau mo ʻEne Malanga ʻi he Moʻungá, fakakaukau ke fakaafeʻi kinautolu ke fakalaulauloto ki he fakamatala ko ʻeni meia Palesiteni Siosefa Filiting Sāmita (1876–1972). Naʻe pehē ʻe Palesiteni Siosefa Filitingi Sāmita ko e Malanga ʻi he Moʻungá ʻa e malanga “maʻongoʻonga taha kuo faifai angé pea malangaʻi, ʻo fakatatau mo ʻetau ʻiló” (Ngaahi Akonaki ʻa e Kau Palesiteni ʻo e Siasí: Siosefa Filitingi Sāmita [2013], 266).

• Meʻa ke fakaʻaliʻalí: Ko ha tā fakatātā faingofua ʻo e takafi ʻo ha makasini ʻoku tau fakakaukauloto ki ai mo e ʻuluʻi tohi Makasini ʻo e Lavameʻa Fakamāmaní; ko ha tā fakatātā faingofua ʻo e takafi ʻo e makasini Liahoná

• Fokotuʻu ki hono akoʻi ʻi he konifelenisi vitioó: Kapau ʻe ako ʻe he kau akó ʻa e ngaahi lea ʻo e konifelenisí mei he kau taki ʻo e Siasí, te ke lava ʻo tuku ke vahevahe ʻenau screen ke fakamahinoʻi ha ngaahi konga pau ʻo e ngaahi lea naʻe ʻuhingamālie kiate kinautolú.

3 Nīfai 12:17–48

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó honau tuʻunga malava ke hoko ʻo haohaoa hangē ko ʻetau Tamai ʻi Hēvaní mo Sīsū Kalaisí.

• Teuteu ʻa e tokotaha akó: Fakaafeʻi e kau akó ke ako ʻa e ʻuluaki palakalafi ʻi lalo ʻi he fakamatala “Haohaoá” ʻi he Fakahinohino ki he Ngaahi Folofolá pea omi mateuteu ke vahevahe ʻa e meʻa ne nau ʻilo ʻoku mahuʻingamālie taha fekauʻaki mo e fakaʻuhinga mo e ʻuhinga ko ʻení.

• Ngaahi ʻīmisi ke fakaʻaliʻalí: Ngaahi ʻīmisi ʻo ha tengaʻi ʻakau, kiʻi kulī, mo ha kiʻi pēpē

• Naunau maʻá e kau akó: Fanga kiʻi laʻipepa ke tohi ai e kau akó

• Fokotuʻu ki hono akoʻi ʻi he konifelenisi vitioó: Ke kamata ʻa e lēsoní, tānaki atu ki hono fakaʻaliʻali ha ngaahi fakatātā ʻo e tengaʻi ʻakaú, kiʻi kulií, mo e pēpeé, te ke lava ʻo fakaʻaliʻali ha ngaahi fakatātā ʻo ha fuʻu ʻakau lahi, ko ha kulī kuo fuʻu lahi, pea mo Sīsū pe ko e Tamai Hēvaní. Hili hono fakaʻaliʻali ʻo e ʻuluaki ʻīmisi ʻe tolú, te ke lava ʻo tokoni ki he kau akó ke fakakaukauloto ki he meʻa te nau malavá ʻaki hono fakaʻaliʻali e ngaahi ʻīmisi naʻe tānaki atú.

Fakataukei Fakatokāteliné: 3 Nīfai 12:48

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukeí mo e kupuʻi folofola mahuʻinga ʻi he 3 Nīfai 12:48, fakamatalaʻi ʻa e tokāteline ʻoku akoʻi atu ʻi he potufolofolá, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke ako maʻuloto ʻa e 3 Nīfai 12:48 kimuʻa pea nau toki omi ki he kalasí. Te ke lava ʻo fakaafeʻi kinautolu ke akoako lau maʻuloto ʻa e potufolofolá ki he kau mēmipa kehe ʻo e kalasí ʻi heʻene ofi atu ki he taimi kalasí, ʻo tatau ai pē pe ʻokú mo fesiofaki, fakahoko atu he pōpoaki (messaging), pe ʻi ha founga kehe.

• Naunau maʻá e kau akó: Ngaahi laʻipepa ʻoku vaeuaʻi

• Fokotuʻu ki hono akoʻi ʻi he konifelenisi vitioó: ʻI he konga “Fakamatalaʻi mo ako maʻuloto” ʻo e lēsoní, te ke lava ʻo teuteu ha fakamatala fakapepa ʻoku tohiʻi ai e ngaahi kupuʻi lea fakafolofolá ʻi ha ngaahi tuliki kehekehe ʻo hangē ko hono fakamatalaʻi ʻi he lēsoní. Te ke lava leva ʻo vahevahe hoʻo screen pea ʻai ke tuhu ʻa e kau akó ki he ngaahi kupuʻi leá ʻi hono hokohoko totonú. Tamateʻi tahataha ʻa e kupuʻi leá, pea fakaafeʻi ʻa e kau akó ke toutou fakahoko ʻa e founga ʻo e tuhu ki he screen pea lea ʻaki ʻa e ngaahi foʻi leá kae ʻoua kuo ʻosi kotoa. Te ke lava foki ʻo teuteuʻi ha ngaahi tatau lahi pea hiki e ngaahi kupuʻi lea fakafolofolá ʻi ha ngaahi tuliki kehekehe pea fakaʻaliʻali tahataha ʻa e fakamatala fakapepá, pea ʻoange ha faingamālie ki he kau akó ke nau kumi ʻa e hokohoko ʻo e ngaahi leá pea toe lau ʻa e kupuʻi lea mahuʻingá.

3 Nīfai 13–14

Taumuʻa ʻo e lēsoní: Ko e taumuʻa ʻo e lēsoni ko ʻení ke tokoniʻi e kau akó ke nau ʻiloʻi ʻa e ngaahi tefitoʻi moʻoni mei he ngaahi akonaki ʻa e Fakamoʻuí pea vakai ki heʻene mahuʻinga ki heʻenau moʻuí he ʻaho ní.

• Teuteu ʻa e tokotaha akó: Fakakaukau ke fakaafeʻi e kau akó ke kumi pea haʻu mateuteu ki he kalasí ke vahevahe ʻa e ngaahi fakamatala ki he tupuʻangá mo hono olá ʻoku nau maʻu ʻi heʻenau ako folofola fakatāutahá. ʻE lava ke fakamatalaʻi ʻeni ʻo fakaʻaongaʻi e ngaahi foʻi lea kapau mo e pea, pe ʻe fakamatalaʻi pē ʻe he potufolofolá ʻa e ngaahi fili ʻoku fakatau ki he ngaahi olá.

• Fokotuʻu ki hono akoʻi ʻi he konifelenisi vitioó: Hili hono maʻu ʻe he kau akó ha taimi ke fakaʻaongaʻi e ngaahi akonaki ʻa e Fakamoʻuí ke faʻu ha ngaahi fakamatala ki he tupuʻangá mo hono olá, fakaafeʻi kinautolu ke ʻai ʻenau fakamatalá ʻi he polokalama fetohiʻakí (chat). ʻE lava ke sio heni e kau akó ki he ngaahi fakamatalá kotoa ʻi heʻenau aleaʻi e founga ʻoku kei ʻaonga ai e ngaahi akonaki ʻa e Fakamoʻuí ʻi he ʻaho ní.

3 Nīfai 15–16

Taumuʻa ʻo e lēsoní: ʻOku fakataumuʻa e lēsoni ko ʻení ke tokoni ki he kau akó ke nau ongoʻi e finangalo ʻo e Fakamoʻuí ke tānaki kinautolu mo e tokotaha kotoa pē kiate Iá.

• Teuteu ʻa e tokotaha akó: Fakaafeʻi e kau akó ke fakalaulauloto ki he founga te nau tali ʻaki e fehuʻi ko ʻení: “Ko e hā ha fakamoʻoni kuó ke mamata ai ʻoku finangalo ʻa e Fakamoʻuí ke tānaki ʻa e tokotaha kotoa pē kiate Ia?”

• Ngaahi ʻAtá: ʻĪmisi ʻe ua ʻo Kalaisi (ko e taha ai ko ʻEne hoko ko ha tauhisipi); ko e fakatātā ʻo ha tākanga sipi

• Meʻa ke fakaʻalilalí: Ngaahi potu folofola ʻi he Sione 10 mo e 3 Nīfai 15, 16 fakataha mo e ngaahi fehuʻi ʻoku nau fekauʻakí

• Fokotuʻu ki hono akoʻi ʻi he konifelenisi vitioó: ʻI he ofi ki he kamataʻanga ʻo e lēsoní, fakakaukau ke ʻoange ha ngaahi miniti siʻi ki he kau akó ke kumi ʻa e ʻīmisi ʻo e Fakamoʻuí ʻoku nau saiʻia ai ko ha tauhisipi. Tuku ke vahevahe ʻe he kau akó ʻenau screen ʻi heʻenau fakamatalaʻi ʻa e meʻa ʻoku nau saiʻia ai fekauʻaki mo e fakatātā ne nau filí pea mo e meʻa ʻokú ne akoʻi kiate kinautolu fekauʻaki mo Kalaisí.