Եթեր 3

«Այնպիսի մեծ հավատքով»

Երբևէ մտածե՞լ եք, թե Հիսուս Քրիստոսի հանդեպ հավատքն իրապես ինչպես կարող է փոխել մեր կյանքը։ Վառ օրինակ է Հարեդի եղբայրը, որն իր խնդիրների լուծման ծրագրով դիմեց Տիրոջը և խոնարհաբար աղոթեց «այնպիսի մեծ հավատքով» (Եթեր 3․9), որ «վարագույրը վերցվեց [նրա] աչքերից» (Եթեր 3․6), և նա տեսավ Տիրոջն ու խոսեց Նրա հետ։ Այս դասը նախատեսված է օգնելու ձեզ խոնարհաբար հավատք գործադրել Հիսուս Քրիստոսի հանդեպ։

Սուրբ գրություններն ուսուցանելիս կենտրոնացեք Հիսուս Քրիստոսի վրա։ Ժամանակ հատկացրեք և օգնեք ուսանողներին ճանաչել Փրկչի և Նրա փրկագնող զորության մասին ճշմարտությունները։ Նշեք սուրբ գրությունների այն հատվածները, որոնք կարող են մեծացնել ուսանողների հավատքը Նրա հանդեպ։ Կարող եք տալ հարցեր, որոնք ուսանողներին կօգնեն խորհել, թե Հիսուս Քրիստոսն ինչպես կարող է օրհնել, ամրապնդել և առաջանորդել իրենց։

Ուսանողի նախապատրաստում․ ուսանողներին առաջարկեք մտածել Եկեղեցու պատմությունից կամ սուրբ գրություններից իրենց հավանած երեք մարդու մասին, և ինչպես են այդ մարդիկ հավատք գործադրել Հիսուս Քրիստոսի հանդեպ։

Հնարավոր ուսումնական վարժություններ

Ինչպե՞ս եք ցույց տալիս հավատքը

Հետևյալը կօգնի պատրաստել ուսանողներին ավելի խորությամբ սովորել Հիսուս Քրիստոսի հանդեպ հավատքի մասին։ Ուսանողները կարող են օրինակներ թվարկելու փոխարեն ցուցադրել դասի վերջում ներկայացված տեսանյութերից մեկը կամ պատմել Ջեն Ռութոֆի պատմությունը։

Եկեղեցու պատմությունից կամ սուրբ գրություններից թվարկեք ձեր հավանած երեք անձանց։

• Այդ մարդիկ ի՞նչ եղանակներով են հավատք գործադրել Հիսուս Քրիստոսի հանդեպ։

• Ինչպե՞ս կարող եք ասել, որ ձեր կյանքում հավատք եք գործադրում Հիսուս Քրիստոսի հանդեպ։

• Ինչո՞ւ եք ցանկանում հավատք գործադրել։

Կարող եք գրատախտակին գրել ուսանողների պատասխանները երկրորդ հարցի վերաբերյալ։ Ուսանողներին առաջարկեք խորհել այդ պատասխանների շուրջ և գնահատել իրենց սեփական հավատքը։ Եթե օգտակար լինի, ավելացրեք ինքնագնահատման հետևյալ պնդումներից մի քանիսը կամ բոլորը և առաջարկեք ուսանողներին ավարտել դրանք։

Սկսեք խորհել Հիսուս Քրիստոսի հանդեպ ունեցած ձեր հավատքի մասին և 1-ից 5 միավոր սանդղակով գրեք, թե հետևյալ պնդումները որքանով են ճիշտ (1 = երբեք, 2 = երբեմն, 3 = հաճախ, 4 = գրեթե միշտ, 5 = միշտ)․

• Ես հավատում եմ Քրիստոսին և ընդունում եմ Նրան որպես իմ Փրկիչ։

• Անկեղծորեն աղոթելով Երկնային Հորը՝ ես խնդրում եմ Աստծուն և Հիսուս Քրիստոսին օգնել լուծել իմ խնդիրները և վստահում են Նրանց ուղղորդմանն ու օգնությանը։

• Ես գործում եմ և վստահում եմ Տիրոջը, որ կօգնի ինձ։

Այս դասն ուսումնասիրելիս փորձեք ավելի խորությամբ հասկանալ, թե ինչպես կարող եք խոնարհաբար հավատք գործադրել Հիսուս Քրիստոսի հանդեպ և ինչու կարող եք ցանկանալ դա։

Հավատք գործադրել

Նախորդ դասին սովորեցիք, որ Տերը Հարեդի եղբորը պատվիրեց բեռնանավեր կառուցել և օվկիանոսով հասնել խոստումի երկիր, սակայն բեռնանավերը լույս չունեին։ Տերը Հարեդի եղբորը խնդրեց լուծում առաջարկել (տե՛ս Եթեր 2․23)։ Երբ Հարեդի եղբայրը գործեց Հիսուս Քրիստոսի հանդեպ հավատքով, Տերն օգնեց լուծել նրա խնդիրը և նրանց օրհնեց առավել, քան նա էր խնդրել։

Բաժանեք հետևյալ աշխատաթերթը և առաջարկեք ուսանողներին լրացնել ինքնուրույն կամ փոքր խմբերով։

Հարեդի եղբոր հավատքը

Մորմոնի Գիրքը. Ուսուցչի ձեռնարկ (2024) — «Եթեր 3․ «Այնպիսի մեծ հավատքով»»

Կարդացեք հետևյալ նկարներից յուրաքանչյուրի ներքևում բերված հատվածները և գրեք, թե հավատքը ցույց տալու համար ինչ արեց կամ ասաց Հարեդի եղբայրը (Եթեր 3․2–3 հատվածն ընկալելու համար կարևոր է հասկանալ, որ Ադամի և Եվայի անկման հետևանքով մենք ապրում ենք մի աշխարհում, որում ֆիզիկապես բաժանված ենք Աստծուց, և բոլորս մեղանչում ենք ու հոգևոր առումով հեռացնում ենք մեզ Աստծուց)։

Եթեր 3․1

Եթեր 3․2–5

Եթեր 3․6–10

Եթեր 3․11–16, 19–20

• Ի՞նչ սովորեցիք Հարեդի եղբոր փորձառությունից։

Հրավիրեք մի քանի ուսանողների կիսվել իրենց փորձառություններով: Գրատախտակին գրեք նրանց նշած ճշմարիտ սկզբունքները։

Սկզբունքներից մեկը, որ կարող ենք սովորել, այն է, որ երբ խոնարհաբար հավատք գործադրենք Տիրոջ հանդեպ, ավելի կմոտենանք Նրան։

Որպեսզի օգնեք ուսանողներին ավելի լավ հասկանալ Հարեդի եղբոր հավատքը, կարող եք հետևյալ չորս վարժությունը կատարելու համար դասարանը փոքր խմբերի բաժանել։ Որպես այլընտրանք առաջարկեք ուսանողներին աշխատել չորս հոգանոց խմբերով, որոնցում յուրաքանչյուր ուսանող կկատարի վարժություններից մեկը։ Հետո ուսանողները կարող են իրենց խմբերում կիսվել սովորածով, և եթե օգտակար լինի, դասարանով կիսվել կարևոր շեշտադրումներով։

1. Հարեդի եղբայրն «ապարից հալեց տասնվեց փոքր քարեր», տարավ դրանք «սարի գագաթը և կրկին աղաղակեց առ Տերն» (Եթեր 3․1)։ Գրեք, թե ինչու եք կարծում, որ խնդիրը լուծելու համար գործելու և մեր կարողացած ամեն բան անելու պատրաստակամությունը Տիրոջ հանդեպ մեր ունեցած հավատքի կարևոր մաս է։

2. Աղոթելիս Հարեդի եղբայրը խոսեց «[Աստծո] առաջ [իր] թուլության» մասին (Եթեր 3․2) և խոնարհաբար օգնություն խնդրեց։ Գրեք, թե հասկանալով մեր թուլությունները և մեր ընդհանուր կախվածությունը Տիրոջից, ինչպես կարող է ազդել մեր աղոթքների և Նրա հանդեպ ունեցած մեր հավատքի վրա։

3. Երբ Հարեդի եղբայրը Տիրոջը խնդրեց դիպչել քարերին, որպեսզի փայլեն, նա վկայեց․ «Ես գիտեմ, ո՜վ Տեր, որ դու ունես ամենայն զորություն և կարող ես անել ինչ որ կամենաս՝ մարդկանց օգտի համար» (Եթեր 3․4)։ Գրեք, թե ինչպես եք իմացել կամ կարող եք իմանալ, որ Տերը մեր խնդիրները լուծելու հարցում մեզ օգնելու զորություն ունի։ Կարող եք ներառել, թե այդ գիտելիքն ինչպես կարող է ազդել Նրա հանդեպ ունեցած մեր հավատքի վրա։

4. Հարեդի եղբայրը խոստացավ, որ կհավատա այն խոսքերին, որոնք Տերը կասի ապագայում (տե՛ս Եթեր 3․11–12)։ Գրեք, թե ըստ ձեզ Հարեդի եղբայրն ինչու էր այդքան շատ վստահում Տիրոջը, որ համաձայնեց սրան։

Ավելի մոտենալ Տիրոջը

• Տերն ի՞նչ տարբեր եղանակներով օրհնեց Հարեդի եղբորը նրա հավատքի համար։

• Հարեդի եղբայրն այս փորձառության միջոցով ինչպե՞ս ավելի մոտեցավ Տիրոջը։

Օգտակար կլինի նշել Տիրոջ խոսքերը, որոնք Նա ասաց Հարեդի եղբորը․ «Դու փրկագնված ես անկումից. ուստի, դու ետ ես բերվել իմ ներկայության մեջ» (Եթեր 3․13)։ Երբ մենք մեր անհատական խնդիրներով հավատք գործադրենք առ Տերը, նույնպես կարող ենք մեր հավերժական նպատակի համար ստանալ Նրա օգնությունը՝ հաղթահարելու Նրանից մեր բաժանումը և վերադառնալու ու ապրելու Նրա հետ։

Դիտեք կամ կարդացեք հավատք գործադրող երիտասարդների հետևյալ օրինակներից մեկը։

• Դիտեք «Հավատքը և նպատակը» տեսանյութը (4:40)։ Մի երիտասարդ ֆուտբոլիստ պատմում է, թե ինչպես է հավատք գործադրում Տիրոջ հանդեպ։

  Faith and the Goal

• Դիտեք «Ինչպես վերակառուցեցի հավատքս, երբ մոլորված էի» տեսանյութը (6:25)։ Միսիոներական ծառայությունից վաղ վերադառնալուց հետո երիտասարդը վերակառուցում է իր հավատքը Հիսուս Քրիստոսի հանդեպ։

  Rebuilding My Faith When I Felt Lost | His Grace

• Կարդացեք երիտասարդ Ջեն Ռութոֆի պատմությունը, որը բնակվում էր Նիդեռլանդներում և իր հիվանդ աչքերը բժշկելու համար փնտրում էր մարգարե Ջոզեֆ Ֆ․ Սմիթին (Սրբեր․ Հիսուս Քրիստոսի Եկեղեցու պատմությունը Վերջին օրերում, հատոր 3, Boldly, Nobly, and Independent, 1893–1955 [2022], 123–25)։

Ուսանողներին առաջարկեք կիսվել, թե ինչ սովորեցին տեսանյութից կամ պատմությունից։

• Ի՞նչ փորձառություններ եք ունեցել դուք կամ ձեզ ծանոթ մարդիկ, որոնք ամրապնդել են ձեր հավատքը Հիսուս Քրիստոսի հանդեպ։

Ամփոփելու համար գրեք մեկ եղանակ, որով ավելի մեծ հավատք կգործադրեք Հիսուս Քրիստոսի հանդեպ և ինչու։ Հետևյալ ընդհանուր գաղափարները կօգնեն ձեզ կատարել այս վարժությունը։ Դուք պետք է ավելացնեք ձեզ վերաբերող մանրամասները։

• Կոնկրետ գործողություն կատարեք՝ որևէ խնդիր լուծելու և Տիրոջ օգնությունը խնդրելու համար։

• Ավելի խոնարհաբար աղոթելու և Տիրոջը վստահելու նպատակ սահմանեք։

• Ակտիվորեն արեք մի բան, որն ավելի կմոտեցնի ձեզ Տիրոջը։

Փնտրեք եղանակներ, որոնցով ավելի մոտ եք զգում Տիրոջը, երբ հավատքով եք գործում։

Ուսանողները հնարավորություն կունենան գիտելիքների գնահատման առաջիկա դասի ընթացքում կիսվելու, թե ինչպես են հավատք գործադրել, և ինչ արդյունք է տվել դա («Գնահատեք ձեր գիտելիքները 9»)։

Ավարտեք Փրկչի և Նրա հանդեպ հավատք գործադրելու արդյունքում եկող օրհնությունների մասին վկայությամբ։

Բացատրական և պատմական տեղեկություններ

Եթեր 3.7, 9: Տերն ինչո՞ւ է մեզ հարցեր տալիս, նույնիսկ եթե Նա գիտի պատասխանները։

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Աստված «գիտի բոլոր բաները, և չկա որևէ բան, որ նա չիմանա» [2 Նեփի 9․20]։ … Այնուամենայնիվ, Աստված հաճախակի է հարցեր ուղղել մահկանացուներին՝ սովորաբար նրանց հավատքը փորձելու, ազնվությունը չափելու կամ նրանց գիտելիքը խորացնելու համար (Ջեֆրի Ռ. Հոլլանդ, Christ and the New Covenant: The Messianic Message of the Book of Mormon [1997], 19–20)։

Եթեր 3.15։ Արդյո՞ք Հարեդի եղբորից առաջ Տերը երբեք չի հայտնվել ոչ մեկին։

Հատված 15-ը բարդ հատված է, եթե հաշվի առնենք, որ գիտենք, որ Աստված հայտնվել էր Ադամին (տե՛ս Վարդապետություն և Ուխտեր 107․53–55), Ենովքին (տե՛ս Մովսես 7․4) և Նոյին (տե՛ս Ծննդոց 6․8–9), և նրանք բոլորն էլ ապրել են Հարեդի եղբորից առաջ։ Տասներկու Առաքյալների Քվորումից երեց Ջեֆրի Ռ. Հոլլանդը մի քանի հնարավոր իմաստ է առաջարկել․ 1) Տերը ցույց է տալիս, որ նախկինում նա երբեք չի հայտնվել հարեդացիներին, 2) «մարդ» բառի օգտագործումը ենթադրաբար կարող է նշանակել, որ Տերը երբեք չի հայտնվել չփրկագնված կամ չսրբագործված մարդկանց, 3) Տերը երբեք չի հայտնվել այդքան լիարժեք ձևով, ինչպես հայտնվել էր Հարեդի եղբորը, 4) սա կարող է առաջին անգամը լինել, որ Տերը հայտնվել և ներկայացել է որպես Հիսուս Քրիստոս՝ Աստծո Որդի և 5) Հարեդի եղբայրը ոչ միայն տեսել էր Տիրոջ մատը, այլև «Քրիստոսի մարմնի, արյան և ոսկորի ավելի ուրիշ ձևով բացահայտող ասպեկտ» (տե՛ս Christ and the New Covenant: The Messianic Message of the Book of Mormon [1997], 21–22)։

Օժանդակ ուսումնական վարժություններ

Եթեր 3․11։ Հավատալ նրան, ինչ Տերը «կխոսի»

Եթե օգտակար կլինի Եթեր 3․11–12 հատվածներն ավելի մանրամասն քննարկել, կարող եք կիսվել հետևյալով․ «Փրկագնող հավատքը պետք է հաճախ գործադրվի ապագայի փորձառությունների հանդեպ[։] … Հավատքը անվերապահորեն համաձայնելն է, կանխավ համաձայնելը՝ ինչ պայմաններ էլ որ Աստված պահանջի թե՛ մոտ և թե՛ հեռավոր ապագայի համար» (Ջեֆրի Ռ. Հոլլանդ, Քրիստոսը և Նոր Ուխտը. Մորմոնի Գրքի Մեսիական Ուղերձը [1997], 18–19)։

Ուսանողներին առաջարկեք քննարկել սցենարներ, որոնցում կարևոր է նախապես ընտրել Տիրոջ խոսքին հավատալը, օրինակ՝ հայրապետական օրհնություն ստանալուն պատրաստվելը կամ միսիայի կանչին սպասելը։

Ճշմարտություններ Տեր Հիսուս Քրիստոսի մասին

Եթե ուսանողների համար օգտակար կլինի Հիսուս Քրիստոսի մասին ավելի շատ ճշմարտություններ հասկանալը, առաջարկեք նրանց կարդալ Եթեր 3․14–20 հատվածները և փնտրել ճշմարտություններ, որոնք Հարեդի եղբայրն իր հավատքի շնորհիվ անձամբ էր իմացել Տիրոջ մասին։ Ահա մի քանի ճշմարտություն, որոնք նրանք գուցե բացահայտեն․ Հիսուս Քրիստոսն աշխարհի հիմնադրումից ի վեր պատրաստվել էր մեզ փրկագնելու համար (տե՛ս Եթեր 3․14), Աստված մեզ ստեղծեց Իր իսկ պատկերով (տե՛ս Եթեր 3․15), Հիսուս Քրիստոսը, նախքան մարմնում ծնվելը, հայտնվել էր հոգու տեսքով (տե՛ս Եթեր 3․16), Հիսուս Քրիստոսի ֆիզիկական մարմինը նման է Նրա հոգևոր մարմնին (տե՛ս Եթեր 3․16–17) և Հիսուս Քրիստոսը ծառայում է մարդկանց, որպեսզի օգնի նրանց իմանալ, որ Ինքը Աստված է (տե՛ս Եթեր 3․18)։

Կարող եք առաջարկել ուսանողներին կիսվել, թե այս ճշմարտություններից որոնք են իրենց համար ամենակարևորը և ինչու։ Նրանք կարող են նաև կիսվել, թե ինչ են սովորել Տիրոջ մասին, երբ Նրա հանդեպ հավատք են գործադրել։