Molomona 1–6

Vakai Fakalūkufuá

ʻI he mamata ʻa Molomona ki he faiangahala ʻa hono kakaí, naʻá ne akonaki fekauʻaki mo e tokotaha te ne fakamaauʻi kitautolú pea mo e founga ʻe fakamaauʻi ai kitautolu ʻi he Fakamaau Fakaʻosí. Naʻá ne lea ʻo fekauʻaki mo e kakai naʻa nau feohí ʻo pehē, “Kuó u taki ʻa kinautolu … peá u ʻofa kiate kinautolu … ʻaki hoku lotó kotoa” (Molomona 3:12). Ka naʻá ne tokanga mo tengihia ʻa hono kakaí ʻi he fakaʻau ke fakaʻauha kinautolú koeʻuhí he naʻe ʻikai ke nau fie tafoki ki he ʻOtuá ke maʻu ha tokoni. Naʻe iku pē ʻo fakaʻauha ʻa e puleʻanga ʻo e kakai Nīfaí ʻe he kakai Leimaná.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Molomona 1–2

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he akó mei he sīpinga ʻa Molomoná ʻa e founga ke muimui ai kia Kalaisí neongo pe ko e hā ʻa e meʻa ʻoku fili ʻe he niʻihi kehé ke faí.

• Teuteu ʻa e tokotaha akó: Fakaafeʻi ʻa e kau akó ke nau omi mateuteu ke vahevahe ha ngaahi aʻusia fekauʻaki mo ha taimi ne nau fili ai ke nau makehe mei he niʻihi kehé kae lava ke nau muimui kia Sīsū Kalaisi pea mo e ʻuhinga naʻe ʻaonga aí.

• Ngaahi ʻīmisi ke fakaʻaliʻalí: Ko ha ʻīmisi ʻo ha meʻa ʻoku ʻilonga ʻene makehe pē ʻaʻana mei he toengá; ko ha fakatātā ʻo Molomona ʻoku ngāue ki he ʻū lauʻi peleti koulá

• Laʻipepa tufa: “Anga-Fakamotuʻa” mo e “Mata poto”

• Fokotuʻu ki hono akoʻi ʻi he konifelenisi vitioó: Kapau te ke kole ki he kau akó ke nau faʻu ha ʻakauni mītia fakasōsiale maʻá e palōfita ko Molomoná ʻi he kotoa ʻo e lēsoní, vahevahe kinautolu ki ha fanga kiʻi loki fealēleaʻaki ke fakaʻatā ke nau fakamatalaʻi ʻa e meʻa ne nau teuteú ki ha kau ako tokosiʻi.

Molomona 3

Taumuʻa ʻo e lēsoní: ʻE lava ke tokoni ʻa e lēsoni ko ʻení ke teuteuʻi ʻa e kau akó ke nau tuʻu ʻi he loto-falala mo e fiefia ʻi he ʻao ʻo Sīsū Kalaisi ʻi he Fakamaau Fakaʻosí.

• Teuteu ʻa e tokotaha akó: Fakaafeʻi ʻa e kau akó ke nau omi mateuteu ke vahevahe ʻa e ngaahi fehuʻi ʻoku nau maʻu fekauʻaki mo e Fakamaau Fakaʻosí. Fakakaukau ke fakaʻaongaʻi ha savea ʻoku ʻikai fakahā ai ʻa e hingoá ke fakaʻatā ʻa e kau akó ke nau ʻomi ʻenau ngaahi fehuʻí kimuʻa he kalasí. ʻE lava ke tataki koe heʻenau ngaahi fehuʻí ʻi hono teuteuʻi ha lēsoni ke feau ʻenau ngaahi fiemaʻú.

• Meʻa ke fakaʻaliʻalí: Ko ha ngaahi fakahinohino ʻoku hangē ʻokú ne fakahaaʻi ʻe fai ha sivi fakatuʻupakē lolotonga ʻa e lēsoni ko ʻení; ko e saati ʻo e ngaahi fehuʻi mo e tali fekauʻaki mo e Fakamaau Fakaʻosí

• Ngaahi Vitioó: “Ko e Palani Lahí” (16:03; mamata mei he taimi 14:06 ki he 14:50); “ʻOfa Fakalangi ʻi he Palani ʻa e Tamaí” (14:46; mamata mei he taimi 1:44 ki he 3:31); “Maʻa he Fakatomalá” (15:27; mamata mei he taimi 8:09 ki he 12:03)

• Fokotuʻu ki hono akoʻi ʻi he konifelenisi vitioó: Fakakaukau ke vahe ʻa e kau akó ki ha fanga kiʻi loki fealēleaʻaki ʻi ha ngaahi miniti siʻi ke lisi ʻenau ngaahi fehuʻi fekauʻaki mo e Fakamaau Fakaʻosí. Toe fakafoki mai kinautolu [ki he loki konifelenisi lahí], pea ngāue ʻaki ʻa e polokalama whiteboard ke fakaʻatā ke nau tohi pe taipeʻi ʻenau ngaahi fehuʻí. Fakaafeʻi ʻa e kau akó ke nau faitaaʻi ʻa e ngaahi fehuʻí kotoa, pea fakaʻaliʻali leva ʻa e lisi ʻo e ngaahi maʻuʻanga tokoni te nau lava ʻo maʻu ai ʻa e talí. ʻOange ha taimi ke nau kumi ai ʻa e ngaahi talí ʻo fakaʻaongaʻi ʻa e ngaahi maʻuʻanga tokoni kuo ʻoatú pe ko ha ngaahi maʻuʻanga tokoni kehe pē kuo fokotuʻu fakalangi ʻa ia ʻoku nau ʻiloʻi.

Molomona 3–6

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ʻa hono mahuʻinga ʻo e tafoki ki he Tamai Hēvaní mo e Fakamoʻuí ʻi heʻenau moʻuí.

• Teuteu ʻa e tokotaha akó: Fakaafeʻi ʻa e kau akó ke nau feinga ke fakamanatuʻi ha taimi naʻe tokoniʻi ai kinautolu ʻe he ʻOtuá ʻi ha faingataʻa koeʻuhí naʻa nau kole tokoni kiate Ia.

• ʻĪmisi ke fakaʻaliʻalí: Ko ha ʻīmisi ʻo Molomona mo Molonai ʻokú na vakai ki hono fakaʻauha ʻo e kakai Nīfaí

• Vitiō: “Fakatokanga ʻa e Kau Palōfitá” (1:24; mamata mei he taimi 0:00 ki he 0:58)

Siviʻi Hono 8 Hoʻo Akó

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke vakaiʻi ʻa e ngaahi taumuʻa kuo nau fokotuʻú pea mo e tupulaki kuo nau aʻusia lolotonga ʻenau ako kimuí ni ʻa e 3 Nīfai 8 ki he Molomona 6.

• Teuteu ʻa e tokotaha akó: Fakaafeʻi e kau akó ke omi mateuteu ke vahevahe ʻa e meʻa kuo nau akó pe ngaahi founga kuo nau tupulaki fakalaumālie ai ʻi he ngaahi uike siʻi kuo hilí. Mahalo ʻe tokoni ke toe vakaiʻi ʻe he kau akó ʻenau tohinoa akó pe ngaahi fakamatala ʻi heʻenau folofolá.

Toe Vakaiʻi Hono 22 ʻo e Fakataukei Fakatokāteliné

Taumuʻa ʻo e lēsoní: ʻE ʻoange ʻe he lēsoni ko ʻení ha faingamālie ki he kau akó ke nau fakaʻaongaʻi ai ʻa e ngaahi potufolofola fakataukei fakatokāteline ʻo e Tohi ʻa Molomoná ki he ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi ʻa e kau akó ke nau fakalaulauloto pea omi mateuteu ke vahevahe ʻa e ngaahi moʻoni pe akonaki mei he ngaahi potufolofola fakataukei fakatokāteliné kuo nau fakaʻaongaʻi ʻi heʻenau moʻuí.

• Meʻa ke fakaʻaliʻalí: Ko ha tūkunga ke fakafonu ʻa e meʻa ʻoku ʻataá; ko e lea ʻa ʻEletā Keleki C. Kulisiteniseni; ko e saati ʻo e ngaahi kupuʻi lea mahuʻinga mei he folofolá meia ʻAlamā ʻo aʻu kia Molonai

• Naunau maʻá e kau akó: Ko ha laʻipepa maʻá e tokotaha ako kotoa

• Fokotuʻu ki hono akoʻi ʻi he konifelenisi vitioó: Fakakaukau ke vahe ʻa e kau akó ki ha ngaahi kulupu tautau toko fā ʻi he fanga kiʻi loki fealēleaʻakí ke nau fakakakato ʻa e ʻekitivitī ʻi he “Ko hono moʻui ʻaki ʻo e folofolá.” Fakaʻaongaʻi ʻa e konga ki he feʻaveʻaki pōpoakí (messaging feature) ke ʻave ai ʻa e ngaahi fakahinohino ki he kulupu takitaha.