Fakataukei Fakatokāteline: 3 Nifai 27:20

“Haʻu Kiate Au ʻo Papitaiso … , Koeʻuhi Ke Fakamāʻoniʻoniʻi ʻa Kimoutolu ʻi he Maʻu ʻo e Laumālie Māʻoniʻoní.”

ʻI hoʻo ako ʻa e 3 Nīfai 27, naʻá ke ako ai kau ki he fakamāʻoniʻoniʻi te ke lava ʻo aʻusia mei he Laumālie Māʻoniʻoní ʻi hoʻo moʻui ʻaki ʻa e ongoongolelei ʻa e Fakamoʻuí. ʻE lava ke tokoni ʻa e lēsoni ko ʻení ke ke ako maʻuloto ai ʻa e potufolofola mo e kupuʻi lea folofola mahuʻinga ki he 3 Nīfai 27:20, fakamatalaʻi ʻa e tokāteline ʻoku akoʻi ʻi he potufolofolá ni, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

Ko hono tokoniʻi ʻa e kau akó ke fakatupulaki ʻenau malava ke aleaʻi mo e niʻihi kehé ʻa e ngaahi meʻa ʻoku tui ki ai ʻa e ongoongoleleí. ʻOku tupulaki ʻa e mahino ʻa e kau akó ʻi heʻenau fefakamatalaʻiʻaki ʻa e ongoongoleleí ʻiate kinautolú. Fokotuʻu ha ʻātakai ʻe ongoʻi fiemālie ai ʻa e kau akó ke vahevahe ʻenau mahino ki he ngaahi moʻoni ʻo e ongoongoleleí.

Teuteu ʻa e tokotaha akó: Fakakaukau ke fakaafeʻi ʻa e kau akó ke kamata ako maʻuloto ʻa e potufolofola mo e kupuʻi lea folofola mahuʻinga ki he 3 Nīfai 27:20: “Haʻu kiate au ʻo papitaiso … , koeʻuhi ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.”

Ngaahi ʻEkitivitī Ako ʻOku Ala Fakahokó

ʻOku fokotuʻutuʻu ʻa e lēsoni fakataukei fakatokāteline ko ʻení ke akoʻi hili ʻa e lēsoni “3 Nīfai 27, Konga 2,” ʻa ia ko e lēsoni puipuituʻa ki he potufolofola fakataukei fakatokāteline 3 Nīfai 27:20. Kapau ʻoku fiemaʻu ke ʻunuakiʻi e lēsoni ʻo e potufolofola fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni puipuituʻa fekauʻaki mo iá ʻi he lolotonga e uike ko iá.

Fakamatalaʻí mo e ako maʻulotó

Naʻá ke ʻilo mei hoʻo ako ʻa e 3 Nīfai 27:20, ʻa e foʻi moʻoni ko ʻení: Kapau te tau fakatomala, haʻu kia Sīsū Kalaisi, pea papitaiso, ʻe lava leva ke fakamāʻoniʻoniʻi kitautolu ʻi heʻetau maʻu ʻa e Laumālie Māʻoniʻoní pea tuʻu taʻehalaia ʻi he ʻao ʻo e Fakamoʻuí ʻi he ʻaho fakaʻosí.

Fakakaukauloto naʻá ke maʻu ha faingamālie ke akoʻi ʻa e moʻoni ko ʻení ki ha kiʻi tamasiʻi siʻi.

Kimuʻa peá ke fakaafeʻi ʻa e kau akó ke tali leʻolahi ʻa e fehuʻi ko ʻení, fakakaukau ke fakaafeʻi kinautolu ke hiki ʻenau fakamatalá ʻi heʻenau tohinoa akó. Hili iá, te ke lava ʻo fakaafeʻi ʻa e kau akó ke vahevahe ʻa e meʻa ne nau tohí mo hanau hoa pe ko ha kulupu tokosiʻi.

• Te ke fakamatalaʻi fēfē ʻa e foʻi moʻoni ko ʻení ki ha kiʻi leka ʻi ha founga ʻe lava ke mahino kiate ia?

Akoako lau maʻuloto ʻa e kupuʻi lea folofola mahuʻinga ki he 3 Nīfai 27:20: “Haʻu kiate au ʻo papitaiso … , koeʻuhi ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.”

Vahevahe ʻa e potufolofolá mo e kupuʻi lea mahuʻingá ki he ngaahi konga ko ʻení. Toutou akoako lau maʻuloto ʻa e konga takitaha. Hili iá pea fakatahaʻi ʻa e ngaahi kongá pea lau maʻuloto ʻa e potufolofolá kotoa mo e kupuʻi lea mahuʻingá.

Ke tānaki atu ha ngaahi founga kehekehe, te ke lava ʻo kole ki ha kau ako pe kulupu kehekehe ke ako maʻuloto ha taha ʻo e ngaahi konga ko ʻení. Tuhu ki ha tokotaha ako pe kulupu pea ʻai ke nau lau maʻuloto ʻenau konga ne vahe angé. Hoko atu ʻeni kae ʻoua kuo toutou lau ʻa e potufolofolá kotoa mo e kupuʻi lea mahuʻingá. Hili iá te ke lava ʻo vahe ha konga kehe ki he tokotaha ako pe kulupu takitaha pea toe fai ʻa e ʻekitivitī ko ʻení.

• 3 Nīfai 27:20

• Haʻu kiate au

• ʻo papitaiso

• koeʻuhí ke fakamāʻoniʻoniʻi ʻa kimoutolu

• ʻi he maʻu ʻo e Laumālie Māʻoniʻoní

Akoako hono fakaʻaongaʻí

Ke tokoni atu ki hano fakamanatú, lisi ʻi ha sekoni ʻe 30 ʻa e meʻa kotoa pē te ke lava ʻo manatuʻi fekauʻaki mo ha taha ʻo e ngaahi tefitoʻi moʻoni ʻo hono maʻu ʻo e ʻilo fakalaumālié. Fai leva ʻa e meʻa tatau ki he ongo tefitoʻi moʻoni ʻoku toé. Kapau ʻokú ke fiemaʻu tokoni ʻi hono manatuʻi ʻa e ngaahi tefitoʻi moʻoní, te ke lava ʻo vakai ki he palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023).

Ko ha founga ʻe taha ke toe vakaiʻi ai ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ko hano vahevahe ʻo e kalasí ki ha kulupu ʻe tolu pea vahe ki he kulupu takitaha ha tefitoʻi moʻoni ʻe taha ke toe vakaiʻi. ʻE lava ke hiki ʻe ha tokotaha ako mei he kulupu takitaha ʻi he palakipoé ʻa e meʻa ʻoku manatu ki ai ʻene kulupú fekauʻaki mo e tefitoʻi moʻoni naʻe vahe angé.

Hili hono toe vakaiʻi ʻe he kau akó ʻenau tefitoʻi moʻoni naʻe vahe angé, vahevahe ʻa e tūkunga ko ʻení mo e kalasí. Mahalo te ke fie fakaʻaliʻali ʻa e tūkungá ke lava ʻa e kau akó ʻo vakai ki ai lolotonga ʻa e lēsoní.

ʻOkú ke aleaʻi mo hoʻo kaungāmeʻa ko Meikení ʻa e ongoongoleleí ʻi hoʻomo foki ki ʻapi mei he akó. ʻOku fehuʻi atu ʻe Meikeni, “ʻOku ʻi ai nai ha taimi ʻokú ke manavasiʻi ai ʻi he toe feʻiloaki mo e ʻOtuá? ʻOku ou feinga ke moʻui faitotonu pea fakatomala ʻi he taimi ʻoku ou fai ai ha ngaahi fehalākí, ka ʻoku fakamanavahē kiate au ʻa e foʻi fakakaukau te u tuʻu ʻi he ʻao ʻo e ʻOtuá ke fakamāuʻi aú.”

Fakaafeʻi ʻa e kau akó ke aleaʻi ʻa e founga te nau lava ʻo fakaʻaongaʻi ai ʻa e ngaahi tefitoʻi moʻoni ʻo hono maʻu ʻo e ʻilo fakalaumālié mo e tokāteline ʻoku akoʻi ʻi he 3 Nīfai 27:20 ke tokoni kia Meikeni ʻi he meʻa ʻokú ne hohaʻa ki aí.

Mahalo te ke fakakaukau ke kamata ʻa e fealēleaʻakí ʻaki hano kole ki he kau akó ke vahevahe pe ko e fē ʻi he ngaahi tefitoʻi moʻoni te nau ala kamata ʻakí mo e founga ʻe ala tokoni ai ʻa e tefitoʻi moʻoni ko iá. Hili iá pea hokohoko atu hono aleaʻi ʻa e ngaahi tefitoʻi moʻoni kehe ki hono maʻu ʻo e ʻilo fakalaumālié kae ʻoua kuo mou aleaʻi ʻa e founga ʻe lava ke tokoni ai ʻa e ngaahi tefitoʻi moʻoni ʻe tolu ko ʻení ki he ngaahi hohaʻa hangē ko ia ʻoku maʻu ʻe Meikení.

ʻO ka fiemaʻu, fakaʻaongaʻi ʻa e ngaahi fehuʻi ko ʻení ko ha konga hoʻomou fealēleaʻakí. ʻOku ʻikai fiemaʻu ke ke fakaʻaongaʻi kotoa ʻa e ngaahi fehuʻi ko ʻení, pea te ke lava ʻo ʻeke kinautolu ʻi he fakahokohoko ʻe ʻaonga tahá.

Vakaiʻi ʻa e Ngaahi Fakakaukaú mo e Ngaahi Fehuʻí ʻaki ha Fakakaukau ʻoku Taʻengatá

• Ko e hā nai ha ngaahi fakakaukau hala ʻoku maʻu ʻe Meikeni fekauʻaki mo e Tamai Hēvaní pe ko ʻEne palaní?

• Ko e hā ha ngaahi moʻoni te ke fiemaʻu ke mahino kia Meikeni fekauʻaki mo e Tamai Hēvaní mo ʻEne palaní?

Fekumi ki ha Mahino Lahi Ange ʻo Fakafou ʻi he Ngaahi Maʻuʻanga Tokoni Kuo Fokotuʻu Fakalangí

• Ko e hā ha ngaahi akonaki mei he 3 Nīfai 27:20 ʻe ala tokoni ʻi he tūkunga ko ʻení?

• Ko e hā ha ngaahi potufolofola pe ngaahi fakamatala kehe mei he kau taki ʻo e Siasí ʻe ala tokoni?

Ngāue ʻi he Tuí

• Ko e hā ha ngaahi ngāue ʻe lava ke fakahoko ʻe Meikeni ʻe lava ʻo tokoni ke ne ongoʻi nonga ange ai ʻi heʻene hohaʻá? ʻOkú ke pehē ko e hā ʻe tokoni ai ʻa e ngaahi ngāue ko ʻení?

Toe vakaiʻi ʻo e fakataukei fakatokāteliné

ʻE lava ke fakaʻaongaʻi ʻa e ʻekitivitī ko ʻení ʻi ha lēsoni ʻi he kahaʻú ke tokoni ki he kau akó ke ako maʻuloto ʻa e potufolofola mo e kupuʻi lea folofola mahuʻinga ki he 3 Nīfai 27:20. ʻE lava ke fakahoko fakakalasi ʻa e ʻekitivitī ko ʻení, fakahoko ʻi ha ngaahi kulupu iiki, pe fakahoko tauhoa.

Fakaafeʻi ʻa e kau akó ke hiki ʻi ha laʻipepa ʻa e potufolofola mo e kupuʻi lea mahuʻinga ki he 3 Nīfai 27:20 pea lau maʻuloto tuʻo tolu ʻa e potufolofolá mo e kupuʻi lea mahuʻingá. Kole ange ke kosi ʻa e ngaahi foʻi leá ke māvahevahe pea fio fakataha kinautolu. Hili iá pea ʻai ke fokotuʻutuʻu ʻe he kau akó ki heʻene hokohoko totonú.