Ether 7–11

“Sa Pagkatinuod Kini nga Butang Modala ngadto sa Pagkabihag”

Tungod kay ang Dios nahigugma kanato, Siya mitawag og mga propeta sa pagpasidaan kanato sa daotan ug sa pag-awhag kanato sa pagsunod sa mga sugo. Ang mga Jaredite wala mopatalinghog sa usa ka pasidaan gikan sa igsoon nga lalaki ni Jared, ug kini miresulta sa malisod nga mga sangpotanan sa daghang mga henerasyon. Kini nga leksiyon makatabang kanimo nga mobati sa kamahinungdanon sa pagsunod sa mga propeta sa Ginoo.

Itudlo ang mga pulong sa mga propeta nga adunay pagtuo ug katuyoan. Ang kabubut-on ug mga katuyoan sa Ginoo gipahibalo pinaagi sa Iyang mga propeta. Tabangi ang mga estudyante sa pag-ila nga makasalig sila sa propetikanhong mga pagtulun-an alang sa direksiyon ug proteksiyon, narekord man diha sa mga kasulatan o gipamulong karon.

Pagpangandam sa estudyante: Dapita ang mga estudyante sa pagtambong nga andam sa pagpakigbahin sa pipila ka propetikanhong tambag o mga pasidaan nga atong nadawat sa atong panahon. Makakita sila og mga ehemplo diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022) o sa bag-ong mga pakigpulong sa kinatibuk-ang komperensiya.

Mga Posibleng Kalihokan sa Pagkat-on

Pagkabihag

Ikonsiderar ang pagpakita sa mosunod nga hulagway o pagdrowing og yano nga selda sa prisohan diha sa pisara.

Tan-awa ang mosunod nga hulagway. Unsa kaha ang gihunahuna o gibati niining tawhana?

Ikonsiderar kon unsa ang nangaging mga pagpili nga hinay-hinay nga misangpot niini nga mga kahimtang ug kon nganong kining tawhana mihimo niadtong mga pagpili.

Ang pag-apil sa makasasala nga binuhatan makadala sa mga tawo ngadto sa espirituhanon ug pisikal nga pagkabihag.

Karong adlawa magtuon ka og asoy nga makatabang kanimo nga makasabot sa importante nga paagi sa paglikay sa espirituhanong pagkabihag. Samtang magtuon ka, hatagi og pagtagad ang mga pag-aghat sa Espiritu nga makatabang kanimo nga makasabot kon unsaon sa paggamit ang unsay imong nakat-onan sa imong kaugalingong kinabuhi.

“Sa pagkatinuod kini nga butang modala ngadto sa pagkabihag”

Human maabot ang mga Jaredite sa gisaad nga yuta, sila matinud-anon nga mialagad sa Ginoo ug misanay ug milig-on diha sa yuta (tan-awa sa Ether 6:17–18). Sa dihang si Jared ug ang iyang igsoon nga lalaki nagkaduol sa kataposan sa ilang mga kinabuhi, ilang gipundok ang ilang mga katawhan aron makigsulti kanila.

Basaha ang Ether 6:19–23, mangita sa unsay gitinguha sa mga tawo.

• Unsa nga pasidaan ang gihatag sa igsoon nga lalaki ni Jared ngadto sa mga tawo sa bersikulo 23?

Ikonsiderar ang pagdapit sa mga estudyante sa pagpakigbahin kon sa unsang paagi kaha unta sila mitubag kon sila anaa pa niini nga sitwasyon. Mahimo nimo silang dapiton sa paghunahuna kon sa unsang paagi ang ilang kahibalo sa Dios ug sa Iyang mga propeta makaimpluwensiya unta sa ilang desisyon. Ang ilang mga tubag makapalig-on sa hugot nga pagtuo ug pagpamatuod diha sa Dios ug sa Iyang mga propeta.

Mga pasidaan nga natuman

Bisan pa man sa pasidaan sa igsoon nga lalaki ni Jared, ang mga tawo mipili gihapon nga magbaton og hari. Human mibalibad ang pipila sa ilang mga anak nga lalaki, ang anak nga lalaki ni Jared nga si Orihah sa kataposan miuyon nga mahimong hari ug mihari sa pagkamatarong sa tibuok niyang kinabuhi (tan-awa sa Ether 6:24–29; 7:1). Bisan pa man, ang panagna sa igsoon nga lalaki ni Jared nga ang pagbaton og hari modala ngadto sa pagkabihag natuman sa makadaghang higayon sa tibuok kasaysayan sa mga Jaredite.

Basaha ang mosunod nga mga tudling, mangita sa mga pananglitan kon sa unsang paagi natuman ang panagna sa igsoon nga lalaki ni Jared. Mahimo nimo kining ilista nga mga pakisayran diha sa imong mga kasulatan tapad sa Ether 6:23.

Pagdapit og mga estudyante nga buot magpuli-puli sa pagbasa og kusog sa pipila o sa tanan sa mosunod nga mga bersikulo. Kon imong pilion nga dili basahon ang tanang mga bersikulo, seguroha nga dili molaktaw sa Ether 7:1–5, nga pihong namahayag nga ang panagna sa igsoon nga lalaki ni Jared natuman (tan-awa sa Ether 7:5). Mahimo usab nga mapuslanon ang pagbasa sa Ether 11:20–23, nga mipaila ni propeta Ether.

• Ether 7:1–5

• Ether 7:15–17

• Ether 8:2–3

• Ether 9:28–32

• Ether 10:13–15

• Ether 10:29–31

• Ether 11:1–7

• Ether 11:20–23

• Unsay mipatigbabaw diha kanimo niini nga mga bersikulo?

• Unsa nga kamatuoran ang atong makat-onan gikan niini nga asoy mahitungod sa mga sangpotanan sa pagsalikway sa mga propeta sa Ginoo?

Usa ka kamatuoran nga atong makat-onan gikan niini nga asoy mao nga ang pagsalikway sa mga propeta sa Ginoo mahimong mosangpot sa pagkabihag.

• Unsa ang pipila ka mga pananglitan kon sa unsang paagi ang usa ka tawo makasinati og pagkabihag pinaagi sa pagbaliwala o pagsalikway sa mga propeta sa Ginoo?

  Kon ang mga estudyante nagkinahanglan og tabang sa miaging pangutana, ikonsiderar ang pagpakigbahin og pipila ka mga pananglitan, sama sa posibilidad nga ang pagsupak sa Pulong sa Kaalam o pagtan-aw og pornograpiya mahimong mosangpot sa pagkabihag sa pagkaadik. Seguroa nga masabtan sa mga estudyante nga ang tanang matang sa sala makapakunhod sa gahom sa Balaang Espiritu sa atong mga kinabuhi.

• Ngano kaha sa imong hunahuna nga ang mga tawo mopili sa pagbalewala sa tambag ug mga pasidaan nga gihatag sa Ginoo pinaagi sa Iyang mga propeta?

Modernong adlaw nga tambag gikan sa mga propeta sa Ginoo

Tabangi ang mga estudyante nga makasabot kon sa unsang paagi kini nga kamatuoran magamit gihapon karon. Ang mosunod nga kalihokan usa ka paagi aron mabuhat kini.

Pangita og tambag o mga pasidaan gikan sa modernong adlaw nga mga propeta ug apostoles. Mahimong gikan kini sa Alang sa Kalig-on sa mga Kabatan-onan (booklet, 2022), o gikan sa bag-o lang nga mga pakigpulong sa kinatibuk-ang komperensiya. Tan-awa kon makakita ka ba og piho nga mga pulong o mga hugpong sa mga pulong nga naghulagway kon sa unsang paagi kita mapanalanginan samtang kita mosunod niini nga tambag, ingon man usab sa mga sangpotanan nga atong masinati sa dili pagtagad niini.

Mahimong makatabang ang pagbutang sa mga estudyante ngadto sa gagmay nga mga grupo ug sa pag-assign sa matag grupo og nagkalainlaing hilisgotan gikan sa Alang sa Kalig-on sa mga Kabatan-onan (booklet, 2022) aron tun-an samtang ilang kompletohon kini nga kalihokan. Ikonsiderar ang pagpakita sa mosunod nga mga pangutana. Hatagi ang mga estudyante og igong panahon sa paghisgot sa ilang mga tubag uban sa ilang mga grupo.

• Unsa nga mga pasidaan o tambag ang imong nakaplagan?

• Unsa ang pipila ka mga paagi nga ang Ginoo mopanalangin kanato samtang kita mosunod niini nga tambag?

• Sa unsang paagi nga ang pagbalewala niini nga tambag o kini nga mga pasidaan makadala sa usa ka tawo ngadto sa pagkabihag?

Kon mahuman na ang mga estudyante, dapita sila sa pagpakigbahin sa pipila sa ilang mga panabot ngadto sa klase.

Mahimong makatabang nga ipakigbahin sa mga estudyante ang mga tubag nga ilang nakaplagan sa mga pangutana nga gilista sa ibabaw. Sama pananglit, ang mga estudyante nga nagtuon sa tambag gikan sa “Magkinabuhi sa Kahayag sa Dios” nga seksiyon sa Alang sa Kalig-on sa mga Kabatan-onan mahimong maghisgot nga ang unsay atong gitan-aw, gibasa, gipaminaw, o giapilan makadapit og maayong mga hunahuna o makapawala sa atong pagkasensitibo sa Espiritu. (tan-awa sa Alang sa Kalig-on sa mga Kabatan-onan [booklet, 2022], 16).

Paggamit niini diha sa imong kinabuhi

Hunahunaa kon giunsa nimo pagtubag ang tambag ug mga pasidaan sa mga propeta sa Ginoo, mga panalangin nga imong nadawat sa pagsunod kanila, ug tambag nga tingali kinahanglan nimong sundon nga mas matinud-anon.

Ikonsiderar ang pagdapit sa mga estudyante sa pagpakigbahin og mga ehemplo kon sa unsang paagi sila gipanalanginan sa Ginoo samtang ilang gisunod ang Iyang tambag pinaagi sa Iyang mga propeta. Mahimo ka usab mopakigbahin og usa ka personal nga kasinatian.

Ang mosunod makatabang sa mga estudyante kinsa mahimong mibati nga nawad-an og kadasig tungod sa pagkabihag nga ilang nasinati isip resulta sa pagbalewala sa tambag gikan sa mga propeta sa Ginoo. Ikonsiderar ang pagbasa sa Mosiah 7:33 isip usa ka klase.

Ang uban mahimong mawad-an og kadasig kon makasinati sila og mga sangpotanan sa pagbalewala sa tambag ug mga pasidaan sa Ginoo pinaagi sa Iyang mga propeta. Apan bisan kon kita nakahimo og mga sayop, ang Manluluwas makaluwas kanato gikan sa atong pagkabihag kon kita modangop ngadto Kaniya. Sama pananglit, basaha ang Ether 7:25–27, ug tan-awa unsay nahitabo sa dihang ang mga tawo naghinulsol ug mibalik ngadto sa Dios.

• Unsa ang gitudlo niini nga tudling diha kanimo mahitungod sa Ginoo? (tan-awa usab sa Mosiah 7:33).

Aron makakita og ehemplo kon sa unsang paagi ang usa ka tawo nakasinati sa kaluwasan sa Ginoo human makasinati og espirituhanong pagkabihag, ikonsiderar ang pagtan-aw sa “Ang Diha-diha nga Kaayo sa Dios,” nga makita sa ChurchofJesusChrist.org, gikan sa time code 3:37 hangtod sa 6:33.

Pagpamatuod sa mga kamatuoran nga gihisgotan karon ug awhaga ang mga estudyante sa paglihok sa ilang espirituhanong mga impresyon.

Komentaryo ug Background nga Impormasyon

Ngano nga gikinahanglan kitang mopatalinghog sa mga pulong sa mga propeta?

Si Elder Neil L. Andersen sa Korum sa Napulog Duha ka Apostoles mitudlo:

Nganong andam man kaayo kitang mosunod sa tingog sa atong propeta? Alang niadtong makugihong nagtinguha og kinabuhing dayon, ang tingog sa propeta nagdala og espiritwal nga kaluwasan sa gubot kaayo nga panahon. …

Ang pag-angkla sa atong kalag ngadto kang Ginoong Jesukristo nagkinahanglan nga maminaw ngadto niadtong Iyang gipadala. Ang pagsunod sa propeta niining gubot nga kalibotan susama sa giputos sa usa ka komportable, init nga habol sa usa ka labihan ka tugnaw nga adlaw. (Neil L. Andersen, “Ang Propeta sa Dios,” Liahona, Mayo 2018, 26)

Tan-awa ang “Pagpaluyo sa mga Propeta” gikan sa time code 3:30 hangtod sa 5:49 aron makakita ni Presidente Russell M. Nelson nga mipakigbahin og importante nga mga kamatuoran nga makatabang kanato nga makasabot kon nganong ang pagpaminaw sa mga propeta hilabihan ka importante.

Sa unsang paagi nga ang pagbalewala sa propetekanhong mga pasidaan mosangpot sa pagkabihag?

Si Elder Quentin L. Cook sa Korum sa Napulog Duha ka Apostoles mitudlo:

Gusto sa Dios nga ang tawo mahimong gawasnon sa pagpili tali sa maayo ug sa daotan. Kon ang daotan nga pagpili nahimong kinaiya nga nagpasulabi sa usa ka kultura o nasod, adunay grabeng mga sangpotanan niini nga kinabuhi ug sa umaabot nga kinabuhi. Ang mga tawo mahigot o maulipon dili lamang ngadto sa makadaot, makaadik nga drugas apan ngadto usab sa makadaot, makaadik nga mga pilosopiya nga makaguba sa matarong nga pagpuyo.

Ang pagbiya sa pagsimba sa tinuod ug buhi nga Dios ug ang pagsimba sa mga dios-dios sama sa bahandi ug kabantog ug ang pag-apil sa imoral ug daotang buhat ang moresulta sa pagkaulipon diha sa tanang makuyaw nga epekto niini. Naglakip kini sa espiritwal, pisikal, ug intelektwal nga pagkaulipon ug usahay magdala og kalaglagan. (Quentin L. Cook, “Mga Lamentaciones ni Jeremias: Pagbantay sa Pagkaulipon,” Liahona, Nob. 2013, 88–89)

Dugang nga mga Kalihokan sa Pagkat-on

Ang liyok sa garbo

Tingali nakakat-on na ang mga estudyante kaniadto mahitungod sa usa ka sumbanan nga usahay gitawag og “ang liyok sa garbo” nga makita sa tibuok mga kasulatan. Kini nga sumbanan naglakip sa mosunod nga mga lakang:

1. Pagkamapahitas-on ug pagkadaotan ug pagkahikalimot sa Ginoo

2. Pagsinati sa pag-antos ug kalaglagan

3. Paghinumdom sa Ginoo, pagkamapainubsanon, ug paghinulsol

4. Pagkamatarong ug pagsinati sa kauswagan

Ikonsiderar ang pagdapit sa mga estudyante sa pagtuon sa mosunod nga mga kasulatan, mangita niini nga sumbanan taliwala sa mga Jaredite:

• Ether 7:23–27

• Ether 9:26–35; 10:1–2

• Ether 10:5–7, 15–19, 28, 30–34; 11:1–8

Human sa pagtuon niini nga mga bersikulo, mahimo nimong hisgotan kon sa unsang paagi kini nga liyok may kalabotan kanato. Ikonsiderar ang pagdapit sa mga estudyante sa pagtimbang-timbang sa ilang mga kaugalingon pinaagi sa paghunahuna kon hain nga bahin niini nga liyok sila mahimong nahimutang ug kon unsay ilang mahimo aron makanunayon nga magmapainubsanon ug mahinumdom sa Ginoo.

Ether 9:14–22. Ang mga panalangin sa pagpuyo nga matarong

Bisan og kadaghanan sa kasaysayan sa Jaredite napuno sa kadaotan, adunay mga higayon nga ang mga tawo nakasinati og dagkong mga panalangin tungod sa ilang pagkamatarong.

Ikonsiderar ang pagdapit sa mga estudyante sa pagtuon mahitungod sa usa ka ingon niana ka matarong nga panahon, nga gipangulohan sa usa ka tawo nga ginganlan og Emer. Mahimong basahon sa mga estudyante ang Ether 9:14–22, mangita sa mga panalangin nga nasinati ni Emer ug sa iyang katawhan samtang nagsunod sila sa Ginoo.

Mahimong makatabang sa mga estudyante nga i-cross-reference kini nga mga bersikulo ngadto sa Mosiah 2:41 o ubang mga kasulatan nga naghisgot sa mga panalangin sa pagpuyo nga matarong. Dapita ang mga estudyante sa pagpakigbahin og mga ehemplo kon sa unsang paagi sila gipanalanginan sa Ginoo samtang sila naningkamot sa pagtuman sa Iyang mga sugo.