Doktrinal nga Kahanas: Ether 12:6

“Kamo Dili Makadawat og Saksi hangtod human sa Pagsulay sa Inyong Hugot nga Pagtuo”

Sa imong pagtuon sa Ether 12:1–22, ikaw nakakat-on kon unsaon paggamit sa hugot nga pagtuo kang Jesukristo ug sa Iyang ebanghelyo sa dili pa makadawat og usa ka espirituhanong saksi sa kamatuoran (tan-awa sa Ether 12:6). Kini nga leksiyon makatabang kanimo sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan sa Ether 12:6, mapasabot ang doktrina nga gitudlo niini nga tudling, ug magamit ang mga baroganan sa pag-angkon og espirituhanong kahibalo sa tinud-anay nga mga sitwasyon sa kinabuhi.

Dasiga ang mga estudyante sa paggamit sa mga baroganan sa pag-angkon og espirituhanong kahibalo.Samtang mahimong mas komportable ang mga estudyante sa paggamit sa mga baroganan sa pag-angkon og espirituhanong kahibalo, natural nga gamiton nila kini sa ilang mga pangutana. Mahimong makanunayon ug mamugnaon samtang imo silang dapiton sa pagrebyo sa mga baroganan sa nagkalainlaing mga paagi.

Pagpangandam sa estudyante: Dapita ang mga estudyante sa pagpangita og mga tudling sa kasulatan nga makatabang sa usa ka tawo sa pagpakita og hugot nga pagtuo kang Jesukristo. Aron makakita og mga kasulatan, mahimo nilang pangitaon ang hilisgotan sa “Hugot nga Pagtuo” diha sa Giya ngadto sa mga Kasulatan.

Mga Posibleng Kalihokan sa Pagkat-on

Kini nga leksiyon sa tudling sa doktrinal nga kahanas gidesinyo nga itudlo human sa leksiyon sa “Ether 12:1–22,” nga mao ang pangkonteksto nga leksiyon alang sa tudling sa doktrinal nga kahanas sa Ether 12:6. Kon kini nga leksiyon sa tudling sa doktrinal nga kahanas kinahanglang ibalhin ngadto sa laing semana, seguroha usab nga itudlo ang katugbang nga pangkonteksto nga leksiyon nianang semanaha.

Ipasabot ug isag-ulo

Sa miaging leksiyon, imong nakat-onan ang mosunod nga kamatuoran gikan sa Ether 12:6: Kon kita magtinguha og espirituhanong saksi, nan kinahanglan una kitang mopakita og hugot nga pagtuo kang Jesukristo ug sa Iyang ebanghelyo.

Ikonsiderar ang pagdapit sa mga estudyante nga magpraktis sa pagpasabot sa mga pagtulun-an sa Ether 12:6 ngadto sa usa ka pares. Mahimo kang magpakita og pangutana sama sa mosunod aron hisgotan sa mga estudyante.

• Unsa nga tambag ang gihatag sa Ether 12:6 niadtong adunay wala matubag nga mga pangutana o wala pa “makasabot” sa kamatuoran?

Tabangi ang mga estudyante sa pagsag-ulo sa pakisayran sa kasulatan ug sa mahinungdanon nga hugpong sa mga pulong sa kasulatan sa Ether 12:6. Ang mosunod mao ang usa ka paagi aron sa pagbuhat niini.

Si Presidente Ezra Taft Benson (1899–1994) mitudlo nga ang matag tawo dili makalikay nga moatubang sa paril sa hugot nga pagtuo ug dinha niana kinahanglan gayod mohimo og mga paghukom (tan-awa sa “The Book of Mormon Is the Word of God [Ang Basahon ni Mormon Mao ang Pulong sa Dios],” Ensign, Mayo 1975, 65). Sa laing pagkasulti, ang tanan kinahanglang mohukom sa ilang kaugalingon diha sa hugot nga pagtuo aron motuo, ug masayod, sa kamatuoran.

Pagdrowing og hulagway sa usa ka dako nga paril nga adunay stick figure sa imong kaugalingon nga nagbarog sa atubangan niini. Gamita ang “paril sa hugot nga pagtuo” sa pagtabang kanimo sa pagsag-ulo sa pakisayran sa Ether 12:6 ug sa mahinungdanon nga hugpong sa mga pulong sa kasulatan. Adornohi ang imong paril pinaagi sa pagsulat og “Ether 12:6” sa ibabaw, dayon isulat ang “kamo dili makadawat og saksi hangtod human sa pagsulay sa inyong hugot nga pagtuo” diha sa paril sa makadaghang mga higayon. Kon ang tanang luna sa imong paril napuno na sa mahinungdanon nga hugpong sa mga pulong sa kasulatan, sulayi sa pagsulti niini sa makusog sa pipila ka higayon nga dili motan-aw.

Pagpraktis sa paggamit

Sa dili pa sugdan ang kalihokan sa pagbansay sa paggamit, paghunahuna og mamugnaong mga paagi sa pagsuporta sa mga estudyante sa pagkat-on ug sa pagrebyo sa mga baroganan sa pag-angkon og espirituhanong kahibalo. Ang pagbuhat sa ingon kanunay makatabang kanila nga mahimong mas malamposon sa pagkahibalo kon unsaon sa paggamit niini nga mga baroganan.

Usa ka paagi sa pagbuhat niini mao ang pagsulat sa tanang tulo ka mga baroganan sa pag-angkon og espirituhanong kahibalo diha sa pisara. Dayon pagsulat og mga ideya o mga konsepto gikan sa matag baroganan sa sinulagma nga pagkasunod-sunod ug dapita ang mga estudyante sa pagpares sa mga ideya sa sakto nga mga baroganan.

Ipakigbahin ang mosunod nga senaryo sa mga estudyante o paghunahuna og imong kaugalingong senaryo nga makatuman sa samang katuyoan.

Si Christiana ug Niceta suod nga managhigala. Si Christiana miyembro sa Ang Simbahan ni Jesukristo sa mga Santos sa Ulahing mga Adlaw. Naningkamot siya pag-ayo nga mahimong maayong ehemplo ngadto ni Niceta, kinsa dili motuo sa organisadong relihiyon. Si Niceta sagad mokwestiyon sa mga pagtuo ni Christiana ug matingala kon nganong siya mosimba sa Dominggo, mobayad sa ikapulo, mosunod sa Pulong sa Kaalam, ug mopili nga magsinina og tarong o desente.

Si Christiana mipasabot ngadto kang Niceta nga iyang gibati nga ang mga sugo ug mga sumbanan nga iyang gipuy-an tinuod ug gipadala gikan sa Dios. Si Niceta mabinationg mitubag, “Nganong nakaingon man ka nga nahibalo ka nga kining mga butanga tinuod? Giunsa nimo pagkahibalo nga ang bisan unsang butang nga dili nimo makita tinuod?”

Ikonsiderar ang pagbahin sa mga estudyante ngadto sa gagmay nga mga grupo ug dapita sila sa paghisgot kon unsaon nila sa paggamit ang mga baroganan sa pag-angkon og espirituhanong kahibalo ug ang Ether 12:6 niini nga sitwasyon. Pahinumdomi ang mga estudyante nga ang mga senaryo sa pagbansay paggamit sa doktrinal nga kahanas gidisenyo aron sa paghatag kanila og mga kahigayonan sa pagpraktis sa paggamit sa mga baroganan sa pag-angkon og espirituhanong kahibalo. Ang ilang mga ideya ug mga tubag dili kinahanglan nga maayo kaayo o perpekto.

Mahimo nimong dapiton ang mga estudyante sa pagsugod sa ilang diskusyon pinaagi sa pagpangutana sa, “Hain sa mga baroganan sa pag-angkon og espirituhanong kahibalo ang imong sugdan sa paggamit aron matabangan ang imong higala? Ngano man?” Ang mosunod nga mga pangutana makatabang usab sa mga estudyante nga hisgotan atol sa ilang diskusyon.

Susihon ang mga konsepto ug mga pangutana inubanan sa mahangtorong panglantaw

• Unsa nga mga konsepto o mga kamatuoran ang gusto nimo nga matabangan si Niceta nga mas makasabot? Ngano man?

• Unsa ang mahimo nimong ipakigbahin kang Niceta mahitungod sa Ginoo ug sa unsang paagi Siya molihok uban kanato?

Tinguhaa ang dugang nga panabot pinaagi sa balaanong gitudlo nga mga tinubdan

• Unsa nga mga pagtulun-an gikan sa Ether 12:6 ang tingali makatabang niini nga sitwasyon? Ngano man?

  Kon ang mga estudyante makabenepisyo sa pagsabot sa may kalabotan nga pamahayag gikan sa usa ka lider sa Simbahan isip ehemplo, ikonsiderar ang pagpakigbahin sa pamahayag ni Sister Bonnie L. Oscarson gikan sa “Komentaryo ug Background nga Impormasyon” nga seksiyon sa miaging leksiyon.

• Unsa ang pipila ka dugang nga mga tudling sa kasulatan o mga pamahayag gikan sa mga lider sa Simbahan ang makahatag og tabang ug giya alang kang Niceta?

Lihokon inubanan sa hugot nga pagtuo

• Unsa nga mga kasinatian ang imong nasinati o nasinati sa uban sa pagpakita og hugot nga pagtuo kang Jesukristo? Sa unsang paagi nga ang pagpakigbahin niini kang Niceta makatabang sa pagdasig kaniya sa paglihok diha sa hugot nga pagtuo?

• Unsa nga matinud-anon nga mga buhat ang imong irekomendar kang Niceta nga sugdan sa pagbuhat?

Kon mahuman na ang mga estudyante sa ilang mga diskusyon, ikonsiderar ang pagdapit og pipila sa pagpakigbahin kon giunsa nila pagtubag ug unsay ilang nakat-onan gikan sa kasinatian.

Ikonsiderar usab ang paghisgot ngadto sa mga estudyante kon sa unsang paagi kini nga kalihokan mahimong makabenepisyo kanila karon ug sa umaabot. Pananglitan, mahimo nimong dapiton ang mga estudyante sa paghunahuna sa kasamtangan o sa umaabot nga mga sitwasyon diin ang mga pagtulun-an sa Ether 12:6 ug ang mga baroganan sa pag-angkon og espirituhanong kahibalo mahimong makatabang kanila o sa uban sa paglatas sa pagsulay sa hugot nga pagtuo ug sa kataposan makadawat og usa ka pagpamatuod nga saksi sa kamatuoran.

Rebyo sa doktrinal nga kahanas

Atol sa umaabot nga leksiyon, pagdrowing diha sa pisara og hulagway sa usa ka paril nga adunay stick figure nga nagbarog sa atubangan niini. Dapita ang mga estudyante sa paghinumdom kon hain nga pakisayran sa doktrinal nga kahanas ang may kalabotan sa drowing (Ether 12:6), ug dasiga sila sa pagpraktis sa pagsag-ulo sa mahinungdanon nga hugpong sa mga pulong sa kasulatan ngadto sa usa ka pares. Ang mahinungdanon nga hugpong sa mga pulong sa kasulatan mao ang “Kamo dili makadawat og saksi hangtod human sa pagsulay sa inyong hugot nga pagtuo.”