Sukda ang Imong Nakat-onan 8

3 Nephi 8–Mormon 6

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol ngadto sa Manluluwas. Kini nga leksiyon gituyo aron sa pagtabang kanimo sa pagtimbang-timbang sa mga tumong nga imong gitakda ug sa paglambo nga imong nasinati sa panahon sa imong bag-ohay lang nga pagtuon sa 3 Nephi 8 hangtod sa Mormon 6.

Hatagi ang mga estudyante og panahon nga makapamalandong.Hatagi og panahon ang mga estudyante sa paghinumdom ug sa pagpamalandong sa unsay ilang nakat-onan. Pangutana o paghatag og mga kalihokan aron matabangan ang mga estudyante sa pagpangita sa ilang mga panumdoman alang sa mga pagbati. Mahimo nimong dapiton ang mga gutlo sa kahilom pinaagi sa paghangyo sa mga estudyante sa paghunahuna, pagbati, ug pagsulat.

Pagpangandam sa estudyante: Dapita ang mga estudyante sa pagtambong nga andam sa pagpakigbahin unsay ilang nakat-onan o mga paagi nga sila milambo sa espirituhanong paagi sa miaging pipila ka semana. Tingali makatabang nga ang mga estudyante magrebyo sa ilang journal sa pagtuon o mubo nga mga sulat diha sa ilang mga kasulatan.

Mga Posibleng Kalihokan sa Pagkat-on

Listahan sa mga butang nga kinahanglang susihon sa dili pa molupad ang eroplano [prefight checks]

Si Presidente Dieter F. Uchtdorf, niadtong anaa pa sa Unang Kapangulohan, mipakigbahin og importante nga leksiyon nga iyang nakat-onan gikan sa iyang panahon isip piloto:

Sa pag-piloto sa usa ka eroplano, dali nimong makat-onan nga ang imong agianan sa paglupad nagdepende kaayo kung giunsa nimo pagdumala ang mga mahagiton nga impluwensiya sa gawas sama sa hangin ug panahon. Apan, ang mas importante mao ang mga desisyon nga inyong himoon agig tubag niadto nga mga impluwensiya sa gawas. … Aron sa paghimo niini nga mga desisyon sa husto nga paagi, kini makatabang kon masayod unsa ang imong aktwal nga posisyon. (Dieter F. Uchtdorf, “As You Embark upon This New Era,” BYU Speeches, Abr. 23, 2009, 4)

• Nganong importante alang sa usa ka piloto nga mahibalo sa iyang aktuwal nga posisyon sa dili pa mohimog bisan unsang mga desisyon?

• Sa unsang paagi nga ang ehemplo sa usa ka piloto sa pag-ila sa iyang aktwal nga posisyon makonektar ngadto sa pagpalambo sa imong kaugalingon sa espirituhanong paagi?

Sa dili pa rebyohon ang piho nga mga hilisgotan nga imong nakat-onan sa seminary, ikonsiderar kon unsa ang mas mipatigbabaw alang kanimo sa kinatibuk-an. Ang mosunod nga mga pangutana mahimong makatabang. Ikonsiderar ang pagrekord sa imong mga tubag diha sa imong journal sa pagtuon.

Ikonsiderar ang pagpakita sa mosunod nga mga pangutana. Human sa panahon sa pagsulat, dapita ang mga estudyante sa pagpakigbahin sa ilang mga tubag ngadto sa klase.

• Unsa ang imong nakat-onan gikan sa imong bag-ohay nga mga pagtuon nga labing nakaapekto kanimo?

• Unsa nga mga kausaban ang imong namatikdan sa imong mga pagbati ug mga kinaiya karong bag-o?

• Unsa ang pipila ka mga paagi nga imong nagamit unsa ang imong nakat-onan?

Niini nga leksiyon, ang mga estudyante adunay oportunidad sa pagpasabot sa doktrina ni Kristo, sukda ang epekto sa ilang pagtuon sa 3 Nephi diha sa ilang mga pagbati mahitungod kang Jesukristo, ug sa pagpamalandong kon sa unsang paagi sila miapil sa pagpundok sa Israel. Kon gikinahanglan, ipahiangay ang mga kalihokan niini nga leksiyon aron matabangan ang imong mga estudyante sa pagsukod sa ilang mga kaugalingon sa mga butang nga gihatagan og gibug-aton atol sa pagtuon sa imong klase sa 3 Nephi hangtod sa Mormon 6.

Pagpasabot sa doktrina ni Kristo

Kini nga bahin sa leksiyon gituyo aron mahatagan ang mga estudyante og kahigayonan sa pagpasabot sa doktrina ni Kristo gamit ang Iyang mga pagtulun-an gikan sa 3 Nephi 11:31–39 ug 3 Nephi 27:13–22.

Tingale imong nahinumdoman nga sa wala madugay human ang nabanhaw nga Manluluwas unang mipakita ngadto sa mga Nephite, Siya mipaambit og importante nga mga kamatuoran mahitungod sa unsay angay natong buhaton aron madawat ang mga panalangin sa kinabuhing dayon (tan-awa sa 3 Nephi 11:31–39 ug 3 Nephi 27:13–22). Kasagaran kitang mitawag niini nga mga pagtulun-an isip “ang doktrina ni Kristo” (2 Nephi 31:21). Ikaw makabaton og kahigayonan sa pagpasabot sa mga pagtulun-an sa Manluluwas diha sa imong kaugalingong mga pulong pinaagi sa paggamit sa mosunod nga senaryo:

Ikonsiderar ang pagpares-pares sa mga estudyante aron magtinabangay sa mosunod nga senaryo. Human matubag sa unang pares ang pangutana, mahimo nimong dapiton ang mga estudyante nga wala pa makapakigbahin sa pagpangita og bag-ong pares aron sa pagpakigbahin sa ilang tubag aron kini dili daw gibalikbalik.

Handurawa nga ikaw adunay usa ka higala, si Josh, kinsa nahimong interesado sa Simbahan. Bisag maayo ang iyang gibati sa iyang nakat-onan, wala siya makasabot sa panginahanglan nga mabunyagan.

• Unsa nga mga bersikulo gikan sa Basahon ni Mormon ang mahimo nimong gamiton aron matabangan si Josh nga makasabot sa doktrina ni Jesukristo? (Kon dili ka sigurado kon asa magsugod, mahimo nimong tan-awon ang 3 Nephi 11:31–39 o 3 Nephi 27:13–22.)

• Sa unsang paagi kaha nga ang mga pagtulun-an sa Manluluwas niini nga mga bersikulo makatabang sa pagsulbad sa kabalaka ni Josh?

Pamalandongi ang imong mga pagbati mahitungod ni Jesukristo

Kini nga bahin sa leksiyon gituyo aron mahatagan ang mga estudyante og kahigayonan sa pagpamalandong kon sa unsang paagi ang ilang mga pagbati sa Manluluwas naapektohan sa unsay ilang nakat-onan mahitungod Kaniya atol sa ilang pagtuon sa 3 Nephi.

Ang mga kasulatan usa ka bililhon nga kapanguhaan alang kanato sa pagkat-on og dugang pa mahitungod sa kinaiya ni Jesukristo. Sa pipila ka mga leksiyon, sugod sa 3 Nephi 8–10, gidapit ka sa paghimo og lista sa mga butang nga imong nakat-onan mahitungod ni Jesukristo samtang Siya nangalagad ngadto sa mga Nephite human sa Iyang Pagkabanhaw. Mahimo usab nga aduna kay pipila ka mga kasinatian diin ikaw naghanduraw nga anaa ka samtang ang Manluluwas nangalagad ngadto sa mga Nephite. Ang pagpamalandong sa imong mga mubo nga mga sulat o sa pipila ka mga gutlo nga imong gihanduraw, makatabang kanimo nga mobati og gugma alang sa Manluluwas ug gugma gikan sa Manluluwas.

Kon inyong gibuhat ang lista nga gihisgotan sa miaging parapo isip usa ka klase, mahimong makatabang ang pagpakita niini aron ang mga estudyante makatan-aw niini atol niini nga kalihokan.

Paggahin og pipila ka mga minuto sa pagrebyo sa imong lista diha sa imong journal sa pagtuon, mangita sa unsay imong nakat-onan mahitungod ni Kristo nga mahimong makaapekto sa imong mga pagbati mahitungod Kaniya. Sa laing paagi, mahimo nimong rebyohon ang mga ulohan sa kapitulo o mga kasulatan nga imong gimarkahan sa imong pagtuon sa 3 Nephi nga adunay samang katuyoan sa hunahuna.

• Unsa ang pipila sa labing mahinungdanon nga mga butang nga imong nakat-onan o gibati mahitungod ni Jesukristo samtang imong gitun-an ang Iyang pangalagad ngadto sa mga Nephite? Ngano man?

Human ang mga estudyante adunay panahon sa paghunahuna ug sa pagsulat sa mga tubag niini nga mga pangutana, mahimo nimong bahinon ang mga estudyante ngadto sa gagmay nga mga grupo aron ipakigbahin ang ilang gisulat. Mahimo usab kining maayong kahigayonan sa pagdapit og mga boluntaryo aron sa pagpakigbahin ngadto sa klase sa ilang pagpamatuod mahitungod sa unsay ilang nakat-onan ug gibati kabahin ni Jesukristo.

Pag-apil sa pagpundok sa Israel

Kini nga bahin sa leksiyon gidesinyo aron sa pagtabang sa mga estudyante sa paghunahuna mahitungod kon sa unsang paagi sila nag-apil o mahimong moapil sa pagpundok sa Israel.

Sa dihang nagtuon ka sa 3 Nephi 15–16; 20–22; ug 25, imong nakat-onan ang mahitungod sa tinguha sa Ginoo sa pagpundok sa Israel. Tingali nakahimo ka og mga plano aron matabangan ang usa ka tawo nga mas maduol ngadto kang Jesukristo ug moapil sa buhat sa templo o kasaysayan sa pamilya.

Kon imong gidapit ang mga estudyante sa paghimo og mga plano sa pagtabang sa pagpundok sa Israel samtang nagtuon kamo sa mga kapitulo nga gihisgotan sa miaging parapo, hatagi sila og panahon sa pagrebyo sa ilang mga plano.

Alang sa mga estudyante nga wala pa makahimo og mga plano, tingali makatabang ang pagdrowing og lingin diha sa pisara. Ang sulod sa lingin mahimong magrepresentar niadtong napundok sa Israel. Dapita ang mga estudyante sa pagsulat sulod sa lingin og lain-laing mga paagi nga ang kabatan-onan makatabang sa Ginoo sa pagpundok sa Israel. Ang usa ka ehemplo mahimong maglakip sa pagpakigbahin sa mga pagtulun-an gikan sa Basahon ni Mormon ngadto sa uban, sa personal man, pinaagi sa social media, o sa ubang paagi.

Paggahin og usa ka minuto sa pagrebyo sa mga plano nga imong gihimo karong bag-o lang aron makatabang sa pag-apil sa pagpundok sa Israel.

Gamita ang pipila o ang tanan sa mosunod nga mga pangutana aron matabangan nga masukod ang pag-uswag sa imong mga plano:

• Unsay imong gihimo aron sa paglihok sa imong mga plano?

• Unsay imong nakat-onan gikan sa paglihok sa imong mga plano? Giunsa nimo paglambo?

• Unsa pa ang imong gusto nga buhaton aron sa pag-apil sa pagpundok sa Israel?