Ether 12:23–27

“Niana Ako Mohimo sa Mahuyang nga mga Butang nga Mahimo nga Malig-on ngadto Kanila”

Samtang si Moroni mipadayon sa pagpamubo sa basahon ni Ether, siya nahadlok nga ang mga Hentil mobiaybiay sa iyang buhat tungod sa iyang kahuyang sa pagsulat. Ang Ginoo mitubag nga samtang kita moduol ngadto Kaniya uban sa pagkamapainubsanon ug hugot nga pagtuo, Iyang mahimo ang atong mahuyang nga mga butang ngadto sa mga kalig-on (tan-awa sa Ether 12:27). Kini nga leksiyon gituyo aron sa pagtabang kanimo sa pagduol ngadto kang Jesukristo aron sa pagbuntog sa mga kahuyang pinaagi sa Iyang grasya.

Pagplano og mga kalihokan sa pagkat-on nga nagdapit og paghinuktok [introspection]. Ang pagsunod sa ebanghelyo ni Jesukristo nagkinahanglan og makanunayon nga pagkat-on ug determinasyon sa paglihok diha sa hugot nga pagtuo. Pagplano og mga kalihokan sa pagtuon nga makapahimo sa mga estudyante sa pagtimbang-timbang sa ilang mga kaugalingon ug makasabot kon sa unsang paagi ang paggamit sa mga baroganan sa ebanghelyo makapanalangin sa ilang mga kinabuhi. Dasiga ang mga estudyante sa pagpaningkamot sa pagsunod sa mga pag-aghat sa Espiritu samtang sila nagtuon.

Pagpangandam sa estudyante: Dapita ang mga estudyante sa pagbasa sa Ether 12:27 ug sa paghunahuna og kahuyang sa ilang kinabuhi nga gusto nilang mabuntog pinaagi sa tabang sa Manluluwas.

Mga Posibleng Kalihokan sa Pagkat-on

Kahuyang ug kalig-on

Pagdapit og usa ka estudyante sa pagduol ngadto sa atubangan sa lawak klasehanan ug sa pagkompleto sa usa ka buluhaton nga nagkinahanglan og mas dakong pisikal nga kalig-on kaysa sa anaa siya karon. Hisgoti kon unsaon sa pagpalambo ang kalig-on nga gikinahanglan aron magmalamposon niini nga buluhaton.

Sa mortalidad, kitang tanan nag-atubang og mga kahuyang. Usahay kini makapaluya. Niini nga leksiyon makakat-on ka mahitungod sa usa ka sumbanan nga gitudlo sa Ginoo ngadto kang Moroni nga makapahimo sa mga kahuyang ngadto sa mga kalig-on.

Ang mga kabalaka ni Moroni

Si Moroni gihatagan og buluhaton sa pagpamubo sa asoy sa mga Jaredite, ug siya nasayod nga kini nga asoy pagabasahon sa daghang mga tawo sa umaabot. Sa iyang pagtapos sa iyang pagpamubo, iyang girekord ang pipila sa iyang kataposang mga hunahuna ug gilakip ang iyang personal nga mga kabalaka ug mga nakapasamok kaniya mahitungod sa unsay gihangyo kaniya nga buhaton.

Basaha ang Ether 12:23–25, mangita sa unsay gikabalak-an ni Moroni.

• Unsa ang piho nga gikabalak-an ni Moroni?

Ikonsiderar ang paghisgot ug ang paglista isip usa ka klase sa pipila sa kasagaran nga mga kahuyang nga anaa sa mga tin-edyer. Mahimong mamalandong ang mga estudyante sa hilom ug irekord diha sa ilang mga journal sa pagtuon ang pipila sa ilang kaugalingon nga mga kahuyang nga gusto nilang mabuntog. Ipasabot nga ang mga estudyante dili mopakigbahin niining personal nga mga hunahuna ngadto sa klase.

Ang tubag sa Ginoo ngadto ni Moroni

Basaha ang Ether 12:26–27, mangita kon giunsa pagtubag sa Ginoo ang mga kabalaka ni Moroni.

Ang Ether 12:27 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Tabangi ang mga estudyante sa pag-analisar sa mga pamahayag sa bersikulo 27 nga nalista sa ubos. Mahimo nimong ipasulat diha sa pisara ang matag usa sa mga hugpong sa mga pulong sa nagkalainlaing mga kuwadrante. Mahimo nimong giyahan ang panaghisgotan isip usa ka klase gamit ang sulod [content] sa ubos.

Sa laing paagi, mahimo nimong bahinon ang mga estudyante ngadto sa gagmay nga mga grupo ug hatagi ang matag grupo og usa ka piraso nga papel. Ipabahin sa mga grupo ang ilang mga papel ngadto sa upat ka mga kwadro. Sa matag kwadro, mahimong irekord sa mga estudyante ang usa sa mga hugpong sa mga pulong gikan sa bersikulo 27. Dayon isip usa ka grupo, mahimong makamugna ang mga estudyante og mga pangutana nga makatabang nila nga masabtan ang matag hugpong sa mga pulong. Human sa pagrekord sa ilang mga pangutana, mahimo nilang bahinon ang mga hugpong sa mga pulong ug ang matag usa mangita og mga tubag sa mga pangutana nga ilang girekord.

“Kon ang mga tawo moduol ngari kanako, Ako mopakita ngadto kanila sa ilang kahuyang”

• Unsa sa imong hunahuna ang gipasabot sa pagduol ngadto kang Kristo?

Ang ubang mga tubag nga tingale mahatag sa mga estudyante mahimong ang paghimo ug pagtuman og mga pakigsaad uban ni Kristo ug pagpili sa pagsunod sa Iyang mga pagtulun-an ug ehemplo. Alang sa dugang nga tabang sa pagtubag niini nga pangutana, mahimo nimong idirekta ang mga estudyante sa artikulo nga “How to Come unto Christ [Unsaon Pagduol ngadto kang Kristo]” ni Elder Jeffrey R. Holland, nga makita sa ChurchofJesusChrist.org.

Timan-i nga ang Ginoo miingon nga Iyang ipakita kanato ang atong kahuyang kon kita moduol ngadto Kaniya.

• Ngano nga kini usa ka panalangin alang kanato?

Ang pulong nga kahuyang niini nga hugpong sa mga pulong nagpasabot sa atong napukan nga kahimtang, nga naglakip sa indibidwal nga “mahuyang nga mga butang” ug ang atong kawalay katakos nga mahimong hingpit.

• Unsa ang imong nakat-onan gikan sa Ether 12:27 mahitungod kon nganong gusto sa Manluluwas nga imong ilhon ang imong kahuyang?

Tabangi ang mga estudyante nga makasabot nga ang mapaubsanong pag-ila sa atong mga limitasyon ug mga kakulangan makadala kanato sa pagtawag sa atong Langitnong Amahan alang sa balaanong tabang. Pinaagi sa Iyang grasya nga ang Ginoo makahimo sa kahuyang ngadto sa kalig-on. (Tan-awa sa 2 Mga Taga-Corinto 12:6–10; Ether 12:37.)

Mahimo usab nimong ipakigbahin ang pamahayag ni Brother Douglas D. Holmes diha sa seksiyon sa “Komentaryo ug Background nga Impormasyon”.

Dapita ang mga estudyante sa hilom nga pagpamalandong kon bag-o lang gipakita sa Dios kanila ang ilang kahuyang. Ipaniguro kanila nga kini usa ka maayong timailhan nga sila moduol ngadto Kaniya.

“Ako mohatag ngadto sa mga tawo og kahuyang nga sila mahimo nga magpaubos”

Basaha ang pipila ka mga ehemplo sa mga indibidwal diha sa mga kasulatan kinsa miila sa ilang kahuyang:

• Ether 3:2: Ang igsoon nga lalaki ni Jared

• Mosiah 4:2: Ang katawhan ni Hari Benjamin

• Sa unsang paagi nga ang pag-ila sa ilang kahuyang nakatabang sa mga indibidwal niini nga mga asoy nga mahimong magpaubos?

• Ngano sa imong hunahuna nga gusto sa Ginoo nga kita magpaubos?

“Ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan”

• Unsa sa imong hunahuna ang gipasabot nga ang grasya sa Manluluwas igo na alang sa tanan kinsa magpaubos sa ilang kaugalingon sa Iyang atubangan?

Kon maglisod ang mga estudyante sa pagtubag sa miaging pangutana, ikonsiderar ang pagpakigbahin sa mosunod nga pamahayag ni Elder Kevin S. Hamilton.

Si Elder Kevin S. Hamilton sa Seventy mipasabot:

Ang [Jesukristo] nga makalig-on, makaabag nga grasya makahatag og gahom sa pagbuntog sa tanan nga mga babag, sa tanan nga mga hagit, ug sa tanan nga mga kahuyang samtang kita magtinguha nga mag-usab.

Ang Manluluwas mihimo sa Iyang walay kinutoban ug mahangtoron nga Pag-ula aron nga kita sa tinuod mausab, maghinulsol, ug mahimong mas maayo. Kita sa pagkatinuod mahimong matawo pag-usab. Kita makabuntog og mga kinaiya, mga adiksyon, ug gani sa “hilig sa pagbuhat og daotan” [Mosiah 5:2]. (Kevin S. Hamilton, “Niana Ako Mohimo sa Mahuyang nga mga Butang nga Mahimo nga Malig-on,” Liahona, Mayo 2022, 51–52)

Pamatikdi kon sa unsang paagi ang mga tawo ni Hari Benjamin nakasinati sa grasya sa Ginoo diha sa Mosiah 4:3.

• Kinsa pa diha sa mga kasulatan ang mipakita nga ang grasya sa Manluluwas igo na sa pagtabang kanato sa pagbuntog sa atong mga kahuyang?

Pipila sa mga ehemplo nga mahimong ipakigbahin sa mga estudyante mahimong si Alma (tan-awa sa Mosiah 27:24–29) ug ang mga anak nga lalaki ni Mosiah (tan-awa sa Mosiah 28:4).

“Kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila”

Gipasabot ni Elder Hamilton nga ang “mahuyang nga mga butang” niini nga bersikulo mahimong nagpasabot sa atong mga kinaiya nga mga kahuyang.

Ang atong napukan nga kinaiyahan, ang atong kahuyang, dayon kita makahimo sa pag-usab sa atong mga kinaiya, sa atong mga kahuyang. (Kevin S. Hamilton, “Niana Ako Mohimo sa Mahuyang nga mga Butang nga Mahimo nga Malig-on,” Liahona, Mayo 2022, 51)

Aron matabangan ang mga estudyante sa paghunahuna mahitungod sa unsay ilang nakat-onan karon, dapita sila sa pagbuhat sa usa o duha sa mosunod nga mga kalihokan diha sa ilang mga journal sa pagtuon.

1. Sa usa ka parapo nga dili moubos sa tulo ka mga kapahayag, irekord unsay imong nakat-onan ug gusto nimong hinumdoman gikan niini nga leksiyon.

2. Sa usa ka parapo nga dili moubos sa tulo ka mga kapahayag, ihulagway kon unsaon nimo paggamit ang imong nakat-onan karon.

Komentaryo ug Background nga Impormasyon

Ngano nga usa ka panalangin nga gipakita sa Dios kanako ang akong kahuyang?

Si Brother Douglas D. Holmes, kanhi magtatambag sa Kinatibuk-ang Kapangulohan sa Young Men, mipasabot:

[Ang pagtan-aw sa atong kaugalingon sa atong napukan nga kahimtang] tingali dili kaayo usa ka ganti ang pag-ila og maayo sa Dios. Dili ba kita gusto sa usa ka Dios nga naghimo kanato nga maayo ug nagpalig-on kanato? Oo, apan gusto ug gisimba usab nato ang usa ka Dios sa kamatuoran, usa ka Dios nga wala makiglabot sa ilusyon kondili sa tinuod, dili sa nindot nga mga butang kondili sa gahom ug himaya. Kita dili lang gusto nga makaila sa Dios, kita gusto nga mahisama Kaniya, ug hangtod nga atong makita ang atong mga kaugalingon kon unsa gayod kita, dili kita mahimo kon unsa Siya gayod. (Douglas D. Holmes, “The Doctrine of Christ: Our Daily Walk,” [debosyonal sa Brigham Young University, Ene. 17, 2017], 3, speeches.byu.edu)

Unsa kaha kon magpadayon ko sa paghimo sa samang mga sayop?

Si Elder Dale G. Renlund sa Korum sa Napulog Duha ka Apostoles mihatag og gibug-aton:

Bisan human sa sinsero nga paghinulsol, hinoon, kita mahimong makasala. Ang pagkasala wala magpasabot nga ang paghinulsol dili igo apan mahimong maghulagway sa tawhanong kahuyang. Makahupay kaayo nga masayod nga “ang Ginoo nagtan-aw sa mga kahuyang sa lahi nga paagi kay sa Iyang [pagtan-aw] sa pagsupak.” Kita kinahanglang dili magduha-duha sa abilidad sa Manlululwas sa pagtabang kanato sa atong kahuyang tungod kay “kon ang Ginoo maghisgot bahin sa mga kahuyang, kanunay inubanan kini sa kalooy” [Richard G. Scott, “Personal nga Kalig-on pinaagi sa Pag-ula ni Jesukristo,” Liahona, Nob. 2013, 83]. (Dale G. Renlund, “Ang Inyong Diosnong Kinaiya ug Mahangtorong Padulngan,” Liahona, Mayo 2022, 76)

Ang mosunod nga mga bidyo naghulagway sa mga indibidwal kinsa mihimo sa mga kahuyang ngadto sa kalig-on uban sa tabang sa Ginoo.

“Ang Mahuyang nga mga Butang Nahimong Lig-on” (1:32)

“Istorya ni Faith Murray: Pagbuntog sa Kalisdanan pinaagi sa Pag-alagad” (4:52)

“Wheelz: Posible ang Pagbuntog” (7:13)

“Uban sa Tibuok Nimo nga Kasingkasing” (3:26)

Dugang nga mga Kalihokan sa Pagkat-on

Ang mga panalangin sa pagduol ngadto kang Kristo

Sa tibuok mga kasulatan, atong makita ang pagdapit sa pagduol ngadto kang Kristo. Usa niini nga mga higayon anaa sa Ether 12:27. Kon ang mga estudyante makabenepisyo sa pagtan-aw sa ubang mga higayon niini nga pagdapit ug sa gisaad nga mga panalangin, mahimo nimong dapiton ang mga estudyante sa pagpangita diha sa mga kasulatan alang sa hugpong sa mga pulong nga “moduol ngadto kang Kristo” o “moduol ngari kanako” gamit ang mga tabang sa pagtuon sa kasulatan o ang Gospel Library nga app. Kon ilang makit-an ang mga pagdapit, ilang mahibaloan kon unsa nga mga panalangin ang moabot kon kita moduol kang Kristo. Pipila ka mga ehemplo nga mahimo nilang makaplagan naglakip sa Mateo 11:28–30 ug 3 Nephi 9:14–15. Samtang makit-an sa mga estudyante kini nga mga kasulatan, mahimo nimong ilista diha sa pisara ang mga panalangin ug dapita ang mga estudyante sa paghisgot kon sa unsang paagi gikinahanglan kini nga mga panalangin sa mga kinabuhi sa kabatan-onan karon.

Mga ehemplo sa pagkalig-on ni Kristo sa pagbuntog sa mga kahuyang

Si Moises ug Enoch duha ka ehemplo sa mga indibidwal kinsa mihimo sa ilang mga kahuyang ngadto sa kalig-on uban sa tabang sa Ginoo. Mahimong tun-an sa mga estudyante ang usa niini nga mga ehemplo sa katugbang nga tudling sa kasulatan. Samtang magtuon sila, dapita sila sa pagpamalandong kon unsay gitudlo niini nga mga asoy mahitungod sa gahom ug abilidad sa Manluluwas sa paghimo sa atong mga kahuyang ngadto sa mga kalig-on.

• Moises (Exodo 4:1, 10–12)

• Enoch (Moises 6:31–34)

Dasiga ang mga estudyante sa paghatag og dakong pagtagad sa mga tubag sa Manluluwas ngadto kanila ni Moises ug Enoch mahitungod sa ilang mga kahuyang. Mahimo dayon ka nga mangutana, “Unsa sa imong hunahuna ang isulti sa Manluluwas diha kanimo mahitungod sa imong mga kahuyang?”