Ether 12–15

Kinatibuk-ang Pagpasabot

Timan-i: Pipila sa mga materyal gikan sa Ether 12 gilakip sa miaging semana.

Samtang si Moroni mipadayon sa pagpamubo sa basahon ni Ether, siya nahadlok nga ang mga Hentil mobiaybiay sa iyang buhat tungod sa iyang kahuyang sa pagsulat. Mitubag ang Ginoo nga kon moduol kita diha Kaniya sa pagkamapainubsanon ug hugot nga pagtuo, Iyang himoon ang atong mga kahuyang ngadto sa mga kalig-on. Human makahibalo sa kalaglagan sa mga Jaredite ug makasaksi sa kalaglagan sa mga Nephite, si Moroni nangamuyo sa tanan niyang mga magbabasa sa pagtinguha kang Jesukristo ug sa mga panalangin nga Iyang ikatanyag.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang kinahanglan nga andamon daan alang sa matag leksiyon.

Ether 12:23–27

Katuyoan sa leksiyon: Kini nga leksiyon gituyo aron matabangan ang mga estudyante nga moduol kang Jesukristo aron mabuntog ang mga kahuyang pinaagi sa Iyang grasya.

• Pagpangandam sa estudyante: Dapita ang mga estudyante sa pagbasa sa Ether 12:27 ug sa paghunahuna og kahuyang sa ilang kinabuhi nga gusto nilang mabuntog pinaagi sa tabang sa Manluluwas.

• Mga materyal: Usa ka palid sa papel alang sa matag estudyante

Doktrinal nga Kahanas: Ether 12:27

Katuyoan sa leksiyon: Kini nga leksiyon makatabang sa mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Ether 12:27, mapasabot ang doktrina, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

• Pagpangandam sa estudyante: Dapita ang mga estudyante sa pagsulay sa pagsag-ulo sa Ether 12:27.

• Sulod nga ipakita: Ang seksiyon sa leksiyon ubos sa ulohan nga “Ang kabatan-onan mogahin og daghang oras diha sa ilang mga telepono”

• Sugyot sa pagtudlo pinaagi sa videoconference: Dapita ang mga estudyante sa pagtino kon kapila ka higayon nila mahimo nga ma-type ang pakisayran sa kasulatan ug ang mahinungdanon nga hugpong sa mga pulong sa kasulatan diha sa chat sulod sa 60 ka segundo. Seguroha nga nahibaloan nila nga kinahanglan nila nga i-type kini pag-usab sa matag higayon imbes nga i-copy ug i-paste. Dayon dapita sila sa pagsusi kon mahimo ba nila kining masulti og kusog gikan sa panumdoman.

Ether 12:28–41

Katuyoan sa leksiyon: Kini nga leksiyon makatabang sa mga estudyante nga mobati og mas dakong tinguha sa pagpangita ni Jesukristo diha sa ilang kaugalingong mga kinabuhi.

• Pagpangandam sa estudyante: Ikonsiderar ang paghatag sa mga estudyante og kopya sa kasinatian ni Elder Melvin J. Ballard nga nalakip niini nga leksiyon. Dapita sila sa pagtambong nga andam sa pagpakigbahin sa unsay ilang nakat-onan ug gibati mahitungod ni Jesukristo pinaagi sa pagbasa sa kasinatian ni Elder Ballard.

• Hulagway: Usa ka puwente [fountain]

• Bidyo: “Jesus Forgives Sins and Heals a Man Stricken with Palsy” (2:57)

• Sulod nga ipakita: Ang pamahayag gikan ni Elder Melvin J. Ballard

Ether 13–15

Katuyoan sa leksiyon: Kini nga leksiyon makatabang sa mga estudyante sa pagbuntog sa tintasyon sa paglihok diha sa kasuko sa tibuok nilang kinabuhi.

• Pagpangandam sa estudyante: Ikonsiderar ang pagdapit sa mga estudyante sa pagpamalandong kon unsay buot ipasabot nga si Jesukristo mao ang “Prinsipe sa Kalinaw” (Isaias 9:6) ug unsay buot ipasabot nga kita mahimong mga sumusunod Kaniya.

• Sulod nga ipakita: Ang mga instruksiyon alang sa opsiyon A, opsiyon B, o ang duha (kon tugotan ang mga estudyante sa pagpili tali kanila)

• Sugyot sa pagtudlo pinaagi sa videoconference: Kon tugotan nimo ang mga estudyante nga mopili tali sa opsiyon A ug sa opsiyon B, ikonsiderar ang paggamit og mga breakout room alang sa duha ka mga opsiyon. Paghatag og mga instruksiyon pinaagi sa email o diha sa chat sa dili pa mosulod ang mga estudyante sa ilang mga breakout room.

Sukda ang Imong Nakat-onan 9

Katuyoan sa leksiyon: Kini nga leksiyon makatabang sa mga estudyante sa paghinumdom ug sa pagtimbang-timbang kon sa unsang paagi ang ilang mga kasinatian sa Mormon 7–Ether 15 nakatabang kanila nga molambo sa espirituhanong paagi.

• Pagpangandam sa estudyante: Dapita ang mga estudyante sa pagrebyo sa unsay ilang nakat-onan pinaagi sa paghuman sa mosunod nga pamahayag: “Usa ka leksiyon gikan sa Mormon 7–Ether 15 nga gusto nakong ipakigbahin sa usa ka higala mao ang …”

• Hulagway: Mga singsing sa kahoy

• Mga materyal: Mga ginunting nga papel nga adunay mga ngalan sa mga dapit diin ang mga estudyante mahimong pagatawgon sa pag-alagad isip mga misyonaryo

• Leksiyon nga naggamit og butang: Usa ka loaf sa pan; usa ka panaksan aron gamiton sa pagsagol ug mga sangkap nga gikinahanglan sa paghimo og pan

• Sugyot sa pagtudlo pinaagi sa videoconference: Diha sa seksiyon sa leksiyon ubos sa ulohan nga “Pamalandongi ang mga plano sa pagpakita og hugot nga pagtuo kang Jesukristo,” ikonsiderar ang pagpatan-aw sa mga estudyante nga isagol nimo ang mga sangkap sa paghimo og pan. Agi og dugang, kon ang mga estudyante nagpuyo duol kanimo, mahimo nimo silang dapiton sa pag-adto sa imong balay unya niining adlawa aron makakuha og usa ka hiwa sa pan human kini maluto. Mahimo nimo silang hangyoon sa paghisgot mahitungod sa unsay ilang nakat-onan sa leksiyon samtang sila mokaon sa ilang hiniwa nga pan.