ʻEta 1–5

Vakai Fakalūkufuá

ʻI he taimi naʻe feinga ai ʻa e kakai faiangahalá ke langa ha taua ke aʻu ki he langí, naʻe veuveuki ʻe he ʻEikí ʻenau leá (vakai, Sēnesi 11:1–9). Naʻe tangi ʻa e tokoua ʻo Sēletí ki he ʻEikí, ʻo tautapa ke Ne fakahaofi hono fāmilí mo e ngaahi kaungāmeʻá mei he puputuʻu ko ʻení (vakai, ʻEta 1:34–37), pea naʻe tali ʻe he ʻEikí ʻi he ʻaloʻofa. ʻI hono foʻu ʻe he tokoua ʻo Sēletí mo hono kakaí ha ʻū vaka lafalafa ke nau kolosi ai ʻi he tahí, naʻa nau fehangahangai mo ha ngaahi palopalema lalahi. Naʻe fakataufolofola ʻa e tokoua ʻo Sēletí ki he ʻEikí mo ha palani ke fakaleleiʻi ʻene ngaahi palopalemá pea lotu ʻi he loto-fakatōkilalo ʻi he “fuʻu tui lahi pehē” (ʻEta 3:9) pea naʻá ne mamata mo fefolofolai mo e ʻEikí. Naʻe fekau ‘e he ‘Eikí kia Molonai ke fakamaʻu e ngaahi lekooti ʻa e tokoua ʻo Sēletí pea fakamatalaʻi ko e ngaahi tohi ko ʻení ʻe toki fakahā ia ʻi he taimi ʻe tui ai ʻa e kakaí ʻo hangē ko e tokoua ʻo Sēletí.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

ʻEta 1

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke ueʻi fakalaumālie ʻa e kau akó ke nau lotu fakamātoato ange pea mo lotu maʻu pē.

Teuteu ʻa e tokotaha akó: Fakaafeʻi ʻa e kau akó ke lau ʻa e ʻEta 1:34–37 pea fakaʻilongaʻi ʻa e kupuʻi lea “tangi ki he ʻEikí.” Kole ange ke nau omi mateuteu ke vahevahe ʻa e ʻuhinga kiate kinautolu ʻa e kupuʻi lea ko ʻení pea mo e founga ʻe kehe ai ia mei he ngaahi founga ʻoku tau faʻa lotu aí.
Vitiō: “Ko e Taua ʻo Pēpelí” (0:58); “Ngaahi Tali ki he Lotú” (12:39; mamata mei he taimi 2:16 ki he 4:31)
Fokotuʻu ki hono akoʻi ʻi he konifelenisi vitioó: ʻI he taimi ʻe fakangalingali ai ʻa e kau akó kuo kole ange ke nau kau ʻi ha pēnolo ki hono fakaleleiʻi ʻenau lotú, fakakaukau ke fakaafeʻi ke nau fakalaulauloto ki he ngaahi fehuʻí ʻi ha miniti ʻe taha pe ua kimuʻa pea nau toki vahevahé. Ke tokoni ke ʻai ʻa e ʻekitivitií ke tatau moʻoni mo ha pēnoló, fakakaukau ke fakaafeʻi ʻa e mātuʻá pe toʻu tupu kehé ke nau kau mai ʻi he konga fakaʻosi ko ʻeni ʻo e kalasí.

ʻEta 2

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ʻiloʻi ʻe he kau akó ʻa e founga ke fekumi ai ki he tokoni ʻa e ʻEikí ʻi hono fakaleleiʻi ʻenau ngaahi palopalemá.

Teuteu ʻa e tokotaha akó: Fakaafeʻi ʻa e kau akó ke nau omi mateuteu ke vahevahe ha ngaahi aʻusia ʻa ia ne nau maʻu ai, pe ko ha niʻihi kehe ʻoku nau ʻiloʻi, ʻa e tokoni ʻa e ʻEikí ke fakaleleiʻi ʻa e ngaahi palopalemá.
Fokotuʻu ki hono akoʻi ʻi he konifelenisi vitioó: Fakakaukau ke ʻīmeili ki he kau akó ʻa e saati ki hono ako ʻo e ʻEta 2. Kimuʻa pea vahe ʻa e kau akó ki ha fanga kiʻi loki fealēleaʻakí, fakakaukau ke vahe ki ha tokotaha ako ʻi he kulupu takitaha ke hoko ko e tokotaha tohi pea ke ne vahevahe ʻene screen koeʻuhí ke lava heʻenau kulupú ʻo fakafonu fakataha ʻa e sātí. Hili ʻa e ngāue ʻa e ngaahi kulupú, fakaafeʻi ha kulupu ʻe taha pe ua ke vahevahe ʻenau screen mo e kalasí pea fakaʻaliʻali ʻenau saati kuo kakató.

ʻEta 3

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi ʻa e kau akó ke nau ngāueʻi ʻi he loto-fakatōkilalo ʻa e tui kia Sīsū Kalaisí.

Teuteu ʻa e tokotaha akó: Fakaafeʻi ʻa e kau akó ke nau fakakaukau ki ha kakai ʻe toko tolu ʻoku nau tanganeʻia ai ʻi he hisitōlia ʻo e Siasí pe ko e folofolá pea mo e founga naʻe fakahaaʻi ai ʻe he kakaí ni ʻa e tui kia Sīsū Kalaisí.
Laʻipepa tufa: “Ko e Tui ʻa e Tokoua ʻo Sēletí”
Ngaahi Vitioó: “Tuí mo e Taumuʻá” (4:40); “Ko Hono Toe Fakatupulaki ʻEku Tuí ʻi he Taimi Naʻá Ku Ongoʻi Hē Aí” (6:26)
Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki he fanga kiʻi loki fealēleaʻaki ʻi ha ngaahi kulupu tautau toko fā ke fakahoko ʻa e ngaahi ʻekitivitī A, E, F, mo e H. Kole ki ha mēmipa ʻo e kulupu takitaha ke ne hoko ko e takí pea fili ʻa e ngāue ke fai ʻe he tokotaha takitaha pea ko e hā ʻa e fakahokohoko ʻoku totonu ke nau vahevahe aí. Kapau ʻoku ʻikai tokolahi feʻunga ʻa e kau akó ke tautau toko fā ʻi he kulupu, fakakaukau ke ʻai ha ngaahi kulupu ʻe niʻihi ke tautau toko tolu. ʻOku ʻikai mahuʻinga ia ke fakakakato ʻe he kulupu takitaha ʻa e ngaahi ʻekitivitī kotoa ʻe faá.

ʻEta 4–5

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke mahino ki he kau akó ʻa e meʻa te nau lava ʻo fai ke maʻu ai ha fakahā lahi angé.

Teuteu ʻa e tokotaha akó: Fakaafeʻi ʻa e kau akó ke lau ʻa e ʻEta 4 ko ha konga ʻo ʻenau ako fakaʻaho ʻa e folofolá, ʻo kumi ʻa e ngaahi moʻoni ʻe ala tokoni kiate kinautolu ke maʻu ha toe fakahā lahi ange mei he ʻEikí.
Naunau: Ko ha meʻa ʻoku mahuʻinga kiate koe pe ko ho fāmilí
Fokotuʻu ki hono akoʻi ʻi he konifelenisi vitioó: Fakakaukau ke ʻave ha pōpoaki kimuʻa he kalasí pea kole ki ha niʻihi ʻo e kau akó ke nau fakaʻaliʻali ha meʻa ʻoku mahuʻinga kiate kinautolu pe ko honau fāmilí lolotonga ʻa e lēsoní.

Toe Vakaiʻi Hono 24 ʻo e Fakataukei Fakatokāteliné

Taumuʻa ‘o e lēsoní: ʻE ʻoatu ʻe he lēsoni ko ʻení ha faingamālie ki he kau akó ke fakaloloto ai ʻenau mahinó mo fakamatalaʻi ʻa e ngaahi moʻoni ʻoku maʻu ‘i he ngaahi potufolofola fakataukei fakatokāteline kehekehe mei he Tohi ʻa Molomoná.

Teuteu ʻa e tokotaha akó: Fakakaukau ke fakaafeʻi ʻa e kau akó ke nau fili ʻi he faʻa lotu ha potufolofola fakataukei fakatokāteline mei he Tohi ʻa Molomoná ʻa ia ʻoku nau fakaʻamu ke mahino lelei ange kiate kinautolú. Kole ange ke nau aleaʻi ʻa e potufolofolá mo ha mēmipa ʻo e fāmilí, ko ha kaungāmeʻa ofi, pe ko ha taki ʻo e Siasí pea omi mateuteu ke vahevahe ʻa e meʻa ʻoku nau ako fekauʻaki mo e potufolofolá mei heʻenau fealeaʻakí.
Fokotuʻu ki hono akoʻi ʻi he konifelenisi vitioó: Fakakaukau ke vahe ki he tokotaha ako takitaha ke ʻave ha ngaahi fehuʻi fekauʻaki mo ha potufolofola fakataukei fakatokāteline ki ha tokotaha ako ʻe taha. Te ke lava ʻo fai ʻeni ʻaki haʻo vahe ki he tokotaha ako kotoa pē ha mataʻifika pea kole ange ke nau ʻave ʻenau fehuʻí ki he tokotaha ʻokú ne maʻu ʻa e mataʻifika ko iá tānaki ki ai mo e taha (ʻe ʻave ʻe he tokotaha ako ʻokú ne maʻu ʻa e mataʻifika māʻolunga tahá ʻene fehuʻí ki he tokotaha ako ʻoku fika ʻuluakí). ʻE feinga leva ʻa e kau akó ke tali ʻa e ngaahi fehuʻí pea fakafoki ia ʻi he fakaʻosinga ʻo e lēsoní.