Molomona 3

“Kuo Pau Ke Mou Tuʻu Kotoa Pē ʻi he Nofoʻanga Fakamaau ʻo Kalaisí”

Kuó ke fifili nai pe ʻe fēfē ʻa e Fakamaau Fakaʻosí? ʻI he mamata ʻa Molomona ki he faiangahala ʻa hono kakaí, naʻá ne akonaki fekauʻaki mo e tokotaha te ne fakamaauʻi kitautolú pea mo e founga ʻe fakamaauʻi ai kitautolu ʻi he Fakamaau Fakaʻosi ko ʻení. ʻE lava ke tokoni ʻa e lēsoni ko ʻení ke teuteuʻi koe ke ke tuʻu ʻi he loto-falala mo e fiefia ʻi he ʻao ʻo Sīsū Kalaisi ʻi he Fakamaau Fakaʻosí.

Poupouʻi ʻa e kau akó ke nau fai ha ngaahi fehuʻi. ʻI hoʻo vakai ki he ngaahi tefito ʻi he folofolá ʻe fakanatula ke fehuʻia ʻe he kau akó, kumi ha ngaahi faingamālie ke fakaʻatā ai kinautolu ke nau fakahaaʻi ʻa e ngaahi fehuʻi ko iá ʻi he kalasí. Fakaafeʻi ke nau kumi ʻa e ngaahi talí ʻi he lolotonga ʻa e lēsoní pea ʻi heʻenau ako fakatāutahá.

Teuteu ʻa e tokotaha akó: Fakaafeʻi ʻa e kau akó ke nau omi mateuteu ke vahevahe ʻa e ngaahi fehuʻi ʻoku nau maʻu fekauʻaki mo e Fakamaau Fakaʻosí. Fakakaukau ke fakaʻaongaʻi ha savea ʻoku ʻikai fakahā ai ʻa e hingoá ke fakaʻatā ʻa e kau akó ke nau ʻomi ʻenau ngaahi fehuʻí kimuʻa he kalasí. ʻE lava ke tataki koe heʻenau ngaahi fehuʻí ʻi hono teuteuʻi ha lēsoni ke feau ʻenau ngaahi fiemaʻú.

Ngaahi ʻEkitivitī Ako ʻOku Ala Fakahokó

Ko e sivi fakaʻosí

Ko e taumuʻa ʻo e ʻekitivitī ko ʻení ke tokoniʻi ʻa e kau akó ke nau fakatokangaʻi hono mahuʻinga ʻo e mateuteu ki he Fakamaau Fakaʻosí.

Kimuʻa pea kamata ʻa e kalasí, fakakaukau ke teuteuʻi mo fakaʻaliʻali ha ngaahi fakahinohino ʻoku hangē ʻokú ne fakahaaʻi ʻe fai ha sivi fakaʻosi fakatuʻupakē lolotonga ʻa e kalasí he ʻaho ní. Hili iá, fakakaukau ke kamata ʻaki ʻa e kalasí hano ʻeke ki he kau akó ha ngaahi fehuʻi faingataʻa hangē ko ʻení:

1. Ko e ngaahi veesi ʻe fiha ʻi he Tohi ʻa Molomoná?

2. ʻOku tuʻo fiha ʻa e ʻasi ʻa e huafa ʻo Kalaisí pe ko e taha ʻo Hono ngaahi huafá ʻi he Tohi ʻa Molomoná?

3. Ko e kau Leimana ʻe toko fiha naʻe fakaului ʻe he akonaki ʻa Nīfai mo Līhai ʻi he Hilamani 5?

Fakakaukau pe te ke lava ʻo tali totonu ʻa e ngaahi fehuʻi ko ʻení taʻe te ke mateuteu ki ai.

• ʻE kehe fēfē nai hoʻo ongo fekauʻaki mo e siví kapau naʻe tomuʻa tala atu ia ʻe hoʻo faiakó peá ne ʻoatu mo ha tohi fakahinohino ako naʻe fakataumuʻa ke ne teuteuʻi koe ki he siví?

• Neongo he ʻikai kole mai ke tau vahevahe ha ngaahi moʻoniʻi meʻa mei he folofolá ʻi he Fakamaau Fakaʻosí, ka ko e hā ha ngaahi founga ʻe lava ke fakafehoanaki ai ʻa e Fakamaau Fakaʻosí ki ha sivi kuo pau ke tau fakahoko kotoa ʻi ha ʻaho? Ko e hā ha ngaahi founga ʻe kehe ai ia mei hono fai ha sivi fakaakó?

Ko ha founga ʻe taha ʻe ala tali ʻaki ʻe he kau akó ʻa e fehuʻi kimuʻá ko hono fakamamafaʻi ʻe lahi ange ʻa e fekauʻaki ʻa e fakamāú mo e meʻa kuo tau aʻusiá ʻi heʻene fekauʻaki mo e meʻa ʻoku tau ʻiló (vakai, Dallin H. Oaks, “The Challenge to Become,” Ensign, Nov. 2000, 32–34). Fakaafeʻi ʻa e kau akó ke nau fakakaukau fakalongolongo ki he anga ʻo ʻenau ongo fekauʻaki mo e Fakamaau Fakaʻosí. ʻE lava ke fakaʻaongaʻi ʻa e palakalafi ko ʻení ke tokoni ke tataki ʻenau fakakaukaú.

Fakalaulauloto ki he tuʻunga mateuteu ‘okú ke ongoʻi ki he Fakamaau Fakaʻosí. ʻOkú ke ʻilo nai ʻa e founga ke mateuteu ki aí? Ko e hā e ʻuhinga ʻokú ke fie mateuteu ai ki aí?

ʻOku ʻofa ʻa e Tamai Hēvaní mo Sīsū Kalaisi ʻiate koe pea kuó Na ʻosi foaki mai ʻa e folofolá ke tokoniʻi koe ke ke ʻiloʻi mo teuteu ki he ʻaho te ke “tuʻu [ai] ʻi he nofoʻanga fakamaau ʻo Kalaisí” (Molomona 3:20). ʻI hoʻo akó, kumi ʻa e ngaahi moʻoni ʻe lava ʻo tokoni atu ke ke mateuteu ai ke taukaveʻi ʻi he loto-falala mo e fiefia ʻi he ʻao ʻo Sīsū Kalaisí ʻi he Fakamaau Fakaʻosí.

Naʻe akonaki ʻa Molomona fekauʻaki mo e Fakamaau Fakaʻosí

Naʻe ʻofa ʻa Molomona ʻi he kakai Nīfaí pea naʻe tuʻo lahi ʻene tataki kinautolu ʻi he taú. Naʻá ne kole kiate kinautolu ke nau fakatomala mei heʻenau faiangahalá pea tafoki ki he Fakamoʻuí. Ka neongo iá, naʻa nau fakasītuʻaʻi ʻa e ʻEikí pea pōlepole ʻi honau ivi pē ʻonautolú, ʻo fuakava ʻi ha ngaahi fakapapau toputapu ʻa ia naʻe akoʻi ke ʻoua naʻa nau teitei fakaʻaongaʻi, ko ia naʻe ʻikai ai ke toe tataki kinautolu ʻe Molomona ʻi ha vahaʻataimi (vakai, Molomona 3:10–16). Naʻá ne akonaki leva fekauʻaki mo e Fakamaau Fakaʻosí ʻa ia ʻe fehangahangai mo e faʻahinga kotoa pē ʻo e tangatá.

Fakakaukau ke fakaʻaliʻali pe ʻoange ki he kau akó ʻa e saati ko ʻení pea fakaafeʻi ke nau fakakakato ia mo haʻanau hoa pe kulupu tokosiʻi.

ʻI he tafaʻaki toʻohema ʻo hoʻo sātí, hiki ai ha lisi ʻo e ngaahi fehuʻi ʻokú ke maʻu fekauʻaki mo e Fakamaau Fakaʻosí hangē ko e ngaahi sīpinga ʻoku ʻoatú.

Ngaahi Fehuʻi ʻoku ou maʻu fekauʻaki mo e Fakamaau Fakaʻosí	Ngaahi tali, ngaahi fakakaukau, mo e ngaahi ongo naʻá ku maʻú
Ngaahi Fehuʻi ʻoku ou maʻu fekauʻaki mo e Fakamaau Fakaʻosí Ko hai te ne fakamāuʻi aú?	Ngaahi tali, ngaahi fakakaukau, mo e ngaahi ongo naʻá ku maʻú
Ngaahi Fehuʻi ʻoku ou maʻu fekauʻaki mo e Fakamaau Fakaʻosí Ko e fē taimi ʻe fakamāuʻi ai aú?	Ngaahi tali, ngaahi fakakaukau, mo e ngaahi ongo naʻá ku maʻú

Hili hono hiki ʻe he hoa pe kulupu takitaha ʻenau ngaahi fehuʻí, fakaafeʻi ke nau vahevahe ʻenau ngaahi fehuʻí mo ha hoa pe kulupu ʻe taha. Fakakaukau ke fakaafeʻi ʻa e kau akó ke lisi ha niʻihi ʻo ʻenau ngaahi fehuʻí ʻi he palakipoé ke fakaʻaongaʻi ʻamui ange ʻi he lēsoní.

Lau ʻa e ngaahi lea ʻa Molomoná ʻi he Molomona 3:18–22; 6:17–22 ke kumi ʻa e tali ki he ngaahi fehuʻi naʻá ke lisí. Hiki ha ngaahi fakakaukau ʻokú ke maʻu ʻi he kōlomu toʻomataʻu ʻo hoʻo sātí, kau ai ʻa e fakamoʻoni fakafolofola naʻá ke maʻu ai ʻa e fakakaukau takitaha.

Ko e nofoʻanga fakamaau ʻo Kalaisí

Ko ha moʻoni ʻe taha ʻoku tau ako mei he ngaahi potufolofola ko ʻení te tau tuʻu kotoa ʻi he ʻao ʻo e nofoʻanga fakamaau ʻo Kalaisí ke fakamāuʻi ʻetau ngaahi ngāué, ʻo tatau ai pē pe ʻoku lelei pe kovi. Fakakaukau ke fakaʻilongaʻi ʻa e ngaahi kupuʻi lea ʻoku nau akoʻi mai ʻa e moʻoni ko ʻení ʻi he Molomona 3:20.

• Ko e hā ka fakafiemālie ai ke ʻiloʻi ko e Fakamoʻuí ʻa hotau Fakamāú? (Lekooti hoʻo talí ʻi he kōlomu toʻomataʻu ʻo hoʻo sātí).

Ke maʻu ha tokoni ki hono tali ʻa e fehuʻi kimuʻá, te ke lava ʻo lau ʻa e ʻAlamā 7:11–13, ʻo kumi ʻa e meʻa naʻe aʻusia ʻe he Fakamoʻuí ʻoku malava ke Ne maʻu ai ha mahino lelei kiate kitautolu ʻi he Fakamāú. Te ke lava foki ʻo fanongo ki ha fakamatala meia Palesiteni Tāleni H. ʻOakesi ʻo e Kau Palesitenisī ʻUluakí ʻi he “Ko e Palani Lahí” mei he taimi 14:06 ki he 14:51 ʻoku maʻu ʻi he ChurchofJesusChrist.org.

Fakakaukau ke tauhoa pe fakakulupu iiki ʻa e kau akó ki he ʻekitivitī ko ʻení pea vahe ki he kulupu takitaha ha taha ʻo e ngaahi maʻuʻanga tokoni ke akó.

Mahalo ʻe kei ʻi ai pē haʻo ngaahi fehuʻi mo ha ngaahi meʻa ʻokú ke hohaʻa ki ai fekauʻaki mo e Fakamaau Fakaʻosí. Fekumi ki ha toe ngaahi tali mo ha ngaahi fakakaukau ʻo fakaʻaongaʻi ʻa e ngaahi maʻuʻanga tokoni ʻi laló pe ngaahi maʻuʻanga tokoni fakalangi kehé. Hiki ‘a e ngaahi fakakaukau te ke maʻú ‘i he kōlomu toʻomataʻu ‘o hoʻo sātí.

• Fakahinohino ki he Ngaahi Folofolá ʻi he “Fakamaau Fakaʻosí, Ko e”

• Topical Guide ʻi he “Judgment, the Last”

• Mōsaia 3:10; 3 Nīfai 27:13–20

• Tokāteline mo e Ngaahi Fuakava 45:3–5; 58:42–43; 137:9

ʻE lava ke fakaafeʻi ha mēmipa ʻo e kulupu takitaha ke ne vahevahe ha ngaahi fakakaukau mei he ngaahi maʻuʻanga tokoni naʻe ako ʻe he kulupú koeʻuhí ke lava kotoa ʻa e kalasí ʻo ako mei he maʻuʻanga tokoni takitaha.

Kapau ʻoku ʻi ai ha ngaahi fehuʻi ʻa e kau akó pe ko hai ʻe kau ʻi hono fakamāuʻi kitautolú, fakakaukau ke vahevahe ʻa e ngaahi fakamoʻoni fakafolofola ʻi he konga ʻuluaki ʻo e konga ki he Fakamatala Fakamahinó mo e Puipuituʻá.

Mahalo te ke fie fanongo foki ki he ngaahi akonaki kehe meia Palesiteni ʻOakesi fekauʻaki mo e Fakamaau Fakaʻosí ʻi he “ʻOfa Fakalangi ʻi he Palani ʻa e Tamaí” mei he taimi 1:44 ki he 3:32, pe “Maʻa he Fakatomalá” mei he taimi 8:09 ki he 12:03, ʻoku fakatou maʻu ʻi he ChurchofJesusChrist.org.

Tuku ki he kau akó ke nau vakai ki he ngaahi fehuʻi naʻe lekooti kimuʻa ʻi he palakipoé. Fakakaukau ke ʻoange ki ha kau ako ʻe niʻihi ha peni fakaʻilonga ke tohi ʻa e ngaahi tali ne nau maʻú ʻi he tafaʻaki ʻo e ngaahi fehuʻi totonú. Hili iá pea tuku ki he kau akó ke nau ʻoange ʻa e peni fakaʻilongá ki ha niʻihi kehe ke nau fai ʻa e meʻa tatau. Toutou fai pehē pē kae ʻoua kuo tohi ʻe he kau ako kotoa pē ʻoku loto-fiemālie ke nau hiki ʻa e meʻa naʻa nau maʻú. Hili iá pea fakaafeʻi ʻa e kau akó ke vahevahe ʻenau tali ki he ngaahi fehuʻi ko ʻení:

• Ko e hā ha ngaahi moʻoni fekauʻaki mo e Tamai Hēvaní, ko Sīsū Kalaisi, ko e fakatomalá, pea mo e Fakamaau Fakaʻosí te ke vahevahe mo ha taha ʻoku tailiili fekauʻaki mo e Fakamaau Fakaʻosí? Ko e hā hono ʻuhingá?

Mahalo naʻa ʻi ai ha ngaahi fakamatala ʻi he konga Fakamatala Fakamahinó mo e Puipuituʻá ʻe ala tokoni ke tali ʻe he kau akó ʻa e fehuʻi kimuʻá.

Loto-falala ʻi he ʻAho Fakamāú

Fakaafeʻi ʻa e kau akó ke fakalaulauloto fakalongolongo ki he meʻa ko ʻení:

Fakakaukau ki he ongo kuó ke maʻu lolotonga ʻa e ako ko ʻení. ʻOkú ke ongoʻi loto-falala mo fiefia ange nai ki he Fakamaau Fakaʻosí ʻi he meʻa naʻá ke ongoʻi kimuʻa he lēsoni ko ʻení? Ko e hā e ʻuhinga ʻokú ke ongoʻi pehē aí? Ko e hā ‘a e meʻa ‘oku ueʻi koe ‘e he Laumālie Māʻoniʻoní ke ke faí?

Faʻu ha palani ʻi hoʻo tohinoa akó ke ke kamata teuteu fakamātoato ange ai ki he Fakamaau Fakaʻosí. Fakalaulauloto pea fili ha ngāue ʻe taha te ke lava ʻo fai ke tokoniʻi koe ke ke ongoʻi ha loto-falala mo ha fiefia lahi ange ʻi hoʻo teuteu ke tuʻu ʻi he ʻao ʻo Kalaisí. Hangē ko ʻení, ko e fakatomala fakamātoato ʻi he ʻaho kotoá ko ha founga mālohi ia ke maʻu ai ʻa e “fiefia mo e nonga ʻo e ʻatamaí.” (Vakai, Russell M. Nelson, “Te Tau Lava ‘o Fai Lelei Ange pea Toe Lelei Ange,” Liahona, Mē 2019, 67.) Tukupā ke muimuiʻi hoʻo palaní.

Fakamatala Fakamahinó mo e Puipuituʻá

Molomona 3:17–22. Ko hai ʻe kau ʻi hono fakamāuʻi kitautolú?

ʻOku akoʻi mai ʻe he folofolá ʻe ʻi ai ʻa e ngaahi maʻuʻanga tokoni ʻe nima te nau kau ʻi hono fakamāuʻi kitautolú:

1. Ko kitautolu (vakai, ʻAlamā 41:3–7)

2. Ngaahi folofolá (vakai, 2 Nīfai 25:18; 29:11; 33:14; 3 Nīfai 27:25–26)

3. Kau ʻAposetoló (vakai, Mātiu 19:27–30; 1 Nīfai 12:9; 3 Nīfai 27:27; Molomona 3:18; Tokāteline mo e Ngaahi Fuakava 29:12)

4. Sīsū Kalaisi (vakai, Sione 5:22; 2 Nīfai 9:41; 3 Nīfai 27:14)

Naʻe fakamatalaʻi ʻe ʻEletā Pulusi R. Makongikī (1915–85) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fatongia ʻo e Fakamoʻuí ʻi Heʻene hoko ko e Fakamāú.

ʻE ʻi ai ha ngaahi fakatuʻutuʻunga kakato ʻo e kau fakamaau te nau fakamāuʻi ʻa e kakai angatonú ʻi he malumalu ʻo Kalaisí. Ko Ia toko taha pē te Ne fakahoko ʻa e ngaahi tuʻutuʻuni ki hono fakamalaʻiaʻi ʻo e kakai faiangahalá. (Bruce R. McConkie, The Millennial Messiah: The Second Coming of the Son of Man [1982], 520)

Ko e hā ʻa e meʻa ʻe fakatefito ai hotau fakamāuʻí?

Naʻe fakamatala ʻe Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

Ko e Fakamaau Fakaʻosí ʻoku ʻikai ko hano fakafuofuaʻi pē ia ʻo e fakakātoa ʻo ʻetau ngaahi ngāue leleí mo e ngāue koví—ʻo e meʻa kuo tau faí. Ka ko hano fakahā ia ʻo e ola aofangatuku ʻo ʻetau ngāué mo e fakakaukaú—ʻa e meʻa kuo tau aʻusiá. ʻOku ʻikai feʻunga ke tau muimui pē ki he ngaahi meʻa ʻoku faí. Ko e ngaahi fekau, ngaahi ouau mo e ngaahi fuakava ʻo e ongoongoleleí, ʻoku ʻikai ko ha lisi ia ʻo e ngaahi meʻa ʻoku fiemaʻu ke fakahū ki ha ʻakauni fakalangi. Ko e ongoongolelei ʻo Sīsū Kalaisí ko ha palani ia ʻokú ne fakahā mai kiate kitautolu ʻa e founga ke tau aʻusia ai ʻa e tuʻunga ʻoku finangalo ʻa ʻetau Tamai Hēvaní ke tau aʻusiá. (Dallin H. Oaks, “The Challenge to Become,” Liahona, Nov. 2000, 32)

ʻE tokoni fēfē nai ʻa e fakatomalá ke teuteuʻi kitautolu ki he Fakamaau Fakaʻosí?

Naʻe akonaki ʻa Palesiteni Lāsolo M. Nalesoni ʻo pehē:

Ko ʻetau feinga taupotu taha ʻi he moʻuí ke tau teuteu ke feʻiloaki mo hotau Tupuʻangá. ʻOku tau fai ʻeni ʻaki haʻatau faifeinga fakaʻaho ke tatau ange mo hotau Fakamoʻui, ko Sīsū Kalaisí. Pea ʻoku tau fai ia ʻi heʻetau fakatomala fakaʻahó mo maʻu Hono mālohi faifakamaʻá, faifakamoʻui, mo faifakamālohiá. (Russell M. Nelson, “Pōpoaki Kamatá,” Liahona, Mē 2020, 6)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Fakakaukau ke fakaafeʻi ʻa e kau akó ke fakakaukauloto ki he Fakamaau Fakaʻosí mo e fehangahangai mo e Fakamoʻuí. Kole ange ke nau lekooti ʻa e ngaahi fakakaukau mo e ngaahi ongo te nau ala maʻu ʻi he tūkunga ko ʻení. Fakaafeʻi ke nau ako ʻa e lēsoni ko ʻení, ʻo kumi ʻa e ngaahi moʻoni ʻe ala tokoni ke nau fehangahangai ai mo e aʻusia ko ʻení ʻi he loto-falala mo e fiefia lahi ange.

Molomona 2:10–15. “Mamahi ʻi he ʻao ʻo e ʻEikí”

Kapau ʻe ʻaonga ki he kau akó hono ako ʻo e faikehekehe ʻo e mamahi ʻoku fakaiku ki he fakatomalá mo e mamahi ʻoku ʻikaí, fakakaukau ke fakaafeʻi ke nau lau ʻa e Molomona 2:10–15, ʻo kumi ʻa e meʻa naʻe maʻu ai ʻe Molomona ha ʻamanaki lelei ki he kahaʻu ʻa hono kakaí pea mo e meʻa naʻá ne fakatupunga ʻene toe loto-mamahí.

Tokoni ke ʻiloʻi ʻe he kau akó ʻa e foʻi moʻoni ʻi he potufolofola ko ʻení ko e mamahi ʻoku fakatau ki he fakatomala moʻoní ʻoku tokoni ia ke tau maʻu ʻa e ʻaloʻofa mo e kātaki fuoloa ʻa Sīsū Kalaisí.

Fakaafeʻi ʻa e kau akó ke nau aleaʻi ʻa e founga ʻe lava ai ʻe ha toʻu tupu ʻoku loto-mamahi ʻi he ngaahi fili kuó ne faí ʻo tafoki ki he Fakamoʻuí ke maʻu ha fakafiemālié.

Molomona 3:9–15. ʻE fakatupu ʻe he polepole ʻi hotau ivi pē ʻotautolú ke mole ai ʻa e mālohi ʻo e ʻOtuá meiate kitautolu

Kole ki he kau akó ke nau vahevahe ʻa e founga ʻoku kehe ai ʻa e loto-falalá mei he polepolé pea mo e ʻuhinga ʻe ala mahuʻinga ai ʻa e faikehekehe ko iá.

Kole ange ke nau ako ʻa e Molomona 3:9–15 pea kumi ʻa e ngaahi ola ʻo e polepole ʻa e kau Nīfaí ʻi honau ivi pē ʻonautolú.

ʻE lava leva ke fekumi ʻa e kau akó ʻi he Fakahinohino ki he Ngaahi Folofolá ʻi he “Loto-hīkisiá.” Te nau lava ʻo kumi ha ngaahi sīpinga lahi ange ʻo e founga ʻoku mole ai meiate kitautolu ʻa e ivi mei he ʻOtuá ʻi he taimi ʻoku tau polepole ai ʻi hotau ivi pē ʻotautolú.

Fakaafeʻi ʻa e kau akó ke nau lisi ha ngaahi ʻulungaanga faka-Kalaisi ʻe niʻihi ʻe ala tokoni ke tau fakaʻehiʻehi ai mei he polepolé. ʻE lava ke fai ʻe he kau akó ha tohi pē kiate kinautolu ʻi he kahaʻú, ʻo vahevahe ʻa e meʻa ne nau ako mo ongoʻi ʻe ala tokoni ke nau fakaʻehiʻehi ai mei he falala mo e polepole ʻi honau ivi pē ʻonautolú.

Fakakaukauloto ki he Fakamāú

Hili hono ako ʻa e Molomona 3, fakakaukau ke fakaafeʻi ʻa e kau akó ke nau fakakaukauloto ʻoku nau ʻi he Fakamāú mo e Tamai Hēvaní mo Sīsū Kalaisi. Lau ʻa e Tokāteline mo e Ngaahi Fuakava 45:3 pea fakamanatu kiate kinautolu ʻa e fatongia ʻo e Fakamoʻuí ʻi Heʻene hoko ko honau taukapó. Kole ange ke nau fakakaukauloto ʻoku folofola ʻaki ʻe he Fakamoʻuí ʻa e ngaahi lea ʻi he Tokāteline mo e Ngaahi Fuakava 45:4–5. Ko hai ʻoku fakaafeʻi ʻe he Fakamoʻuí ʻa e Tamai Hēvaní ke Ne ʻafio ki aí? Ko e hā hono ʻuhingá?

Kole ange ke nau vahevahe ʻa e founga ʻoku ʻoange ai ʻe he fakakaukauloto ki he ngaahi veesi ko ʻení ha loto-falala ki he Fakamāú pea mo hono ʻuhingá.