Mamona 3

“O Le A Outou Tutula’i Uma i Luma o le Nofoa-Faamasino o Keriso”

Pe na i ai se taimi na e mafaufau ai pe o le a faape’ī le Faamasinoga Mulimuli? A o vaavaai atu Mamona i le amioleaga o lona nuu, sa ia aoao atu e uiga i lē o le a faamasinoina i tatou ma le ala o le a faamasinoina ai i tatou i lenei Faamasinoga Mulimuli. O lenei lesona e mafai ona fesoasoani e saunia ai oe e tu atu ma le mautinoa ma le olioli i luma o Iesu Keriso i le Faamasinoga Mulimuli.

O le valaauliaina o tagata aoga e fai ni fesili. A o e vaai i autu i tusitusiga paia atonu e masani ona i ai ni fesili a tagata aoga, vaavaai mo avanoa e faataga ai i latou e faaleo na fesili i le vasega. Valaaulia i latou e saili tali i le taimi o le faagasologa o le lesona ma i a latou lava suesuega faaletagata lava ia.

Sauniuniga a le tagata aoga: Valaaulia tagata aoga e o mai saunia e faasoa mai ni a latou fesili e uiga i le Faamasinoga Mulimuli. Mafaufau e faaaoga palota le faailoaina e faataga ai tagata aoga e auina mai ai a latou fesili a o lei amataina le vasega. O a latou fesili e mafai ona taialaina ai oe i le sauniaina o se lesona e fetaui ma o latou manaoga.

Gaoioiga e Ono Mafai Ona Aoao Ai

O le suega mulimuli

O le faamoemoega o le gaoioiga lenei o le fesoasoani lea i tagata aoga ia iloa le taua o le saunia ai mo le Faamasinoga Mulimuli.

A o lei amataina le vasega, mafaufau e saunia ma faaali atu faatonuga e foliga mai e faailoa mai ai o le a i ai se suega faaiu e faateia ai po o se iloiloga i le taimi o le vasega i le aso. Ona, i le amataina ai o le vasega, mafaufau e fai atu i tagata aoga ni fesili faigata e pei o nei:

1. E fia fuaiupu o loo i ai i le Tusi a Mamona?

2. E faafia ona ta’ua Keriso i se tasi o Ona suafa po o faalagiga i le Tusi a Mamona?

3. E toafia sa Lamana na liua i aoaoga a Nifae ma Liae o loo i le Helamana 5?

Mafaufau pe mafai ona e taliina sao nei fesili e aunoa ma se sauniuniga.

• Mata e ese faapefea ou lagona e uiga i le suega pe afai e ta’u muamua atu e lou faiaoga ia te oe e uiga i ai ma tuuina atu ia te oe se taiala suesue ua mamanuina e saunia ai oe mo lena suega?

• E ui o le a le talosagaina i tatou e faasoa atu ni mea moni mai tusitusiga paia i le taimi o le Faamasinoga Mulimuli, ae o a ni auala e mafai ai ona faatusatusa le Faamasinoga Mulimuli i se suega o le a tatou faia uma i se aso? O a ni auala o le a ese ai nai lo le faia o se suega faaleaoaoga?

O se tasi o auala e ono tali mai ai tagata aoga i le fesili na muamua atu o le faamamafa atu faapea o le faamasinoga o le a sili atu ona faatatau i [ituaiga o] tagata ua avea ai i tatou nai lo mea ua tatou iloa (tagai Dallin H. Oaks, “The Challenge to Become”, Liahona, Nov. 2000, 32–34). Valaaulia tagata aoga e manatunatu le leoa i o latou lagona e uiga i le Faamasinoga Mulimuli. O le parakalafa lenei e mafai ona faaaoga e fesoasoani e taiala ai o latou mafaufauga.

Mafaufau loloto pe o a ou lagona e uiga i lou saunia mo le Faamasinoga Mulimuli. E te iloa le auala e sauniuni i ai? Aisea ua e manao ai e te saunia i ai?

E alolofa le Tama Faalelagi ma Iesu Keriso ia te oe ma ua tuuina mai tusitusiga paia e fesoasoani e te iloa ai ma saunia ai mo le aso o le a e “tutula’i uma i luma o le nofoa-faamasino o Keriso” (Mamona 3:20). A o e suesue, vaavaai mo upumoni e mafai ona fesoasoani ia te oe e saunia ai e tu atu ma le mautinoa ma le olioli i luma o Iesu Keriso i le Faamasinoga Mulimuli.

Na aoao mai Mamona e uiga i le Faamasinoga Mulimuli

Sa alofa Mamona ia sa Nifae ma taitai ia i latou i le taua i le tele o taimi. Sa ia aioi atu ia i latou ia salamo i lo latou amioleaga ma liliu atu i le Faaola. Peitai, sa latou teena le Alii ma mitamitavale i lo latou lava malosi, ma tauto i tautoga paia sa aoaoina i latou e aua lava nei faaaogaina, o lea na musu ai Mamona e taitai i latou mo se taimi (tagai Mamona 3:10–16). Ona ia aoao atu lea e uiga i le Faamasinoga Mulimuli o le a feagai ma tagata uma.

Mafaufau e faaali atu pe tuu atu i tagata aoga le siata lenei ma valaaulia i latou e faauma ma se paga po o se vaega toalaiti.

I le itu agavale o lau siata, fai se lisi o fesili o loo ia te oe e uiga i le Faamasinoga Mulimuli e pei o faataitaiga ua tuuina atu.

O Fesili o loo ia te au e uiga i le Faamasinoga Mulimuli	O tali, malamalamaaga, ma uunaiga na ou maua
O Fesili o loo ia te au e uiga i le Faamasinoga Mulimuli O ai o le a faamasinoina a’u?	O tali, malamalamaaga, ma uunaiga na ou maua
O Fesili o loo ia te au e uiga i le Faamasinoga Mulimuli O afea o le a faamasinoina ai a’u?	O tali, malamalamaaga, ma uunaiga na ou maua

A uma ona lisi e paga po o vaega taitasi a latou fesili, valaaulia i latou e faasoa mai a latou fesili i se isi paga po o se vaega. Mafaufau e valaaulia tagata aoga e lisi nisi o a latou fesili i luga o le laupapa e faaaoga i se taimi mulimuli ane o le lesona.

Faitau upu a Mamona i le Mamona 3:18–22; 6:17–22 e saili ai tali i fesili na e lisiina. Lisi ni malamalamaaga e te maua i le koluma taumatau o lau siata, e aofia ai le mau faasino lea e te maua ai malamalamaaga taitasi.

O le nofoa faamasino o Keriso

O se upumoni e tasi ua tatou aoao mai nei fuaitau e faapea o le a tatou tutula’i uma i luma o le nofoa faamasino o Keriso ina ia faamasinoina i a tatou galuega, pe lelei pe leaga. Mafaufau e faailoga ia fasifuaitau o loo aoao mai ai lenei upumoni i le Mamona 3:20.

• Aisea e ono mafanafana ai le iloa e faapea o le Faaola o lo tatou Faamasino? (Faamaumau lau tali i le koluma taumatau o le siata).

Mo se fesoasoani i le taliina o le fesili na muamua atu, e mafai ona e faitauina le Alema 7:11–13, ma vaavaai mo mea na oo i le Faaola lea e mafai ai e Ia ona malamalama atoatoa ia i tatou i le Faamasinoga. E mafai foi ona e faalogologo i se saunoaga mai ia Peresitene Dallin H. Oaks o le Au Peresitene Sili i le “O Le Fuafuaga Sili” mai le faailo taimi 14:06 i le 14:51 o loo maua i le ChurchofJesusChrist.org.

Mafaufau e tuu tagata aoga i ni paga po o ni vaega toalaiti mo le gaoioiga lenei ma atofa atu i vaega taitasi se tasi o punaoa e suesue ai.

Atonu o loo i ai pea ni au fesili ma ni atugaluga e uiga i le Faamasinoga Mulimuli. Saili mo tali ma malamalamaaga faaopoopo e faaaoga ai punaoa o loo i lalo po o isi punaoa paia. Lisi malamalamaaga loloto sa e mauaina i le koluma taumatau o lau siata.

• Taiala i Tusitusiga Paia i lalo o le upuautū “Faamasinoga Mulimuli, O Le”

• Faamatalaga o le Taiala o Autu i lalo o le upuautū “Faamasinoga Mulimuli, O Le”

• Mosaea 3:10; 3 Nifae 27:13–20

• Mataupu Faavae ma Feagaiga 45:3–5; 58:42–43; 137:9

E mafai ona valaaulia se tagata o vaega taitasi e faasoa mai ni malamalamaaga loloto mai punavai na suesueina e le vaega ina ia mafai e le vasega atoa ona aoao mai punaoa taitasi.

Afai e i ai ni fesili a tagata aoga po o ai o le a aofia ai i lo tatou faamasinoga, mafaufau e faasoa atu mau faasino i le vaega muamua o le vaega o Manatau ma Talaaga o Faamatalaga.

Atonu foi e te manao e faalogologo i isi aoaoga mai ia Peresitene Oaks e uiga i le Faamasinoga Mulimuli i le “Alofa Paia i le Fuafuaga a le Tama” mai le faailo taimi 1:44 i le 3:32, po o le “Faamamaina e ala i le Salamo” mai le faailo taimi 8:09 i le 12:03, o loo maua uma i le ChurchofJesusChrist.org.

Faasino tagata aoga i fesili na tusia i luga o le laupapa i se taimi na muamua atu. Mafaufau e tuu atu i ni nai tagata aoga se peni maka e tusi ai tali na latou maua i tafatafa o fesili talafeagai. Ona tuu atu lea e tagata aoga peni maka i isi e faia ai lea lava mea e tasi. Toe fai seia tusi e tagata aoga naunautai uma se mea na latou maua. Ona, valaaulia lea o tagata aoga e faasoa mai a latou tali i fesili nei:

• O a upumoni e uiga i le Tama Faalelagi, Iesu Keriso, salamo, ma le Faamasinoga Mulimuli o le a e faasoa atu i se tasi o loo popole e uiga i le Faamasinoga Mulimuli? Aisea?

Atonu e i ai ni faamatalaga i le vaega o Manatu ma Talaaga o Faamatalaga e mafai ona fesoasoani i tagata aoga e tali ai le fesili na muamua atu.

Lotomautinoa i le Aso Faamasino

Valaaulia tagata aoga e mafaufau loloto filemu i fesili nei:

Mafaufau pe o a ni ou lagona i le taimi o lenei suesuega. O e lagonaina le sili atu po o le itiiti ifo o le lotomautinoa ma le olioli e uiga i le Faamasinoga Mulimuli nai lo le mea sa e lagonaina a o lei faia lenei lesona? Aisea e te faalogoina ai se lagona e pei ona e iai? O le a se mea o uunaia oe e le Agaga Paia e fai?

I lau api talaaga mo suesuega, fai se fuafuaga e amata tapena ai ma le naunautai mo le Faamasinoga Mulimuli. Mafaufau loloto ma filifili i se faatinoga se tasi e mafai ona e faia e fesoasoani ai ia te oe ia lagona atili le mautinoa ma le olioli a o e sauni e tu i luma o Keriso. Mo se faataitaiga, o le salamo faamaoni i aso taitasi o se auala mamana lea e maua ai le “fiafia ma le filemu o le mafaufau.” (Tagai i le Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67.) Tuuto e mulimuli i lau fuafuaga.

Manatu ma Talaaga o Faamatalaga

Mamona 3:17–22. O ai o le a aofia i lo tatou faamasinoga?

Ua aoao mai e tusitusiga paia o le a i ai e le itiiti ifo ma le lima punaoa o le a aofia ai i lo tatou faamasinoga:

1. I Tatou Lava (tagai Alema 41:3–7)

2. Tusitusiga Paia (tagai 2 Nifae 25:18; 29:11; 33:14; 3 Nifae 27:25–26)

3. Aposetolo (tagai Mataio 19:27–30; 1 Nifae 12:9; 3 Nifae 27:27; Mamona 3:18; Mataupu Faavae ma Feagaiga 29:12)

4. Iesu Keriso (tagai Ioane 5:22; 2 Nifae 9:41; 3 Nifae 27:14)

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua le matafaioi a le Faaola o se Faamasino.

O le a i ai se faagasologa atoa o faamasino o e, i lalo o Keriso, o le a faamasinoina e amiotonu. E na o Ia lava o le a tuuina atu tuutuuga o le malaia mo e amioleaga. (Bruce R. McConkie, The Millennial Messiah: The Second Coming of the Son of Man [1982], 520)

O le a le mea o le a faavae ai lo tatou faamasinoga?

Na faamatala mai e Peresitene Dallin H. Oaks o le Au Peresitene Sili:

O le Faamasinoga Mulimuli ua le na o se iloiloga o le tuuaofaiga atoa o amioga lelei ma le leaga—o mea sa tatou faia. O se faailoaga o aafiaga tupito o a tatou faatinoga ma mafaufauga—o tagata ua avea ai i tatou. E lē lava mo so o se tasi le tau lava ina fai. O poloaiga, sauniga, ma feagaiga o le talalelei ua le o se lisi o tupeteu e manaomia ona fai i se teugatupe faalelagi. O le talalelei a Iesu Keriso o se fuafuaga lea ua faaali mai ai ia i tatou le auala e avea ai ma tagata ua finagalo lo tatou Tama Faalelagi e avea ai i tatou. (Dallin H. Oaks, “The Challenge to Become,” Liahona, Nov. 2000, 32)

E mafai faapefea e le salamo ona saunia i tatou mo le Faamasinoga Mulimuli?

Na aoao mai Peresitene Russell M. Nelson:

O le tatou sailiga silisili lava i le olaga o le saunia lea e feiloai ma lo tatou Mataisau. Tatou te faia lenei mea e ala i le tauivi i aso taitasi ia avea atili e pei o lo tatou Faaola, o Iesu Keriso. Ma e tatou te faia lena mea pe a tatou salamo i aso taitasi ma maua Lana faamamāāga, faamalologa, ma le mana faamalosiau. (Russell M. Nelson, “Tuleiga Amata,” Liahona, Me 2020, 6)

Gaoioiga Faaopoopo e Aoao Ai

O se isi filifiliga mo le amataga o le lesona

Mafaufau e valaaulia tagata aoga e vaai faalemafaufau i le Faamasinoga Mulimuli ma faasaga atu i le Faaola. Fai atu ia i latou e tusifaamaumau manatu ma lagona atonu latou te maua i lenei tulaga. Valaaulia i latou e suesue i lenei lesona, ma vaavaai mo upumoni e mafai ona fesoasoani ia i latou e feagai ai ma lenei aafiaga ma le talitonuga ma le olioli sili atu.

Mamona 2:10–15. “Faalotomaualaloina i luma o le Alii”

Afai o le a manuia tagata aoga mai le suesueina o le eseesega i le va o le faanoanoa lea e taitai atu ai i le salamo ma le faanoanoa e le taitaiina atu iai, mafaufau e valaaulia i latou e faitau le Mamona 2:10–15, ma vaavaai mo mea na avatu ai ia Mamona le faamoemoe mo le lumanai o lona nuu ma le mea na mafua ai ona toe foi mai lona faanoanoa.

Fesoasoani i tagata aoga ia iloa le upumoni i lenei fuaitau e faapea o le faanoanoa lea e taitai atu ai i le salamo faamaoni e fesoasoani tatou te maua ai le alofa mutimutivale ma le tali-tiga o Iesu Keriso.

Valaaulia tagata aoga e talanoaina pe mafai faapefea e se talavou e le fiafia i filifiliga na latou faia ona liliu atu i le Faaola mo se toomaga.

Mamona 3:9–15. O le mitamita i lo tatou lava malosi o le a mafua ai ona tatou le maua le malosi o le Atua

Fai atu i tagata aoga e faasoa mai pe faapefea ona ese le to’a nai lo le mitamita ma pe aisea e ono taua ai le eseesega.

Fai atu ia i latou e suesue le Mamona 3:9–15 ma vaavaai mo taunuuga o sa Nifae o loo mitamitavale i lo latou lava malosi.

Ona mafai lea e tagata aoga ona sailiili i le Taiala o Autu i lalo o le “Mitamita,Mitamitavale” po o le Taiala i Tusitusiga Paia i lalo o le “Faamaualuga.” E mafai ona latou vaavaai mo nisi faataitaiga o le auala tatou te le maua ai le malosi mai le Atua pe a tatou mitamita i lo tatou lava malosi.

Valaaulia tagata aoga e lisi ni nai uiga faaKeriso e mafai ona fesoasoani ia i tatou e aloese ai mai le mitamita. E mafai e tagata aoga ona tusi se tusi ia i latou lava i le lumanai, faasoa atu mea sa latou aoaoina ma lagonaina e mafai ona fesoasoani ia i latou e aloese ai mai le faalagolago ma le mitamita i lo latou lava malosi.

Vaai faalemafaufau i le Faamasinoga

A uma ona suesue le Mamona 3, mafaufau e valaaulia tagata aoga e vaai faalemafaufau i le i ai i le Faamasinoga faatasi ai ma le Tama Faalelagi ma Iesu Keriso. Faitau le Mataupu Faavae ma Feagaiga 45:3 ma faamanatu atu ia i latou le matafaioi a le Faaola o lo latou fautua. Fai atu ia i latou e vaai faalemafaufau i le Faaola o fetalaia upu o loo i le Mataupu Faavae ma Feagaiga 45:4–5. O ai e valaaulia e le Faaola le Tama Faalelagi e silasila i ai? Aisea?

Fai atu ia i latou e faasoa mai pe faapefea e le vaai faalemafaufau i nei fuaiupu ona tuuina atu ia i latou le mautinoa mo le Faamasinoga ma pe aisea.