Toe Vakaiʻi Hono 24 ʻo e Fakataukei Fakatokāteliné

Mahino pea Fakamatalaʻi

ʻE lava ke tokoni ʻa e fakataukei fakatokāteliné ke mahino peá ke fakamatalaʻi ʻa e tokāteline ʻa e Fakamoʻuí ʻi hoʻo lea pē ʻaʻau. ʻE ʻoatu ʻe he lēsoni ko ʻení ha faingamālie ke fakaloloto ai hoʻo mahinó mo fakamatalaʻi ʻa e ngaahi moʻoni ʻoku maʻu ʻi he ngaahi potufolofola fakataukei fakatokāteline kehekehe mei he Tohi ʻa Molomoná.

Ako lahi ange fekauʻaki mo hoʻo kau akó. Kumi ha ngaahi faingamālie ke ke maheni ai mo e kau akó. ʻE lava ke hoko ʻa hono vakaiʻi mo fakahoko ha ngaahi fehuʻi fakamātoató ke tataki ai koe ke ke ako lahi ange fekauʻaki mo e meʻa ʻoku mahuʻinga ki ha tokotaha ako. ʻI he mahino lahi ange kiate koe hoʻo kau akó, ʻe lava ke tokoniʻi koe ʻe he Laumālie Māʻoniʻoní ke ke fakatefito ʻa e meʻa ʻokú ke akoʻí ʻi heʻenau ngaahi fiemaʻú.

Teuteu ʻa e tokotaha akó: Fakakaukau ke fakaafeʻi ʻa e kau akó ke nau fili ʻi he faʻa lotu ha potufolofola fakataukei fakatokāteline mei he Tohi ʻa Molomoná ke ako ʻa e meʻa ʻoku nau fakaʻamu ke mahino lelei ange kiate kinautolú. Kole ange ke nau aleaʻi ʻa e potufolofolá mo ha mēmipa ʻo e fāmilí, ko ha kaungāmeʻa ofi, pe ko ha taki ʻo e Siasí pea omi mateuteu ke vahevahe ʻa e meʻa ʻoku nau ako fekauʻaki mo e potufolofolá mei heʻenau fealeaʻakí.

Ngaahi ʻEkitivitī Ako ʻOku Ala Fakahokó

ʻE ala fiemaʻu ke akoʻi ha lēsoni potufolofola fakataukei fakatokāteline ʻo fetongi ʻaki ʻa e lēsoni toe vakaiʻi ko ʻení. Vakai ki he taimi-tēpile ʻo e lēsoní ʻa ia ʻoku ʻomi ʻe he talēkita fakaʻēliá pe fakavahefonuá pe kouʻōtineitá ke fakapapauʻi ʻe akoʻi e lēsoni ʻo e potufolofola fakataukei fakatokāteline takitaha lolotonga e lele ʻa e seminelí.

Ko e ʻeke ha ngaahi fehuʻí

Fakakaukau ke fakaafeʻi ʻa e kau akó ke nau kumi ha taha ʻi he kalasí ʻoku ʻikai ke nau maheni lelei mo ia. Fakaafeʻi ke nau fakaʻaongaʻi ha kiʻi taimi ke nau ʻeke ai ha ngaahi fehuʻi ke tokoni ke nau maheni ange. Kapau ʻe ʻaonga, ʻoange ha sīpinga ʻo ha ngaahi fehuʻi te nau ala ʻeke, hangē ko e “Ko e hā ha meʻa ʻokú ke saiʻia ke fai?” mo e “Ko e hā ʻa e ngaahi lēsoni ʻokú ke saiʻia taha ai ʻi he akó?”

Fakakaukau ki ha taha ʻokú ke maheni lelei mo ia.

• Naʻe anga fēfē hoʻo maheni mo iá?

• Ko e hā ʻa e ʻaonga ʻo e ʻeke fehuʻí naʻá ke lava ai ʻo maheni mo iá?

• Naʻe mei kehe fēfē nai hoʻomo feohí kapau naʻe ʻikai ke ke teitei ʻeke ha ngaahi fehuʻi?

Hangē pē ko e mahuʻinga ke ʻeke ha ngaahi fehuʻi ke maheni ai mo ha tahá, ʻoku pehē pē ʻa hono mahuʻinga ke ʻeke ha ngaahi fehuʻi lolotonga hoʻo ako ʻa e folofolá ke ke ʻiloʻi lelei ange ai mo maʻu ha mahino kia Sīsū Kalaisi ʻo fakafou [ʻi he folofolá].

Naʻe akonaki ʻa Palesiteni Lāsolo M. Nalesoni ʻo pehē, “ʻOku tokoni ʻa hono ʻeke ʻa e ngaahi fehuʻi ʻoku kaungatonú ki hono maʻu ʻa e fakahinohino fakafolofolá” (“Living by Scriptural Guidance,” Ensign, Nov. 2000, 18).

ʻE lava ke tokoni hono ʻeke ha ngaahi fehuʻi fekauʻaki mo e ngaahi potufolofola fakataukei fakatokāteliné ke mahino lelei ange kiate kitautolu pea fakaafeʻi kakato ange ʻa e tataki ʻa e ʻEikí ki heʻetau moʻuí.

Fakakaukau ke fakaʻaliʻali ʻa e ngaahi fakamoʻoni folofola fakamuimui ʻe 12 ki he fakataukei fakatokāteline ʻo e Tohi ʻa Molomoná pe fakaʻaliʻali ki he kau akó ʻa e feituʻu ʻe lava ke nau maʻu ai kinautolú ʻi he Fakamatala ki he ʻElito ʻo e Fakataukei Fakatokāteliné (2023). Kapau ʻe fiemaʻu, fakaʻaongaʻi ʻa e ngaahi potufolofola fakataukei fakatokāteline kotoa ʻe 24 ʻo e Tohi ʻa Molomoná ki hono toe vakaiʻi ko ʻení, pe fili ha niʻihi pē, ʻo fakatatau mo e fiemaʻu ʻa e kalasí.

Fakakaukau ke fakahoko fakakalasi ʻa e ʻekitivitī ko ʻení ʻo fakaʻaongaʻi ha taha ʻo e ngaahi potufolofola fakataukei fakatokāteliné. Fakaafeʻi leva ʻa e kau akó ke nau toe fai ʻa e ʻekitivitií ʻo fakaʻaongaʻi ha potufolofola fakataukei fakatokāteline kehe pē naʻa nau fili. ʻE lava ke ngāue ʻa e kau akó ʻi ha ngaahi kulupu, tauhoa, pe fakafoʻituitui, ʻo fakatatau mo ʻenau fiemaʻú mo e meʻa ʻoku nau saiʻia aí.

Fili ha taha ʻo e ngaahi potufolofola fakataukei fakatokāteline ʻokú ke fakaʻamu ke mahino lelei ange kiate koé pea lau fakalelei ia. Feinga ke ʻiloʻi ha fehuʻi ʻe ua te ke lava ʻo ʻeke fekauʻaki mo e potufolofolá ke mahino lelei ange ia pea hiki ia. Hangē ko ʻení, ʻi hoʻo lau ʻa e 3 Nīfai 27:20 te ke lava ʻo fehuʻi, “ʻOku ʻuhinga ki he hā ke fakamāʻoniʻoniʻí?” Pe ʻi hoʻo lau ʻa e Molonai 10:3–5 te ke lava ʻo fehuʻi, “ʻOku ʻuhinga ki he hā ke kole ‘ʻi he loto-moʻoni’?”

Kumi ʻa e tali ki he ngaahi fehuʻi naʻá ke fakakaukau ki aí; fakaʻaongaʻi ʻa e ʻū naunau ki he ako folofolá hangē ko e Fakahinohino ki he Ngaahi Folofolá, pe ngaahi lea ʻo e konifelenisi lahí. Te ke lava ʻo fakaʻaongaʻi ha ngaahi founga kehe ʻokú ke ʻilo ki he ako folofolá, hangē ko hono ako ʻa e ngaahi veesi ʻoku hoko atu aí ke mahino lelei ange ʻa e puipuituʻa ʻo e potufolofolá.

Ke tokoni ke fengāueʻaki ʻa e kau akó ʻiate kinautolu pē, fakakaukau ke kole ange ke nau hiki ʻa e potufolofola fakataukei fakatokāteline ne nau filí mo ʻenau fehuʻí ʻi ha laʻipepa ʻoku tohi ai honau hingoá. Fakaafeʻi ʻa e kau akó ke fakafetongi ʻenau laʻipepá mo ha tokotaha ako ʻe taha. Pe, fakaafeʻi ʻa e kau akó ke paasi ʻenau ʻū laʻipepá ki muʻa ke lava ʻo fio pea tufaki ki he toenga ʻo e kau akó. Kole ki he kau akó ke hiki ʻa e tali ki he fehuʻi ʻi he laʻipepa naʻe ʻoange kiate kinautolú. Hili ha taimi feʻunga, fakaafeʻi ʻa e kau akó ke fakafoki ʻa e laʻipepá ki he tokotaha ako ʻoku tohi hono hingoá ʻi he laʻipepá.

ʻOange ha taimi ki he kau akó ke nau fakalaulauloto ai ki he ngaahi tali naʻe hiki ʻe he kau ako kehé, pea kapau ʻe ʻaonga, pea nau fekumi ki ha ngaahi tali kehe ʻi he folofolá, ʻo fakafou ʻi he lotú, mo e alā meʻa pehē.

Manatuʻi, mahalo he ʻikai te ke maʻu ʻa e tali ki hoʻo ngaahi fehuʻí kotoa lolotonga hoʻo akó. Ka ʻi he hokohoko atu hoʻo ngāueʻi ʻa e tui ki he ʻEikí, te Ne tokoniʻi koe ke ke ʻiloʻi ʻa e moʻoni ʻo e meʻa ʻokú ke fekumi ki aí.

Fakaafeʻi ha niʻihi ʻo e kau akó ke vahevahe ʻa e potufolofola fakataukei fakatokāteline ne nau filí, niʻihi ʻo e ngaahi fehuʻi ne nau tohí, pea mo e ngaahi tali ne nau maʻu pe maʻu ʻe honau kaungāakó. ʻIkai ngata aí, fakakaukau ke fehuʻi ange pe ko e hā ʻa e meʻa naʻe tokoni ʻa e potufolofolá ke mahino kiate kinautolu fekauʻaki mo e Fakamoʻuí pe ko ʻEne ongoongoleleí.

Kapau ʻoku lahi e taimí (pe ʻi ha ʻaho kehe), fakakaukau ke fakaafeʻi e kau akó ke nau toe fai e ʻekitivitií ʻo fakaʻaongaʻi ha potufolofola fakataukei fakatokāteline ʻe taha.

Poupouʻi ʻa e kau akó ke hokohoko atu ʻenau ʻeke ʻa e ngaahi fehuʻi fekauʻaki mo e folofolá mo e fekumi ki he ngaahi talí.