3 Nīfai 27–4 Nīfai 1

Vakai Fakalūkufuá

Naʻe akoʻi ʻe Sīsū Kalaisi ʻEne kau ākonga Nīfaí ʻoku totonu ke ui Hono Siasí ki Hono huafá pea langa ʻi Heʻene ongoongoleleí. Naʻá Ne fakamatalaʻi ha ngaahi tāpuaki mahuʻinga ʻoku ʻatā maʻanautolu ʻoku muimui ki Heʻene ongoongoleleí, kau ai ʻa e fakamāʻoniʻoniʻi ʻo fakafou ʻi he Laumālie Māʻoniʻoní. Naʻe fakaʻamu ha toko tolu ʻo e kau ākonga Nīfaí ke nau nofo ʻi he māmaní ke ʻomi ʻa e ngaahi laumālié kia Sīsū Kalaisi kae ʻoua kuo aʻu ki Heʻene Hāʻele ʻAnga Ua Maí, pea naʻe fakahoko ʻa e fakaʻamu ko ʻení. Naʻe liliu lahi ʻa e kakaí ʻe he ngāue fakafaifekau ʻa e Fakamoʻuí ʻi honau lotolotongá, pea naʻa nau moʻui angatonu ʻi ha meimei taʻu ʻe 200.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

3 Nīfai 27, Konga 1

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e ongoongolelei ʻo e Fakamoʻuí pea mo e mahuʻinga ʻo e hingoa ʻo e Siasí.

• Teuteu ʻa e tokotaha akó: Te ke lava ʻo fakaafeʻi ʻa e kau akó ke lau ʻa e 3 Nīfai 27:1–10 pea ʻiloʻi ʻa e meʻa naʻe akoʻi ʻe he Fakamoʻuí ki Heʻene kau ākonga Nīfaí fekauʻaki mo Hono Siasí.

• Vitiō: “Ko e Hingoa Totonu ʻo e Siasí” (15:43; mamata mei he taimi 3:26 ki he 4:45)

• Fakatātā: Ko ha fakatātā laine ʻo ha falelotu

• Fokotuʻu ki hono akoʻi ʻi he konifelenisi vitioó: ʻI he ofi ki he fakaʻosinga ʻo e lēsoní, ʻoku fakaafeʻi ʻa e kau akó ke tā ha fakatātā ʻo ha falelotu pea lisi ʻi lalo ai ha ngaahi moʻoni fekauʻaki mo e ongoongolelei ʻa e Fakamoʻuí. Te ke lava ʻo fakaʻaliʻali ʻa e falelotú ʻi hoʻo screen pea fakaʻaongaʻi ʻa e kiʻi meʻangāue ke tohi ha fakamatalá (annotate feature) ke fakaʻatā ʻa e kau akó ke tānaki ki ai ʻenau ngaahi fakakaukaú.

3 Nīfai 27, Konga 2

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau maʻu ʻa e mālohi fakamāʻoniʻoniʻi ʻo e Fakamoʻuí ʻi heʻenau feinga ke moʻui ʻaki ʻEne ongoongoleleí.

• Teuteu ʻa e tokotaha akó: Fakaafeʻi ʻa e kau akó ke aleaʻi mo e niʻihi kehé ʻa e founga kuo tokoniʻi ai kinautolu ʻe he Laumālie Māʻoniʻoní ke fakamāʻoniʻoniʻi, pe hangē ange ko e Fakamoʻuí.

• Vitiō: “Ko e Manatu Kiate Ia ʻOku Tau Falalaʻiá” (10:25; mamata mei he taimi 0:00 ki he 2:09)

• Meʻa ke fakaʻaliʻalí: Ngaahi founga ʻe lava ke fakaʻaongaʻi ai ʻe he kau akó ʻa e ngaahi moʻoni kuo nau akó ki heʻenau moʻuí (ʻoku hiki atu ʻi he fakaʻosinga ʻo e lēsoní)

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ʻa e kau akó ke fakaʻaongaʻi ʻa e polokalama fetalanoaʻakí ke tali ʻa e fehuʻi “Ko e hā ha ngaahi founga te tau lava ai ʻo fakaafeʻi ʻa e takaua ʻo e Laumālie Māʻoniʻoní ke tāpuekina maʻu ai pē kitautolu ʻaki Hono ivi tākiekina fakamāʻoniʻoniʻí?” ʻE lava ke tokoni ʻeni ke ke faʻu vave ha lisi ʻo e ngaahi fakakaukau ʻe ala tokoni ki he kau akó.

Fakataukei Fakatokāteliné: 3 Nīfai 27:20

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea folofola mahuʻinga ki he 3 Nīfai 27:20, fakamatalaʻi ʻa e tokāteline naʻe akoʻi ʻi he potufolofola ko ʻení, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Fakakaukau ke fakaafeʻi ʻa e kau akó ke kamata ako maʻuloto ʻa e potufolofolá mo e kupuʻi lea folofola mahuʻinga ki he 3 Nīfai 27:20: “Haʻu kiate au ʻo papitaiso …, koeʻuhí ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.”

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ʻa e polokalama Fakataukei Fakatokāteliné ke tokoni ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea mahuʻingá.

3 Nīfai 28

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke nau ongoʻi ha loto-holi lahi ange ke ʻomi ʻa e niʻihi kehé ke nau ʻilo ʻa Sīsū Kalaisi.

• Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi aʻusia kuo nau maʻu ʻi hono vahevahe ʻo e ongoongoleleí pea mo e meʻa naʻá ne tokoniʻi kinautolu ke maʻu ʻa e loto-holi ke fakahoko ʻa e meʻa naʻa nau faí.

• Meʻa ke fakaʻaliʻalí: Ngaahi fehuʻi vakaiʻi fakataautaha ʻoku ofi ki he kamataʻanga ʻo e lēsoní; ngaahi potufolofola ki he ʻekitivitī akó ʻoku ofi ki he fakaʻosinga ʻo e lēsoní

• Vitioó: “Your Day for a Mission” (3:31); “By Small and Simple Things: Sharing the Gospel” (3:19)

4 Nīfai

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ha ʻofa lahi ange ki he Tamai Hēvaní mo Sīsū Kalaisi koeʻuhí ke nau lava ʻo ului lahi ange kiate Kinaua.

• Teuteu ʻa e tokotaha akó: Fakakaukau ke fakaafeʻi ʻa e kau akó ke ako ʻa e ʻuhinga ʻo e foʻi lea fakauluí ʻi he ngaahi maʻuʻanga tokoni ʻa e Siasí ʻoku lava ke maʻú. Ka ʻikai, te ke lava ʻo fakaafeʻi ʻa e kau akó ke fehuʻi ki ha taha ʻokú ne ʻiloʻi ʻa e ʻuhinga kiate ia ʻo e ului kia Kalaisí.

• Vitiō: “Ko e Koloa Lelei Tahá” (12:44; mamata mei he taimi 7:02 ki he 8:19)

• Fokotuʻu ki hono akoʻi ʻi he konifelenisi vitioó: Kapau te ke fili ke lau fakataha mo e kalasí ʻa e 4 Nīfai 1:2–18, te ke lava ʻo seti hoʻo screen ki he gallery view koeʻuhí ke ke lava ʻo sio ki he kalasí kotoa. Hili hono lau ʻe ha tokotaha ako ha veesi, fakaafeʻi ia ke tuhu ki ha tafaʻaki pau. Hili iá pea kole ki he tokotaha ako ʻoku ʻasi ʻi he tafaʻaki ko ia ʻi hoʻo screen ke ne lau ʻa e veesi hono hokó. Ko e fānau ako ko ia ʻoku ʻikai ke nau ongoʻi fiemālie ke laukongá, ʻoku totonu ke fakaʻatā pē ke ʻoua te nau laukonga.