“Mamona 1–2: O Le Perofeta o Mamona,” Tusi Lesona a le Faiaoga o le Tusi a Mamona (2024)
“Mamona 1–2,” Tusi Lesona a le Faiaoga o le Tusi a Mamona
Mamona 1–2
O le Perofeta o Mamona
A o e taumafai e mulimuli ia Keriso, o nisi taimi atonu e te maitauina ai e ese lau amio nai lo tagata o siomiaina oe. Atonu na e mafaufau, “E mafai faapefea ona lava lou malosi e mulimuli ai ia Keriso pe a foliga mai e le o mulimuli isi ia te Ia?” Sa oo foi le perofeta o Mamona i ni tulaga talitutusa a o talavou o ia. O lenei lesona e mafai ona fesoasoani ia te oe e malamalama ai mai le faataitaiga a Mamona i le ala e mulimuli ai ia Keriso tusa lava po o a mea e filifili isi e fai.
Aoao tagata aoga e vaavaai mo uiga o le Faaola i olaga o isi. O loo i ai i tusitusiga paia le tele o tala o alii ma tamaitai faamaoni o e na faataitaia uiga o Iesu Keriso. Fesoasoani i tagata aoga e aoao e uiga i le Faaola e ala i le suesueina o olaga o i latou o e taumafai e faataitai ia te Ia.
Sauniuniga a le tagata aoga: Valaaulia tagata aoga e o mai saunia e faasoa mai ni aafiaga ina ua latou filifili ia ese ai mai isi ina ia mulimuli ia Iesu Keriso ma pe aisea na aoga ai.
Gaoioiga e Ono Mafai Ona Aoao Ai
Tu matila ai o se soo o Iesu Keriso
Mafaufau e faaali atu se ata faapenei o loo faaalia ai se mea e matua manino le ese ai mai mea o loo siomia ai. Ona fai atu lea o fesili nei:
-
O a faatusatusaga e mafai ona e faia i le va o lenei ata ma se tasi o loo taumafai e mulimuli ia Keriso i le lalolagi i aso nei?
-
O a nisi o tulaga e filifili ai le autalavou i le va o le faia o le mea sao ma le mulimuli i mea o loo faia e isi o loo siomia ai i latou?
A o amata ona e suesue i le soifuaga ma aoaoga a le perofeta o Mamona, vaavaai mo malamalamaaga e mafai ona fesoasoani ia te oe e mulimuli ai i le Faaola pe a ese le filifiliga a isi o loo siomia ai oe.
O le perofeta o Mamona
Mafaufau e faaali atu le ata lenei o Mamona. Fai atu i se volenitia e faamatala mai po o a papatusi uamea o loo ia galue ai. Afai e manaomia, faasoa atu le faamatalaga mai le parakalafa lenei.
Na filifilia Mamona e le Atua e faasaoina ma puipuia faamaumauga paia a lona nuu ma faaopoopo atu i ai lona lava talafaasolopito ma aafiaga ia i latou. O nisi o talafaamaumau sa ia tusia, otootoina, ma faasaoina o le a faaliliuina mulimuli ane e le Perofeta o Iosefa Samita o le Tusi a Mamona.
Mo se aafiaga e sili atu ona fesootai, e mafai ona e faia mea nei: Valaaulia tagata aoga e mafaufau faapea o loo latou fatuina se talaaga otooto o ala o faasalalauga faaagafesootai mo Mamona po o le sauniuni e faailoa atu o ia i se vaega o tagata. Taofi pe a uma seti o fuaiupu taitasi ma valaaulia tagata aoga e faaopoopo se mea na latou aoaoina i le talaaga otooto po o le faatomuaga.
Faitau fuaitau o mau nei e aoao ai ni nai mea e uiga ia Mamona:
-
O le a se mea na tulagaese ia te oe mai faamatalaga a Mamona?
E oo lava i le avea ai ma se alii talavou, sa tatauia Mamona ona filifili pe mafai ona ia mulimuli i mea sa faia e le toatele o loo siomia ai o ia, pe sa naunau foi o ia e tu matila o se soo o Iesu Keriso.
Atonu e te manatua lou aoaoina ai e uiga i le malo amiotonu lea na faavaeina ina ua mavae le asiasiga a le Faaola i Amerika. O le mea e faanoanoa ai, ina ua mavae le toeitiiti atoa le 200 tausaga o ola amiotonu, sa amata ona faamaualuga sa Nifae ma sa Lamana. Mulimuli ane, sa oo ina latou amioleaga tele ma fefinauai (tagai 4 Nifae 1:24–49).
Faitau le Mamona 1:13–14, 16; 2:18–19, ma vaavaai mo le faamatalaga a Mamona o le sosaiete sa ia ola a’e ai.
-
O le a se mea ua e aoaoina mai le faataitaiga a Mamona?
O se upumoni e tasi e ono faailoa mai e tamaiti aoga e faapea, e mafai ona tatou filifili e mulimuli i le Faaola, tusa lava pe le faia e isi o loo siomiaina i tatou. Atonu e te manao e tusi lenei upumoni i luga o le laupapa.
Ona o le amiotonu o Mamona, na ia maua ai faamanuiaga ofoofogia mai le Atua, e oo lava foi ina o talavou. Faitau le Mamona 1:15, ma vaavaai mo se tasi o nei faamanuiaga.
-
O a ni auala e ono faamanuiaina ai se talavou i aso nei i le “[tofo] ma [iloa] o le agalelei o Iesu”?
O tali e mafai ona i ai i lenei fesili e aofia ai le faamagaloina mo agasala po o le lagonaina o le filemu i taimi faigata. Atonu foi e ta’ua e tagata aoga ni taimi na latou lagonaina ai le malosi o Iesu e fesoasoani ia i latou e faia se mea latou te lei lagonaina le agavaa po o le gafatia e fai ai.
-
Na faapefea ona faamanuiaina oe e le Tama Faalelagi mo le mulimuli i le faataitaiga a Iesu Keriso tusa lava pe le o faia e isi?
Afai e saunia tagata aoga e faailoa atu ia Mamona pe saunia se talaaga otooto o ala o faasalalauga faaagafesootai mo ia, valaaulia i latou e faasoa mai mea na latou saunia ma se vaega toalaiti.
Faataitaiga a Mamona
O le faataitaiga a Mamona e mafai ona fesoasoani ia te oe e faailoa ai nisi o auala patino e mafai ona e mulimuli ai ia Keriso e tusa lava pe le mulimuli isi o siomia oe. O gaoioiga nei e mafai ona fesoasoani ia te oe e faalolotoina ai lou malamalama i uiga o Mamona ma faailoa ai auala e faaaoga ai i le mulimuli ai ia Keriso.
Mafaufau e vaevae le vasega i ni vaega toalaiti. Tofi atu i vaega taitasi se tasi o uiga auaumama nei e suesue iai, ma tuu atu ia i latou pepa e tufa atu e o faatasi ai. Ona valaaulia lea o tagata aoga e lipoti mai mea na latou aoaoina i se vaega na suesueina isi uiga auaumama.
Gaoioiga 1
O le mafaufau lelei
Tusi Lesona a le Faiaoga o le Tusi a Mamona (2024)—“Mamona 1–2: O Le Perofeta o Mamona”
Faitau le Mamona 1:2, 15, ma mafaufau e faailoga le upu “mafaufau lelei.” (Atonu e te tusia i au tusitusiga paia e faapea o le mafaufau lelei e mafai ona faauigaina o le migao, manatu mamafa, ma le mafaufau loloto.)
Faitau le saunoga lenei a Peresitene Boyd K. Packer, (1924–2015) o le Korama a Aposetolo e Toasefululua:
Ua matou vaaia uiga faaaloalo ma le le faaaloalo i totonu o le Ekalesia. E ui lava e toatele e ao ona tuuina atu i ai le faamalo, ae ua solomuli malie lava i tatou i tua. E i ai se pogai ua matou matua atugalu loloto ai lava. …
O le le faaaloalo e talafeagai tonu ma faamoemoega o le fili, e ala i le faalavelaveina o fesootaiga faaeteete gata o faaaliga i le mafaufau ma le agaga. (Boyd K. Packer, “O Le Faaaloalo Na te Valaaulia Faaaliga,” Liahona,, Nov. 1991, 22)
-
O a nisi o mea e tatau ona taulimaina ma le migao ma le faamaoni lea o loo taulimaina ma le le migao e nisi?
-
O a nisi o auala ua faaalia ai e le Faaola le mafaufau lelei(migao, manatu mamafa, ma le magafagafa)?
© 2023 by Intellectual Reserve, Inc. Ua taofia aiā tatau uma.
Gaoioiga 2
O le vave ona maitau
Tusi Lesona a le Faiaoga o le Tusi a Mamona (2024)—“Mamona 1–2: O Le Perofeta o Mamona”
Faitau le Mamona 1:2 ma mafaufau e faailoga le fasifuaitau “vave ona e matau.”
Faitau le saunoaga lenei a Elder David A. Bednar o le Korama a Aposetolo e Toasefululua:
Pe a televave ona tatou maitau, e vave ona vaai pe matau ma usitai. O elemene taua uma nei e lua—o le vaai ma usitai—e taua i le faatelevave ai o le maitau. Ma o le perofeta o Mamona o se faataitaiga lelei lea o le faatinoina o lenei meaalofa. (David A. Bednar, “Quick to Observe,” Ensign, Tes. 2006, 32)
-
O a aoaoga ua e iloa e aoga i le vave ona maitau ma usitai? Aisea?
-
O le a se fautuaga o le a e tuuina atu i se uo e lagona e mafai ona faatali le usiusitai i le Alii seia oo i se taimi mulimuli ane o le olaga?
-
Na faapefea ona faaaoao mai e Iesu Keriso le vave ona maitau?
© 2023 by Intellectual Reserve, Inc. Ua taofia aiā tatau uma.
Fesoasoani ma le malosi e tumau faamaoni ai
Mafaufau e vaevae tagata aoga i ni vaega toalaiti e faamaea ai le gaoioiga lenei. Ona valaaulia lea o i latou e faasoa mai a latou tali i le vasega.
Ina ia fesoasoani ia te oe e faailoa auala e faaaoga ai nei uiga faaKeriso i lou lava olaga, lisi ia le itiiti ifo ma le lua ni luitau o feagai ma le autalavou a o ola i le lalolagi i aso nei. Ona tusi lea pe mafai faapefea e se tasi po o uiga uma e lua sa e suesueina ona fesoasoani i le autalavou ia maua le fesoasoani ma le malosi mai le Tama Faalelagi ma Iesu Keriso.
Mafaufau e faasoa atu faamanuiaga ua e maua e ala i le mulimuli ia Keriso. Ona fautuaina lea o tagata aoga e fai se fuafuaga e faatino ai mea sa latou aoaoina ma lagonaina i le asō.